ပါကစ္စတန်ဝန်ကြီးချုပ်ဟောင်း အင်မ်ရန်ခန်းဟာ မတ်လ ၁၃ ရက်က လာဟိုးမြို့မှာ သူ့ရဲ့ ရွေးကောက်ပွဲ မဲဆွယ်စည်းရုံးရေး စတင်ဖို့ လူထုစုဝေးပွဲတခုကို ဦးဆောင်ပြုလုပ်ခဲ့ပါတယ်။

စုဝေးပွဲဟာ ဇာမန်ပန်းခြံရှိ အင်မ်ရန်ခန်းရဲ့ နေအိမ်ကနေ စတင်ခဲ့ပြီး ထောက်ခံသူတွေဟာ မော်တော်ယာဉ်တွေနဲ့ရော ခြေလျင်နဲ့ပါ ကီလိုမီတာပေါင်းများစွာ ကွာဝေးတဲ့ လာဟိုးရှိ Data Darbar နတ်ကွန်းဆီကို ပါတီအလံတွေ ဝှေ့ယမ်းပြီး ခရီးနှင်ခဲ့ကြပါတယ်။

အင်မ်ရန်ခန်းဟာ သူ့ရဲ့ကားထဲကနေ လူထုအစုအဝေးကို မိန့်ခွန်းပြောကြားခဲ့ပြီး သူနဲ့ သူ့ရဲ့ ထယ်ရီကီအင်ဆာ့ဖ်ပါတီက တခြားခေါင်းဆောင်တွေကို ရွေးကောက်ပွဲတွေကနေ မောင်းထုတ်ဖို့ အစိုးရက အမှုတွေ ဖန်တီးလုပ်ဆောင်နေတာလို့ စွပ်စွဲခဲ့ပါတယ်။ သူဟာ မတ်လ ၁၉ ရက်မှာ လူထုစည်းဝေးပွဲကြီး ကျင်းပမယ်လို့လည်း ကြေညာခဲ့ပါတယ်။

အင်မ်ရန်ခန်းဟာ သူ့ရဲ့ ရွေးကောက်ပွဲ မဲဆွယ်စည်းရုံးမှု စတင်ဖို့ စီစဉ်ထားခဲ့တာဖြစ်ပြီး အစိုးရက နောက်ပိုင်းမှာ တားမြစ်ခဲ့တာပါ။ အဲဒီပွဲမတိုင်ခင် မတ်လ ၈ ရက်က လာဟိုးမြို့ အရှေ့ပိုင်းမှာ ပဋိပက္ခတွေ ဖြစ်ပွားခဲ့ပြီးနောက် ရက်ပိုင်းအကြာမှာ တနင်္လာနေ့ လူထုစုဝေးပွဲ ပေါ်ပေါက်လာတာပါ။

ပဋိပက္ခတွေကြောင့် နှစ်ဖက်စလုံးက လူအများအပြား ဒဏ်ရာရရှိခဲ့ကြောင်း အစိုးရဝန်ကြီးတဦးနဲ့ သူ့ရဲ့ပါတီက ပြောခဲ့ပါတယ်။

ဝန်ကြီးချုပ်ဟောင်း အင်မ်ရန်ခန်းဟာ မနှစ်က ပါလီမန်မှာ အယုံအကြည်မရှိအဆို တင်သွင်းခံရပြီး မဲဆန္ဒနဲ့ ဖြုတ်ချခံခဲ့ရပြီးကတည်းက ရွေးကောက်ပွဲရက်ကို စောပြီးကျင်းပပေးဖို့ တောင်းဆိုနေခဲ့တာပါ။

သူ့ကိုဆက်ခံတဲ့ ဝန်ကြီးချုပ်အသစ်ကလည်း တောင်းဆိုချက်ကို ပယ်ချခဲ့ပြီး စီစဉ်ထားတဲ့အတိုင်း ရွေးကောက်ပွဲတွေကို အခုနှစ်နှောင်းပိုင်းမှာ ကျင်းပသွားမယ်လို့ ပြောကြားထားပါတယ်။

