ကုလသမဂ္ဂအတွင်းရေးမှူးချုပ်ဟောင်း ဘန်ကီမွန်းနှင့် စစ်ခေါင်းဆောင်တွေ့ဆုံ၊ မြန်မာ အရေးဆွေးနွေး

DVB

မြန်မာနိုင်ငံမှာရောက်ရှိနေတဲ့ The Elders အဖွဲ့ ဒုတိယဥက္ကဋ္ဌ၊ ကုလသမဂ္ဂအတွင်းရေးမှူးချုပ်ဟောင်း ဘန်ကီမွန်းဟာ ဧပြီ ၂၄ ရက်က  နေပြည်တော်မှာ  မြန်မာစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံခဲ့ပါတယ်။

ဒီလိုတွေ့ဆုံရာမှာ မြန်မာနိုင်ငံရဲ့ နောက်ဆုံးဖြစ်ပေါ်မှု အခြေအနေတွေနဲ့ ပတ်သက်လို့ အပြန်အလှန် အမြင်ချင်းဖလှယ် အပြုသဘောဆောင် ရင်းနှီးပွင့်လင်းစွာ ဆွေးနွေးခဲ့ကြတယ်လို့  စစ်ကောင်စီ ပြန်ကြားရေးက သတင်းထုတ်ပြန်ခဲ့ပေမဲ့ ဆွေးနွေးတဲ့ အကြောင်းအရာ အသေးစိတ်ကိုတော့ ပြောဆိုခဲ့တာမရှိပါဘူး။

• 

အဆိုပါတွေ့ဆုံပွဲကို စစ်ကောင်စီတွဲဖက်အတွင်းရေးမှူး ဒုဗိုလ်ချုပ်ကြီး ရဲဝင်းဦး၊ ဒုတိယ ဝန်ကြီးချုပ်နဲ့ ကာကွယ်ရေးဝန်ကြီး ဗိုလ်ချုပ်ကြီး မြထွန်းဦး၊ နိုင်ငံခြားရေးဝန်ကြီး ဦးသန်းဆွေ တို့တက်ရောက်ကြသလို The Elders အဖွဲ့ကလည်း ဘန်ကီမွန်းနဲ့အတူ ဩစတြေးလျနိုင်ငံဆိုင်ရာ ကိုရီးယားသံအမတ်ကြီးဟောင်း ကင်ဘွန်းယန်တို့လည်း တက်ရောက်ခဲ့ကြပါတယ်။

မစ္စတာ ဘန်ကီမွန်းနဲ့အဖွဲ့ကို ကာကွယ်ရေးဝန်ကြီး ဗိုလ်ချုပ်ကြီး မြထွန်းဦးကလည်း နေပြည်တော်ရှိ Jasmine  ဟိုတယ်မှာ သီးခြားတွေ့ဆုံပြီး မြန်မာနိုင်ငံရဲ့ နောက်ဆုံးဖြစ်ပေါ်တိုးတက်မှု အခြေအနေတွေကို အမြင်ချင်းဖလှယ် ဆွေးနွေးခဲ့တယ်လို့လည်းဆိုပါတယ်။

မစ္စတာ ဘန်ကီမွန်းဟာ ဒီခရီးစဉ်မှာ  နေပြည်တော်မှာ အကျဉ်းကျခံနေရတဲ့ ဒေါ်အောင်ဆန်းစုကြည်နဲ့ တွေ့ဆုံခွင့်ရဖို့ စစ်ကောင်စီကို တောင်းဆိုခဲ့တယ်လို့ သတင်းထွက်ပေါ်ခဲ့ ပေမဲ့ အတည်ပြုနိုင်ခြင်းမရှိသလို တွေ့ခွင့်ရတယ် မရဘူးဆိုတာလည်း မသိရသေးပါဘူး။

မစ္စတာ ဘန်ကီမွန်းဟာ ကုလသမဂ္ဂ အတွင်းရေးမှူးချုပ်အဖြစ် သူတာဝန်ယူခဲ့စဉ်က မြန်မာနိုင်ငံ နာဂစ်မုန်တိုင်းဘေးဒဏ်ခံခဲ့ရတဲ့  ၂၀၀၈ ခုနှစ် မေလမှာ  မြန်မာနိုင်ငံကို ပထမဆုံးအကြိမ် လာရောက်ခဲ့ဖူးပါတယ်။

အခုသွားရောက်တဲ့ မစ္စတာ ဘန်ကီမွန်းရဲ့ မြန်မာပြည်ခရီးစဉ်ဟာ ကိုရီးယားအစိုးရနဲ့ လုံးလုံးမပတ်သက်တဲ့အကြောင်း၊ ကိုရီးယားအစိုးရကစေလွှတ်တဲ့ တရားဝင်ခရီးစဉ်လည်း မဟုတ်ကြောင်းနဲ့ The Elders အဖွဲ့ရဲ့ အစီအစဉ်သာဖြစ်တယ်လို့ ကိုရီးယားသံရုံးက အေပီသတင်းဌာနကို ပြောထားပါတယ်။

