အရှေ့အာဖရိက ကုန်းတွင်းပိတ် မာလာဝီနိုင်ငံမှာ အပူပိုင်းမုန်တိုင်း ဖရက်ဒ်ဒီကြောင့် ရေကြီးနစ်မြုပ်မှုဒဏ်ခံရပြီး မတ်လ ၁၂ ရက်အထိ  လူ ၄၀ ထက်မနည်း သေဆုံးတယ်လို့ အစိုးရတာဝန်ရှိသူတွေက ပြောပါတယ်။

ဘလန့်တိုင်းယားမြို့ရှိ လူနေရပ်ကွက်တခုမှာ ရွှံ့ရေတွေနဲ့ ဖုံးလွှမ်းခဲ့ပြီး ရှာဖွေရေးနဲ့ ကယ်ဆယ်ရေးလုပ်ငန်းတွေဟာ ပိတ်မိနေတဲ့ ရုပ်အလောင်းတွေကို ရှာဖွေဖို့ ကျောက်တုံးတွေကို တူးဖော်ခဲ့ကြပါတယ်။

မုန်တိုင်းဖရက်ဒ်ဒီဟာ မတ်လ ၁၁ ရက်က မိုဇမ်ဘစ်နိုင်ငံ အလယ်ပိုင်းကို ထိုးဖောက်ဝင်ရောက် တိုက်ခတ်ခဲ့ပြီး အဆောက်အဦတွေပေါ်က ခေါင်မိုးတွေ ကျွတ်ထွက်ကုန်ကာ ခယ်လာမားနား ဆိပ်ကမ်းတဝိုက်မှာ နေရာအနှံ့ ရေလွှမ်းမိုးမှုတွေခဲ့ပြီး နောက်မှာတော့ ကုန်းတွင်းပိုင်းဘက်ကို ဝင်ရောက်သွားခဲ့တာပါ။

မာလာဝီနိုင်ငံထဲမှာတော့ မုန်တိုင်းကြောင့် မိုးသည်းထန်စွာရွာသွန်းပြီး မြေပြိုမှုတွေလည်း ဖြစ်ခဲ့ပါတယ်။

မာလာဝီနိုင်ငံဟာ သမိုင်းတလျှောက် လူသေဆုံးမှုအများဆုံး ကာလဝမ်းရောဂါဖြစ်ပွားမှုကို ရင်ဆိုင်နေရတာဖြစ်ပြီး အခုလည်း မုန်တိုင်းအရှိန်နဲ့ မိုးသည်းထန်စွာ ရွာသွန်းတာကြောင့်လည်း အခြေအနေ ပိုမိုဆိုးရွားလာနိုင်ကြောင်း ကုလသမဂ္ဂအေဂျင်စီတွေက သတိပေးထားပါတယ်။

အပူပိုင်းမုန်တိုင်း ဖရက်ဒ်ဒီဟာ တောင်ပိုင်းကမ္ဘာခြမ်းမှာ မှတ်တမ်းတင်ဖူးသမျှ အပြင်းထန်ဆုံး မုန်တိုင်းတွေထဲက တခုဖြစ်ပြီး သက်တမ်းအကြာဆုံး အပူပိုင်း ဆိုင်ကလုန်းမုန်တိုင်း ဖြစ်လာနိုင်ကြောင်း ကမ္ဘာ့မိုးလေဝသအဖွဲ့ရဲ့ အဆိုအရ သိရပါတယ်။

မာလာဝီနိုင်ငံနဲ့ အိမ်နီးချင်း မိုဇမ်ဘစ်နိုင်ငံတွေကို အပူပိုင်းမုန်တိုင်း အန်နာက ဝင်ရောက် တိုက်ခတ်ခဲ့အပြီး ဇန်နဝါရီ ၂၆ ရက်က မာလာဝီနိုင်ငံတောင်ပိုင်း ချီကွာဝါမြို့က လမ်းပေါ်မှာ လူတွေ သောင်တင်နေပါတယ်။

ဇန်နဝါရီ ၂၄ ရက်ကတည်းက ချီကွာဝါမြို့နဲ့ ငါဘူမြို့တွေမှာ မုန်တိုင်းကြောင့် လူတွေ သောင်တင်နေတာလို့ ရုပ်သံရိုက်ကူးသူ ဂျရတ် အန်သာလာက ပြောပါတယ်။

အိမ်တွေ ရေစီးနဲ့ မျောပါသွားပြီး သစ်ပင်တွေကို ဖမ်းတွယ်ထားတဲ့ လူတွေက အကူအညီ အော်တောင်းနေခဲ့တယ်လို့ သူက ပြောပါတယ်။

မိုဇမ်ဘစ်နဲ့ မာလာဝီ ၂ နိုင်ငံထဲမှာ မုန်တိုင်း အန်နာကြောင့် သေဆုံးသူ ဦးရေ ၁၂ ဦးထက် မနည်းရှိနေပြီလို့ အာဏာပိုင်တွေက ပြောပါတယ်။

ဒါပေမယ့် အရာရှိတွေနဲ့ အကူအညီပေးရေး အဖွဲ့အစည်းတွေဟာ တောင်အာဖရိက တိုက်တလွှား တနင်္လာနေ့က တိုက်ခတ်ခဲ့တဲ့ မုန်တိုင်းရဲ့  သက်ရောက်မှုကို အပြည့်အဝ ချင့်ချိန်တွက်ချက်နေ ဆဲပါ။

မာလာဝီ နိုင်ငံထဲမှာတော့ မုန်တိုင်းကြောင့် ရေကြီးလို့ လျှပ်စစ်ဆိုင်ရာ ပံ့ပိုးမှု အင်္ဂါရပ်တွေ ပျက်စီးခဲ့တဲ့အတွက် အကြီးအကျယ် မီးပျက်နေတာပါ။

မိုဇမ်ဘစ်နိုင်ငံမှာတော့ ၂၄ နာရီအတွင်း လူ ၈၉၅ ယောက်ကို ဘေးကင်းရာ ရွှေ့ပေးခဲ့ရတယ်လို့ စီမံရေးနဲ့ ကပ်ဘေး လျော့ကျရေး အမျိုးသားအဖွဲ့က ဇန်နဝါရီ ၂၅ ရက်မှာ ပြောပါတယ်။

မိုဇမ်ဘစ်နဲ့ တခြား အာဖရိက တောင်ပိုင်း နိုင်ငံတွေဟာ ပြင်းထန်တဲ့ မုန်တိုင်းတွေနဲ့ ဆိုင်ကလုန်းမုန်တိုင်းတွေရဲ့ ဒဏ်ကို လတ်တလော နှစ်တွေမှာ ထပ်ခါတလဲ ရိုက်ခတ် ခံနေရလို့ အခြေခံအဆောက်အအုံတွေ ပျက်စီးပြီး လူတွေ အများအပြား နေရာ ရွှေ့ပြောင်းခဲ့ရပါတယ်။

ရာသီဥတု ပြောင်းလဲမှုကြောင့် ရေတွေ ပူနွေးလာတဲ့အတွက် မုန်တိုင်းတွေက အားပို ကောင်းလာပြီး ပင်လယ်ရေ မျက်နှာပြင် မြင့်တက်လာလို့ မြေနိမ့် ကမ်းရိုးတန်းဒေသတွေမှာ ဒဏ်ပိုခံရတယ်လို့ ပညာရှင်တွေက ပြောထားပါတယ်။