အမျိုးသားညီညွတ်ရေးအစိုးရ (NUG)၊ ပညာရေးဝန်ကြီးဌာနက အသိအမှတ်ပြုထားတဲ့ ကြားကာလ အခြေခံပညာ ပြည်သူ့ပညာရေးကျောင်းတွေကို ဇန်နဝါရီ ၂၃ ရက်က ထုတ်ပြန်လိုက်ပါတယ်။

ပညာသင်ယူခွင့်ဆုံးရှုံးနေတဲ့ ကျောင်းသား၊ ကျောင်းသူတွေအတွက် ကြားကာလ ပြည်သူ့ပညာရေးကျောင်းတွေ ဖွင့်လှစ်ကာ စဥ်ဆက်မပြတ် ပညာသင်ကြားရေးကို အကောင်အထည်ဖော် ဆောင်ရွက်နေတယ်လို့လည်း အဲဒီထုတ်ပြန်ချက်မှာ ဖော်ပြထားပါတယ်။

NUG အသိအမှတ်ပြု ကြားကာလပညာရေးကျောင်းတကျောင်းရဲ့ တာဝန်ခံက “ကျနော်တို့က NUG ချမှတ်ထားတဲ့ မူဝါဒ ၁၁ ချက်ရယ် လုံခြုံရေးစည်းမျဥ်းတွေကို လိုက်နာမှ အသိအမှတ်ပြုတာပါ။ အခုထုတ်ပြန်တာက ၃၃ ကျောင်းပဲ ထုတ်ပြန်တာ။ တချို့ကျောင်းတွေက လုံခြုံရေးအရ ထုတ်ပြန်ဖို ကန့်ကွက်ထားတာတွေရှိတယ်” လို့ ဒီဗွီဘီကို ပြောပါတယ်။

ကြားကာလ ပညာရေးကျောင်းတက်နေတဲ့ ကျောင်းသားမိဘတဦးကလည်း “ကျမတို့ကတော့ စစ်ကောင်စီအုပ်ချုပ်သမျှ ကာလပတ်လုံး လုံးဝ ကျောင်းမထားဘူးလို ဆုံးဖြတ်ပြီးသားပါ။ ခုလို ပြည်သူ့ပညာရေးကျောင်းလေးတွေ ရှိနေတော့ ဆုံးဖြတ်ချက်က ပိုတောင် သေချာသွားသေးတယ်” လို့ ပြောပါတယ်။

စစ်အာဏာသိမ်းပြီးတဲ့နောက် CDM ဆရာ၊ ဆရာမတွေ ဦးဆောင်တဲ့ အွန်လိုင်း ကြားကာလ အခြေခံပြည်သူ့ပညာရေးကျောင်းပေါင်း ၇၀ ကျော်ရှိနေပြီး လွတ်မြောက်နယ်မြေတွေ၊ စစ်ကိုင်းနဲ့ မကွေးနယ်မြေတွေမှာတော့ မြေပြင်မှာ ဖွင့်လှစ်သင်ကြားနေတဲ့ ကျောင်းတွေ အများအပြားရှိနေတယ်လို့ NUG ပညာရေးဝန်ကြီးဌာနနဲ့ နီးစပ်သူတွေဆီက သိရပါတယ်။

တော်လှန်ရေးကြားကာလ ပညာသင်ကြားရေးကျောင်းတခုရဲ့ ကျောင်းသားစာရင်းတချို့ ပေါက်ကြားသွားခဲ့ပြီးနောက် ကျောင်းကို အရေးပေါ်ပိတ်ထားလိုက်ရပါတယ်။ 

Interim Basic Education School – Thingangyun (IBEST) ရဲ့ ကျောင်းသားစာရင်း အချက်အလက်တချို့ကို စစ်ကောင်စီဝါဒဖြန့် တယ်လီဂရမ်အုပ်စုမှာ နိုဝင်ဘာ ၂၃ ရက်က ဖော်ပြတိုက်ခိုက်ခံခဲ့ရတာ ဖြစ်ပါတယ်။

