ဆီဗီလာအသင်းနဲ့ ကစားရမယ့် ယူရိုပါလိဂ်ဒုတိယအကျော့ပွဲစဉ်မှာ ဒဏ်ရာရရှိနေတဲ့တိုက်စစ်မှူး ရက်ရှ်ဖို့ဒ်ပြန်လည်ပါဝင်ကစားလာနိုင်ကြောင်း နည်းပြတန်ဟတ်ဂ်က ပြောသွားပါတယ်။
ယူနိုက်တက်အသင်းရဲ့ ဂိုးသွင်းအများဆုံးကစားသမား ရက်ရှ်ဖို့ဒ်ဟာ အဲဗာတန်ကို ၂ ဂိုး ဂိုးမရှိနဲ့ အနိုင်ရခဲ့တဲ့ လိဂ်ပွဲစဉ်မှာ ပေါင်ခြံဒဏ်ရာရခဲ့တာဖြစ်ပြီး ဆီဗီလာနဲ့ နှစ်ဂိုးစီသရေကျခဲ့တဲ့ ပထမအကျော့ပွဲစဉ် ကိုလွဲချော်ခဲ့ပါတယ်။
သောကြာနေ့ကပြုလုပ်ခဲ့တဲ့ သတင်းစာရှင်းလင်းပွဲမှာတော့ ရက်ရှ်ဖို့ဒ် ပြန်လည်ပါဝင်နိုင်မယ်လို့ အတည်မပြုနိုင်သေးပေမဲ့ ပြန်လည်ပါဝင်နိုင်ဖို့ အခွင့်အလမ်းရှိနေ ကြောင်း နည်းပြတန်ဟတ်ဂ်ကပြောပါတယ်။
အင်္ဂလန်တိုက်စစ်မှူးဟာ တနင်္ဂနွေနေ့မှာကစားရမယ့် နော်တမ်ဟမ် ဖောရက်စ်နဲ့ပွဲကိုတော့ သေချာပေါက် လွဲချော်မှာဖြစ်ပါတယ်။
ယူရိုပါလိဂ်ပြိုင်ပွဲမှာ အစဉ်အလာရှိတဲ့ ဆီဗီလာအသင်းကို သတိထားယှဉ်ပြိုင်ရလိမ့်မယ်လို့ မန်ယူနည်းပြ အဲရစ်တန်ဟတ်ဂ်ကပြောပါတယ်။
မန်ယူအသင်းဟာ ယူရိုပါလိဂ်ချန်ပီယံ ခြောက်ကြိမ်အထိ စံချိန်တင်ရရှိထားတဲ့ ဆီဗီလာအသင်းနဲ့ ကွာတားဖိုင်နယ်အဆင့်မှာတွေ့ဆုံခဲ့တာပါ။
ဆီဗီလာဟာ အလွန်ကောင်းမွန်တဲ့ စံချိန်တင်ဆုဖလားတွေရရှိထားတာကြောင့် အတွေ့အကြုံရှိတဲ့ အသင်းဖြစ်နေပြီး သတိထားယှဉ်ပြိုင်ရမှာဖြစ်ကြောင်း နည်းပြတန်ဟတ်ဂ်ကပြောပါတယ်။
“ဆီဗီလာက ယူရိုပါလိဂ်မှာ အမှန်တကယ်အတွေ့အကြုံများတဲ့ အသင်းဖြစ်လို့ ခက်ခဲမဲ့ပွဲ ဖြစ်လာလိမ့်မယ်။ သူတို့က ချန်ပီယံဆုအများကြီးရထားတယ်။ သူတို့အသင်းအကြောင်း အသေးစိတ်တော့ မသိသေးပါဘူး။ ဒါကြောင့် အဲဒီအတွက် အာရုံစိုက်လုပ်ဆောင်သွားပါမယ်” လို့ နည်းပြတန်ဟတ်ဂ်က ပြောပါတယ်။
နောက်တစ်ဆင့်တက်နိုင်ဖို့ဆိုရင် အကောင်းဆုံးခြေစွမ်းထုတ်ပြနိုင်မှသာဖြစ်နိုင်လိမ့်မယ်လို့လည်း နည်းပြတန်ဟတ်ဂ်က ပြောသွားပါတယ်။
