အခုနှစ် သရက်သီးတင်ပို့ရာသီမှာ အသီးအထွက်နှုန်း လျော့ကျနေတာကြောင့် တင်ပို့မှု လျော့နည်းနိုင်တယ်လို့ မူဆယ်အခြေစိုက် သစ်သီးဝလံကုန်သည်ကြီးတွေက ခန့်မှန်းထားကြပါတယ်။

ဒါ့အပြင် သရက်သီးအထွက်နှုန်း နည်းတာကြောင့် သရက်သီးဈေးကောင်းရမယ့်နှစ်လို့လည်း မူဆယ် နယ်စပ်စျေးကွက် ကျွမ်းကျင်သူတွေက သုံးသပ်ထားကြတာပါ။

မူဆယ်အခြေစိုက် သစ်သီးဝလံကုန်သည်တဦးက “ဒီနှစ်က သရက်သီး သီးအားနည်းတယ်။ ဒါကြောင့် ဈေးကောင်းမယ်လို့ ခန့်မှန်းနေကြတာ။ အရည်အသွေးကောင်း အသီးတွေ များလာပြီး ဝယ်လိုအားကောင်းလာရင် ဈေးကောင်းမှာပါ။ ဒီနှစ်က သရက်သီးအထွက်ပါးပြီး တင်ပို့မှုနည်းမယ့်နှစ်” လို့ ပြောပါတယ်။

ကိုဗစ်ကာလအလွန် မူဆယ်-ဝမ်တိန်-ရွှေလီ လမ်းပန်းဆက်သွယ်ရေး ပုံမှန်လည်ပတ်နေပါက မနှစ်ကထက် ပိုပြီး သရက်သီး အဝယ်လိုက်လာနိုင်တယ်လို့လည်း ကုန်သည်တွေက ခန့်မှန်းသုံးသပ်ထားကြပါတယ်။

မြန်မာ့သရက်သီးတွေကို မူဆယ်လမ်းကြောင်းကနေ တရုတ်နိုင်ငံကို အဓိက အများဆုံး တင်ပို့နေတာဖြစ်ပြီး ပြီးခဲ့တဲ့ရက်ပိုင်းက မူဆယ်စျေးကွက်မှာ အရည်အသွေးကောင်း စိန်တလုံးသရက်သီး တချင်းကို တရုတ်ယွမ်ငွေ ၁၈၀ အထိ စျေးရရှိခဲ့တယ်လို့ သိရပါတယ်။

မူဆယ်အခြေစိုက် အတွေ့အကြုံရင့် သစ်သီးကုန်သည်ကြီးတွေကတော့ သရက်သီးရှားမယ့် နှစ်မှာ မရင့်မှည့်သေးတဲ့ နုသီးတွေကို ခူးဆွတ်တင်ပို့တာနဲ့ စျေးကွက်ကို မဖျက်ကြဖို့ သတိပေးထားပါတယ်။

“ကျနော်ပြောချင်တာက သရက်စိန်ရှားမယ့်နှစ်မှာ အမှန်အကန် လမ်းကြောင်းသွားမယ်။ စိန်ရဲ့ အနေအထား မပျက်ယွင်းဖို့အတွက် အားလုံး အားစိုက်စေချင်ပါတယ်” လို့ စိန်တလုံးသရက် စိုက်ပျိုးထုတ်လုပ်ရောင်းချသူ လုပ်ငန်းရှင်တဦးက ပြောပါတယ်။

မူဆယ် သရက်သီးဈေးကွက်ဟာ မြန်မာ့နှစ်သစ်ကူး သင်္ကြန်အပြီးကာလမှာ စတင်ပါတယ်။ လက်ရှိမှာတော့ မန္တလေး၊ ကျောက်ဆည်နဲ့ စဉ့်ကိုင်မြို့တို့က သရက်ခြံတွေမှာ စိန်တလုံး သရက်သီးတွေ စတင်ရင့်မှည့်လာပြီး အရောင်းအဝယ် ပြုလုပ်နေကြတယ်လို့ သိရပါတယ်။

မြန်မာ့ စိန်တလုံးသရက်သီးကို တရုတ်အပြင် စင်ကာပူဈေးကွက်ကိုလည်း အထိုက်အလျောက် တင်ပို့နေတယ်လို့လည်း သိရပါတယ်။

တရုတ်နိုင်ငံကို မူဆယ်နယ်စပ်ကနေ တင်ပို့မယ့် ပို့ကုန်တွေထဲက သရက်သီးကို Green Channel ဦးစားပေးအနေနဲ့ အချိန်တိုအတွင်း တင်ပို့ခွင့်ရရှိဖို့ တရုတ်ဘက်နဲ့  ညှိနှိုင်းနေပေမဲ့ အဖြေမရရှိသေးဘူးလို့ မူဆယ်အခြေစိုက် ခွာညိုသစ်သီးပွဲရုံက ပြောပါတယ်။

အရင်ကတော့ ကြာရှည်အထားမခံ ပုပ်သိုးပျက်စီးလွယ်တဲ့ သစ်သီးဝလံ၊ ရေထွက်ကုန်နဲ့ လယ်ယာထွက် ပို့ကုန်တွေကို ပျက်စီးဆုံးရှုံးမှု နည်းပါးစေဖို့အတွက် ဦးစားပေးအစီအစဉ် Green Channel နဲ့ တင်ပို့ခွင့်ပြုခဲ့ပါတယ်။

