မန်စီးတီးနဲ့ အာဆင်နယ်အသင်းတွေကို ကျော်တက်ပြီး ချန်ပီယံဆုဖလားရဖို့ မန်ယူနည်းပြ တန်ဟတ်ဂ်က ရည်မှန်းထားပါတယ်။

လက်ရှိအချိန်မှာ မန်ယူအသင်းက မန်စီးတီးနဲ့ အာဆင်နယ်အသင်းတွေကို ၅ မှတ်အကွာနဲ့ ဖိအားပေးနေတာပါ။

လက်ရှိခြေစွမ်းကို ဆက်ထိန်းထားနိုင်မယ်ဆိုရင် အပေါ်နှစ်သင်းကို ကျော်ဖြတ်ပြီး ချန်ပီယံဆုယူဖို့ နည်းပြတန်ဟတ်ဂ်ကမျှော်မှန်းထားတာပါ။

ချန်ပီယံဆုဖလားကိုစိန်ခေါ်နိုင်ဖို့အတွက် လက်ရှိပုံစံအတိုင်း လာမယ့်ဧပြီလအထိ ဆက်သွားဖို့ လိုအပ်တယ်လို့ နည်းပြတန်ဟတ်ဂ်က ပြောပါတယ်။

ဒါပေမဲ့ နောက်လာမယ့် ပွဲစဉ်တစ်ပွဲချင်းစီကို အာရုံစိုက်တာကတော့ အသင်းအတွက် အားအင်နဲ့ အာရုံစူးစိုက်မှုပိုကောင်းမှာဖြစ်တယ်လို့ နည်းပြတန်ဟတ်ဂ်ကပြောပါတယ်။

မန်ယူအသင်းဟာ လာမယ့် တနင်္ဂနွေနေ့မှာ လက်စတာအသင်းနဲ့ ယှဉ်ပြိုင်သွားရမှာဖြစ်ပြီး ကစားသမားတွေအနေနဲ့ အဲဒီပွဲစဉ်အတွက် အဆင်သင့်ဖြစ်နေလိမ့်မယ်လို့ နည်းပြတန်ဟတ်ဂ်က ပြောသွားပါတယ်။ 

မန်စီးတီးအသင်းအနေနဲ့ ချန်ပီယံဆုဖလားအကြောင်း စဉ်းစားနိုင်တဲ့အခြေအနေမှာ မရှိကြောင်း နည်းပြ ဂွါဒီယိုလာကပြောပါတယ်။ 

စပါးအသင်းကို တစ်ဂိုး ဂိုး မရှိနဲ့  ရှုံးနိမ့်ခဲ့ပြီးနောက်မှာ ချန်ပီယံ ဆုဖလားနဲ့ ပတ်သက်ပြီး နည်းပြ ဂွါဒီယိုလာက မှတ်ချက်ပေးခဲ့တာပါ။

မန်စီးတီးဟာ ထိပ်ဆုံးက အာဆင်နယ်ထက် တစ်ပွဲပိုအခြေအနေမှာ ၅ မှတ်ကွာဟနေဆဲ ဖြစ်ပါတယ်။ 

“ကျနော်တို့ အသင်းက ချန်ပီယံဆုဖလားအကြောင်း စဉ်းစားရလောက်တဲ့ အခြေအနေမှာ မရှိပါဘူး။  လာမယ့် ပွဲစဉ်တွေအတွက်ပဲစဉ်းစားရမှာပါ” လို့ နည်းပြဂွါဒီယိုလာ ပြောပါတယ်။

ပွဲအစမှာ ခြေစွမ်းကောင်းမွန်အောင် ကစားနိုင်ခဲ့ပေမဲ့ အမှားတစ်ခု လုပ်လိုက်တဲ့အချိန်မှာ ဂိုးပေးလိုက်ရကြောင်း၊ တစ်ဂိုး အရှုံးအခြေအနေဟာ ခက်ခဲသွားစေပြီး အမှတ် ၃ မှတ် ဆုံးရှုံးခဲ့ရကြောင်း နည်းပြ ဂွါဒီယိုလာက ပြောပါတယ်။ 

ဒါ့အပြင် စပါးအသင်းကိုလည်း ချီးကျူးခဲ့ပြီး တိုက်စစ်ပိုင်းမှာ အရည်အသွေးမြင့် ကစားသမားတွေ ရှိကြောင်း နည်းပြဂွါဒီယိုလာက ပြောပါတယ်။