စစ်ကိုင်းတိုင်း၊ ကလေးမြို့၊ မြို့သာရပ်ကွက်မှာ နိုဝင်ဘာ ၉ ရက် ဒီနေ့မှာ စစ်ကောင်စီတပ်သားတွေ၊ စစ်ကောင်စီခန့် ရပ်ကွက်အုပ်ချုပ်ရေးမှူးနဲ့ တပ်ထောက်ခံသူတွေက အစည်းအဝေးဆိုပြီး ၂၀၂၃ ရွေးကောက်ပွဲအတွက် စည်းရုံးခဲ့တယ်လို့ မြို့ခံတွေက ပြောပါတယ်။

နိုဝင်ဘာ ၈ ရက်က စစ်ကောင်စီခန့် ရပ်ကွက်အုပ်ချုပ်ရေးမှူးနဲ့ တပ်ထောက်ခံသူတွေ ရပ်ကွက်အတွင်းကို သုံးဘီးနဲ့လှည့်လည်ကာ စစ်‌ကြောင်း မြို့ပေါ်ရောက်ရှိလာပြီ၊ တအိမ်လျှင် တယောက် အိမ်ထောင်ဦးစီးကိုယ်တိုင် အစည်းအဝေးကို မဖြစ်မနေ တက်ရောက်ရမယ်လို့ အသံချဲ့စက်နဲ့ အော်ခဲ့ကြောင်း မြို့သာရပ်ကွက် ဒေသခံတွေက ဒီဗွီဘီကို ပြောပါတယ်။

“မြို့ပေါ်ကို စစ်ကြောင်းရောက်နေပြီပြောတယ်။ ဘာအဓိပ္ပာယ်လဲ ဆိုတာတော့ သိပ်နားမလည်ဘူး။ အစည်းအဝေးဆိုလို့ မဖြစ်မနေ တက်ရမယ်ပြောလို့ ကြောက်ကြောက်နဲ့ တက်ခဲ့ရတာ။”

အဲ့ဒီအစည်းအဝေးကို မြို့သာဘုန်းကြီးကျောင်းမှာ ပြုလုပ်ခဲ့တာဖြစ်ပြီး စစ်ကောင်စီတပ်သားတွေက လုံခြုံရေးယူကာ စစ်ဗိုလ်တွေနဲ့ ရပ်ကွက်အုပ်ချုပ်ရေးမှူးတွေက ၂၀၂၃ မှာ ရွေးကောက်ပွဲရှိတာကြောင့် မှတ်ပုံတင်မရှိတဲ့သူတွေ လုပ်ဆောင်ထားကြဖို့၊ အသက်ပြည့်တဲ့သူတိုင်း မဲပေးနိုင်ရေး၊ ကျောင်းသားတွေကို ကျောင်းထားကြဖို့၊ မြို့နယ်တည်ငြိမ်အေးချမ်းဖို့ ပြည်သူတွေ ပူးပေါင်းပါဝင်ဖို့ လိုအပ်ကြောင်း‌ ဟောပြောခဲ့တယ်လို့ အစည်းအဝေး တက်ရောက်ခဲ့သူက ပြောပါတယ်။

စစ်ကောင်စီတပ်သားတွေဟာ ကျေးရွာတွေဘက်ကို စစ်ကြောင်းထိုးပြီး ထိုးစစ်မဆင်ရဲတော့တာကြောင့် မြို့ပေါ်ကို ထိန်းချုပ်နိုင်အောင် ကြိုးစားနေတာဖြစ်တယ်လို့ ကလေး PDF အဖွဲ့ဝင်တယောက်က ပြောပါတယ်။

စစ်ကောင်စီကျင်းပဖို့ စီစဉ်နေတဲ့ ရွေးကောက်ပွဲကို ဒီမိုကရေစီအင်အားစုတွေနဲ့ နိုင်ငံတကာက အတုအယောင် ရွေးကောက်ပွဲအဖြစ် သတ်မှတ်ကြေညာထားပါတယ်။