တော်လှန်လူငယ်ရဲဘော်တယောက်ဖြစ်တဲ့ ကိုဗညားစိုးထက်ကို အကြမ်းဖက်စစ်ကောင်စီက ထောင် ၁၀ နှစ် မတရား ထပ်မံချမှတ်လိုက်တာကြောင့် သူ့ကို ချမှတ်ထားတဲ့ စုစုပေါင်း ထောင်ဒဏ် ၈၄ နှစ် ထိရှိလာပြီလို့ Yangon Revolution Force – YRF က ပြောပါတယ်။

ဒီပြစ်ဒဏ်တွေဟာ အမြင့်ဆုံးပြစ်ဒဏ်ချမှတ်ထားခံရမှုတွေထဲက တခုဖြစ်ပြီးတော့ ရဲဘော် ဗညားစိုးထက်ဟာ ဒီမတိုင်ခင်ကတည်းက ထောင်ဒဏ် ၇၄ နှစ်ချမှတ်ထားခံရပြီးဖြစ်တယ်လို့ ဆိုပါတယ်။

Yangon Revolution Force – YRF ကတော့ မြေပြင်တော်လှန်ရေးအဖွဲ့တဖွဲ့အနေနဲ့ အ ကြမ်းဖက်စစ်အုပ်စုကို ဆန့်ကျင်ကာ ရှေ့တန်းကနေ ရရာနည်းလမ်းနဲ့ တော်လှန်ကမ်ပိန်း တွေ၊ မြေပြင်လူထုသပိတ်လှုပ်ရှားမှုတွေနဲ့ စဉ်ဆက်မပြတ် လှုပ်ရှားနေတဲ့ အဖွဲ့တဖွဲ့ ဖြစ် ပါတယ်။

မြန်မာနိုင်ငံမှာတော့ အကြမ်းဖက် စစ်တပ်က မတရားအာဏာသိမ်းယူထားခဲ့တဲ့ ကာလဟာ ၂ နှစ်ကျော်ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေး မတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေး ကဏ္ဍတွေ အသီးသီးမှာ အဘက်ဘက်က ကျဆင်းနေခဲ့တာ ဖြစ်ပါတယ်။

ဒါ့အပြင် အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက် သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ် ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံပြည်သူ့ကာကွယ်ရေး တပ်တွေ၊ တိုင်းရင်းသားလက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

တဘက်မှာလည်း အာဏာသိမ်း အကြမ်းဖက်စစ်ကောင်စီက စစ်အာဏာသိမ်းမှုကို ဆန့် ကျင်ပြီး နွေဦးတော်လှန်ရေးမှာ ပါဝင်နေတဲ့ ဘယ်သူ့ကိုမဆို မတရားပုဒ်မတပ် ဖမ်းဆီးအ ရေးယူတာ၊ ညှဉ်းပန်းနှိပ်စက်သတ်ဖြတ်နေတာ ဖြစ်ပါတယ်။

အာဏာသိမ်းပြီးကတည်းကနေ ဒီကနေ့အထိ အကျဉ်းထောင်တွေမှာ ၁၇,၇၂၆ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၅,၇၂၄ ယောက်ကတော့ ထောင် ဒဏ် ချမှတ်ခံထားရတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေ အေပီပီ) က ထုတ်ပြန်ထားပါတယ်။

တော်လှန်ရေးနဲ့ ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်း သိမ်းခံနေရသူ အရေအတွက်ကတော့ ၁၁၁ ယောက် ရှိနေပြီး မျက်ကွယ် သေဒဏ်ချမှတ် ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ်ပြစ်ဒဏ်ချမှတ်ခံ ထားရတာကြောင့် သေဒဏ်ချမှတ်ခံထားရသူ စုစုပေါင်း ၁၅၃ ယောက် ရှိလာခဲ့ပြီ ဖြစ်ပါ တယ်။

ကရင်ပြည်နယ်၊ မြဝတီမြို့နယ်၊ မဲကနယ်ကျေးရွာအနီးမှာ ဖြစ်ပွားခဲ့တဲ့ ၂ ရက်တာ တိုက်ပွဲ တွေအတွင်း အကြမ်းဖက်စစ်ကောင်စီဘက်က ၂၄ ယောက် သေဆုံးပြီး တော်လှန်ရေး ပူး ပေါင်းတပ်ဖွဲ့တွေဘက်ကတော့ ၂ ယောက် ကျဆုံးခဲ့တယ်လို့ ကော်ဘရာစစ်ကြောင်းက ထုတ်ပြန်ပါတယ်။

တပ်မဟာ(၆) KNU/KNLA၊ ကော်ဘရာစစ်ကြောင်း(၁)၊ ကော်ဘရာစစ်ကြောင်း(၂)၊ ကျားသစ်နက်စစ်ကြောင်း၊ Federal Wings၊ Golden Eagle၊ ရောင်နီ စတဲ့ တော်လှန်ရေး ပူးပေါင်းတပ်ဖွဲ့တွေနဲ့ အကြမ်းဖက်စစ်ကောင်စီ ခလရ ၂၇၅၊ ခမရ ၃၅၅၊ ခလရ ၁၀၂၊ မ(၂)၊ ခလရ (၂၀၇)၊ BGF (၁၀၁၉)တပ်ရင်းတို့ကြား တိုက်ပွဲတွေ ဖြစ်နေခဲ့တာပါ။

