ထိုင်း-မြန်မာနယ်စပ်၊ မဲဆောက်မြို့ရှိ ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR) ရုံးရှေ့မှာ မြန်မာဒုက္ခသည်အရေးနဲ့ ပတ်သက်ပြီး မတ်လ ၁ ရက် ဒီကနေ့ မနက်ပိုင်းက ဆန္ဒထုတ်ဖော်ခဲ့ကြပါတယ်။
Maesot Myanmar Refugee Voice အဖွဲ့က ဆန္ဒထုတ်ဖော်ခဲ့ကြတာဖြစ်ပြီး “UNHCR Hurry up”၊ “Save All The Refugee”၊ “Please Hurry up” စတဲ့ စာတန်းတွေကို ကိုင်ဆောင်ပြီး အသံတိတ် ဆန္ဒပြခဲ့ကြတာလည်း ဖြစ်ပါတယ်။
အဆိုပါဆန္ဒထုတ်ဖော်ခဲ့ကြတဲ့အဖွဲ့ဟာ ဖေဖော်ဝါရီလထဲမှာလည်း ဆန္ဒပြခဲ့ပြီး ခြိမ်းခြောက်ခံခဲ့ရတဲ့အတွက် မြေပြင်လှုပ်ရှားမှုတွေ ရပ်နားခဲ့ကာ ဒီကနေ့ မတ်လ ၁ ရက်မှ ပြန်လည်စတင်ခဲ့တာလို့ ဆိုပါတယ်။
ဒုက္ခသည်အရေးနဲ့ပတ်သက်ပြီး UNHCR အနေနဲ့ ဖြေရှင်းပေးဖို့ကိုလည်း စာပို့ထားခဲ့ပေမဲ့ အကြောင်းပြန်ခြင်း မရှိခဲ့တဲ့အတွက် ဆန္ဒထုတ်ဖော်ရတာဖြစ်ပြီး ထိုင်းနိုင်ငံ အချုပ်ထောင်ထဲမှာ ဖမ်းဆီးခံထားရတဲ့ မြန်မာနိုင်ငံသားတွေကိုလည်း ပြန်လည်လွှတ်ပေးစေချင်တယ်လို့ Maesot Myanmar Refugee Voice မှ တာဝန်ရှိသူတဦးက ဒီဗွီဘီကို ပြောပါတယ်။
“အခုလတ်တလောမှ UNHCR အနေနဲ့ လုပ်ငန်းတွေ ပြန်စနေပြီလို့ သိရတယ်။ ဒါပေမဲ့ ခွဲခြားဆက်ဆံခံနေရတယ်လို့ သံသယတွေ ရှိနေတယ်။ သူခေါ်ချင်တဲ့သူ ခေါ်သလို ဖြစ်နေတယ်။ အဓိကကတော့ ရုပ်ရှင်မင်းသား မင်းသမီးမို့လို့၊ နိုင်ငံရေးသမားမို့လို့ ခွဲခြားတာတွေ မလုပ်စေချင်ဘူး။ မြန်မာနိုင်ငံကနေ နိုင်ငံရေး၊ စစ်ရေး၊ အသက်အန္တရာယ်တွေအရ၊ ဒီနေရာကို တိမ်းရှောင်လာရတာ အတူတူ အကာအကွယ် ပေးတာတွေ တန်းတူဖြစ်စေချင်တယ်။”
အလားတူ ဖေဖော်ဝါရီ ၆ ရက်နဲ့ ၁၃၊ ၁၄၊ ၁၅ ရက်တွေကလည်း မဲဆောက်မြို့ မြို့နယ် အုပ်ချုပ်ရေးမှူးအိမ်နဲ့ မဲဆောက်အချုပ်ထောင်ရှေ့ အပါအဝင် UNHCR ရုံးရှေ့တွေမှာလည်း မြန်မာဒုက္ခသည်တွေကို လေးစားအသိအမှတ်ပြုဖို့ စာတန်းတွေကိုင်ဆွဲပြီး အသံတိတ် ဆန္ဒထုတ်ဖော်ခဲ့ကြပါသေးတယ်။
စစ်တပ်အာဏာသိမ်းပြီးနောက် အကြောင်းအမျိုးမျိုးကြောင့် ထိုင်းနိုင်ငံ နယ်စပ်မြို့ဖြစ်တဲ့ မဲဆောက်ကို ထွက်ပြေးတိမ်းရှောင်လာတဲ့ မြန်မာဒုက္ခသည်တွေကို ထိုင်းနိုင်ငံ လူဝင်မှုကြီးကြပ်ရေးဥပဒေနဲ့ ဖမ်းဆီးအရေးယူတာတွေ ရှိသလို အထောက်အထားမရှိတဲ့ သူတွေကို ထိုင်းအာဏာပိုင်တွေက ဖမ်းဆီးပြီး တရားမဝင် ငွေကြေးတောင်းခံနေတယ်လို့ သိရပါတယ်။
