ရခိုင်ပြည်နယ်၊ မောင်တောမြောက်ပိုင်း ကြိမ်ချောင်း ၂၄ စစ်ဆေးဂိတ်မှာ စားနပ်ရိက္ခာထောက်ပံ့နေတဲ့  နိုင်ငံတကာ အန်ဂျီအို အဖွဲ့အစည်းတွေကို သွားလာခွင့် ပိတ်ထားဆဲ ဖြစ်တာကြောင့် အခက်တွေ့နေတယ်လို့ ဒေသခံတွေက ပြောပါတယ်။

မောင်တောမြောက်ပိုင်း ကျေးရွာသားတဦးက “ကျနော်တို့ မြောက်ပိုင်းက ကျေးရွာစုရပ်တွေကို ရိက္ခာထောက်ပံဖို့ အိုင်အန်ဂျီအိုနဲ့ အန်ဂျီအိုအဖွဲ့တွေ လာလို့မရသေးဘူး။ ၂၄ စစ်ဆေးဂိတ်က ပိတ်ထားတယ်။ ကြိမ်ချောင်းကနေ သွားယူရတော့ သယ်ယူစရိတ်ကို အိုင်အန်ဂျီအိုအဖွဲ့တွေက ၂၀ ရာခိုင်နှုန်း ကျခံတယ်။ ကျနော်တို့ဆီက ၈၀ ရာခိုင်နှုန်းအထိ ကျခံနေရတော့ ဆင်းရဲတဲ့ပြည်သူတွေ စရိတ်မတတ်နိုင် ဖြစ်နေကြရတယ်” လို့ ပြောပါတယ်။

အရင်က အပြည်ပြည်ဆိုင်ရာကြက်ခြေနီကော်မတီ (ICRC) နဲ့ ကမ္ဘာ့စားနပ်ရိက္ခာအဖွဲ့ (WFP) တို့က မောင်တောမြောက်ပိုင်းရှိ ဝေးလံခေါင်ဖျားတဲ့ ဒေသတွေအထိ သွားရောက် ကူညီထောက်ပံ့ခွင့်ရခဲ့ပေမဲ့  လက်ရှိ ကြိမ်ချောင်း ၂၄ စစ်ဆေးဂိတ်က အဲဒီ မြောက်ပိုင်းကျေးရွာတွေအထိ သွားလာခွင့် မပြုသေးတာကြောင့် ကြိမ်ချောင်းကျေးရွာမှာ စုရပ်လုပ်ပြီး ရိက္ခာတွေ ထောက်ပံ့ ကူညီနေကြရတာလည်း ဖြစ်ပါတယ်။

ကြိမ်ချောင်းကျေးရွာကနေ ရိက္ခာတွေကို မိုင် ၄၀ ကျော် ၅၀ ဝေးလံတဲ့ ကျေးရွာအုပ်စုတွေဆီ သယ်ယူရာမှာ ကားတစီးငှားခ ကျပ် ၃ သိန်းအထိ ပေးနေရပြီး ကျေးရွာအုပ်စုတခုအတွက် ကား ၆ စီးငှားခ ကျပ် ၁၈ သိန်းအထိ ကုန်ကျမှုရှိနေရာ အဲဒီခရီးစရိတ်ကို အိုင်အန်ဂျီအိုအဖွဲ့တွေက ၂၀ ရာခိုင်နှုန်းသာပေးပြီး ကျန် ၈၀ ရာခိုင်နှုန်းကို ဒေသခံတွေ စုပေါင်းကျခံနေကြရကြောင်း ကျေးရွာအုပ်စု ဒေသခံတွေဆီက သိရပါတယ်။

ရိက္ခာထောက်ပံ့မှု ၈ လအထိ လုံးဝမရရှိတဲ့ ကျေးရွာတွေကတော့ တောင်ပြို၊ နံသာတောင်၊ သင်္ဘောလှ၊ မီးတိုက်၊ သာယာကုန်း၊ တရိမ်း၊ လိပ်ရ၊ ကျောက်ချောင်း၊ စျီးပင်ချောင်း၊ ရေတွင်းပြင် စတဲ့ကျေးရွာ ၁၁ ရွာဖြစ်ပြီး  ၂၀၂၂ ခုနှစ် ဇွန်လကစလို့  ၂၀၁၃ ခု ဇန်နဝါရီ ၁၇ ရက်အထိ ရိက္ခာထောက်ပံ့မှု မရရှိတာကြောင့် စားဝတ်နေရေး အခက်အခဲ့တွေနဲ့ တွေ့ကြုံနေကြရတယ်လို့ ကျေးရွာဒေသခံတွေက ပြောပါတယ်။

