မလေးရှားနိုင်ငံမှာ ယူအန် အသိအမှတ်ပြုကတ် ကိုင်ထားတဲ့ မြန်မာနိုင်ငံသားတွေ အာဏာပိုင်တွေရဲ့ ဖမ်းဆီးခြင်းကိုခံရပြီး အဖမ်းခံရသူ အများစုက ချင်းတိုင်းရင်းသားတွေဖြစ်တယ်လို့ ကူညီဆောင်ရွက်ပေးနေသူတွေက ပြောပါတယ်။
မလေးရှားနိုင်ငံ၊ ကွာလာလမ်ပူမြို့၊ ဂျလန်အမ်ဘီမှာ နေထိုင်နေကြတဲ့ ရာနဲ့ချီတဲ့ မြန်မာနိုင်ငံသားတွေဟာ ဇန်နဝါရီ ၆ ရက်နေ့ သန်းခေါင်ယံကျော်အချိန်မှာ မလေးရှားနိုင်ငံအစိုးရ ဌာနစုံပါဝင်တဲ့ ဝန်ထမ်းအင်အား ၁၀၀ ကျော်ရဲ့ ဝင်ရောက်ရှာဖွေဖမ်းဆီးတာကို ခံခဲ့ရပါတယ်။
အဖမ်းခံခဲ့ရသူ အများစုက တတိယနိုင်ငံကိုသွားဖို့ စောင့်ဆိုင်းနေကြတဲ့သူတွေနဲ့ လျှောက်ထားဆဲသူတွေဖြစ်ပြီး အဖမ်းခံခဲ့ရတဲ့သူတွေထဲမှာ မွေးကင်းစကနေ ၁၀ နှစ်ကြားကလေး ၃၀ ကျော်နဲ့ သက်ကြီးရွယ်အို ချင်းတိုင်းရင်းသားတွေ ပါတယ်လို့ မလေးရှားမီဒီယာတွေက ဖော်ပြကြပါတယ်။
ဖမ်းဆီးခံခဲ့ရတဲ့ မြန်မာနိုင်ငံသားတွေထဲမှာ ချင်းတိုင်းရင်းသားတွေအများစုဖြစ်ပြီး အဖမ်းခံခဲ့ရတဲ့သူတွေထဲက တချို့ကိုတော့ ပြန်လွှတ်ပေးခဲ့တယ်လို့ မလေးရှားနိုင်ငံအခြေစိုက် ချင်းဒုက္ခသည်ကော်မတီ ဥက္ကဋ္ဌ ပေါလ်ငွန်လွဲထန်းက ပြောပါတယ်။
မလေးရှားအစိုးရက အခုလို ရှာဖွေဖမ်းဆီးမှုတွေဆောင်ရွက်တာဟာ နှစ်စဉ်နှစ်တိုင်း ဆောင်ရွက်နေကျလုပ်ငန်းစဉ်တခုဖြစ်ပြီး အဲဒီစစ်ဆင်ရေးကို မလေးရှားနိုင်ငံ လူဝင်မှုကြီးကြပ်ရေးဌာန ညွှန်ကြားရေးမှူးချုပ်ကိုယ်တိုင်ဦးဆောင်ခဲ့တာ ဖြစ်ပါတယ်။
အဲဒီစစ်ဆင်ရေးမှာ ဘင်္ဂလားဒေ့ရှ်၊ ပါကစ္စတန်၊ နီပေါ၊ မြန်မာ၊ အင်ဒိုနီးရှားနဲ့ အိန္ဒိယနိုင်ငံတွေက နိုင်ငံခြားသား ၁၀၀၀ ကျော်ကို စစ်ဆေးခဲ့ပြီး ၅၀၀ ကျော်ကိုဖမ်းဆီးခဲ့တာလို့ စစ်ဆင်ရေးခေါင်းဆောင်ရဲ့ ပြောဆိုချက်ကို ကိုးကားပြီး မလေးရှားမီဒီယာတွေက ရေးပါတယ်။
လက်ရှိမလေးရှားနိုင်ငံမှာ တရားဝင်ရော တရားမဝင်ပါနေထိုင်နေကြတဲ့သူ ၈ သိန်းကျော်ရှိပြီး ဖမ်းဆီးခံရတဲ့သူတွေကို မြန်မာနိုင်ငံကို ပြန်လည်ပို့ဆောင်ခြင်းမရှိအောင် ယူအန်အေဂျင်စီကို အမည်စာရင်းအားလုံး ပေးပို့ထားတယ်လို့ ဖမ်းဆီးခံရသူတွေလွတ်မြောက်အောင် ဆောင်ရွက်ပေးနေသူက လျန်ခူးလ်က ဒီဗွီဘီကို ပြောပါတယ်။
ဖမ်းဆီးခံရသူတွေဆီကနေ သိမ်းဆည်းခဲ့တဲ့ပစ္စည်းတွေထဲမှာ Matu Social Organization (MSO) လူမှုအဖွဲ့အစည်းက ထုတ်ပေးတဲ့ကတ်ပြားတွေလည်း သိမ်းဆည်းခဲ့တယ်လို့ စစ်ဆင်ရေးကို ဦးဆောင်ခဲ့သူရဲ့ပြောဆိုမှုကို ကိုးကားပြီး မလေးရှားမီဒီယာတွေက ရေးသားကြပါတယ်။
