ထိုင်း-မြန်မာနယ်စပ်၊ တာ့ခ်ခရိုင်၊ ဖုပ်ဖရမြို့နယ်ထဲမှာ ဧပြီ ၂၅ ရက် မနေ့ညနေပိုင်းက မြန်မာလုပ်သား ၂ ဦး မိုးကြိုးပစ်ခံရပြီး သေဆုံးသွားတယ်လို့ ထိုင်းသတင်းတွေမှာ ဖော်ပြပါတယ်။ 

မနေ့ ညနေ ၃ နာရီခွဲလောက်က ဖုပ်ဖရမြို့နယ် ဆီရိရတ်ဆဒွန်းကျေးရွာအုပ်စု ဘန့်ဟွေ့ဖိုင်ကျေးရွာမှာ မိုးကြိုးပစ်ခံရပြီး သေဆုံးသူရှိကြောင်း အကြောင်းကြားချက်ရတဲ့အတွက် သွားရောက်စစ်ဆေးခဲ့တယ်လို့ ဆီရီရတ်ဆဒွန်းနယ်မြေရဲစခန်း တာဝန်ရှိသူက သတင်းထောက်တွေကို ပြောပါတယ်။

အခင်းဖြစ်တဲ့နေရာဟာ တောင်ပေါ်တောလမ်းဖြစ်ပြီး လဲကျနေတဲ့ အနက်ရောင်ဟွန်ဒါဝေ့ဖ် ဆိုင်ကယ်တစီးဘေးမှာ ခြံအလုပ်သမားဝတ်စုံနဲ့ ပက်လက်အနေအထား လဲကျသေဆုံးနေတဲ့ အမျိုးသား တယောက်ကို တွေ့ရတယ်လို့ ဆိုပါတယ်။ 

အဆိုပါ နေရာနဲ့ နောက်ထပ် ၃- ၄ မီတာအကွာအဝေးမှာတော့  နောက်ထပ်အမျိုးသမီး တယောက်ရဲ့ အလောင်းကို တွေ့ရှိရကြောင်း၊ သေဆုံးသူ နှစ်ယောက်လုံးရဲ့ ခန္ဓာကိုယ်မှာ မိုးကြိုးပစ်ခံထားရတဲ့ ဒဏ်ရာတွေ့ရှိတယ်လို့ ဆိုပါတယ်။ 

မျက်မြင်ရွာသားတွေ ပြောပြချက်အရ သေဆုံးသူတွေမှာ မြန်မာအလုပ်သမား မောင်နှမတော်စပ်ပြီး ဒီမတိုင်ခင်က တောထဲမှာ ဟင်းသွားရှာမယ်ဆိုပြီး ဆိုင်ကယ်နဲ့ တောင်ပေါ်တက်လာကြောင်း၊ တောင်ပေါ်တနေရာမှာ ရာသီဥတုရုတ်တရက်ပြောင်းလဲပြီး မိုးသားတွေမည်းလာကာ မိုးခြိမ်းသံတွေပါကြားရလို့ ရှေ့ဆက်မသွားတော့ဘဲ နောက်ကိုလှည့်ပြန်စဉ် မိုးကြိုးပစ်ခံရပြီး ဆိုင်ကယ်လဲကျသွားကာ နှစ်ဦးလုံးမှာလည်း လျှပ်စစ်စီးဝင်ဓာတ်လိုက်ခံရပြီး သေသွားတာလို့ ဆိုပါတယ်။

အဆိုပါနေရာဟာ ကျဉ်းမြောင်းတဲ့ တောင်ပေါ်လမ်းဖြစ်တဲ့အပြင် ရာသီဥတုလည်း ဆိုးရွားနေ တာကြောင့် ဘယ်သူကမှ ဝင်ကယ်လို့မရဘူးလို့ ရွာသားတွေက ပြောပါတယ်။

သေဆုံးသူ ၂ ဦးနဲ့ပတ်သက်လို့ AEC အာဆီယံသတင်းမှာတော့ အမျိုးသားမှာ အသက် ၂၁ နှစ်အရွယ် ကိုအားချင်နဲ့ အမျိုးသမီးမှာ အသက် ၂၀ နှစ်အရွယ် မမွှေးတို့ဖြစ်တယ်လို့ ဆိုပါတယ်။ 