မီးတိုက်ကျေးရွာသားတဦးက “ကျနော်တို့ စားဝတ်နေရေး အတော်အခက်အခဲ ဖြစ်နေကြတယ်။ ရိက္ခာထောင်ပံ့မှု မရကြတာ ၇ လပိုင်းကတည်းက လုံးဝမရသေးဘူး။ ၉ လပိုင်းမှာ မီးတိုက်ကျေးရွာမှာ တိုက်ပွဲတွေဖြစ်တာနဲ့ သွားလာလို့မရခဲ့ကြဘူး။ အခု အပစ်အခတ် ရပ်ထားတော့လည်း ရိက္ခာထောက်ပံ့မှု မရတော့ ဒေသခံတွေ စားဝတ်နေရေး အလွန်အခက်အခဲ ဖြစ်နေရတယ်” လို့ ပြောပါတယ်။

ရခိုင်ပြည်နယ် (မြောက်ပိုင်း) မှာ UNHCR နဲ့ မိတ်ဘက်အဖွဲ့အစည်းတွေ ၂၀၂၂ ခုနှစ် စက်တင်ဘာလကစပြီး ရိက္ခာဖြန့်ဝေမှုလုပ်ငန်းတွေ ခေတ္တဆိုင်းငံ့ထားခဲ့ပါတယ်။

ဇန်နဝါရီ ၁၀ ရက်ကစပြီး ပဋိပက္ခဒဏ်ခံစားနေရတဲ့ လူမှုအသိုင်းအဝန်းတွေဆီကို အရေးပေါ် ကယ်ဆယ်ရေးပစ္စည်းတွေ ဖြန့်ဝေတဲ့လုပ်ငန်း ပြန်လည်ဆောင်ရွက်နေပြီလို့ ကုလသမဂ္ဂ ဒုက္ခသည်များဆိုင်ရာအေဂျင်စီက သတင်းထုတ်ပြန်ထားပေမဲ့ အထောက်အပံ့မရတဲ့ ကျေးရွာတွေရှိနေပါသေးတယ်။

စစ်ကိုင်းတိုင်း၊ ဒီပဲယင်းမြို့နယ်မှာ စစ်‌ကောင်စီတပ်ဖွဲ့က လူနေအိမ် ၃,၀၀၀ ကျော် မီးရှို့ဖျက်ဆီးပြီးနောက် စစ်ဘေးမီးဘေးသင့်သူတွေကို ဒီပဲယင်းမြို့နယ် ညီနောင်များအဖွဲ့က အလှူခံရရှိတဲ့ ငွေသားနဲ့ အခြေခံစားသောက်ကုန်တွေ ခွဲဝေလှူဒါန်းပေးနေပါတယ်။

ပထမအကြိမ် မီးဘေးသင့် ကျေးရွာပေါင်း ၃၂ ရွာက မီးဘေးသင့်ပြည်သူတွေ ပြန်လည်တည်ဆောက်ရေးအတွက် အမျိုးသားညီညွတ်ရေးအစိုးရ (NUG) က ကျပ် ၃၇,၄၁၄,၇၅၄ ကို မြို့နယ်ပြည်သူ့အုပ်ချုပ်ရေးအဖွဲ့ ပ-အ-ဖ၊ မြို့နယ်လူကယ်ပြန်က‌နေတဆင့် ပေးအပ်ခဲ့ပြီး ပြန်လည်ထူထောင်ရေးနဲ့ ယာယီနေစရာ အဆင်‌ပြေစေဖို့အတွက် ပြန်လည်တည်ဆောက်ရေး ဆောင်ရွက်ကြမယ့် စာရင်းပေးကျေးရွာတွေကို ထောက်ပံ့ ကူညီပေးသွားမယ်လို့ သိရပါတယ်။

