ထိုင်းနိုင်ငံ၊ ချင်းမိုင်ခရိုင်၊ မဲ့အိုင်းမြို့နယ် ထိုင်း-မြန်မာနယ်စပ်အနီးမှာ ပြီးခဲ့တဲ့ရက်ပိုင်းက မူးယစ်ဆေးဝါးသယ်ဆောင်လာတဲ့အဖွဲ့နဲ့ ထိုင်းစစ်တပ်တို့ ပစ်ခတ်မှုဖြစ်ပွားပြီး စိတ်ကြွဆေးပြား ၄ သိန်း ဖမ်းဆီးရမိခဲ့တယ်လို့ မယ်ဆိုင်ပရက်စ် ဒေသတွင်းသတင်းက မတ် ၃၀ ရက်မှာ ဖော်ပြပါတယ်။

ပြီးခဲ့တဲ့ မတ် ၂၆ ရက် မွန်းလွဲပိုင်းက ထိုင်းခြေမြန်တပ်ရင်း တပ်ဖွဲ့ဝင်တွေဟာ မဲ့အိုင်းမြို့နယ် မဲ့အိုင်းအုပ်စု ဘန်မအင့်ကျေးရွာအနီး တောစပ်မှာ လုံခြုံရေးတာဝန်ထမ်းဆောင်စဉ် မသင်္ကာဘွယ်လူတစု အထုပ်တွေကျောပိုးပြီး မြန်မာနယ်စပ်တောင်ကုန်းဘက်ကနေ ဆင်းလာတာ တွေ့ရှိတယ်လို့ ဆိုပါတယ်။

ထိုင်းစစ်တပ်က စစ်ဆေးဖို့ ရပ်မိန့်ပေးလိုက်ရာမှာ တဖက်က လူစုခွဲပြီး သေနတ်နဲ့ စပစ်ခဲ့ကြောင်း၊ ဒါကြောင့် ထိုင်းစစ်တပ်က ပြန်လည်ပစ်ခတ်ပြီး မိနစ်အနည်းငယ် အပြန်အလှန် ပစ်ခတ်ခဲ့တယ်လို့ ဆိုပါတယ်။

သေနတ်သံတွေငြိမ်သွားတော့ ထိုင်းစစ်တပ်က အဆိုပါနေရာကို ပစ်ခတ်လမ်းရှင်းပြီး တဖြည်းဖြည်းဝင်သွားကြောင်း၊ အခင်းဖြစ်တဲ့နေရာမှာ လူမရှိတော့ဘဲ မြွေရေခွံအိတ် ၄ လုံးနဲ့ အသုံးအဆောင်ပစ္စည်း တချို့သာ တွေ့တယ်လို့ သတင်းမှာ ဖော်ပြပါတယ်။

အိတ် ၄ လုံးထဲမှာ စိတ်ကြွဆေး ၁ သိန်းစီပါရှိပြီး စုစုပေါင်း ၄ သိန်းရှိကြောင်း၊ ၂ သိန်းမှာ 999 တံဆိပ်နဲ့ နောက်ထပ် ၂ သိန်းမှာ Y1 တံဆိပ်တို့ဖြစ်ကြောင်း၊ ဒါ့အပြင် အနွေးထည်အင်္ကျီ ၃ ထည်၊ ကက်ပ်ဦးထုပ် ၁ လုံး၊ ကျောပိုးအိတ် ၁ လုံးနဲ့ မူးယစ်ဆေးသုံးကိရိယာတချို့ တွေ့ရှိခဲ့ပါတယ်။

အဆိုပါပစ္စည်းတွေကို မဲ့အိုင်းမြို့နယ်ရဲစခန်းကို ပို့ဆောင်လိုက်ပြီး ထွက်ပြေးလွတ်မြောက်သူနဲ့ ပါဝင်ပတ်သက်သူတွေကို နယ်စပ်ကျေးရွာအနီးနားတဝိုက်မှာ ဆက်လက်ရှာဖွေနေတယ်လို့ ဆိုပါတယ်။

မဲ့အိုင်းမြို့နယ်ဟာ မြန်မာနိုင်ငံ ရှမ်းပြည်နယ် မိုင်းဆတ်ခရိုင်နဲ့ ကပ်လျက်တည်ရှိပြီး အဆိုပါနယ်မြေထဲမှာ UWSA ဝ တပ်ဖွဲ့၊ လားဟူတပ်ဖွဲ့တွေ သွားလာလှုပ်ရှားနေပါတယ်။

