ကရင်ပြည်နယ်၊ မြဝတီ-ကော့ကရိတ် အာရှလမ်းပိုင်းမှာ တိုက်ပွဲတွေထပ်မံ ဖြစ်ပွားနေတဲ့အတွက် သင်္ဃန်းညီနောင်မြို့သစ် ၆ လမ်းထိပ်ကနေ မြဝတီ-ကော့ကရိတ် အာရှလမ်းပိုင်းကို ပိတ်ထားလိုက်တယ်လို့ ယာဉ်မောင်းတွေထံက သိရပါတယ်။ 

ဧပြီလ ၄ ရက် နေ့လယ် ၂ နာရီဝန်းကျင်လောက် မြဝတီမြို့အနီး ဒေါနတောင်ကြားနဲ့ သင်္ဃန်းညီနောင်မြို့သစ်ထိပ်နားမှာ စစ်ကောင်စီတပ်တွေနဲ့  ကရင်အမျိုးသားလွတ်မြောက်ရေး တပ်မတော် (KNLA) ၊ PDF ပူးပေါင်းတပ်ဖွဲ့တွေ တိုက်ပွဲဖြစ်ပွားနေတာဖြစ်ပြီး ဒီကနေ့လည်း တိုက်ပွဲတွေ ဆက်လက်ဖြစ်ပွားနေပါတယ်။ 

ကုန်ကားမောင်းသူ မြဝတီမြို့ခံတစ်ဦးက “မနေ့က နေ့လယ်လောက်ကစဖြစ်တာထင်တယ်။ သေနတ်သံတွေက ညအထိမစဲဘူး၊ လမ်းပိတ်တာကတော့ ဘယ်အဖွဲ့ကပိတ်လိုက်တယ်ရယ် မဟုတ်ဘူး။ အသုံးမပြုဖို့အတွက် ပြောတာ၊ ညီနောင်က ကျနော့်ညီတွေလည်း စစ်ရှောင်နေရပြီ ကျနော်တို့လည်း အလုပ်အကိုင်ပျက်တယ်ဗျာ။ အခုက ထို့ကော်ကိုးတောလမ်းကလည်း မသွားရဲဘူး။ မရှိလို့သာ လုပ်စားနေရတာ ရင်တထိတ်ထိတ်ပဲ”လို့  ပြောပါတယ်။

သင်္ဃန်းညီနောင်မြို့က ချစ်ကြည်ရေးဆီဆိုင်နားမှာ မနေ့က ကုန်ကားတွေ ပစ်ခတ်ခံထားရပြီး လက်နက်ငယ် လက်နက်ကြီးပစ်သံတွေကို ထိုင်းနယ်စပ် မဲဆောက်မြို့ကတောင် ကြားနေရတယ်လို့ နှစ်နိုင်ငံ ချစ်ကြည်ရေးတံတား အမှတ် ၁ နားမှာ နေထိုင်တဲ့ ရွှေ့ပြောင်းအလုပ်သမားတွေက ပြောပါတယ်။

မတ်လ ၂၅ ရက်ကစတင်ပြီး  မြဝတီမြို့ကုန်သွယ်ရေးဇုန်၊ မဲကနယ်ရွာတွေဘက်မှာ ပြည်သူ့ကာကွယ်ရေးတပ်တွေနဲ့ စစ်ကောင်စီတို့အကြား တိုက်ပွဲတွေဖြစ်ပွားနေတာပါ။

ပြီးခဲ့တဲ့ ၃ ရက်ကလည်း မြဝတီကို ပြန်လာတဲ့ စစ်ကောင်စီ အင်အား ၄၀ လောက်ပါတဲ့ စစ်ကားကို ကော်ဘရာစစ်ကြောင်းက တိုက်ခိုက်ခဲ့ပါတယ်။

လက်ရှိ မြဝတီ-ကော့ကရိတ်အာရှလမ်းပိုင်းမှာ ကုန်ကားတွေရော ခရီးသည်တင်ကားတွေပါ ပိတ်မိနေပြီး မြဝတီ-မဲဆောက် အမှတ် ၁ ချစ်ကြည်ရေးတံတားရဲ့ ထိုင်းနိုင်ငံဘက်ခြမ်းမှာ ဒေသအာဏာပိုင်တွေက လုံခြုံရေးအင်အားတိုးမြှင့်ချထားပါတယ်။

ဧပြီ ၃ ရက် ညပိုင်းကလည်း မြဝတီမြို့တောင်ဘက်ရှိ စစ်ကောင်စီရဲ့ ဝေါလေဗျူဟာကုန်းကို    ကရင်အမျိုးသားကာကွယ်ရေးအဖွဲ့-KNDO တပ်ရင်း (၈) နဲ့ Federal Wings ဒရုန်းတပ်ဖွဲ့တို့ ပူးပေါင်းပြီး ဒရုန်းနဲ့ ဗုံးကြဲတိုက်ခိုက်ခဲ့ရာမှာ (၁၂၂ မမ) ဟောင်ဝစ်ဇာမြောက်နဲ့ ရိက္ခာဂိုဒေါင်ရုံ ထိခိုက်မီးလောင် ပျက်စီးခဲ့တယ်လို့   Federal Wings ကထုတ်ပြန်ပါတယ်။

