စစ်ကိုင်းတိုင်းရဲ့ စစ်ကောင်စီတပ်များရုံးစိုက်ရာ မုံရွာမြို့ပေါ်မှာ လုယက်မှုတွေ နေစဉ်ဖြစ်နေပြီး တရားခံတွေကို ဖမ်းဆီးနိုင်ခြင်းမရှိသလို လုံခြုံမှုနဲ့ တရားဥဒေစိုးမိုးမှုမရှိတော့တာကြောင့် စီးပွားရေးလုပ်ငန်းရှင်တွေ၊ ဈေးဆိုင်ပိုင်ရှင်တွေနဲ့ ဒေသခံပြည်သူတွေ စိုးရိမ်နေရတယ်လို့ မြို့ခံတွေက ပြောပါတယ်။ 

မုံရွာမြို့ပေါ်မှာ မတ်လ ၂၆ ရက် မနေ့ မနက်က ကွေ့ကြီးရပ်ကွက်ရှိ စတိုးဆိုင် တဆိုင်မှာ ဆိုင်ရှင်ကို ဓားနဲ့ထောက်ကာ ငွေနဲ့ ဖုန်းတွေ လုယက်အနုကြမ်းစီးခံရသလို မုံရွာမြို့မှာ အခု မတ်လအတွင်းမှာ လုယက်မှု ၁၀ ခုကျော် ဖြစ်ပွားခဲ့ပါတယ်။

မုံရွာမြို့က နာမည်ကြီး ဖုန်းဆိုင်ပိုင်ရှင်တဦးက “ခေတ်ပျက်တယ်ဆိုတဲ့ အကြောင်းပြပြီး စစ်ကောင်စီဘက်က လုပ်နေတယ်လို့ပဲ ကျနော်ကထင်တယ်။ ဘာလို့လဲဆိုတော့ ပြည်သူတွေ အကြောက်တရားဖြစ်အောင် တမင်တကာကို လုပ်နေတာလို့ ပြောရမယ်။ သူတို့ နာရီနဲ့အမျှ လုံခြုံရေးကင်းပတ်နေတာပဲ။ ဒီလုယက်နေတဲ့ကောင်တွေ ဘယ်ကနေထွက်လာတာလဲ။ ပထမ လပ်ကီးဆင်နှစ်ကောင်တို့၊ သိန်းတရာရွှေဆိုင်တို့ အကြီးအကျယ်လုယက်နေတုန်းကတည်းက တရားခံကို မိအောင်မဖမ်းနိုင်ဘူး။ တခြားအသေးစားလုယက်မှုတွေလည်း အများအပြားရှိ‌တယ်။ တချို့က အသက်အန္တရာယ်ဖြစ်မှာကြောက်လို့ သတင်းမထုတ်ကြပဲ နေကြ‌တာတွေလည်း အများကြီးရှိတယ်။ အခုလိုဖြစ်နေတော့ ကိုယ့်အိမ်ထဲကိုယ်နေရတာတောင် လုံခြုံမှုမရှိတော့ဘူး”လို့ ပြောပါတယ်။

မုံရွာမြို့ပေါ်မှာ ပြီးခဲ့တဲ့ရက်ပိုင်းကလည်း ပေါ်ဦးရွှေဆိုင်လုယက်မှုဖြစ်ပွားခဲ့သလို မတ်လ ၂၅ ရက်ကလည်း ပြည်တော်သာရပ်ကွက်သစ်က နေအိမ်တစ်အိမ်မှာ  လက်နက်ကိုင် ၈ ဦးက နေအိမ်အတွင်း ဝင်ရောက်ပြီး ကားတစ်စီး၊ ဆိုင်ကယ်နှစ်စီး၊ ဖုန်းနဲ့ ပိုက်ဆံတွေ ယူဆောင်လုယက်သွားတယ်လို့  မြို့ခံတွေရဲ့ပြော ပြချက်အရသိရပါတယ်။

