မကွေးတိုင်း၊ မင်းဘူးခရိုင်၊ စလင်းမြို့နယ်၊ အောက်လှိုင်းကျေးရွာအုပ်စု၊ ပိန္နပင်ရွာမှာ မတ် ၂၃ ရက်နေ့ ညနေ ၅ နာခွဲလောက်က မီးကြွင်းမီးကျန်ကနေ မီးလောင်မှုဖြစ်ပွားခဲ့ပြီး နေအိမ် ၂၇ လုံး မီးလောင်ဆုံးရှုံးခဲ့တယ်လို့ မြို့ခံပရဟိတအသင်းကနေ သိရပါတယ်။
ကယ်ဆယ်ရေး မီးသတ်တပ်ဖွဲ့ဝင်တဦးက “ရေနွေးအိုးတည်ပြီး အပြင်ထွက်သွားတာ၊ အဲ့ဒီကနေ စလောင်တာ၊ သူပြန်လာတော့ မီးက အတော်တောင်များနေပြီ။ သူ့ကိုလည်း ဖမ်းထားတယ်။ အိမ်တွေက ထရံကာနဲ့ ပျဉ်ကာတွေများတယ်။ နှစ်ထပ်အိမ် ၁၂ လုံးလောက်ပါတယ်။ မီးလောင်ခဲ့တဲ့အိမ်တွေက ဘာမှပြန်မရဘူး” လို့ ဒီဗွီဘီကို ပြောပါတယ်။
မီးလောင်ကျွမ်းမှုကို မြန်မာနိုင်ငံမီးသတ်တပ်ဖွဲ့မှ မီးသတ်ယာဉ် ၆ စီး၊ ရေသယ်ယာဉ် ၂ စီးနဲ့ အချိန် ၂ နာရီကြာ ငြိှမ်းသတ်ခဲ့ရတယ်လို့ သတင်းထုတ်ပြန်ထားပြီး ပျက်စီးဆုံးရှုံးမှုတန်ဖိုးကို ဖော်ပြထားတာတော့ မတွေ့ရပါဘူး။
မီးလောင်မှုကြောင့် စပါးကျီထဲမှာ သိုလောင်ထားတဲ့ ဆန်စပါးအများအပြား ဆုံးရှုံးခဲ့တယ်လို့ ရွာခံတွေဆီက သိရပါတယ်။
ရွာခံတဦးက “လေးငါးအိမ်လောက်က စပါးကျီတွေရှိတယ်။ စပါးတွေလည်းကုန်၊ ဆန်အိတ်တွေကလည်း အဲ့ဒီအိမ်တွေမှာ ရှိတယ်၊ တအိမ်မှာ အနည်းဆုံး ဆန်အိတ်က ၅၀ အထက်ရှိတယ်။ အခုတော့ အကုန်မီးထဲပါသွားပြီ။ ဘယ်လိုမှ ပြန်သုံးလို့မရတော့ဘူး။ လူထိခိုက်မှုတော့ မရှိဘူး” လို့ ပြောပါတယ်။
Photo Zaw Min
မကွေးတိုင်း၊ စလင်းမြို့နယ်မှာ ဇန်နဝါရီ ၁၃ ရက် နေလယ်ပိုင်းက CDM ကျောင်းဆရာ တယောက်နဲ့ ဒေသခံပြည်သူ တယောက်ကို စစ်ကောင်စီတပ်သားတွေက ဖမ်းဆီးသွားတယ်လို့ ဒေသခံတွေဆီကနေ သိရပါတယ်။
သရက်ကုန်းကျေးရွာက အသက် ၄၃ နှစ်အရွယ် CDM ကျောင်းဆရာ ဦးအောင်ကိုဝင်းနဲ့ အသက် ၃၈ နှစ်အရွယ် ဦးအောင်အောင်တို့ကို မနေ့ နေ့လယ်ပိုင်းမှာ စစ်ကောင်စီတပ်သားအင်အား ၅၀ လောက်က လာဖမ်းသွားတာလို့ သရက်ကုန်းရွာ ဒေသခံတယောက်က ပြောပါတယ်။
“အဲဒီစစ်သားတွေ ဖမ်းတုန်းကတော့ ၃ ယောက်အဖမ်းခံရတာ။ တယောက်ကတော့ လမ်းတဝက် လောက်မှာပြန်လွှတ်ပေးခဲ့လို့ ပြန်လွတ်လာတယ်။ အဖမ်းခံရတဲ့ ၂ ယောက်ကိုတော့ ကန်းပြား ရဲစခန်းဘက်ကို ခေါ်သွားကြတယ်”
ရွာထဲကို ဝင်တဲ့ အချိန်မှာလည်း လမ်းမှာတွေ့တဲ့ လူငယ်တွေကို ရိုက်နှက်ခဲ့ပြီး ဖမ်းဆီးခံရတဲ့ CDM ကျောင်းဆရာနဲ့ ပြည်သူတယောက်ကတော့ လက်ရှိအချိန်ထိ ပြန်မလွှတ်ပေးသေးလို့ စစ်ကြောရေးမှာ ရိုက်နှက်နှိပ်စက်ခံရမှာကို မိသားစုဝင်တွေ စိုးရိမ်နေကြတယ်လို့ ပြောပါတယ်။
စစ်တပ်အာဏာသိမ်းခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက်ကနေ ၂၀၂၃ ခုနှစ် ဇန်နဝါရီ ၁၃ ရက်အထိ နိုင်ငံတဝန်း ဖမ်းဆီးချုပ်နှောင်ခံထားရသူ ၁၃၄၉၅ ယောက်ရှိပြီး အဲဒီထဲက ၂၀၅၇ ယောက်ဟာ ထောင်ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း AAPP ကထုတ်ပြန်ထားပါတယ်။