နယ်လ်ဆင်မန်ဒဲလားတည်ထောင်ခဲ့တဲ့    The Elders အဖွဲ့ဟာ  ကမ္ဘာ့တဝန်း  ငြိမ်းချမ်းရေးနဲ့ လူ့အခွင့်အရေးနဲ့ ကိစ္စတွေနဲ့ ပတ်သက်ပြီး တဖက်တလမ်းကနေပါဝင်ကူညီဆောင်ရွက်ပေးနေတာ ဖြစ်ပြီး ဒီအဖွဲ့မှာ ငြိမ်းချမ်းရေးနိုဘယ်လ်ဆုရှင်တွေ၊ ဩဇာရှိပြီး လူအများလေးစားရတဲ့ ကမ္ဘာ့ခေါင်းဆောင်ဟောင်းတွေနဲ့ ပါဝင်ဖွဲ့စည်းထားတာဖြစ်ပါတယ်။  

Photo -CINCDS

မြန်မာနိုင်ငံမှာ စစ်တပ်က အာဏာသိမ်းပြီးတဲ့နောက် အကြမ်းဖက်မှုတွေ တိုးနေတာကို ဟန့်တားဖို့အတွက်  မြန်မာစစ်တပ်နဲ့ တိုက်ရိုက် တွေ့ဆုံဆွေးနွေးဖို့ ကုလသမဂ္ဂ အတွင်းရေးမှူးချုပ်ဟောင်း ဘန်ကီမွန်းက လက်ရှိ ကုလသမဂ္ဂအတွင်းရေးမှူးချုပ် အန်တိုနီယိုဂုတားရပ်စ်ကို  ဧပြီ ၁၉ ရက်က တိုက်တွန်းလိုက်ပါတယ်။ 

အရှေ့တောင် အာရှနိုင်ငံတွေအနေနဲ့ကလည်း  မြန်မာ့အရေး ဝရုန်းသုန်းကား အခြေအနေကို ပြည်တွင်းရေးအဖြစ် မပယ်ချသင့်ဘူးလို့လည်း ဘန်ကီမွန်းက ပြောပါတယ်။ 

ဖေဖော်ဝါရီ ၁ ရက်နေ့ အာဏာသိမ်းပြီးကတည်းက ကုလအတွင်းရေးမှူးချုပ်ရဲ့ မြန်မာဆိုင်ရာ အထူးသံတမန် ခရစ္စတင်းဘာဂျီနာဟာ   စစ်တပ်နဲ့ ဆက်သွယ်ခဲ့ပေမယ့် စစ်တပ်က သူ့ကို မြန်မာပြည် လာရောက်ခွင့်မပြုခဲ့ပါဘူး။ 

လက်ရှိအခြေအနေအရ အတွင်းရေးမှူးချုပ် ကိုယ်တိုင်က  မြန်မာစစ်တပ်နဲ့ တိုက်ရိုက်ညှိုနှိုင်းသင့်ကြောင်း ဒါမှ အကြမ်းဖက်မှု အရှိန်တိုးလာတာကို ဟန့်တားနိုင်မယ်လို့ ဘန်ကီမွန်းက ကုလသမ္မဂ လုံခြုံရေးကောင်စီ အစည်းအဝေးမှာ ပြောပါတယ်။ 

အဖွဲ့ဝင် ၁၀ နိုင်ငံရှိတဲ့ အရှေ့တောင် အာရှနိုင်ငံများအသင်း အာဆီယံကလည်း မြန်မာနိုင်ငံက အကြမ်းဖက်မှုတွေအတွက် နည်းလမ်းရှာဖို့ ကြိုးစားနေခဲ့ပါတယ်။ 

အာဆီယံဟာ မြန်မာ့လက်ရှိ အခြေအနေက အင်မတန်စိုးရိမ်စရာ ဖြစ်နေလို့ ပြည်တွင်းရေး သက်သက်လို့ မမှတ်ယူနိုင်တော့ဘူးဆိုတာ မြန်မာစစ်တပ်ကို ရှင်းအောင် ပြောရမယ်လို့ ဘန်ကီမွန်းက ပြောပါတယ်။

စစ်တပ်က အရပ်သားတွေအပေါ် လူ့အခွင့်အရေး ကျူးလွန်ဖောက်ဖျက်ပြီး လူသေစေလောက်တဲ့အထိ အင်အားသုံးနေတာဟာ အာဆီယံ ပဋိညာဉ်နဲ့ မကိုက်ညီဘူး၊ ဒီလုပ်ရပ်တွေဟာ နိုင်ငံတကာ ဥပဒေကို ချိုးဖောက်တာ ရှင်းနေတယ်။ ဒေသတွင်း တည်ငြိမ် လုံခြုံ ဘေးကင်းရေးကိုလည်းခြိမ်းခြောက်နေတယ်လို့ ဘန်ကီမွန်းက ပြောခဲ့ပါတယ်။