ဒီအခြေအနေကြောင့် အရေးပေါ်လုံခြုံရေးအစီအစဉ်တွေလုပ်ပြီး အတတ်နိုင်ဆုံး လုံခြုံရေးအဆင့်မြှင့်တင်ခဲ့သလို ကျောင်းသားကျောင်းသူတွေ၊ ဆရာဆရာမ တွေကိုလည်း လုံခြုံရေးဆိုင်ရာ သတိပေးချက်တွေ အချိန်နဲ့တပြေးညီ ထုတ်ပြန်နေပြီး အန္တရာယ်ကင်းရှင်းစေဖို့ လုပ်နေတယ်လို့ IBEST SCHOOL က ထုတ်ပြန်ထားပါတယ်။

IBEST SCHOOL ရဲ့ အတန်းတွေအားလုံးကိုလည်း အရေးပေါ်အခြေအနေအရ ပိတ်ထားလိုက်ပြီး အခုဖြစ်စဉ်နဲ့ပတ်သက်လို့ ကျောင်းကြီးကြပ်ရေးကော်မတီအနေနဲ့ တာဝန်ယူ တာဝန်ခံမှုအပြည့်နဲ့ ဆောင်ရွက်နေသလို အမျိုးသားညီညွတ်ရေးအစိုးရ၊ ပညာရေးဝန်ကြီးဌာနဆီကိုလည်း အသေးစိတ် အစီရင်ခံစာတင်ပြထားတယ်လို့ ဆိုပါတယ်။ 

ပြီးတော့ မြို့နယ်အဆင့် သက်ဆိုင်ရာအစုအဖွဲ့တွေနဲ့ ချိတ်ဆက်ပူးပေါင်းပြီး စုံစမ်းစစ်ဆေးတာနဲ့ အရေးပေါ်လုပ်စရာရှိတာတွေကို အထူးကြိုးပမ်းနေတယ်လို့လည်း ဆိုပါတယ်။ 

ကျောင်းရဲ့ စစ်ဆေးချက်တွေအရတော့ စစ်အုပ်စုရဲ့တယ်လီဂရမ်မှာ ဖော်ပြခဲ့တာက IBEST SCHOOL ရဲ့ ၂၀၂၂ ခုနှစ်၊ ဇွန်လမှာ အတန်းလိုက် သက်ဆိုင်ရာ ကျောင်းသားကုဒ်နံပါတ်တွေ မပေးခင်အချိန်က Batch-1 G10 section B Group မှာ ကျောင်းသားစာရင်းကို အတည်ပြုချပြခဲ့တဲ့ အချက်အလက်တွေဖြစ်တာကို တွေ့ရတယ်လို့ ဆိုပါတယ်။ 

အဲဒါကို စကရင်ရှော့လုပ်ထားခဲ့တာဖြစ်ပြီး တချို့ကျောင်းသားကျောင်းသူတွေဟာ ကျောင်းထွက်ထားသူတွေဖြစ်တယ်လို့လည်း ကျောင်းက ဆိုပါတယ်။ 

၂၀၂၂ ခုနှစ် ဇူလိုင်မှာတော့ အတန်းအသီးသီးက တယ်လီဂရမ်အုပ်စုတွေအစား လုံခြုံရေးမြှင့်တင်ပြီး တယ်လီဂရမ်ချန်နယ်အဖြစ်ပြောင်းလဲခဲ့ပြီး ဖြစ်တယ်လို့လည်း ဆိုပါတယ်။

ပြီးခဲ့တဲ့ ဇူလိုင်လကလည်း Kaung For You Education အွန်လိုင်းပညာသင်ကျောင်း တည်ထောင်သူ ဆရာကောင်းသိုက်စိုးနဲ့ ဆရာ၊ ဆရာမတချို့အဖမ်းခံရတဲ့သတင်းနဲ့   အချက်အလက်တွေ ပေါက်ကြားတယ်ခဲ့တယ်ဆိုတဲ့ သတင်းတွေထွက်ပေါ်ခဲ့ပြီး လုံခြုံရေးအရ ကျောင်းကို ရပ်နားထားခဲ့ရတယ်။