ရခိုင်ပြည်နယ်၊ မောင်တောမြို့နယ်မြောက်ပိုင်း၊ ငန်းချောင်းကျေးရွာမှာ ဖေဖော်ဝါရီ ၂၁ ရက် နေ့လယ်ပိုင်းက ကျပ်သိန်း ၉,၅၀၀ ကျော်တန်ဖိုးရှိ WY စိတ်ကြွမူးယစ်ဆေးဝါးတွေ ဖမ်းဆီးရမိခဲ့တယ်လို့ နယ်ခြားစောင့်ရဲတပ်ဖွဲ့ကနေ သိရပါတယ်။

မနေ့ နေ့ခင်းပိုင်းက ကြိုတင်သတင်းရလို့ အမှတ် ၁ နယ်ခြားစောင့်ရဲတပ်ဖွဲ့မှ ရဲမှူးငြိမ်းချမ်းအောင် ဦးစီးပြီး တပ်ဖွဲ့ဝင် ၂၅ ယောက် ပါဝင်တဲ့အဖွဲ့က မောင်တောမြို့နယ် ငန်းချောင်ကျေးရွာရှိ နုရ်ဘော်ရှောရဲ့ နေအိမ်ကို သွားရောက်ရှာဖွေခဲ့ရာမှ နေအိမ်အပေါ်ထပ် အိပ်ခန်းအတွင်းက WY စိတ်ကြွမူးယစ်ဆေးပြား စုစုပေါင်း ၄၇၇,၇၅၀ ပြား ကာလတန်ဖိုး  ၉၅၅,၅၀၀,၀၀၀ ကျပ်ဖိုး ဖမ်းဆီးရမိခဲ့တာ ဖြစ်ပါတယ်။

နယ်ခြားစောင့်ရဲတပ်ဖွဲ့ တာဝန်ရှိသူတဦးက “ငန်းချောင်းကျေးရွာက နေအိမ်တအိမ်မှာ မူးယစ်ဆေး အစုအပြုံလိုက် ရောက်နေတဲ့သတင်း အတိအကျရရှိတဲ့အတွက် သွားရောက်ရှာဖွေခဲ့ကြတာ။ ဆေးပြား ၄ သိန်းကျော် ဖမ်းမိခဲ့တယ်။ ကာလတန်ဖိုးအရဆို သိန်း ၉,၅၀၀ ကျော်မယ်” လို့ အတည်ပြု ပြောပါတယ်။

ဖမ်းဆီးရမိတဲ့ နုရ်ဘော်ရှောကို သက်‌သေခံ မူးယစ်ဆေးဝါးတွေနဲ့အတူ ငါးခူရနယ်မြေရဲစခန်းမှာ မူး/စိတ် ဥပဒေပုဒ်မနဲ့ အမှုဖွင့်ထားပြီး မူးယစ်‌ဆေးဝါး လုပ်ငန်းတွေရဲ့ နောက်ကွယ်ကလူတွေကိုလည်း ရှာဖွေဖော်ထုတ်ဖမ်းဆီးနိုင်ဖို့ ကြိုးစားနေတယ်လို့ တာဝန်ရှိသူတွေထံက သိရပါတယ်။

စစ်တပ်အာဏာသိမ်းပြီးနောက်ပိုင်း ကချင်ပြည်နယ်မှာ မူးယစ်ဆေးဝါးသုံးစွဲသူတွေ ပိုမိုများပြားလာပြီး အသက်မပြည့်သေးတဲ့ လူငယ်တွေလည်း မူးယစ်ဆေးဝါး ရောင်းဝယ်သုံးစွဲမှု ပိုမိုများပြားလာတယ်လို့ ဒေသခံတွေထံက သိရပါတယ်။

အသက်မပြည့်သေးတဲ့ ၁၈ နှစ်အောက် လူငယ်တွေဟာ WY စိတ်ကြွဆေးပြားနဲ့ No.4 ဘိန်းဖြူ သုံးစွဲတာတွေ အရင်ကထက် ပိုများလာပြီး အရေးယူမှု အားနည်းတဲ့အတွက် မိဘတွေအနေနဲ့ စိုးရိမ်ပူပန်နေကြပါတယ်။

ဆွမ်ပရာဘွမ်မြို့ ဒေသခံတဦးက “မူးယစ်ဆေးဝါးသုံးစွဲတဲ့သူတွေထဲ စစ်အာဏာသိမ်းပြီး နောက်ပိုင်း အသက် ၁၅ နှစ်၊ ၁၆ နှစ် ဝန်းကျင်ကလေးတွေ ပိုများလာတယ်။ မူးယစ်ဆေး ရောင်းဝယ်သုံးစွဲလို့ ဖမ်းတာဆီးတာလည်း အတော်နည်းသွားပြီ။ လူရှင်းတဲ့လမ်းတွေမှာဆိုရင် ဘိန်းဖြူထိုးနေတာတွေ တွေ့နေရတော့ ကျနော်တို့အနေနဲ့ သားသမီးတွေ လမ်းမှားရောက်သွားမှာကို စိုးရိမ်ရတယ်” လို့ ပြောပါတယ်။