ဝေါလေဗျူဟာကုန်းမှာ စစ်ကောင်စီ အမှတ် (၁၃) စစ်ဆင်ရေးကွပ်ကဲမှုဌာနချုပ် လက်အောက်ခံ အမှတ် (၂) နည်းဗျူဟာ တပ်ဖွဲ့ဝင်တွေ အထိုင်ချပြီး လက်နက်ကြီးတွေနဲ့ ကျေးရွာတွေကို ပစ်ခတ်လေ့ရှိတာပါ။

ကရင်ပြည်နယ်၊ မြဝတီ-ကော့ကရိတ် အာရှလမ်းမကြီးမှာ KNLA ပူးပေါင်းတပ်နဲ့ စစ်ကောင်စီတပ်တို့ကြား တိုက်ပွဲဖြစ်ပြီး ကုန်တင်ကားအပါအဝင် ခရီးသွားကား ရာနဲ့ချီ ပိတ်မိတယ်လို့ ဒေသခံတွေက  ပြောပါတယ်။

အောက်တိုဘာ ၁၈ ရက် ညနေ ၅ နာရီလောက်က အာရှလမ်းမကြီး သင်္ဃန်းညီနောင်နဲ့ ကော့ကရိတ်ကြား တောနော်ရေတံခွန်အနီးမှာ ကရင်အမျိုးသားလွတ်မြောက်ရေးတပ်မတော် KNLA ပူးပေါင်းတပ်နဲ့ စစ်ကောင်စီ၊ BGF ပူးပေါင်းတပ်တို့ကြား တိုက်ပွဲ ဖြစ်ပွားခဲ့တာပါ။

သင်္ဃန်းညီနောင် ဒေသခံ တစ်ဦးက “သင်္ဃန်းညီနောင်မှာ အခုထိ ကားတွေ တန်းစီပြီး စောင့်နေတုန်းပဲ၊ ကော့ကရိတ်ဘက်ကလာတဲ့ ကားတွေလည်း တက်လို့ မရဘူး၊ သင်္ဃန်းညီနောင်ဘက်က ဆင်းမယ့် ကားတွေလည်း ဆင်းလို့ မရသေးဘူး။ အခုထိ ပိတ်နေတုန်းပဲ”လို့ ပြောပါတယ်။

ဒါ့အပြင် အောက်တိုဘာ ၁၉ ရက် ဒီနေ့ မနက် ၁၀ နာရီလောက်မှာလည်း အာရှလမ်း တောင်ကြောအဝင် ဘုရားလေးနဲ့ စမ်းချောင်းတံတားအနီးမှာ စစ်ကောင်စီတပ်နဲ့ KNLA တို့ကြား တိုက်ပွဲတွေ ဆက်လက် ဖြစ်ပွားနေတာပါ။

အဆိုပါတိုက်ပွဲတွေအတွင်း နှစ်ဖက်တပ်တွေ ထိခိုက်ဒဏ်ရာရ သေဆုံးမှု အခြေအနေကိုတော့ လတ်တလော မသိရသေးပါဘူး။ 

နှစ်ဖက်တိုက်ပွဲတွေ ဆက်လက် ဖြစ်ပွားနေတဲ့အတွက် ကော့ကရိတ်ကို ရောက်နေတဲ့ ခရီးသည်ကားတချို့ နောက်ကြောင်း ပြန်လှည့်နေကြပြီး ကုန်တင်ကားတွေကတော့ ဆက်လက် စောင့်ဆိုင်းနေတယ်လို့ ကော့ကရိတ်ဒေသခံ တစ်ဦးက ပြောပါတယ်။

မြဝတီ-အာရှလမ်းမှာ တိုက်ပွဲကြောင့် လမ်းအသုံးပြုခွင့်ကို KNLA နဲ့ စစ်ကောင်စီ နှစ်ဖက်စလုံးက ကန့်သတ်ထားသလို မြဝတီကုန်သွယ်ရေးဇုန်မှာလည်း ကားအစီး ရာနဲ့ချီ ပိတ်မိနေတာပါ။

ကေအန်ယူ တပ်မဟာ(၆) ဒူးပလာယာခရိုင်ထဲကို စစ်ကောင်စီ တပ်သားတွေက အင်းအားအလုံးအရင်းနဲ့ ဝင်ရောက်လာတာကြောင့် ကော့ကရိတ်-မြဝတီ အာရှလမ်းမကြီးနဲ့ မြဝတီ-ဝေါလေ လမ်းပိုင်း အသုံးပြုခွင့် ရပ်ဆိုင်းထားဖို့ ပြီးခဲ့တဲ့ မတ်လ ၂၇ ရက်နေ့မှာ ကေအန်ယူက ထုတ်ပြန်ထားပါတယ်။