အင်တာနက်ရတဲ့ ဘယ်နေရာကမဆို ပါဝင်ဆွေးနွေးပြောကြားနိုင်တဲ့ ဘားကမ့် ၂၀၂၃ ဆွေးနွေးပွဲကို မတ်လ ၁၉ ရက်က ကျင်းပသွားရာမှာ မြန်မာနိုင်ငံ ဒေသအနှံ့က လူငယ်ပေါင်း ၂၀၀၀ ကျော်လောက် ပါဝင်တက်ရောက် ဆွေးနွေးခဲ့တယ်လို့ ပွဲစီစဉ်သူတွေထံက သိရပါတယ်။

Work Adventure နဲ့ Jitsi အွန်လိုင်းပလက်ဖောင်းတွေကနေ  VarCamp 2.0   ခေါင်းစဉ်နဲ့   ရန်ကုန်၊ မန္တလေး၊ ပြည်၊ ပခုက္ကူ၊ တောင်ကြီး၊ တောင်ငူ၊ ပုသိမ်နဲ့ မိုးကုတ်စတဲ့ အခန်း ၈ ခန်း ပြုလုပ်ပေးထားရာမှာ လူငယ်တွေ ထောင်ချီပါဝင်တက်ရောက်ဆွေးနွေးခဲ့ကြတာဖြစ်ပါတယ်။

လူငယ်တွေအတွက် အလုပ်အကိုင် သက်မွေးဝမ်းကျောင်းဆိုင်ရာ လမ်းစတွေကို နယ်ပယ်စုံက ကျွမ်းကျင်သူပေါင်း ၄၀ ကျော်နဲ့အတူ နည်းပညာဆိုင်ရာ ခေါင်းစဥ်ပေါင်း ၄၀ ဝန်းကျင်ကို တက်ရောက်သူတွေက ပါဝင်ဆွေးနွေးခဲ့တယ်လို့လည်း ပွဲစီစဉ်သူတွေက ပြောပါတယ်။

Virtual Camp ဖြစ်တဲ့ VarCamp ဟာ အပြင်မှာကျင်းပတဲ့ BarCamp ပွဲတွေအတိုင်းဖြစ်ပြီး ထူးခြားတာကတော့ ကမ္ဘာ့ကပ်ရောဂါ ကိုဗစ်-၁၉ ရောဂါ ဖြစ်ပွားတဲ့ကာလမှာ အင်တာနက်တဆင့် Virtual Camp အနေနဲ့ ကျင်းပခဲ့ကြတဲ့အတွက် အင်တာနက်ရှိတဲ့ ကမ္ဘာ့ဘယ်နေရာကမဆို ပါဝင်ဆင်နွှဲနိုင်တာပဲဖြစ်ပါတယ်။

အခုလို ကာလမျိုးမှာ ကျောင်းလည်းနားထားရတော့ ရှေ့ဆက်အသက်မွေးဝမ်းကျောင်းလုပ်ဖို့ လမ်းပြမယ့်သူမရှိပဲဖြစ်နေရာကနေ အခုလို အွန်လိုင်းကနေ ဘားကမ့်ကျင်းပတာကို တက်ရောက်ခဲ့တဲ့အတွက် အများကြီးအမြင်ပွင့်သွားတယ်လို့ VarCamp 2.0 ကို ပါဝင်တက်ရောက်ခဲ့သူတဦးက ဒီဗွီဘီကိုပြောပါတယ်။

VarCamp ဆိုတာ ပုံမှန် ဟောပြောဆွေးနွေးပွဲတွေလို တစ်ချိန်တည်း အကြာကြီး ထိုင်နားထောင်နေရတာ၊ တစ်ယောက်တည်းက ပြောတာကိုပဲနားထောင်နေရတာမျိုးမဟုတ်ပဲ ကိုယ်တိုင်ဆွေးနွေးပေးဖို့ စိတ်ပါရင် နှစ်သက်ရာ အဆိုပြုခေါင်းစဥ်တစ်ခုနဲ့ လူငယ်တွေကို ဝင်ရောက်ဆွေးနွေးနိုင်တာဖြစ်ကာ လွတ်လပ်ပေါ့ပါးပြီး နှစ်လိုဖွယ်ကောင်းတဲ့ ရပ်ဝန်းတစ်ခုမှာ မိမိတို့ စိတ်ဝင်စားရာ အကြောင်းအရာတွေ နည်းပညာ အသစ်အသစ်တွေ ရင်ဘတ်ချင်း တူတဲ့သူတွေနဲ့ ထိတွေ့ရင်းနှီးခွင့်ရဖို့ အကောင်းဆုံး ပွဲတစ်ခုဖြစ်တယ်လို့လည်း ပွဲစီစဉ်သူက ဆိုပါတယ်။

