မကွေးတိုင်း၊ ပခုက္ကူမြို့နယ်မှာ မေလ ၇ ရက် မနက်ပိုင်းက စစ်ကောင်စီကား ၃ စီးမိုင်းဆွဲတိုက်ခိုက်ခံရကာ စစ်ကူလာတဲ့ ကား ၅ စီး ဒရုန်းနဲ့ ဗုံးကြဲတိုက်ခိုက်ခံခဲ့ရတယ်လို့ ပခုက္ကူမြို့နယ် ပကဖ ကနေ သိရပါတယ်။
ပခုက္ကူမြို့ဘက်ကနေ ထွက်လာတဲ့ စစ်ကောင်စီကား ၃ စီးကို မနေ့ မနက် ၅ နာရီလောက်က သာကြီးတောင်နားမှာ ပဒေသာမိုင်း ၁၄ လုံး နဲ့ မိုင်းဆွဲတိုက်ခိုက်ခဲ့တယ်လို့ ပခုက္ကူမြို့နယ် ပကဖကနေ ရဲ့ ပြန်ကြားရေးတာဝန်ခံ အတီးက ပြောပါတယ်။
“ကား ၂ စီးထိခိုက်ပျက်စီးသွားတယ်။ ပျက်စီးသွားတဲ့ကားကို သာကြီးတောင်ရေနံမြေမှာ ဝင်ပြင်တယ်လို့သတင်းရတယ်။ နောက်တစီးကကျတော့ Jammer ပါတော့ကျတော့ဆွဲလို့ မရဘူးဖြစ်နေတယ်။ အဲဒီကားပေါ်မှာလည်း စစ်(...)တွေပါတယ်လို့ ဆိုပါတယ်။ အဲဒီနောက် ပခုက္ကူမြို့ကနေ နောက်ထပ် ကား ၅ စီး စစ်ကူအနေနဲ့ကော ရိက္ခာအနေနဲ့ကော နောက်ထပ် ထပ်ထွက်လာတာ။ အဲဒီကားပေါ်မှာတော့ (....)အင်အားတယ်။ ကျနော်တို့က ကြိုစောင့်ပြီးတော့ အီနာဂါဗုံးသီး ၆ လုံးနဲ့ ဖြုတ်ချတိုက်ခိုက်ခဲ့လို့ ကားပေါ်တည့်တည့် ကျရောက်ပေါက်ကွဲခဲ့တယ်။”
အဲဒီတိုက်ခိုက်မှုကြောင် စစ်ကောင်စီဘက်က ၄ ယောက်ထက်မနည်း ဒဏ်ရာရရှိကာ ပခုက္ကူဆေးရုံမှာ အတွင်းလူနာအဖြစ် အရေးပေါ် ဆေးဝါးကုသမှုခံယူနေရပြီး သေဆုံးသူ ရှိမရှိကိုတော့ မသိရသေးဘူးလို့ ဆိုပါတယ်။
ပခုက္ကူမြို့နယ် ပကဖ တပ်ခွဲ(၁)ကတိုက်ခိုက်ခဲ့တာဖြစ်ပြီး PDF ရဲဘော်တွေ ထိခိုက်မှု မရှိဘူးလို့ ဆိုပါတယ်။
ပခုက္ကူမြို့နယ်မှာ ကန်တော်ကျေးရွာနားမှာလည်း မနေ့မနက်ပိုင်းက စစ်ကောင်စီယာဥ်တန်း မိုင်းဆွဲတိုက်ခိုက်ခံရပြီး ၂ ယောက်သေဆုံးကာ ၈ ယောက်ထက်မနည်း ဒဏ်ရာရရှိခဲ့တယ်လို့ မြိုင်ပကဖ ကနေ သိရပါတယ်။
မနေ့ မနက် ၈ နာရီခွဲလောက်က စစ်ကောင်စီတပ်သားတွေနဲ့ ရဲတွေလိုက်ပါလာတဲ့ ကား ၅ စီးကို ကန်တော်ရွာကို ဖြတ်သွားတဲ့အချိန်မှာ မိုင်းဆွဲတိုက်ခိုက်ခဲ့တယ်လို့ မြိုင်ပကဖ တပ်ရင်း(၁) တပ်ရင်းမှူး ဗိုလ်လက်ယာက ပြောပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ၈ ယောက် အပြင်းထန်ဒဏ်ရာရရှိခဲ့ပြီး မိုင်းဆွဲခံရတဲ့ ကားတစီးကတော့ ကမ္မမြို့နားကဂျိုးပျံရပ်ကွက်မှာ မီးလောင်သွားခဲ့တယ်လို့ ဆိုပါတယ်။