ထိုင်းနိုင်ငံ၊ မဲဆောက်မြို့က UNHCR ရုံးရှေ့မှာ မြန်မာ့ဒုက္ခသည်အရေးနဲ့ ပတ်သက်ပြီး အသံတိတ် ငြိမ်းချမ်းစွာ ဆန္ဒပြခဲ့တဲ့ Maesot Refugee Voice အဖွဲ့ကို အွန်လိုင်းကနေ ခြိမ်းခြောက်မှုတွေ ရှိလာတဲ့အတွက် ဆန္ဒထုတ်ဖော်တာတွေ ရပ်ဆိုင်းထားတယ်လို့ အဖွဲ့တာဝန်ရှိသူက ပြောပါတယ်။
ဖေဖော်ဝါရီ ၁၄ ရက်က UNHCR ရုံးရှေ့မှာ ဆန္ဒထုတ်ဖော်ခဲ့ပြီးတဲ့နောက် ဆန္ဒပြသူတွေဆီကို အွန်လိုင်းကနေ အကောင့်တုတွေနဲ့ မက်ဆေ့ချ်တွေပို့ပြီး ခြိမ်းခြောက်စာတွေ ပို့ခံရပြီးတဲ့နောက် ဖေဖော်ဝါရီ ၁၅ ရက် မနက်ပိုင်းမှာ နောက်ဆုံးအကြိမ် ဆန္ဒထုတ်ဖော်ခဲ့ပြီး အခုလို ရပ်နားလိုက်တာ ဖြစ်တယ်လို့လည်း ဆိုပါတယ်။
Maesot Myanmar Refugee Voice တာဝန်ရှိသူတဦးက “အကောင့်တုနှစ်ခု ပေ့ချ်တစ်ခုနဲ့ စာတွေပို့ပြီး ဆန္ဒတွေဆက်မပြဖို့ ဆန္ဒပြနေတဲ့သူတွေက ဘာတွေဖြစ်ချင်နေကြတာလဲ၊ အခုဆန္ဒပြနေတဲ့သူတွေအနေနဲ့ လုပ်ဆောင်မှုတွေကို ရပ်တန်းကရပ်ပြီး ရှေ့ဆက်မတိုးဖို့ သတိပေးစာတွေဝင်လာတယ်”လို့ ပြောတယ်။
အခုလို ခြိမ်းခြောက်စာတွေပို့နေတဲ့သူတွေဟာ ကမ်းကူးပြီး လူသယ်ပေးနေတဲ့အဖွဲ့လို့ယူဆပြီး အရင်က ဒုက္ခသည်စခန်းတွေကို အခုဆန္ဒပြတဲ့အဖွဲ့က သွားလှူတဲ့အချိန်မှာလည်း အနှောင့်ယှက်တွေရှိခဲ့တယ်လို့လည်း ပြောပါတယ်။
ဖေဖော်ဝါရီ ၁၅ ရက် မနက်ပိုင်း ဆန္ဒပြမှုမှာတော့ ဆန္ဒပြသူတွေက “UNHCR Save Burmese Refugee Quickly”၊ “Myanmar Refugee save”၊ “Recognize and accept Burmese Refugee”၊ “Do UNHCR Work” စတဲ့ဆိုင်းဘုတ်တွေ ကိုင်ဆောင်ပြီး အသံတိတ် ဆန္ဒပြခဲ့ကြတာလည်း ဖြစ်ပါတယ်။
ဆန္ဒပြသူတွေအနေနဲ့ ထိုင်းရဲနဲ့ တခြားအာဏာပိုင်တွေ ငွေညှစ်တာတွေကို ရပ်တန့်စေချင်ပြီး ဖမ်းဆီးခံထားရတဲ့ ဒုက္ခသည်တွေကိုလည်း ပြန်လည်လွှတ်ပေးဖို့ ဆန္ဒပြတောင်းဆိုမှုတွေကို ပြင်ပမှာလှုပ်ရှားတာ ရပ်နားထားပေမဲ့ အွန်လိုင်းလှုပ်ရှားမှုတွေကတော့ ဆက်ရှိနေဦးမှာ ဖြစ်တယ်လို့ Maesot Myanmar Refugee Voice တာဝန်ရှိသူတဦးက ဒီဗွီဘီကို ပြောပါတယ်။
စစ်တပ်အာဏာသိမ်းပြီးနောက် အကြောင်းအမျိုးမျိုးကြောင့် မဲဆောက်မြို့ကို ထွက်ပြေးတိမ်းရှောင်လာတဲ့ မြန်မာဒုက္ခသည် ၂ သိန်းဝန်းကျင်ထိရှိလာပြီး ဘန်ကောက်ထောင်နဲ့ မဲဆောက်နှစ်ထပ်အကျဥ်းဆောင်တွေမှာ ငွေမပေးနိုင်လို့ ဖမ်းဆီးခံထားရတဲ့ မြန်မာဒုက္ခသည်အရေအတွက် ၃၀၀ ဝန်းကျင်ရှိနေတယ်လို့ မဲဆောက်ရောက် ဒုက္ခသည်အရေး ဆောင်ရွက်ပေးသူတွေရဲ့ မှတ်တမ်းတွေအရ သိရပါတယ်။
