လှည်းကူးမြို့နယ် ကျောက်ကုတင်ကျေးရွာမှာ မတ် ၁၀ ရက် ည ၇ နာရီခွဲက နေအိမ်တအိမ် ဓား ပြတိုက်ခံရပြီး ငွေသိန်း ၁၀၀ ကျော်နဲ့ အိမ်စီးကားတစီး ယူသွားတယ်လို့ ဒေသခံတွေဆီက သိရပါတယ်။
ကျောက်ကုတင်ကျေးရွာနေ ဆောက်လုပ်ရေး နဲ့ အိမ်ခြံမြေလုပ်ငန်းလုပ်ကိုင်သူ ဦးကိုကိုရဲ့ နေအိမ်ကို အမည်မသိအမျိုးသား ၇ ယောက်က လက်နက်ကိုင်ဆောင်ကာ ဝင်လာပြီး ဓားပြတိုက်ခဲ့တာလို့ ဒေသခံတဦးက ပြောပါတယ်။
"ဓားပြတိုက်ခံရတဲ့အိမ်က လူဝင်လူထွက်များတယ်။ ညက ဓားပြတိုက်တော့လည်း လူအများကြီး လာတိုက်တာလို့ ကြားတယ်။ ဘယ်သူမှ မမေးရဲဘူး ခေါ်အစစ်ခံရမှာစိုးလို့။ ဒါပေမဲ့ ပွဲစားအချင်းချင်းဆိုတော့ သတင်းကညကတည်းက ပြန့်နေတာ ငွေကတော့ သိန်းရာချီနဲ့ မာစီဒီးတစီးပါသွားတယ်”လို့ ပြောနေကြတယ်။"
ဓားပြတိုက်သူတွေဟာ အိမ်ရှင်နဲ့မိသားစုတွေကို ဧည့်ခန်းမှာ ချုပ်နှောင်ထားပြီး ငွေသိန်း ၁၀၀ ကျော်နဲ့မာစီဒီးကားတစီးယူသွားတယ်လို့ ရဲတပ်ဖွဲ့နဲ့နီးစပ်သူတဦးက ပြောပါတယ်။
"လူကို ဘာမှမလုပ်သွားတာပဲ ကံကောင်းတယ်လို့ ပြန်ဖြေရမှာပေါ့။ ဓားပြတိုက်ခံရတာ လမ်းထဲ က လူတွေတောင်မသိဘူး။ စစ်သားတွေ ရဲတွေလာမှ သိတာ။"
လက်တလောအခြေအနေထိ စစ်ကောင်စီတပ်နဲ့ရဲတွေဟာ လှည်းကူးတာဆုံ၊ ဖောင်ကြီးလမ်းဆုံနဲ့ ဇရပ်ကွင်းလမ်းဆုံမှာ ပြစ်မှုကျူးလွန်သူတွေ ယူသွားတဲ့ မာစီဒီးကားကို စစ်ဆေးရှာဖွေပေမဲ့ ဖမ်းဆီးရမိခြင်း မရှိဘူးလို့ ဒေသခံတွေဆီက သိရပါတယ်။
၂၀၂၂ ခုနှစ် စက်တင်ဘာလကလည်း လှည်းကူးမြို့နယ် ငြိမ်းချမ်းရေးရပ်ကွက်က မှုခင်း သတင်းထောက် တယောက်ရဲ့ နေအိမ် ဓားပြတိုက်ခံရပြီး ရွှေငွေလက်ဝတ်လက်စား သိန်း ၃၀၀ ဖိုးလောက် ပါသွားခဲ့တဲ့ ဖြစ်စဥ်ကိုလည်း ဖမ်းဆီးရမိတာမရှိဘူးလို့ မြို့ခံတွေဆီက သိရပါတယ်။
