ထိုင်းနိုင်ငံမြောက်ပိုင်း၊ ချင်းမိုင်မြို့မှာ နှစ်စဉ်ကျင်းပနေကျ ၄၆ ကြိမ်မြောက် အခမ်းနားဆုံး ပန်းပွဲတော်ကို ဖေဖော်ဝါရီ ၃ ရက်ကနေ ၁၅ ရက်အထိ ချင်းမိုင်မြို့၊ ကျုံးထောင့်ရှိ Nong Buak Haad ပန်းခြံမှာ ကျင်းပနေပါတယ်။

ဒီပန်းပွဲတော်ဟာ ချင်းမိုင်မြို့ရဲ့ အထင်ကရဖြစ်ပြီး ပွဲတော်အတွင်း စျေးရောင်းပွဲတော်၊ ပန်းအရောင်းပြခန်းတွေ၊ အလှဆင်ထားတဲ့ ပန်းရုပ်တုတွေနဲ့ ကျုံးဘေး ပန်းခြံအနီး လမ်းမတလျှောက် ပန်းအလှပြကားတွေ ခမ်းခမ်းနားနား ပြသထားပါတယ်။  

ချင်းမိုင်ပန်းပွဲတော်ကို နှစ်စဉ် ဖေဖော်ဝါရီလ ပထမပတ်ထဲ ကျင်းပလေ့ရှိရာ ကမ္ဘာလှည့် ခရီးသွားတွေနဲ့ ပြည်တွင်းခရီးသွားတွေ အများဆုံး လာရောက်ကြပါတယ်။ ပန်းပွဲတော်ကို ဖေဖော်ဝါရီ ၃ ရက်ကနေ ၅ ရက်အထိ ၃ ရက်တာ ကျင်းပမယ် ကြေညာထားပေမယ့် ခရီးသွားတွေ စိတ်ဝင်စားမှုများတာကြောင့် ဖေဖော်ဝါရီ ၁၅ ရက်အထိ ပြသဖို့ တိုးချဲ့လိုက်တာပါ။ 

ဒီပန်းပွဲတော်ကို ချင်းမိုင်စည်ပင်ဌာနကဦးစီး ကျင်းပတာဖြစ်ပြီး၊ အများပြည်သူ အပန်းဖြေရာ ပန်းခြံမှာ ဝင်ကြေးက အခမဲ့ပါ။ 

အရောင်အသွေးစုံတဲ့ ချင်းမိုင်ပန်းပွဲတော်ကို ၁၉၇၇ ခုနှစ်မှာ စတင်ကျင်းပခဲ့တာ ဒီနှစ်မှာ ၄၆ ကြိမ်မြောက် ရှိပြီဖြစ်ပါတယ်။

သတင်း/ဓာတ်ပုံ - ဇွဲသစ်

ထိုင်းနိုင်ငံမြောက်ပိုင်း၊ ချင်းမိုင်မြို့က နာမည်ကျော် ပန်းပွဲတော်ကို ဒီဇင်ဘာ ၁၆ ရက်ကနေ ဇန်နဝါရီ ၂၃ ရက်အထိ မြို့တော်ခန်းမအနီး ပန်းခြံမှာ ကျင်းပနေပါတယ်။

ပန်းခြံအတွင်း ဇုန် ၆ ဇုန် ခွဲထားပြီး၊  ဇုန် ၁ မှာ အပူပိုင်းမိုးသစ်တော အလှပန်းမျိုးစုံ၊ ဇုန် ၂ မှာ ဆောင်းရာသီပန်းတွေ၊ ဇုန် ၃ မှာ အပူပိုင်းဒေသပန်းတွေ၊ ဇုန် ၄ မှာ အရောင်အသွေးစုံပန်းတွေ၊ ဇုန် ၅ မှာ ခရမ်းရောင် လာဗင်ဒါပန်းခင်းနဲ့ ဇုန် ၆ မှာတော့ ထိုင်းနိုင်ငံရဲ့ အကြီးမားဆုံး ဂီတရေပန်းရှိုးနဲ့ ပန်းခင်းအလှတွေကို ခံစားရမှာ ဖြစ်ပါတယ်။

ပန်းမျိုးစုံ ပြသထားတဲ့ ချင်းမိုင်ပန်းပွဲတော်ကို ဒီကနေ့ ခရစ္စမတ်ညမှာ လာရောက် လည်ပတ်ကြတဲ့ ခရီးသွားဧည့်သည်တွေ အများအပြား ရှိနေပါတယ်။

ပန်းပွဲတော်ဝင်ကြေး အခမဲ့ဖြစ်ပြီး မနက် ၈ နာရီကနေ ည ၁၀ နာရီ အချိန်ထိ ဖွင့်လှစ်ပေးထားပါတယ်။ အရောင်အသွေးစုံတဲ့ ချင်းမိုင်း ပန်းပွဲတော်ကို ၁၉၇၇ ခုနှစ်ကနေ စတင်ကျင်းပခဲ့တာ ဖြစ်ပါတယ်။

Photo-ဇွဲသစ်