အမေရိကန်နိုင်ငံ၊ အလာဘာမားပြည်နယ် အလယ်ပိုင်းမှာ မိုးကြိုးမုန်တိုင်းတွေနဲ့ လေဆင်နှာမောင်း အနည်းဆုံး ၁ ခု တိုက်ခတ်ခဲ့မှုကြောင့် ဇန်နဝါရီ ၁၂ ရက်က လူ ၆ ဦး သေဆုံးခဲ့တယ်လို့ ဒေသဆိုင်ရာ တာဝန်ရှိသူတွေက ပြောပါတယ်။
ဆဲလ်မာမြို့မှာလည်း လေဆင်နှာမောင်း တိုက်ခတ်မှုကြောင့် နေအိမ်တွေ ပျက်စီးခဲ့သလို သစ်ပင်တွေလည်း အမြစ်ကနေ ပြုတ်ထွက်သွားကြတာပါ။
ဒါ့အပြင် လေပြင်းတိုက်ခတ်မှုနဲ့ မိုးသည်းထန်စွာ ရွာသွန်းမှုတို့ကြောင့် လူထောင်ပေါင်းများစွာဟာ လျှပ်စစ်ဓာတ်အား ပြတ်တောက်သွားတယ်လို့လည်း ရိုက်တာသတင်းဌာနအရ သိရပါတယ်။
ဒေသခံတဦးကတော့ ဒီလေဆင်နှာမောင်းက သူ့အိမ်ကို ဖြတ်တိုက်သွားခဲ့ပြီး သူကတော့ ရေချိုးကန်ထဲမှာ အကာအကွယ်ယူခဲ့ရကြောင်း ဒေသခံမီဒီယာတွေကို ပြောပါတယ်။
ဂျော်ဂျီယာနဲ့ မစ္စစ္စပီပြည်နယ်တို့မှာပါ ပြင်းထန်တဲ့ ရာသီဥတုဒဏ်ကို ခံစားခဲ့ရတယ်လို့ ရိုက်တာသတင်းမှာ ဖော်ပြထားပါတယ်။
ထိုင်းနိုင်ငံမြို့တော် ဘန်ကောက်နဲ့ အနီးတဝိုက် ဒေသတွေမှာ ဒီကနေ့ ဇွန် ၃ ရက်ကစတင်ကာ သီတင်းတပတ်အတွင်း နေရာကွက်ကျား မိုးကြိုးမုန်တိုင်းတိုက်ခတ်နိုင်တယ်လို့ ထိုင်းမိုးလေဝသဌာနက သတိပေးထားပါတယ်။
အနောက်တောင်မုတ်သုံလေဟာ ကပ္ပလီပင်လယ်ပြင်နဲ့ ထိုင်းပင်လယ်ကွေ့တို့မှာ အားကောင်းနေပြီး လာမယ့် ၇ ရက်အတွင်း အရှေ့မြောက်ပိုင်းနဲ့ တောင်ပိုင်းဒေသတွေမှာ မိုးသည်းထန်စွာ ရွာသွန်းနိုင်တယ်လို့လည်း ထုတ်ပြန်ထားပါတယ်။
တချိန်တည်းမှာပဲ မိုးသည်းထန်စွာရွာသွန်းမှုကြောင့် ကပ္ပလီပင်လယ်ပြင်နဲ့ ထိုင်းပင်လယ်ကွေ့တို့မှာ လှိုင်းအမြင့် ၂ မီတာအထိ မြင့်တက်နိုင်တာမို့ သင်္ဘောတွေ၊ လှေငယ်တွေကိုလည်း ကမ်းလွန်ပင်လယ်ပြင်တွင်း ရှောင်ရှားကြဖို့အတွက် မိုးလေဝသဌာနက သတိပေးထားတယ်လို့ ဆိုပါ တယ်။
လတ်တလောမှာတော့ ထိုင်းပင်လယ်ကွေ့အထက်ပိုင်းမှာ လှိုင်းအမြင့် ၁ မီတာကနေ ၂ မီတာအထိ ရှိနေပြီး မိုးကြိုးမုန်တိုင်းတိုက်ခတ်ချိန်နဲ့ မိုးသည်းထန်စွာ ရွာသွန်းချိန်တွေအတွင်းမှာတော့ ဒီ့ထက်ပိုပြီးတော့ မြင့်တက်နိုင်ကြောင်း ထုတ်ပြန်ထားတာပါ။