မြန်မာနိုင်ငံရဲ့ ပထမဆုံး ဘားကမ့်ရန်ကုန် (BarCamp Yangon 2010) ကို ၂၀၁၀ ပြည့်နှစ်မှာ နည်းပညာအသိုင်းအဝိုင်းက လူငယ်တွေဦးဆောင် ပြုလုပ်ခဲ့တာဖြစ်ပြီး အဲဒီအချိန်ကစလို့ နိုင်ငံအနှံ့နဲ့  မြို့ကြီးတွေမှာ ဘားကမ့်ကျင်းပဖို့ စိတ်ဝင်စားကြတဲ့ လူကြီး လူငယ်တွေ စုပေါင်းပြီး မြို့အလိုက် ဘားကမ့်ပွဲတွေ နှစ်စဉ်ဆိုသလို ကျင်းပခဲ့ကြတာ ကိုဗစ်ရောဂါ ကပ်ဘေးမတိုင်ခင်အထိ ဖြစ်ပါတယ်။

အဲ့ဒီကာလအတွင်းမှာ တက္ကသိုလ် ကျောင်းသူကျောင်းသားတွေရဲ့ IT-Camp, ဓာတ်ပုံပညာရှင်တွေရဲ့ Photo Camp ၊ နည်းပညာ အသိုင်းအဝိုင်းရဲ့ Ubuntu Camp, Arduino Camp စတဲ့ သက်ဆိုင်ရာ နယ်ပယ်တွေအလိုက် ဘားကမ့်ပွဲတွေလည်း ပြုလုပ်နိုင်ခဲ့ကြပါတယ်။

စစ်တပ်အာဏာသိမ်းထားတဲ့ လက်ရှိ အခြေအနေအရ မြေပြင်ဆွေးနွေးပွဲတွေ မကျင်းပနိုင်သေးတဲ့ အချိန်အခါဖြစ်တာကြောင့် အွန်လိုင်းကနေ VarCamp (Virtual Camp) ကို ဘားကမ့်ပါ လက်ဟောင်းလက်သစ်တွေ ပူးပေါင်းအားထုတ်ပြီး ကျင်းပလာခဲ့တာ ၂၀၂၂ နဲ့ ၂၀၂၃ ခုနှစ် နှစ်ကြိမ်တိုင် ရှိခဲ့ပြီဖြစ်တယ်လို့ သိရပါတယ်။

ဓာတ်ပုံ - VarCamp

ပစ်တိုင်းထောင်လို့ နာမည်ပေးထားတဲ့ မြန်မာလူငယ် တစ်ယောက်ရဲ့ ဗိသုကာဒီဇိုင်းဟာ အခုဆိုရင်  နယူးဇီးလန် ဗိသုကာ အသိုင်းအဝိုင်းမှာ လူသိများနေပါပြီ။

မြန်မာပြည်က အိမ်တွေမှာ တွေ့ရလေ့ရှိတဲ့ ပစ်တိုင်းထောင်ကို နိမိတ်ပုံယူပြီး ဒုက္ခသည် စခန်းတခုကို စိတ်ကူးနဲ့ တည်ဆောက်ထားတဲ့ အော့ကလန်တက္ကသိုလ်က မဟာဘွဲ့ရ မြန်မာလူငယ် မြင့်ဆန်းအောင်ရဲ့ ဗိသုကာလက်ရာဟာ နယူးဇီလန်မှာ တနိုင်ငံလုံးအဆင့် ဆုတခု ရရှိထားပြီး၊ ထိပ်တန်းဗိသုကာအသင်းရဲ့ ဆန်ခါတင်ဆုတစ်ခုအဖြစ် ရွေးချယ်ခံထားရပါတယ်။

မြင့်ဆန်းအောင်ဟာ ဖခင်ဖြစ်သူ ကျောင်းသားတပ်မတော် (ABSDF)  ရဲဘော်ဟောင်း ဦးမြင့်အောင်၊ မိခင်ဒေါ်နီနီစမ်းတို့နဲ့အတူ ထိုင်းနိုင်ငံ ဒုက္ခသည်စခန်းကနေ ၂၀၁၁ ခုနှစ် သူ့အသက် ၁၂ နှစ်အရွယ်မှာ  နယူးဇီလန်နိုင်ငံကို ပြောင်းရွှေ့ အခြေချခဲ့ပါတယ်။ နယူးဇီလန်မှာ ကျောင်းတက်ခွင့်ရတဲ့အချိန်မှာ ဗိသုကာ ပညာရပ်ကို စတင်သူ စိတ်ဝင်စားခဲ့ပါတယ်။