WY စိတ်ကြွရူးသွပ်ဆေးပြား၊ No.4 ဘိန်းဖြူ မူးယစ်ဆေးဝါး ရောင်းချသူတွေကို စစ်ကောင်စီတပ်ဖွဲ့ဝင်တွေက ဝင်ရောက်ဖမ်းဆီးတာရှိပေမဲ့ လိုင်းကြေးယူပြီး ဥပဒေမဲ့ ပြန်လွှတ်ပေးတာတွေလည်း ရှိနေပါတယ်။

ပူတာအိုဒေသခံတဦးက “မူးယစ်ဆေးဝါး ရောင်းသူတွေကို ရဲတပ်ဖွဲ့က ဝင်ဖမ်းတာရှိတယ်။ မနှစ်က မတ်လပိုင်းမှာ မြို့မရပ်ကွက်နဲ့ လုံးစွတ်ရပ်ကွက်ထဲ သတင်းရလို့ဆိုပြီး ၄ ကြိမ်လောက်ရှိတယ် ဝင်ဖမ်းတာ။ မကြာဘူး ၅ သိန်းပေးရပြီး ပြန်လွတ်လာတယ်။ ခုနောက်ပိုင်း အဲ့လိုမဟုတ်တော့ဘူး။ နယ်ထိန်းရဲ လေးငါးယောက်လောက်က ရောင်းချသူ အိမ်ထဲဝင်တယ်။ အိမ်ပေါ်မှာပဲ လိုင်းကြေးညှိတယ်။ လိုင်းကြေးကလည်း ၁၀ သိန်းအထက် ပေးရင် မဖမ်းတော့ဘူး” လို့ ပြောပါတယ်။

မူးယစ်ဆေးဝါး လက္ကားရောင်းချသူတွေဟာ စစ်ကောင်စီလက်အောက်ခံ ဒုစရိုက်နှိမ်နင်းရေး အဖွဲ့၊ မူးယစ်တပ်ဖွဲ့၊ နယ်ထိန်းတပ်ဖွဲ့ဝင်တွေကို တရားမဝင် လိုင်းကြေးပေး လာဘ်ထိုး ရောင်းချနေတာပါ။

မိုးညှင်းမြို့ခံတဦးက “မူးယစ်ဆေး လက္ကား လက်ကြီးသမားက ကျနော်တို့မြို့မှာ သုံးဦးလောက်ရှိတယ်။ သူတို့တွေကလည်း ဒုစရိုက်နှိမ်နင်းရေးအဖွဲ့၊ နယ်ထိန်းတပ်ဖွဲ့နဲ့ မူးယစ်တပ်ဖွဲ့စုတွေကို တရားမဝင် လိုင်းကြေးပေးပြီး လက်ခွဲလက်လီသမားတွေကို ဖြန့်ပြီး ရောင်းခိုင်းတယ်။ ရဲစခန်းနားမှာတင် အဖမ်းအဆီးမရှိ ရောင်းနေတာ။ စစ်အာဏာသိမ်းပြီးနောက်ပိုင်းမှ အသက်မပြည့်တဲ့ ကလေးတွေထဲမှာမှ မိန်းကလေးငယ်လေးတွေပါ မူးယစ်ဆေး သုံးစွဲလာတာ တွေ့ရတယ်” လို့ ပြောပါတယ်။

စစ်အာဏာမသိမ်းခင် ကချင်ပြည်နယ်အတွင်းက မြို့နယ်တချို့မှာ လူထုအခြေပြု မူးယစ်ဆေးဝါးတိုက်ဖျက်ရေးအဖွဲ့တွေက မူးယစ်ဆေးဝါးနဲ့ပတ်သက်လို့ အသိပညာပေးတာတွေ၊ တိုက်ဖျက်ရေးလုပ်ငန်းတွေ လုပ်ကိုင်ခဲ့တာ ရှိခဲ့ပေမဲ့ စစ်အာဏာသိမ်းပြီး နောက်ပိုင်းမှာတော့ လှုပ်ရှားမှုတွေ ပြုလုပ်နိုင်ခြင်း မရှိသေးပါဘူး။