မုံရွာလျှပ်စစ်ပစ္စည်းဆိုင်ပိုင်ရှင်တစ်ဦးက “ မုံရွာက ဈေးဆိုင်တွေကတော့  မနက် ၉ နာရီလောက်စပြီးဆိုင်ဖွင့်ကြတယ်။ အရင်က မနက်ခင်း ၇ နာရီ ၈ နာရီမှာ ဆိုင်ဖွင့်ကြတယ်။ ညနေကြတော့လည်း ၄ နာရီ ၅ နာရီဆိုရင် ဆိုင်သိမ်းကြတယ်။ အရင်ကဆိုရင် ည ၈ နာရီ‌အထိ ဆိုင်ဖွင့်ကြတယ်။ ရောင်းချရတာလည်း မလွယ်ကူတော့ဘူးလေ။  ဘယ်နေ့ကိုယ့်ဆိုင် အလှည့်ကြလာမလားဆို‌တဲ့ စိုးရိမ်စိတ်ကြီးက အမြဲဝင်နေရတယ်။ စစ်ကောင်စီ အနေနဲ့လည်း ထိထိရောက်ရောက်မကိုင်တွယ်၊ မအုပ်ချုပ်နိုင်ဘူးဆိုရင် သိမ်းထားတဲ့အာဏာ ပြန်ပြီး ပေးလိုက်တော့လေ။ အခုဟာက ဟိုမနိုင်၊ ဒီမနိုင်နဲ့။ အခုဆိုရင် မြို့ပေါ်လုယက်တဲ့တရားခံကို တစ်ယောက်မှ မမိဘူးဆိုတာကတော့ အတော်လေး တရားလွန်လာသလို သူတို့ကိုပါ မြို့ခံပြည်သူတွေက အယုံကြည်မဲ့လာကြတယ်” လို့ ပြောပါတယ်။

မုံရွာမြို့မှာ မတ်လအတွင်း လုယက်အနုကြမ်းစီးခံရတာ ၁၀ ကြိမ်အထက်မှာရှိတယ်လို့ မြို့ခံတွေက ပြောဆိုကြပေမဲ့ လုယက်ခံရသူအသေးစိတ်ကို  လုံခြုံရေးအရ ကာယကံရှင်တွေက အမည်မဖော်လို ကြဘူးလို့လည်း မုံရွာဒေသခံတွေက ပြောဆိုပါတယ်။

မတ်လအတွင်း ချမ်းမြဝတီရပ်ကွက်က စားသောက်ဆိုင်တစ်ဆိုင်၊ အောင်မင်္ဂလာရပ်ကွက်က ဆိုင်ကယ်အပိုပစ္စည်းဆိုင်၊ ပြည်တော်သာရပ်ကွက်က အလှပြင်ဆိုင်တစ်ဆိုင်၊ ဗိုလ်ချုပ်လမ်းမကြီးပေါ်က ပေါ်ဦးရွှေဆိုင်နဲ့ မုံရွာမြို့တွင်းလမ်းမပေါ်မှာ လုယက်မှုတွေ ဖြစ်ပွားခဲ့တယ်လို့  ဒေသခံတွေထံက စုံစမ်းသိရပါတယ်။

အခုလို မြို့ပေါ်မှာ လုယက်မှုတွေ၊ အနုကြမ်းစီးတာ၊ ဓားပြတိုက်တာတွေနဲ့ ပတ်သက်ပြီး တရားခံတွေကို ဖမ်းမမိတာနဲ့ ပတ်သက်လို့ မုံရွာရဲတပ်ဖွဲ့ကို ဆက်သွယ်မေးမြန်းလို့ မရသေးပါဘူး။

စစ်ကိုင်းတိုင်း၊ မုံရွာမြို့၊ အောင်မင်္ဂလာရပ်ကွက်၊ ဗိုလ်ချုပ်လမ်းမပေါ်မှာရှိတဲ့ ပေါ်ဦးရွှေဆိုင်ကို မတ် ၂၁ ရက် နေ့လယ် ၁၂ နာရီကျော်ခန့်က ဓားပြတိုက်ခံရတယ်လို့ မြို့ခံတွေဆီက သိရပါတယ်။

မျက်နှာဖုံးစွပ်နဲ့ လူ ၅ ယောက်က  ပေါ်ဦးရွှေဆိုင်ကို ဝင်ရောက်ဓားပြတိုက်ခဲ့တာဖြစ်ပြီး  ရွှေထည်ပစ္စည်းနဲ့ ငွေကြေးတွေ ဘယ်လောက်ပါသွားတယ်ဆိုတာကိုတော့ မသိရသေးပါဘူး။