ကျေးရွာပေါင်း ၃၂ ရွာက နေအိမ် အားလုံး ၁,၅၀၀ လောက် ပြန်လည်တည်ဆောက်ရေးတော့ ပြုလုပ်နိုင်မှာ မဟုတ်သေးဘဲ စစ်ကြောင်းအခြေအနေတွေကြောင့် ပေးအပ်ရခြင်း မရှိသေးတာလို့ ဒီပဲယင်းမြို့နယ် ညီနောင်များအဖွဲ့က ထုတ်ပြန်ထားပါတယ်။

ဒုတိယအကြိမ် မီးဘေးသင့်ပြည်သူ‌တွေအတွက် စာရင်းတင်ကြရမှာ ဖြစ်ပြီး ဒီဇင်ဘာ ၁ ရက်က‌နေ ဒီဇင်ဘာ ၁၁ ရက်အထိ ထပ်မံမီးရှို့ဖျက်ဆီးခံလိုက်ရတဲ့ ကျေးရွာ ၁၉ ရွာက နေအိမ် ၁,၆၀၀ ကျော်အတွက် အကူအညီတွေလည်း လိုအပ်နေပါတယ်။

မြို့နယ်အတွင်း မီးရှို့ဖျက်ဆီးခံရတဲ့ ပြည်သူတွေရဲ့ ထိခိုက်ပျက်စီး ဆုံးရှုံးတာတွေကို မြို့နယ်ပြည်သူ့အုပ်ချုပ်ရေးအဖွဲ့ (ပ.အ.ဖ) အဖွဲ့က မြေပြင်ဆင်းကာ စာရင်းကောက်ယူတာ အပါအဝင် ယာယီစားနပ်ရိက္ခာ စစ်ဘေးသင့် အကူအညီကိုလည်း မျှဝေပေးနေတယ်လို့ ဒီပဲယင်းမြို့နယ်ညီနောင်များအဖွဲ့ တာဝန်ရှိသူက ပြောပါတယ်။

ဒီပဲယင်းမြို့နယ်အတွက် နီးစပ်ရာအလှူရှင်တွေက ဆန်အိတ်ပိုင်း (၁၂၀၊ တင်း ၁၈၀)၊ ဆီ ပိဿာ ၃၀ ထောက်ပံ့ကူညီထားတဲ့ ဆန်အိတ်တွေကို ယာယီအဆင်ပြေဖို့ ဒီပဲယင်းမြို့နယ် ညီနောင်များအဖွဲ့က စေတနာရှင်တွေကိုယ်စား တာဝန်ယူ လုပ်ကိုင်ဆောင်ရွက်‌နေတယ်လို့ ဒေသခံတွေထံက သိရပါတယ်။

“လူသားချင်းစာနာစွာ အကူအညီပေးလာတဲ့ ငွေကြေးတွေကိုလည်း ကျေးရွာအမည်နဲ့ ရောက်လာသည်ဖြစ်စေ အများအတွက်ဖြစ်စေ ထောက်ပံ့ကူညီမှု ရရှိသမျှကိုလည်း မြေပြင်ရှိ ပြည်သူများ လက်ဝယ်အရောက် ထောက်ပံ့ကူညီပေးသွားမှာ ဖြစ်ပါတယ်။ အနယ်နယ်အရပ်ရပ်မှ စေတနာရှင်တွေက ပထမအကြိမ် ထောက်ပံ့ကူညီတဲ့ ဆန်အိတ်ပိုင်းအရေအတွက် ၄၈ ပိုင်းကို မူးကမ်း၊ ဆူးတပ်နဲ့ ကိုင်းကံရွာ‌တွေကို ထောက်ပံ့ကူညီပေးခဲ့ပါတယ်” လို့ အဖွဲ့တာဝန်ရှိသူက ပြောပါတယ်။

အခု ထောက်ပံ့ကူညီထားတဲ့ ဆန်နဲ့ ဆီ အလှူရှင် စေတနာရှင် မိသားစုတွေကိုရော ချိတ်ဆက် အကူအညီပေးသူတွေကိုပါ မြို့နယ်ပြည်သူလူထုကိုယ်စား ကျေးဇူးအထူးတင်ရှိပါတယ်လို့ ဒီပဲယင်းမြို့နယ် ညီနောင်များအဖွဲ့က ထုတ်ဖော်ပြောဆိုပါတယ်။