စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့ပေါ်ရှိ စစ်ကောင်စီလက်အောက်ခံ ရုံးဌာနတွေနဲ့ ကြံ့ခိုင်ရေးပါတီရုံးကို ဒေသခံ ပြည်သူ့ကာကွယ်ရေးအဖွဲ့တွေက ဒီဇင်ဘာ ၂၆ ရက် ည ၈ နာရီလောက်က လက်နက်ကြီးတွေနဲ့ ပစ်ခတ်ခဲ့တယ်လို့ ဒေသခံ PDF ခေါင်းဆောင်တွေဆီကနေ သိရပါတယ်။
ဆားလင်းကြီးမြို့ပေါ်ကို ရှိ စစ်ကောင်စီ ပစ်မှတ်တွေကို ပစ်ခတ်တိုက်ခိုက်တာဟာ အခုအကြိမ်နဲ့ဆိုရင် ၈ ကြိမ်အထိ ရှိနေပြီလို့လည်း ဒေသခံတွေရဲ့ ပြောပြချက်အရ သိရပါတယ်။
ဆားလင်းကြီးမြို့နယ်မှ တွေ့ရာသင်္ချိုင်းဓားမဆိုင်းအဖွဲ့ခေါင်းဆောင် ဗိုလ်စွမ်းသူမောင်က “ပစ်တာက ၆၀ မမ လေးလက်၊ ၈၀ မမ ငါးလက်၊ ၁၂၀ မမ နှစ်လက်နဲ့ ကျည်အလုံး ၃၀ နဲ့ ပစ်ခတ်တိုက်ခိုက်ခဲ့တာဗျ။ ရဲစခန်းအတွင်း ၃ လုံးထက်မနည်း ကျရောက်တယ်။ အထွေထွေအုပ်ချုပ်ရေးရုံးနဲ့ မြို့နယ်တရားရုံးအတွင်းလည်း ကျရောက် ပေါက်ကွဲတယ်လို့ ဒီနေ့မနက်ခင်းမှာ ဒေသခံတွေဆီက သိထားရတယ်။ စစ်(--)တွေရဲ့ အသေစာရင်းကတော့ မသိရသေးဘူးဗျ။ သူတို့ဘက်ကလည်း ၄၀ မမဗုံးသီး၊ G-3၊ G4 စတဲ့ လက်နက်တွေနဲ့ ၂ ကြိမ် ပြန်လည်ပစ်ခတ်တာတွေလည်း ရှိတယ်။ ဒါပေမဲ့ ကျနော်တို့ဘက်က အထိအခိုက် မရှိခဲ့ဘူး” လို့ ပြောပါတယ်။
အဲဒီတိုက်ခိုက်မှုကို ဓားမဆိုင်းတပ်မတော် (D.M.S.A) ယင်းမာပင်ခရိုင် တပ်ရင်း-၂၈၊ တပ်ခွဲ-၂၊ တပ်ခွဲ-၃၊ တပ်ခွဲ-၄၊ တပ်ခွဲ-၅ တို့ ပူးပေါင်းတိုက်ခိုက်ခဲ့တာလို့လည်း သိရပါတယ်။
ကချင်ပြည်နယ် ဖားကန့်မြို့နယ် စစ်ကောင်စီရုံးစိုက်ရာ နေရာအနီးတွေမှာ ဖေဖော်ဝါရီ ၁၂ ရက် ပြည်ထောင်စုနေ့က ဗုံးပေါက်ကွဲမှု သုံးကြိမ်ဖြစ်ပွားခဲ့တယ်လို့ သိရပါတယ်။
ဖားကန့်မြို့ စစ်ကောင်စီရုံးစိုက်ရာ ထွေအုပ်ရုံးအနီးမှာ မနက်ပိုင်းက ၂ ကြိမ်နဲ့ Jade city ဗျူဟာကုန်း အနီးမှာ တစ်ကြိမ် တစ်နေ့တည်း သုံးကြိမ် ပေါက်ကွဲခဲ့တာလို့ ဒေသခံတွေက ပြောပါတယ်။
“မနက် ၇ နာရီမထိုးခင်လေးမှာ ထွေအုပ်ရုံးနားမှာ နှစ်ကြိမ်ပေါက်တယ်။ နေ့လယ် ၁ နာရီလောက်ကျတော့ မြို့ထဲ jade city အနီး ဗျူဟာကုန်းမှာ တစ်ကြိမ် ထပ်ပေါက်တယ်။ ဒီနေ့ တစ်ရက်တည်း သုံးကြိမ်ပေါက်တယ်။ အသံကတော့ အတော်ကျယ်တယ်။ အိမ်တောင်တုန်သွားတယ်” လို့ ဒေသခံတစ်ဦးက ပြောပါတယ်။
ဗုံးပေါက်ကွဲခဲ့တဲ့အတွက် လူထိခိုက် ဒဏ်ရာရတာမရှိဘဲ ပေါက်ကွဲမှုဖြစ်ပွားတဲ့နေရာ အနီးနားမှာ စစ်ကောင်စီတပ်ဖွဲ့ဝင်တွေက လမ်းပိတ်ဆို့ စစ်ဆေးနေတယ်လို့ ဆိုပါတယ်။
ဖားကန့်မြို့နယ်မှာ ဗုံးပေါက်ကွဲတာတွေ မကြာခဏဖြစ်ပွားနေပြီး စစ်အာဏာရှင် စနစ်ကျရှုံးရေးအတွက် ဒေသခံပြည်သူရာနဲ့ချီကလည်း နေ့စဉ်နီးပါး ဆန္ဒပြနေကြပါတယ်။