မျက်မြင်တွေ့သူတဦးက “သူတို့လာတာက အိမ်စီးကားလေးနဲ့ ရောက်လာတယ်။ ကိုယ်လည်း ခါတိုင်းလို ရွှေဝယ်သူတွေလို့ပဲ ထင်နေတာပေါ့။ နောက်တော့ ကားပေါ်ကနေ မျက်နှာဖုံးစွပ်တွေနဲ့ ၅ ယောက်လောက် ဆင်းလာတာ မြင်လိုက်တော့ ဓားပြတိုက်ပြီဆိုတာ သိလိုက်တယ်။ သူတို့ ဓားပြတိုက်လို့သာ တိုက်တာ၊ ရွှေဆိုင်နဲ့ အနီးအနားမှာ မြန်မာ့စီးပွားရေးဘဏ်ကို စောင့်နေတဲ့ စစ်သားတွေ၊ ရဲတွေလည်း ရှိတယ်။ သူတို့လှုပ်ရှားတာလည်း မြန်တယ်။ ဆိုင်ထဲ ၅ မိနစ်လောက်ပဲ ကြာတယ်။ ပြန်ထွက်လာပြီး ကားကို မောင်းသွားတယ်။ လုယက်သူ‌တွေရဲ့ အသက်အရွယ် ဘယ်လောက်ရှိနိုင်သလဲဆိုရင် အသက်က ၂၀ ကျော်နဲ့ ၃၀ လောက်တွေ ဖြစ်ဖို့များမယ်”လို့ ပြောပါတယ်။

စစ်ခေါင်းဆောင်မင်းအောင်လှိုင် မုံရွာမြို့ကိုလာရောက်ပြီး ရက်ပိုင်းအတွင်း လုံခြုံရေးတင်းကျပ် ချထားတဲ့ မုံရွာမြို့ရဲ့ အချက်အချာကျတဲ့နေရာမှာ ဓားပြတိုက်မှုဖြစ်ပွားတာဖြစ်ပေမဲ့ ဓားပြတွေကို ဖမ်းဆီးနိုင်ခြင်းမရှိပါဘူး။

မုံရွာ မြို့ခံစီးပွားရေးသမားတစ်ဦးက “ကျနော်တို့ မြို့ပေါ်မှာ ဒီလောက်အချက်အချာကျပြီး လူစည်ကားတဲ့နေရာမျိုးမှာ လုယက်ဓားပြတိုက်တာဟာ တော်ရုံလူတွေ မလုပ်ရဲဘူးလေဗျာ။ ပေါ်ဦးရွှေဆိုင်က မုံရွာမှာ နှစ်ဆိုင်ရှိတာ။ တဆိုင်က မြို့လယ်မီးပွိုင့်အနီးက ပင်မဆိုင်၊ အခု လုယက်ဓားပြတိုက်ခံရတဲ့ဆိုင်က ဟောင်ကောင်ဖုန်းဆိုင်အနီးက ဆိုင်သစ်လို့ ပြောတယ်ဗျ။ အဲဒီဆိုင်အနားမှာ ဈေးလည်းရှိတယ်။ ပြောချင်တာကဗျာ လူလည်းမပြတ်၊ အမြဲစည်ကားနေတဲ့နေရာကို အခုလို ဓားပြတိုက်တာကတော့ သာမန်အရပ်သားတို့၊ PDF တို့ ဘယ်လိုနည်းနဲ့မှ မဖြစ်နိုင်ဘူး။ ဗိုလ်ချုပ်လမ်းမပေါ်မှာ သူတို့ကင်းပုန်းတွေ မိုးလင်း၊ မိုးချုပ်အထိ ရှိတယ်။ ဒါကို အတိုက်ခံရတာဆိုတော့ စဉ်းစားသာကြည့်တော့ဗျာ”လို့ ပြောပါတယ်။

မုံရွာမြို့ပေါ်မှာ စစ်ကောင်စီ အာဏာသိမ်းပြီးချိန်ကစပြီး သိန်းတရာရွှေဆိုင်၊ ပေါ်ဦးရွှေဆိုင်အပြင် Mobile One ဖုန်းဆိုင်နဲ့ ကုန်စုံဆိုင် ၅ ဆိုင်ထက်မနည်း လုယက် ဓားပြတိုက်ခံခဲ့ရတာတွေ ရှိခဲ့ပါတယ်။

စစ်ကောင်စီအနေနဲ့လည်း ပြစ်မှုကျူးလွန်သူ တရားခံ တစ်ဦး တစ်ယောက်ကိုမှ မဖမ်းဆီးနိုင်သေးဘူးလို့ မုံရွာမြို့ခံတွေက ပြောပါတယ်။

မုံရွာဒေသခံက ပြည်သူ့ကာကွယ်ရေးတပ်ဖွဲ့တွေကလည်း PDF ရဲဘော်တွေအနေနဲ့ အဆိုပါ ဓားပြမှုတွေကို လုပ်ဆောင်ခဲ့တာမရှိဘူးလို့  ငြင်းဆိုထားပါတယ်။