အခုသူ့အသက် ၂၄ နှစ်ရှိပါပြီ။ ဒါပေမဲ့ လူမှန်းသိတတ်စအရွယ်က သူတက်ခဲ့ရတဲ့ ဒုက္ခသည်စခန်းထဲက စာသင်ကျောင်းလေး ဆုပေးပွဲနေ့မှာ ပြိုကျသွားတာကို သူ အခုထိ သတိရနေပါတယ်။

ထိုင်းနိုင်ငံ ဒုက္ခသည်စခန်းက မြန်မာဒုက္ခသည်တွေဟာ အပြင်ထွက် အလုပ်လုပ်ခွင့်မရဘဲ၊ ကုလသမဂ္ဂဒုက္ခသည်အေဂျင်စီရဲ့ ထောက်ပံ့ကြေး၊ ရိက္ခာနဲ့ အသက်ရှင်နေထိုင်ကြရပါတယ်။

ဒီအဖြစ်အပျက်တွေကို ငယ်ဘဝ မှတ်ဉာဏ်ထဲ စွဲနေတဲ့ မြင့်ဆန်းအောင်က ဖန်တီးပုံဖော်ထားတဲ့ ဒုက္ခသည်စခန်းမှာ လူတွေ ကိုယ့်ခြေထောက်ပေါ် ကိုယ်ရပ်တည်နိုင်ဖို့ စနစ်တကျ စိတ်ကူးထားတဲ့ စေတနာကို တွေ့နိုင်ပါတယ်။

ဒီစိတ်ကူးဟာ သူ့ရဲ့ ငယ်ဘ၀ အတွေ့အကြုံတွေအပေါ် အခြေခံထားတယ် ဆိုပေမဲ့ ဒီနေ့ ကမ္ဘာ့မှာ စစ်ကြောင့် အိုးအိမ်စွန့်ခွာရသူ သန်းပေါင်းများစွာအတွက်လည်း ရည်ရွယ်တာပါ။

ပစ်တိုင်းထောင်ဟာ မနှစ်တုန်းက New Zealand Institute of Architects ဗိသုကာအသင်းက ပေးအပ်တဲ့ နယူးဇီလန် တနိုင်ငံလုံးက ဗိသုကာကျောင်းသားတွေရဲ့ လက်ရာတွေထဲမှာ အကောင်းဆုံးအဖြစ် ရွေးချယ်ခံရပါတယ်။ အခုလည်း နယူးဇီလန်ရဲ့ ဂုဏ်သိက္ခာရှိတဲ့ ဒီဇိုင်း အသင်း Designers Institute of New Zealand  က ရွေးချယ်ထားတဲ့ အကောင်းဆုံး ဒီဇိုင်း လက်ရာတွေထဲမှာ  ဆန်ခါတင်စာရင်း ဝင်ပါတယ်။

စစ်တပ်အာဏာသိမ်းပြီးတဲ့နောက်မှာ မြန်မာပြည်မှာတော့  တက္ကသိုလ်တွေအပါအဝင်၊ ပညာရေးစနစ်တခုလုံး ကမောက်ကမ ဖြစ်နေပါတယ်။ မြန်မာပြည်ကို တခေါက်ပဲ ပြန်ရောက်ဖူးတဲ့ မြင့်ဆန်းအောင်က မြန်မာဗိသုကာကျောင်းသားတွေနဲ့ အွန်လိုင်းပေါ်မှာ အခု ပုံမှန်အဆက်အသွယ် လုပ်နေပါတယ်။ သူ့ရဲ့ ပညာရေးအတွေ့အကြုံတွေကို မျှဝေပေးသလို၊ မြန်မာပြည်က ကျောင်းသားတွေဆီကနေလည်း သင်ယူနေတယ်လို့ ပြောပါတယ်။ မြန်မာပြည်ကို သူ့နည်းသူဟန်နဲ့ ကူညီဖို့ ကြိုးစားနေတဲ့ သားအတွက် မြင့်ဆန်းအောင်ရဲ့ မိဘနှစ်ယောက်စလုံးက ဂုဏ်ယူနေကြပါတယ်။

မြင့်ဆန်းအောင်ကတော့ ဆုရတာဟာ သူ့အတွက် ဂုဏ်ယူစရာ ဖြစ်သလို၊ မြန်မာပြည်နဲ့ မြန်မာကျောင်းသားတွေရဲ့ ပါရမီနဲ့ အစွမ်းအစကို ဖော်ထုတ်ပြသနိုင်တဲ့ အခွင့်အရေးအဖြစ် ယုံကြည်နေပါတယ်။ မြန်မာပြည်က ပုဂံခေတ် ဗိသုကာ လက်ရာတွေ အပါအဝင် ရှေးဟောင်း ဗိသုကာလက်ရာတွေကို လေ့လာဖို့လည်း သူက မျှော်လင့်နေပါတယ်။

Photo Credit- nzia.co.nz