တရုတ်နိုင်ငံမြို့တော် ပေကျင်းကို မတ် ၂၂ ရက်က သဲမုန်တိုင်းတွေ သိပ်သိပ်သည်းသည်း တိုက်ခတ်ခဲ့တာကြောင့် မြင်နိုင်စွမ်း အပြင်းအထန်ထိခိုက်ခဲ့ပြီး အဆောက်အအုံတွေနဲ့ လမ်းတွေ ဖုန်ထူတွေအောက် ရောက်ကုန်ပါတယ်။

လူဦးရေ ၂၁ သန်းကျော်နေတဲ့ ပေကျင်းမြို့တော်မှာ လွန်ခဲ့တဲ့ ရက်အတော်ကြာကတည်းက သဲမုန်တိုင်းတွေ ကြုံတွေ့ခဲ့ရပြီးတဲ့နောက် အဝါရောင်အဆင့် သဲမုန်တိုင်းသတိပေးချက် ထုတ်ပြန်ခဲ့ရသလို လေထုညစ်ညမ်းမှုအဆင့် သိသိသာသာ တိုးမြင့်ခဲ့တာပါ။

မြေအောက်ရထားပေါ်မှာ ဖုန်နံ့ နံတာနဲ့ သူတို့အဝတ်အစားတွေပေါ်မှာ သဲတွေ တင်ကျန်ခဲ့တာကလွဲလို့ ဆိုးရွားတဲ့ရာသီဥတုကြောင့် လူအများစုရဲ့ နေ့စဉ် လုပ်ရိုးလုပ်စဉ်တွေကို မထိခိုက်ဘူးလို့ ဒေသခံတွေက ပြောပါတယ်။

ပေဂျင်းမြို့တော်မှာ ဗုဒ္ဓဟူးနေ့က လေထုအရည်အသွေး အညွှန်းကိန်း ၅၀၀ ထိ ရောက်ခဲ့ပါတယ်။ သဲမုန်တိုင်းတွေဟာ လေထုညစ်ညမ်းမှုအဆင့် ၆ ထိရောက်အောင် တွန်းပို့ခဲ့ပြီး ဒါဟာ လူ့ကျန်းမာရေးကို အလွန်အန္တရာယ်ဖြစ်စေနိုင်တယ်လို့  ပေကျင်းဂေဟဗေဒ ပတ်ဝန်းကျင်စောင့်ကြည့်ရေးစင်တာက ပြောပါတယ်။

ကြီးမားတဲ့ ဂိုဘီသဲကန္တာရနဲ့ နီးကပ်နေပြီး တရုတ်နိုင်ငံ မြောက်ပိုင်းတခွင် သစ်တောပြုန်းတီးမှုကြောင့် မတ်လနဲ့ ဧပြီလအတွင်း သဲမုန်တိုင်းတွေကို ပုံမှန်လိုလို ကြုံတွေ့ရလေ့ရှိပါတယ်။

တရုတ်နိုင်ငံ၊ မြို့တော်ပေကျင်းမှာ ၁၄ ကြိမ်မြောက် အမျိုးသားပြည်သူ့ကွန်ဂရက် (NPC) ရဲ့ ပထမဆုံး အစည်းအဝေးကို မတ် ၄ ရက်က ကျင်းပခဲ့ပြီး အမြဲတမ်းပါတီကော်မတီရဲ့ အမှုဆောင် ဥက္ကဋ္ဌတွေကို ရွေးချယ်ခဲ့ပါတယ်။ 

ပထမအကြိမ်အစည်းအဝေးအတွက် ကြိုတင်ပြင်ဆင်တဲ့ အစည်းအဝေးကိုတော့ မတ် ၄ ရက် အစောပိုင်းက ကျင်းပပြီး ကော်မတီဝင်တွေကို ရွေးချယ်ခဲ့ပါတယ်။

NPC ရဲ့ လုပ်ထုံးလုပ်နည်း စည်းမျဉ်းအရ၊ ၁၃ ကြိမ်မြောက် NPC ရဲ့အမြဲတမ်း ကော်မတီ ဥက္ကဌဖြစ်တဲ့ လီကျန်းရှုက သူ့လက်အောက်မှာရှိတဲ့ ကော်မတီရဲ့ အမှုဆောင်ဥက္ကဋ္ဌတွေကိုပထမ ဦးဆုံး ရွေးချယ်ခဲ့ပါတယ်။

ကျောက်လီကျိနဲ့ ၁၄ ကြိမ်မြောက် NPC ရဲ့ တခြားလက်ထောက် ၁၀ ယောက်တို့ဟာ အမြဲတမ်း ပါတီကော်မတီရဲ့ အမှုဆောင်ဥက္ကဋ္ဌတွေအဖြစ် ရွေးချယ်တင်မြှောက် ခံခဲ့ရပါတယ်။

အဲဒီနောက် ၁၄ ကြိမ်မြောက် NPC ရဲ့ ပထမအကြိမ်အစည်းအဝေးအတွက် အချိန်ဇယားကို အတည်ပြုခဲ့ပြီး မတ် ၅ ရက်မှာစပြီး မတ် ၁၃ ရက်မှာ  ပြီးဆုံးမှာ ဖြစ်ပါတယ်။

ဒီအစည်းအဝေးမှာ NPC နှစ်ပတ်လည် အစည်းအဝေးတွေ၊  စုံညီအစည်းအဝေးတွေအတွက် အမှုဆောင်ဥက္ကဋ္ဌတွေကို ရွေးချယ်ပြီး ဒုတိယအထွေထွေအတွင်းရေးမှူးနဲ့  အစည်းအဝေးအတွက် ပြောရေးဆိုခွင့် ရှိသူတို့ကို ရွေးချယ်တင်မြှောက် ခဲ့ပါတယ်။

မတ် ၇ ရက် ၁၂ နာရီကို အဆိုတင်သွင်းဖို့ နောက်ဆုံးရက်အဖြစ် အစည်းအဝေးက ဆုံးဖြတ်ခဲ့ပါတယ်။