MSO အဖွဲ့ဟာ မြန်မာနိုင်ငံကလာတဲ့ ချင်းတိုင်းရင်းသားတွေကို ကတ်တွေထုတ်ပေးထားတာဖြစ်ပြီး လက်ရှိမှာ အဲဒီကိစ္စနဲ့ပတ်သက်လို့ မလေးရှားအစိုးရတာဝန်ရှိသူတွေနဲ့ ညှိနှိုင်းဖြေရှင်းဆောင်ရွက်ပြီးဖြစ်တယ်လို့ MSO အဖွဲ့အစည်းရဲ့ ပြောခွင့်ရသူက ဒီဗွီဘီကို ပြောပါတယ်။
အာဏာသိမ်းပြီး ၇ လအတွင်း စစ်ကောင်စီတပ်ကြောင့် ချင်းတိုင်းရင်းသား ၁၀၈ ဦး ထိခိုက်သေဆုံးခဲ့တယ်လို့ ချင်းရေးရာအဖွဲ့က ထုတ်ပြန်ပါတယ်။
စစ်ကောင်စီတပ်ရဲ့ တိုက်ခိုက်မှုများကြောင့် အသက်ပေးခဲ့ရတဲ့ ချင်းတိုင်းရင်းသားတွေနဲ့ ပတ်သက်ပြီး ချင်းရေးရာအဖွဲ့က ဇူလိုင်လ ၆ ရက်နေ့အထိ ထုတ်ပြန်ချက်အရ စစ်ကောင်စီတပ်ကြောင့် သေဆုံးသူ ချင်းတိုင်းရင်းသား ၈၁ ဦးထိရှိခဲ့ကာ အခုသြဂုတ် ၃၁ ရက်နေ့အထိ သေဆုံးသူဦးရေ ၁၀၈ ဦးထိ ရှိလာပြီလို့ ထုတ်ပြန်ထားပါတယ်။
၂ လတာကာလအတွင်း ၂ ရက်ကို ၁ ဦးနှုန်းနဲ့ သေဆုံးသူ ၂၇ ဦးထိ မြင့်တက်လာကြောင်းလည်း သြဂုတ် ၃၁ ရက်က ထုတ်ပြန်ချက်မှာ ဖော်ပြပါတယ်။
သေဆုံးသူတွေ အမျိုးသမီး ၇ ဦးနဲ့ ၁၈ နှစ်အောက် ကလေးသူငယ် ၁၄ ဦးအပါအဝင် အရပ်သား ၅၇ ဦးနဲ့ တော်လှန်ရေးတပ်ဖွဲ့ဝင် ၅၁ ဦးအထိ ရှိကြောင်း ဖော်ပြပါတယ်။
သေဆုံးသူတွေထဲက အလောင်းကို သက်သေဖျောက်ကာ မိသားစုဆီ ပြန်မပေး၊ လူ့ဂုဏ်သိက္ခာနဲ့အညီ၊ ချင်းရိုးရာဓလေ့ထုံးတမ်း၊ ခရစ်ယာန်ဓလေ့ ထုံးတမ်းတွေနဲ့အညီ သင်္ဂြိုဟ်ခွင့်မရခဲ့တဲ့ အရပ်သား ၇ ဦး ပါဝင်တယ်လို့ ဖော်ပြပါတယ်။
ဒါ့အပြင် စစ်ကောင်စီတပ်နဲ့ ချင်းတော်လှန်ရေးအင်အားစုတွေနဲ့ တိုက်ပွဲတွေမှာ စစ်ကောင်စီတပ်က ကျေးရွာလူနေအိမ်တွေအတွင်း အတင်းအဓမ္မဝင်ရောက်ကျူးကျော်တာ၊ ပြည်သူတွေရဲ့ ပိုင်ဆိုင်မှုနဲ့ ရိက္ခာတွေကို ခွင့်ပြုချက်မရှိဘဲ အသုံးပြုတာ၊ အိမ်တွေကို ဖျက်ဆီးတာ၊ လက်နက်ကြီးတွေနဲ့ ရမ်းသမ်း ပစ်ခတ်တာတွေ ပြုလုပ်ခဲ့တယ်လို့ ပါရှိပါတယ်။
“ဩဂုတ်လ (၂၅) ရက်နေ့တွင် စစ်ကောင်စီတပ်၏ လူနေအိမ်များအတွင်း လက်နက်ကြီးကျည်များဖြင့် ပစ်ခတ်မှုကြောင့် ထန်ထလန်မြို့၌ သေဆုံးသူ (၃) ဦးနှင့် နောက်ထပ် အရပ်သား (၈) ဦး ဒဏ်ရာရရှိခဲ့သည်” လို့ ဖော်ပြပါတယ်။
ဒါကြောင့် အရပ်သားပြည်သူတွေရဲ့ အသက်အိုးအိမ်စည်းစိမ်အပေါ် ပစ်မှတ်ထားခြင်း၊ အပြစ်မဲ့ပြည်သူများ အထူးသဖြင့် အမျိုးသမီးတွေနဲ့ ကလေးသူငယ်များအပေါ် တိုက်ခိုက်သတ်ဖြတ်တိုက်ခိုက်တာ ချက်ချင်းရပ်တန့်ရန်ဖို့နဲ့ အရပ်သားများအပေါ် လက်နက်ကြီး၊ လက်နက်ငယ်သုံးပြီး တိုက်ခိုက်ခြင်းမလုပ်ဖို့လည်း စစ်ကောင်စီတပ်ကို တိုက်တွန်းတောင်းဆိုထားပါတယ်။ ဒါ့အပြင် ချင်းတိုင်းရင်းသားတွေအပေါ် လူ့အခွင့်အရေး ချိုးဖောက်နေတာတွေကို နိုင်ငံတကာ အသိုင်းအဝိုင်းကကြားဝင်ပြီး အရေးယူဆောင်ရွက်ပေးဖို့ ထပ်မံတောင်းဆိုကြောင်း ထုတ်ပြန်ချက်ထဲမှာ ဖော်ပြထားပါတယ်။