ချနယ်လ် ၇ ထိုင်းတီဗွီသတင်းမှာတော့ အသက် ၃၅ နှစ်ရွယ် နဲ့ ၃၀ နှစ်ရွယ် မြန်မာအမျိုးသား ၂ ဦး လို့ ဖော်ပြပါတယ်။

သေဆုံးသူတွေကို ဓလေ့ထုံးစံအတိုင်းသင်္ဂြိုဟ်ဖို့ တာဝန်ရှိသူတွေက သက်ဆိုင်ရာဆွေမျိုးတွေကို အလောင်းလာယူဖို့ အကြောင်းကြားထားပြီး လတ်တလော ရာသီဥတုဖောက်ပြန်မှုရှိတာကြောင့် ပြည်သူတွေအနေနဲ့ သတိထားနေထိုင်ကြဖို့ သက်ဆိုင်ရာက သတိပေးထားပါတယ်။

တချိန်တည်းမှာပဲ မယ်လမတ်မြို့နယ်ထဲမှာ မိုးသက်လေပြင်းတိုက်ခတ်ခဲ့တာကြောင့် ဟွေ့နုတ်လဲ၊ မဲ့စလောဝ်း၊ ဆာမ်မိန်၊ မဲ့တိန် အစရှိတဲ့ ကျေးရွာအုပ်စုထဲမှာ နေအိမ် ၂၆ လုံးပျက်စီးခဲ့ပြီး သစ်ပင်ကြီးတွေ၊ ဓာတ်မီးတိုင်တွေ လဲပြိုခဲ့တယ်လို့ AEC အာဆီယံသတင်းမှာ ဖော်ပြပါတယ်။

ထိုင်းနိုင်ငံ၊ ချူဖွန်ခရိုင်မှာ  တရားမဝင် မြန်မာ ရွှေ့ပြောင်းလုပ်သား အယောက် ၂၀ ကျော်ကို မတ် ၃၀ ရက် ည ၁၀ နာရီခွဲတွင် ထိုင်းအာဏာပိုင်တွေက ဖမ်းဆီးခဲ့တယ်လို့ အမှတ် ၂၅ ထိုင်း ခြေလျင်တပ်ရင်းက ထုတ်ပြန်ထားပါတယ်။

အမျိုးသား ၁၆ ယောက်နဲ့ အမျိုးသမီး ၈ ယောက် ပါဝင်ပြီး လိုက်ပါပို့ဆောင်ပေးတဲ့ ထိုင်းနိုင်ငံသား ၃ ယောက်ကိုလည်း ထိုင်းအာဏာပိုင်တွေက ဖမ်းဆီးထိန်းသိမ်းထားတယ်လို့ ဖော်ပြထားပါတယ်။

ကားနှစ်စီးရဲ့ ကားနောက်ခန်းမှာ မြန်မာလုပ်သားတွေ လဲလျောင်းလိုက်ပါလာပြီး ထိုင်းနိုင်ငံရဲ့ အဝေးပြေးလမ်းက စစ်ဆေးရေး ဂိတ်တစ်ခုမှာ ဖမ်းဆီးခံရတယ်လို့ ရွှေ့ပြောင်းလုပ်သား ကူညီပေးသူ တဦးက ပြောပါတယ်။

မြန်မာလုပ်သားတွေဟာ  တယောက်ကို ပွဲစားခ ဘတ်ငွေ ၂၀၀၀ ပေးပြီး ပရာကျွတ်ခီရီခမ်ခရိုင် ကနေ ဆောင်ခလာခရိုင်၊ ဟက်ရိုင်မြို့သို့ အလုပ်သွားရောက် လုပ်ကိုင်မယ့် သူတွေလည်း ဖြစ်တယ်လို့ သိရပါတယ်။

အမှတ် (၂၅) ထိုင်းခြေလျင်တပ်ရင်းက တရားမဝင် မြန်မာလုပ်သားတွေနဲ့ လိုက်ပါ ပို့ဆောင်ပေးတဲ့ ထိုင်နိုင်ငံသားတွေကို ချူဖွန်ခရိုင် ဘန်းမာ့(ပ်)အန်(မ်)ရက်ရဲ စခန်းမှာ ဖမ်းဆီးထားပြီး ဥပဒေအရအရေးယူမယ်လို့ ထုတ်ပြန်ချက်မှာ ဖော်ပြထားပါတယ်။