ဧပြီ ၁၈ ရက်ည သန်းခေါင်ကျော် အချိန်ကစပြီးတော့ မဲကနယ်ကျေးရွာအနီး ကျောက်မိုင်းဒေသမှာ စစ်ကောင်စီဘက်က လက်နက်ကြီးပစ်ကူယူကာ မနက် ၅ နာရီအချိန်မှာ စစ် ကြောင်းထိုးတက်လာခဲ့တာကြောင့် နယ်မြေလုံခြုံရေးယူထားတဲ့ ပူးပေါင်းတပ်ဖွဲ့တွေနဲ့ ရင်ဆိုင်တိုက်ပွဲဖြစ်ပွားခဲ့ကာ စစ်အုပ်စုဘက်က ၄ ယောက်သေဆုံးပြီး ၅ ယောက် ထိခိုက် ဒဏ်ရာရခဲ့တာလို့ ဆိုပါတယ်။

အဆိုပါ တိုက်ပွဲတွင်းမှာတော့ 40mm (၁)လက်၊ အေကေ (၁)လက် တို့ကို သိမ်းဆည်း ရမိခဲ့ပြီး စစ်ကောင်စီဘက်က လက်နက်ကြီးနဲ့ အဆက်မပြတ် ပစ်ခတ်တာကြောင့် တော် လှန်ရေးပူးပေါင်းတပ်ဖွဲ့တွေဘက်က ၇ ယောက် ထိခိုက်ဒဏ်ရာရရှိခဲ့ပြီး ၁ ယောက် ကျ ဆုံးခဲ့တယ်လို့ ကော်ဘရာစစ်ကြောင်းက ပြောပါတယ်။

 ဒါ့အပြင် ဧပြီ ၁၉ ရက် ဒီကနေ့မှာလည်း မဲကနယ်ကျေးရွာအနီး ကျောက်မိုင်းဒေသမှာပဲ ညသန်းခေါင် ၁၂ နာရီလောက်ကစပြီး စစ်ကောင်စီဘက်က လက်နက်ကြီးတွေနဲ့ ပစ်ခတ် ပြီး စစ်ကြောင်းထိုးတက်လာခဲ့ပြီး ပူးပေါင်းတပ်ဖွဲ့တွေနဲ့ မနက် ၆ နာရီမှာ ထိတွေ့မှု တိုက် ပွဲတွေ ထပ်မံ ဖြစ်ပွားခဲ့တယ်လို့ သိရပါတယ်။

ဒီကနေ့ တိုက်ပွဲမှာတော့ အကြမ်းဖက်စစ်အုပ်စုဘက်က အယောက် ၂၀ သေဆုံးပြီး ၁၈ ယောက် ထိခိုက်ဒဏ်ရာတွေ ရရှိခဲ့ကာ အမ်အေ1 (၁)လက်၊ အမ်အေ2 (၁)လက်၊ အမ် အေ3 (၁)လက်၊ နာတိုပြောင်း (၁)ပြောင်း၊ 60mm ကွန်မန်ဒိုပြောင်း (၁)ပြောင်း၊ 60mm ပြောင်းရှည် (၁)ပြောင်း၊ နာတိုကျည် (၅၂၀)တောင့်၊ နာတိုကျည်ကြိုး (၁၂)ကြိုး၊ ကပစ ကျည် (၁၅၀၀)တောင့်၊ အေကေကျည် (၁၄၀)တောင့်၊ 60mm (၂၃)လုံး၊ အီနာဂါ (၁၈)လုံး၊ အီနာဂါပို့ကျည် (၂၀)တောင့်၊ 40mm (၃၉)လုံး၊ အမ်အေကျည်ဘောက် (၁၉)ဘောက်၊ အေကေကျည်ဘောက် (၁)ဘောက်၊ နင်းမိုင်း (၇)လုံး၊ လက်ပစ်ဗုံး (၂) လုံး တို့ကို သိမ်း ဆည်းရမိခဲ့တယ်လို့ ဆိုပါတယ်။

တိုက်ပွဲတွေအတွင်း စစ်ကောင်စီဘက်က အကျအဆုံးများတာကြောင့် ည ၈ နာရီခွဲ လောက်က စတင်ကာ လက်နက်ကြီးတွေနဲ့ လေကြောင်းအသုံးပြုကာ ၅ ကြိမ်ထက်မ နည်း တိုက်ခိုက်ခဲ့တာကြောင့် ကော်ဘရာစစ်ကြောင်းက  ရဲဘော် ၁ ယောက် ထပ်မံကျ ဆုံးခဲ့တယ်လို့ ထုတ်ပြန်ချက်မှာ ဖော်ပြပါတယ်။

ကရင်ပြည်နယ်၊ မြဝတီ၊ ရွေကုက္ကို၊ ကော့ကရိတ်မြို့နဲ့ တခြားမြို့တွေမှာ စစ်ကောင်စီ BGF ပူးပေါင်းတပ်တွေနဲ့ KNU၊ KNLA၊ PDF ပူးပေါင်းတပ်ဖွဲ့တွေ ပြီးခဲ့တဲ့ မတ် ၂၅ ရက်ကတည်းက စတင်ကာ ဆက်တိုက်ဆိုသလို တိုက်ပွဲဖြစ်ပွားနေတာပါ။

ပြီးခဲ့တဲ့ ဧပြီ ၁၂ ရက်နဲ့ ၁၃ ရက်နေ့တွေမှာတော့ မြဝတီမြို့နယ်ထဲက BGF အထိုင်စခန်း သိန်းတန်ကုန်းကို ကော်ဘရာ၊ ကျားသစ်နက် စတဲ့ ပူးပေါင်းမဟာမိတ်တွေ သိမ်းယူနိုင်ခဲ့ပြီး လက်နက်ခဲယမ်း အမြောက်အမြား သိမ်းဆည်းရမိကာ စစ်ကောင်စီတပ်သား ၁၀ ဦးထက်မနည်း သေဆုံးခဲ့ပါတယ်။