ဒါ့အပြင် မြန်မာအရေး ကြေညာချက် ထုတ်တာထက် ပိုပြီး တစုတစည်းတည်း အရေးယူဆောင်ရွက်ဖို့ကိုလည်း မစ္စတာဘန်က ကုလသမဂ္ဂ လုံခြုံရေးကောင်စီကို တိုက်တွန်းခဲ့ပါတယ်။

ကုလသမဂ္ဂအတွင်းရေးမှူးချုပ်ရဲ့ ပြောခွင့်ရသူ  စတက်ဖနီ ဒူဂျာရစ်ခ်ကတော့ “ ဂုတားရပ်စ်ဟာ  မြန်မာ့အရေး အင်မတန် တက်တက်ကြွကြွ ပါဝင်နေခဲ့တာ အချိန် အတော်ကြာပြီ၊ သူနဲ့ အထူးသံတမန်တို့ဟာ အမြဲအသင့် ဖြစ်နေတယ်. အကြမ်းဖက်မှု အဆုံးသတ်တာကို ကျနော်တို့ မြင်ချင်လှပြီ” လို့  ပြောပါတယ်။ 

ဒါ့အပြင် ကုလသမဂ္ဂ အတွင်းရေးမှူးချုပ်ဟောင်းများနဲ့ အကြီးတန်း အရာရှိများအသင်း ဒုဥက္ကဋ္ဌ ဘန်ကီမွန်းဟာ ကုလသမဂ္ဂ လုံခြုံရေးကောင်စီကို မြန်မာနိုင်ငံအတွင်း အကြပ်အတည်းတွေကို ရင်ဆိုင်ရာမှာ တိကျပြတ်သားတဲ့ ခြေလှမ်းတွေကို လှမ်းဖို့နဲ့ ဖွဲ့စည်းပုံ  အခြေခံဥပဒေအရ အုပ်ချုပ်ရေးကိုပြန်လည်ဖော်ဆောင်  ထောက်ခံဖို့ ဧပြီ ၂၀ ရက်မှာ ဆော်သြလိုက်ပါတယ်။ 

ကုလသမဂ္ဂနဲ့ ဒေသတွင်း အဖွဲ့အစည်းတွေအကြား  ပူးပေါင်းဆောင်ရွက်ဖို့ လိုအပ်ချက်နဲ့ ပတ်သက်တဲ့ အဆင့်မြင့်ဆွေးနွေးပွဲအတွင်း ဘန်ကီမန်းက ခုလို ပြောလိုက်တာလို့ the elders အဖွဲ့ကြီး ဧပြီ ၂၀ရက်မှာ သတင်းထုတ်ပြန်ပါတယ်။

အရပ်သားတွေကို လူသေတဲ့အထိ ရက်ရက်စက်စက် အင်အားသုံးတာ၊ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတ ဦးဝင်းမြင့်နဲ့ ထောင်ချီတဲ့ ဆန္ဒပြသူတွေကို ဖမ်းဆီးထိန်းသိမ်းထားတာကို ပြစ်တင်ရှုတ်ချတယ်လို့လည်း ဘန်ကီမွန်းက ပြောခဲ့ပါတယ်။ 

မြန်မာ့ အကြပ်အတည်းကို ငြိမ်းငြိမ်းချမ်းချမ်း ဖြေရှင်းရေးထောက်ခံပြီး တင်းမာမှု ဖြေလျှော့ဖို့ ကြိုးစားရေးအတွက်ဘက်အားလုံးက ကိုယ်စားလှယ်တွေနဲ့တွေ့ဖို့ မြန်မာပြည်ကို သွားရောက်လည်ပတ်ဖို့သူ မျှော်လင့်ထားခဲ့ပေမယ့် စစ်အာဏာပိုင်တွေက သူ့ရဲ့ တောင်းဆိုချက်ကို ငြင်းခဲ့တယ် လို့ ဘန်ကီမွန်းက ပြောပါတယ်။

မြန်မာ့အရေးနဲ့ ပတ်သက်ပြီး ကုလသမဂ္ဂ အာဆီယံနဲ့ ပိုကျယ်တဲ့ ဒေသတွင်းမှာ တစုတစည်းတည်း ညှိနှိုင်းအားထုတ်ဖို့ လိုအပ်တယ်။ ဒါမှသာ ကပ်ဆိုးကြီးကို ရှောင်ကွင်းပြီး မြန်မာနိုင်ငံကို ငြိမ်းချမ်းတဲ့ ဒီမိုကရေစီ အသွင်ကူးပြောင်းရေး လမ်းကြောင်းပေါ် ရောက်အောင် ကူညီနိုင်မယ်လို့ ဘန်ကီမွန်းက ပြောဆိုခဲ့ပါတယ်။

ကိုးကား- Reuters/ The Elders