ရှမ်းပြည်နယ်အရှေ့ပိုင်း၊ မိုင်းဖြတ်မြို့နယ်၊ တာချီလိတ်-ကျိုင်းတုံသွားလမ်းမ၊ မိုင်တိုင်အမှတ် ၆၈၈/၆၈၉ ကြား၊ ဆွတ်ပလောင်းရွာနဲ့ တာကျောက်ရွာအနီးရှိ နမ့်လုံချောင်းထဲကို ဧပြီ ၂၀ ရက်၊ ညနေပိုင်းက ခရီးသည်တင် တိုယိုတာဟိုင်းအေ့စ် အဖြူရောင်ယာဉ်တစီး  ထိုးကျခဲ့တယ်လို့ မြို့ခံကယ်ဆယ်ရေးအသင်းတွေက ပြောပါတယ်။

ချောင်းထဲပြုတ်ကျခဲ့တာကြောင့် ကားပေါ်ပါ ၂၅ ဦးအနက် အသက် ၂၀ ကျော် အမျိုးသား ၂ ဦးနဲ့ အမျိုးသမီး ၁ ဦး သေဆုံးခဲ့ပြီး ကလေးငယ် ၄ ဦး အပါအဝင် လူ ၂၂ ဦး ထိခိုက်ဒဏ်ရာ ရရှိခဲ့ပါတယ်။

အဆိုပါယာဉ်ပေါ်ရှိ လူတွေဟာ ထိုင်းနိုင်ငံကနေ ပြန်လာကြတာလို့ စုံစမ်းသိရှိရပြီး တာချီလိတ်ကနေ ကျိုင်းတုံသွားလမ်းမှာ အခုလို ဖြစ်ပွားခဲ့တာပါ။

မြို့ခံကယ်ဆယ်ရေးအသင်းက“ရွာသားတယောက်က ဖုန်းဆက်လာတာ၊ ကားတစီးက ပြုတ်ကျလာတယ်တဲ့။ ဟိုရောက်တော့ အကုန်လုံးကယ်ထုတ်ပြီး Deadbody ၃ ခု ထွက်ပါတယ်။ ကားသမားကိုတော့ စိုးရိမ်ရလို့ ကျိုင်းတုံဆေးရုံကြီး ပို့ထားတယ်။ ကားကတော့ ၁၂ ယောက်စီး၊ ၁၃ ယောက်စီးကားပေါ့။ လိုင်းတွေဘာတွေ ဝင်ထားတဲ့ ကားတော့ မဟုတ်ပါဘူး။ ခရီးသည်တွေက နယ်ပြန်ဖို့ကို ကားသမားနဲ့ ချိတ်ပြီးတော့မှသွားကြတယ်။ လမ်းမှာ ဒီလိုဖြစ်သွားတာ”လို့ ပြောပါတယ်။

ယာဥ်ပေါ်ပါခရီးသည်တွေရဲ့ မိသားစုဝင်တွေနဲ့ အဆက်အသွယ်ရပြီလို့ သိရပြီး ထိခိုက်ဒဏ်ရာ မစိုးရိမ်ရသူတွေကိုတော့ မိုင်းဖြတ်မြို့နယ်ဆေးရုံ ပို့ဆောင်ထားတယ်လို့ သိရပါတယ်။

နေပြည်တော်၊ လယ်ဝေးမြို့နယ်၊ မန္တလေး- ရန်ကုန်အမြန်လမ်းမ၊ မိုင်တိုင်အမှတ် ၁၉၄/၂ ဖာလုံရှိ တံတားမှာ မနေ့ညသန်းခေါင်းကျော်  ဧပြီ ၄ ရက် မနက် ၀၀:၃၀ လောက်က ခရီးသည်တင် အမြန်ယာဉ်တစီး  တံတားလက်ရန်းကို ဝင်တိုက်မိတာကြောင့် ယာဉ်ပေါ်ပါသူ ၁ ဦး သေဆုံးခဲ့တယ်လို့ အမြန်လမ်းမီးသတ်တပ်ဖွဲ့က ပြောပါတယ်။ 

ဝင်တိုက်မိတဲ့ ကားဟာ ရန်ကုန်- မုံရွာကို ပြေးဆွဲနေတဲ့ တက်နေဝန်း အောင်ကျော်မိုး express ဖြစ်ပြီး ဧပြီ ၃ ရက် ညနေ ၆ နာရီက ရန်ကုန် အောင်မင်္ဂလာအဝေးပြေးကနေ ထွက်ခွာလာခဲ့တာပါ။ 

အမြန်လမ်း မီးသတ်တပ်ဖွဲ့ဝင်တဦးက "ယာဉ်မောင်းက အရှိန်လွန်ပြီးတော့ တံတားလက်ရန်းကို တိုက်တာပါ၊ စပယ်ယာတော့ သေသွားတယ်၊ အသက် ၃၇ နှစ်၊ ဒဏ်ရာရသွားတာက ၄၀ ကျော်ပတ်ဝန်းကျင်တွေပါပဲ၊ ဖြစ်တာက လယ်ဝေးအပိုင်ထဲမှာပါ၊ နေပြည်တော်ကုတင် ၁၀၀၀ ကို ပို့ထားပါတယ်"လို့ ပြောပါတယ်။ 

တံတားကို တိုက်မိတာကြောင့် ကားဘယ်ဘက်အရှေ့ခြမ်းနဲ့ ကားမှန်ကြေမွသွားပြီး အသက် ၃၇ နှစ်အရွယ် မြောက်ဥက္ကလာပမြို့နယ်နေသူ ယာဉ်နောက်လိုက် အမျိုးသားသေဆုံးခဲ့ပါတယ်။ 

ယာဉ်လိုင်းက တာဝန်ရှိသူတစ်ဦးက" ပုံမှန်တိုင်း ခရီးစဉ်ကို မောင်းလာတဲ့ အချိန်မှာပဲ ၊ အရှေ့ကနေ လူတစ်ယောက်က ဖြတ်ပြေးတယ်။ ရှောင်လိုက်တဲ့အချိန်မှာပဲ မတော်တဆမှု ဖြစ်သွားတာပေါ့၊ တံတားလက်ရန်းကို တိုက်မိတာပေါ့။ ဖြတ်ပြေးတာကို ရှောင်လိုက်တဲ့အတွက် ကားကတော့ ထိသွားတာပေါ့၊ စပယ်ယာတစ်ယောက်လည်း ဆုံးသွားတယ်" လို့ ပြောပါတယ်။ 

သေဆုံးသွားသူနဲ့ ဒဏ်ရာရရှိသူတွေကို နေပြည်တော်ကုတင် ၁၀၀၀ ဆေးရုံပို့ဆောင်ထားတယ်လို့ သိရပြီး နစ်နာ ထောက်ပံ့ကြေးကို ဘယ်လို ပေးမလဲဆိုတာ‌တော့ ယာဉ်လိုင်းဘက်က ပြောကြားခြင်း မရှိသေးပါဘူး။ 

ပြီးခဲ့တဲ့ မတ်လအတွင်း ရန်ကုန်- မန္တလေး အမြန်လမ်းမမှာ ယာဉ်မတော်တဆမှု ၁၀ ကြိမ်ထပ်မနည်း ဖြစ်ပွားခဲ့ပြီး ယာဉ်တိုက်မှုကြောင့် သေဆုံးသူ ၄ ဦးအထိ ရှိခဲ့တယ်လို့ အမြန်လမ်းမီးသတ်တပ်ဖွဲ့ မှတ်တမ်းတွေအရ သိရပါတယ်။