တူရကီနိုင်ငံအရှေ့တောင်ပိုင်း ဒီရာဘာကီယာပြည်နယ်က အဝေးပြေးလမ်းမပေါ်မှာ ရဲတွေလိုက်ပါလာတဲ့ မီနီဘတ်စ်ကားတစီး ဖြတ်သန်းချိန် လမ်းဘေးတနေရာရှိ ကားတစီး ဗုံးပေါက်ကွဲမှုကြောင့် ဒီဇင်ဘာ ၁၆ ရက်က ရဲအရာရှိ ၈ ဦး ထိခိုက်ဒဏ်ရာရရှိခဲ့ကြောင်း လုံခြုံရေးသတင်းရင်းမြစ်တွေက ပြောပါတယ်။

ဒီရာဘာကီယာ အုပ်ချုပ်ရေးမှူး အလီ အီဆန်စုက “ကျနော်တို့ရဲ့ လုပ်ဖော်ကိုင်ဘက်တွေကို စောင့်ကြည့်ဆေးကုပေးဖို့ ဆေးရုံကို ပို့ဆောင်ထားပါတယ်။ အဲ့ဒီထဲက ရဲအရာရှိ ၇ ဦးက ဆေးရုံကနေ ဆင်းသွားပြီဖြစ်ပေမဲ့ ကျန်တဲ့ ၂ ဦးကိုတော့ စောင့်ကြည့်စစ်ဆေးနေဆဲဖြစ်ပြီး အသက်အန္တရာယ်စိုးရိမ်ရတဲ့ ထိခိုက်မှုမျိုး မရှိဘူး”လို့ အခင်းဖြစ်ရာမှာ သတင်းထောက်တွေကို ပြောပါတယ်။

ဒီဗုံးခွဲမှုကို ကျူးလွန်ခဲ့တယ်လို့ ယူဆရတဲ့ သံသယရှိသူ ၂ ဦးကို ဖမ်းဆီးထိန်းသိမ်းထားကြောင်း ပြည်ထဲရေးဝန်ကြီးဌာနက ပြောကြားခဲ့ပြီး ဒါဟာ ဒေသတွင်း အကြီးဆုံးမြို့ဖြစ်တဲ့ ဒီရာဘာကီရာမြို့ ဗဟိုတောင်ဘက်ရှိ ၆ မိုင်အကွာက အသား၊ ငါးဈေးတခုအနီးမှာ ဒီပေါက်ကွဲမှု ဖြစ်ပွားခဲ့တာလို့ အတည်ပြုပါတယ်။ ဒီဖြစ်ရပ်နဲ့ပတ်သက်ပြီး တာဝန်ခံ ပြောဆိုမှုမျိုး မရှိသေးပါဘူး။

တူရကီနိုင်ငံမှာ အရင်ကတော့ ကာ့ဒ်တွေ၊ လက်ဝဲဝါဒီတွေနဲ့ အစ္စလာမ္မစ် စစ်သွေးကြွတွေက ဗုံးခွဲတိုက်ခိုက်မှုတွေ လုပ်ဆောင်ခဲ့ဖူးပါတယ်။

အီရန်နိုင်ငံတောင်ပိုင်း၊ ဖားစ်ပြည်နယ်၊ ရှီရက်ဇ်မြို့ရှိ ရှီးယိုက်မွတ်စလင် ဘုရားကျောင်းကို အောက်တိုဘာ ၂၆ ရက်က တိုက်ခိုက်ခံရပြီး လူ ၁၃ ယောက် သေဆုံးခဲ့ပါတယ်။

အစောပိုင်းသတင်းတွေအရ အဲဒီတိုက်ခိုက်မှုမှာ သေနတ်သမား ၃ ယောက် ပါဝင်ခဲ့တယ်လို့ ဆိုပေမဲ့ အာမက်သတင်းထုတ်ပြန်ချက်မှာ တိုက်ခိုက်သူတယောက်သာ ပါဝင်ကြောင်း သိရပါတယ်။

တိုက်ခိုက်ရေးသမားဟာ ဘုရားကျောင်းဝင်းအတွင်းကို ဝင်ရောက်စီးနင်းခဲ့ပြီး အီရန်ရဲတွေနဲ့ ဘုရားကျောင်းအစောင့် အများအပြားကို ပစ်ခတ်ခဲ့ရာမှာ လူအများအပြား သေဆုံး ဒဏ်ရာရခဲ့ကြောင်း သတင်းရင်းမြစ်တွေက ပြောပါတယ်။

တိုက်ခိုက်သူကို ဖမ်းဆီးရမိထားပြီး စစ်ဆေးမေးမြန်းမှုတွေ ပြုလုပ်ထားကြောင်း ဒေသတွင်းရဲချုပ်က ပြောကြားခဲ့ပြီး အသေးစိတ်အချက်အလက်တွေကိုတော့ မပြောကြားပါဘူး။

သမ္မတ အီဘရာဟင် ရိုင်စီကတော့ ဆွန်နီ မွတ်စလင် စစ်သွေးကြွတွေရဲ့ ပစ်ခတ်မှုကို မဖြေရှင်းဘဲ မနေဘူးလို့ ကတိပြုလိုက်ပြီး ဘုရားကျောင်းတိုက်ခိုက်မှုကို အီရန်က တုံ့ပြန်သွားမှာဖြစ်တယ်လို့ ရိုင်စီက နိုင်ငံပိုင်မီဒီယာမှာ ဖော်ပြထားပါတယ်။

ပြည်ထဲရေးဝန်ကြီး အာမဒ်ဗာဟီဒီကတော့ ဒီဖြစ်စဉ်မှာ လူအများအပြား ဒဏ်ရာရရှိခဲ့ပြီး သေဆုံးသူအရေအတွက် ထပ်မံတိုးလာနိုင်ကြောင်း ပြောကြားခဲ့ပါတယ်။

အစ္စလာမ္မစ်နိုင်ငံတော်အဖွဲ့ကတော့ ဒီတိုက်ခိုက်မှုဟာ သူတို့အဖွဲ့ရဲ့လက်ချက်ဖြစ်တယ်လို့  အာမက်သတင်းဌာန တယ်လီဂရမ်မှာ ဖော်ပြထားပါတယ်။