ဒါကြောင့် အဲဒီအစီအစဉ်နဲ့ ဦးစားပေး တင်ပို့ခွင့်ရဖို့ တရုတ်ဘက်နဲ့ ညှိနှိုင်း ဆောင်ရွက်နေတာပါ။ သရက်သီးတင်ပို့မှုကို အချိန်ကြန့်ကြာမှု အနည်းဆုံး အစီအမံ၊ သင့်တင့်တဲ့ ကုန်ကျစရိတ်နဲ့ နှစ်ဖက် ညှိနှိုင်းဆောင်ရွက်နိုင်ဖို့ မြန်မာကုန်သည်တွေက မျှော်လင့်နေကြပါတယ်။

ပြီးခဲ့တဲ့ ဖရဲ၊ သခွား တင်ပို့မှုမှာတော့ တရုတ်ဘက်ရဲ့ တင်းကျပ်တဲ့ ကိုဗစ်စည်းကမ်း သတ်မှတ်ချက်တွေကြောင့် တင်ပို့မှု လမ်းကြောင်းတလျှောက်မှာ အချိန်ကြန့်ကြာတာ ကုန်ကျစရိတ် ကြီးမြင့်တာ၊ ကုန်သွယ်ရေး မရေရာတာ စတဲ့ စိန်ခေါ်မှုတွေ ကြုံခဲ့ရပြီး တောင်သူရော ကုန်သည်ပါ ဆုံးရှုံးနစ်နာမှုတွေ ရှိခဲ့ပါတယ်။

လတ်တလော အနေအထားအရ မြန်မာနိုင်ငံဘက်က ကပ်ရောဂါ ကာလစည်းကမ်း တင်းကျပ်မှု ဖြေလျော့လာတာရှိပေမဲ့ တရုတ်ဘက်ကတော့ အထူးအရေးကြီးကိစ္စအဖြစ် ကိုင်တွယ်နေဆဲ ဖြစ်တယ်လို့ သိရပါတယ်။

ဒါကြောင့် သစ်သီးအရည်အသွေးအပေါ် အာမခံချက်နည်းတာကြောင့် သရက်သီးကိုလည်း ချင့်ချိန်တင်ပို့ကြဖို့ မူဆယ်အခြေစိုက် ကုန်သည်ကြီးတွေက သတိပေးထားပါတယ်။

တရုတ်နိုင်ငံဘက်ရဲ့ ကိုဗစ်အကြောင်းပြချက်နဲ့ နယ်စပ်အဝင်အထွက်ကို မကြာခဏ ကန့်သတ်ပိတ်ပင်မှုတွေက ဈေးကွက်တည်ငြိမ်မှုကို ထိခိုက်နိုင်ပြီး အခုနှစ် သရက်တင်ပို့မှု အပေါ်မှာလည်း သက်ရောက်မှု ရှိလာနိုင်တယ်လို့ ဈေးကွက်စောင့်ကြည့်သူတွေက သုံးသပ်ထားကြပါတယ်။

နှစ်စဉ် ဧပြီလလယ်ပိုင်းမှ သရက်တင်ပို့မှု စတင်လေ့ရှိပေမဲ့ ဒီနှစ်သရက်ရာသီမှာ စိန်တလုံးရင့်မှည့်မှု အနည်းငယ်နောက်ကျပြီး လက်ရှိအချိန်ထိ တင်ပို့မှု မရှိသေးကြောင်း သိရပြီး တရုတ်ဘက် အရောင်းကွင်းမှာလည်း ကိုဗစ်ကန့်သတ်ချက်တွေကြောင့် အခုနှစ် သရက်သီးဈေးတန်းအတွက် နေရာစီစဉ်နိုင်ခြင်း မရှိသေးဘူးလို့လည်း သိရပါတယ်။

မြန်မာနိုင်ငံရဲ့ သစ်သီးဝလံ ပို့ကုန်တွေထဲမှာ သရက်သီးက အဆင့် ၄ နေရာမှာ ရပ်တည်နေပြီး တရုတ်နိုင်ငံကို နယ်စပ်လမ်းကြောင်းကနေ အဓိက အများဆုံး တင်ပို့နေတာပါ။ နှစ်စဉ် ပျဉ်းမျှတန်ချိန် ၄၀,၀၀၀ ကနေ ၅၀,၀၀၀ တင်ပို့မှုရှိပြီး ဟောင်ကောင်၊ ဒူဘိုင်းနဲ့ စင်ကာပူနိုင်ငံတို့ကိုလည်း အထိုက်အလျောက် တင်ပို့ရောင်းချနေတာပါ။

နိုင်ငံရေး မတည်ငြိမ်မှုနဲ့ စိုက်ပျိုးရေးသွင်းအားစုဈေး ကြီးမြင့်နေတာကြောင့် အခုနှစ် သရက်စိုက်ပျိုးထွက်ရှိမှု လျော့ကျနိုင်တယ်လို့ ဈေးကွက်စောင့်ကြည့်သူတွေက ခန့်မှန်းထားကြပါတယ်။