တနင်္သာရီတိုင်း မြိတ်ခရိုင်၊ မြိတ်နဲ့ ကျွန်းစုမြို့နယ်က ပျူစောထီးစာရင်းတွေကို မြိတ်ပြည်သူ့ကာကွယ်ရေးအဖွဲ့ကနေ ဖေဖော်ဝါရေ ၂၅ ရက်မှာ ထုတ်ပြန်ကြေညာလိုက်ပါတယ်။

မြိတ်ပြည်သူ့ကာကွယ်ရေးအဖွဲ့မှ တာဝန်ရှိသူ တဦးက “မြိတ်ပကဖအနေနဲ့ သူတို့ကို စကစ လက်အောက်ကနေ အမြန်ဆုံး နုတ်ထွက်ကြဖို့ တရားဝင် ထုတ်ပြန်ထားပြီးဖြစ်တယ်။ သူတို့တွေ ဘက်က နုတ်ထွက်ခြင်း မရှိဘဲ ဆက်လက်လုပ်ကိုင်နေတဲ့အတွက် ရရှိထားတဲ့ နာမည်စာရင်းကို ထုတ်ပြန်လိုက်ခြင်းဖြစ်တယ်”လို့ ပြောပါတယ်။

ထုတ်ပြန်လိုက်တဲ့ စာရင်းတွေထဲမှာ ပဲ့တိုင်ကျေးရွာ၊ စလွန်ကျေးရွာ၊ ကလွင်ကျေးရွာနဲ့ မြိတ်တောင်ကျေးရွာမှ ပျူစောထီးအယောက် ၁၀၀ရဲ့ နာမည်တွေပါဝင်တယ်လို့လည်း ထုတ်ပြန်ချက်အရ သိရပါတယ်။

မြိတ်ပကဖအဖွဲ့က မြိတ်မြို့နယ်အတွင်း တိုက်ပွဲဖော်ဆောင်နေပြီဖြစ်တဲ့အတွက် ပြည်သူလူထု အနေနဲ့ စစ်ရေး သတိရှိဖို့နဲ့ ခရီအသွားအလာ သတိထားပြီးသွားဖို့ လိုအပ်လိမ့်မယ်လို့ ပြောပါတယ်။

တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်မှာ စစ်ကောင်စီခန့် ကျေးရွာအုပ်ချုပ်ရေးမှူးဆိုသူအား တနင်္သာရီမြို့နယ် ပြည်သူ့ကာကွယ်ရေးအဖွဲ့ (တောင်ပံနီ) က ပစ်သတ်ခဲ့တယ်လို့ တနင်္သာရီပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။

ဖေဖော်ဝါရီ ၂၅ ရက်နေ့ မနက် ၆ နာရီလောက်က တနင်္သာရီမြို့ကနေ ‌ဆင်‌‌ခြေဖုံး‌ကျေးရွာအုပ်စု လယ်တောင်ကျေးရွာကို ဆိုင်ကယ်နဲ့ ပြန်လာတဲ့အချိန် ရွာအနီးလမ်းပေါ်မှာ သေနတ်နဲ့ပစ်သတ်ခဲ့တာလို့ ဆိုပါတယ်။

သေဆုံးသူအမျိုးသားမှာ စစ်ကောင်စီခန့် ဆင်ခြေဖုံးကျေးရွာအုပ်စုရဲ့ အုပ်ချုပ်ရေးမှူး အသက် ၄၀ ကျော်အရွယ် ဦးရန်အောင်စိုးဖြစ်တယ်လို့သိရပါတယ်။

ဒေသခံတဦးက “ဒီအုပ်ချုပ်ရေးမှူးက စစ်ကောင်စီနဲ့ပေါင်းပြီး ရွာမှာ နာမည်ဆိုးတွေထွက်နေတဲ့ တယောက်ပါ၊ စစ်ကောင်စီကိုသတင်းပေးနေတာ‌တွေလုပ်တယ်” လို့ ပြောပါတယ်။

တနင်္သာရီမြို့နယ်မှာ စစ်အုပ်ချုပ်ရေးကြေညာပြီးနောက်ပိုင်း စစ်ကောင်စီရဲ့ယန္တရားတချို့အား ရှင်းလင်းခဲ့ပြီး ‌နောက်ထပ် ပြည်သူနဲ့မပူးပေါင်းဘဲ ကျန်ရှိနေတဲ့ အုပ်ချုပ်ရေးမှူးတွေကိုလည်း စစ်ကောင်စီထောက်တိုင်တွေအဖြစ်သတ်မှတ်ပြီး ရှင်းလင်းသုတ်သင်သွားမယ်လို့ တနင်္သာရီပြည်သူ့ကာကွယ်ရေးအဖွဲ့က သတိပေးထုတ်ပြန်ထားပါတယ်။

စစ်ကိုင်းတိုင်း၊ ကောလင်းမြို့နယ်ဗျူဟာလမ်းပိုင်းမှာ ဘိန်းဖြူတွေ၊ ကျောက်စိမ်းတုံးတွေနဲ့အတူ အမျိုးသား နှစ်ယောက်ကို ဖမ်းဆီးရမိခဲ့တယ်လို့ ကောလင်းမြို့နယ် ပြည်သူ့အုပ်ချုပ်ရေး(ပအဖ)အဖွဲ့က ပြောပါတယ်။
ဒီဇင်ဘာ ၄ ရက် နေ့လယ်ပိုင်းက မန္တလေးကနေ မောင်းနှင်လာတဲ့ ပါဂျဲရိုးကားကို သတင်းအရ ရှောင်တခင်တားဆီးစစ်ဆေးခဲ့ရာ ကားမောင်းလာသူ အမျိုးသား တယောက်နဲ့ လိုက်ပါလာသူ အမျိုးသားတယောက်ဆီကနေ ဘိန်းဖြူ ကျောက်စိမ်းတုံးတွေ တွေ့ရှိခဲ့တာပါ။
"ဘိန်းဖြူတွေနဲ့ ငွေသား ကျပ်ဆယ့်‌ခြောက်သိန်းကျော်၊ နိုင်ငံခြားငွေလည်းပါတယ်။ ဆက်စပ်ပစ္စည်းတွေရှာရင်း သိမ်းဆည်းရမိတာ" လို့ ဒေသခံက ပြောပါတယ်။
ဖမ်းဆီးရမိတဲ့အထဲမှာ ဘိန်းဖြူ ဆပ်ပြာခွက်ပေါင်း (၁၁၀)နဲ့ ကျောက်စိမ်းတုံး ၂၃ လုံး သွေးပြီးသားကျောက်ချော ၉ လုံး၊ လက်ကိုင်ဖုန်း ၂ လုံး၊ Tablet ၁ လုံး ၊ Laptop ၁ လုံး၊ ကီးဘုတ် ၂ ခု၊ ကီလိုဂရမ်ချိန်စက် ၁ လုံး၊ ကျောက်ကြည့်ဓာတ်မီး ၁ လုံး၊ ဓား ၁ လက်၊ တော်ပါပြောင်း ၁ ခုပါဝင်ပါတယ်။
ဒါ့အပြင် မြန်မာငွေ ကျပ် ၁၆၈၂၀၅၀၊ ပိုက်ဆံအိတ် ၃ လုံး၊ နိုင်ငံခြားငွေ အမေရိကန် ဒေါ်လာ ၁၀ ဒေါ်လာ၊ ATM ကတ် ၁ ခုတို့ကို ကောလင်းမြို့နယ် ပြည်သူ့လုံခြုံရေးအဖွဲ့က ထုတ်ပြန်ထား ပါတယ်။