ပခုက္ကူမြို့ဘက်ကနေ ထွက်လာတဲ့ စစ်ကောင်စီယာဥ်တန်းကို မနက် ၈ နာရီ ၄၅ မိနစ်လောက်မှာ ကမ္မမြို့အနောက်ဘက်မှာ မြိုင်ပကဖတပ်ရင်း(၁)နဲ့ KMDF တို့ပူးပေါင်းပြီး မိုင်း ၆ လုံးနဲ့ မိုင်းဆွဲတိုက်ခိုက်ခဲ့လို့ စစ်ကောင်စီတပ်သား ၂ ယောက်ကားပေါ်ကပြုတ်ကျကာ သေဆုံးသွားတယ်လို့ ဗိုလ်လက်ယာက ပြောပါတယ်။
ပခုက္ကူမြို့နယ်မှာ မေလ ၄ ရက် မနက်ပိုင်းနဲ့ ညနေပိုင်းတွေမှာလည်း စစ်ကောင်စီကား ၂ စီး မိုင်းဆွဲတိုက်ခိုက်ခံရပြီး ၁ ယောက်သေဆုံးကာ ၇ ယောက်ဒဏ်ရာရရှိခဲ့တယ်လို့ မြိုင် ပကဖ ကနေသိရပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေနေကို သီးခြား အတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မရှိပါဘူး။
မကွေးတိုင်း၊ ပခုက္ကူမြို့နယ်မှာ ဧပြီ ၂၈ ရက် မနက်က ရေပန့်လာပြုပြင်တဲ့ ရဲတပ်သားတယောက် ပစ်ခတ်ခံရပြီး သေဆုံးခဲ့တယ်လို့ ပခုက္ကူမြို့နယ် ပကဖအဖွဲ့ကနေ သိရပါတယ်။
မြိုင်မြို့နယ်၊ ကိုင်းတောမရဲစခန်းကနေ ပခုက္ကူမြို့နယ်၊ ကမ္မမြို့ကို ရေပန့်လာပြင်တဲ့ ရဲတပ်သား ချင်းလေးကို မနေ့ မနက် ၉ နာရီ ၄၅ မိနစ်လောက်က ကမ္မ-မြိုင် လမ်းဆုံနားမှာ ပခုက္ကူမြိုနယ်ပကဖ တပ်ခွဲ(၁)က ပစ်ခတ်ရှင်းလင်းခဲ့တာလို့ ပခုက္ကူမြို့နယ် ပကဖရဲ့ ပြန်ကြားရေးတာဝန်ခံ အတီးက ပြောပါတယ်။
“အဲဒီရဲတပ်သား ရေပန့်သွားပြင်မှာကို သတင်းတချက်ထောက်ကာ အသေချာစောင့်ပြီးတော့မှ ဆိုင်ကယ်နဲ့ထွက်လာတဲ့အချိန် ကျနော်တို့ ပစ်ခတ်ရှင်းလင်းလိုက်လို့ နေရာမှာတင် ပွဲချင်းပြီး သေဆုံးတာဗျ။သူကတော့ အသက် အသက် ၂၃ နှစ်လောက်ရှိပြီး ဘာလက်နက်ခဲယမ်းမှ ပါမလာဘူး။”
ပခုက္ကူမြို့နယ် အနောက်ဘုန်းကံ ပျူစောထီးကျေးရွာကိုလည်း ဧပြီ ၂၃ ရက်က ပခုက္ကူမြို့နယ် ပကဖနဲ့ ညီနောင်မဟာမိတ်တပ်ဖွဲ့တွေပူးပေါင်းပြီး ရှော့တိုက်ဒုံး ၁၀ လုံးနဲ့ ပစ်ခတ်တိုက်ခိုက် ခဲ့ပါတယ်။