မန္တလေး၊ ပြည်ကြီးတံခွန်မြို့နယ်၊ ဋ ရပ်ကွက်၊ ၄၄× ၁၃၆ လမ်းကြား၊ ညောင်ပင်ကုန်းကျေးရွာရှိ နေအိမ်တအိမ်မှာ ဖေဖော်ဝါရီ ၂၅ ရက် ည ၆ နာရီခွဲလောက်က ဓားပြတိုက်မှုတခု ဖြစ်ပွားခဲ့ပြီး အဲ့ဒီအိမ်ရောက်နေတဲ့ ဒုရဲမှူးတဦးကိုလည်း ဓားပြတွေက ပစ်သတ်ခဲ့တယ်လို့ မြို့ခံတွေက ပြောပါတယ်။
မန္တလေး၊ ပြည်ကြီးတံခွန်မြို့နယ်၊ ဋ ရပ်ကွက်၊ ၄၄× ၁၃၆ လမ်းကြား၊ ညောင်ပင်ကုန်းကျေးရွာရှိ နေအိမ်တအိမ်မှာ ဖေဖော်ဝါရီ ၂၅ ရက် ည ၆ နာရီခွဲလောက်က ဓားပြတိုက်မှုတခု ဖြစ်ပွားခဲ့ပြီး အဲ့ဒီအိမ်ရောက်နေတဲ့ ဒုရဲမှူးတဦးကိုလည်း ဓားပြတွေက ပစ်သတ်ခဲ့တယ်လို့ မြို့ခံတွေက ပြောပါတယ်။
“မြစ်ငယ်က ဒုရဲမှူး၊ အရင်က စက်မှုနယ်မြေစခန်းမှူးပါ။ စနေ၊ တနင်္ဂနွေဆို ဒီဘက်ကို လာတတ်တယ်။ အဲ့နေ့က လာတာ ရဲမှူးမိန်းမလည်း ပါလာတယ်၊ ညနေ မှောင်ချိန်လောက်က ဆိုင်ကယ် ၃ စီးနဲ့ အိမ်ထဲ ဝင်ပစ်သွားတာ၊ သေနတ်သံ ၂ ချက် ၃ ချက်လောက် ကြားရတယ်။ အိမ်က ကျန်တဲ့သူတွေ ဘာမှ မဖြစ်သွားဘူး၊ ပိုက်ဆံ သိန်း ၃၀၀ ကျော်လောက် ပါသွားတယ် ပြောတယ်။ အဲ့အိမ်က အိမ်ခြံမြေပွဲစားအိမ်ပါ" လို့ မိသားစုနဲ့ နီးစပ်သူတဦးက ပြောပါတယ်။
ပစ်ခတ်ခံရလို့ သေဆုံးသွားသူဟာ အမှတ် (၆) မြစ်ငယ်မီးရထားရဲတပ်ဖွဲ့က ဒုရဲမှူး ဝင်းမင်းသန့် ဖြစ်ပြီး ဓားပြတိုက်ခံရတဲ့အိမ်က အမျိုးသမီးဖြစ်သူနဲ့ မောင်နှမတော်စပ်တယ်လို့ သိရပါတယ်။
လူ ၇ ဦးပါ ဓားပြအဖွဲ့က အဆိုပါအိမ်ကနေ ရွှေ ၃ ကျပ်သားခန့် လက်ဝတ်ရတနာတွေ၊ ကျပ်ငွေ သိန်း ၃၀၀ ခန့်နဲ့ ပစ်သတ်ခံရသူ ဒုရဲမှူးကိုင်ဆောင်တဲ့ Webley ခြောက်လုံး ပြူး ၁ လက်၊ ကျည် ၁၈ တောင့်၊ စကားပြောစက် ၁ လုံးနဲ့ လွယ်အိတ် ၁ လုံးကို ယူဆောင်သွားပြီး ဆိုင်ကယ် ၃ စီးနဲ့ မောင်းထွက်သွားတယ်လို့ ဒေသခံတွေက ပြောပါတယ်။
ဓာတ်ပုံ ( Pan, Facebook)
