တနင်္သာရီတိုင်း၊ မြိတ်အကျဉ်းထောင်ကနေ ဧပြီ ၁၇ ရက် မနက်ပိုင်းက အကျဉ်းသား၊ အကျဉ်းသူ ၁၀ ယောက် ပြစ်ဒဏ်လွတ်ငြိမ်းချမ်းခွင့်နဲ့ ပြန်လည်လွတ်မြောက်လာပြီး အဆိုပါ လွတ်မြောက်လာသူတွေအထဲမှာ နိုင်ငံရေးအကျဉ်းသားမပါဝင်ဘူးလို့ ထောင်နဲ့နီးစပ်တဲ့ အသိုက်အဝိုင်းကနေ သိရပါတယ်။
မြိတ်အကျဉ်းထောင်ကနေ ပြန်လွတ်လာသူတွေထဲမှာ တခြားပြစ်မှုကြောင့် ထောင်ကျပြီး လွတ်မြောက်လာသူ အမျိုးသား ၈ ဦးနဲ့ အမျိုးသမီး ၂ ဦး စုစုပေါင်း ၁၀ ဦးပါဝင်တယ်လို့ ထောင်နဲ့နီးစပ်သူတစ်ဦးက ပြောပါတယ်။
ထောင်ဝန်ထမ်းတစ်ဦးက “လွတ်တဲ့သူတွေထဲမှာ ဆေးမှုတွေ၊ မူးယစ်ရမ်းကားတွေလောက်ပဲပါတယ်။ ပုဒ်မ ၁၆ (ဂ)ထဲမှာ တောင်မှ နှစ်ကြာနေတဲ့သူတွေပဲလွတ်ပေးတာ။ ပြစ်ဒဏ် လေးချိုးတချိုး ခံစားခွင့်ပေးတာပါ။”လို့ ပြောပါတယ်။
မြန်မာနှစ်ဆန်း ၁ ရက်မှာ စစ်ကောင်စီက ရာဇဝတ်ကျင့်ထုံး ဥပဒေပုဒ်မ ၄၀၁ ပုဒ်မခွဲ ၁ အရ မြန်မာနိုင်ငံတဝန်း အကျဉ်းထောင်အသီးသီးကနေ အကျဉ်သား၊ အကျဉ်းသူ ၃၀၁၅ ဦးနဲ့ နိုင်ငံခြားသား အကျဉ်းသား ၉၈ ဦးကို ပြစ်ဒဏ်လွတ်ငြိမ်းခွင့်ပေးလိုက်တယ်လို့ ထုတ်ပြန်ထားတာ ဖြစ်ပါတယ်။
နိုင်ငံရေးအကျဉ်းသား မိသားစုဝင်တစ်ဦးက “ဒီလိုဖြစ်စဉ်မျိုးဟာ ကျနော်တို့လည်း ခဏခဏ ခံနေရတယ်။ ဘာမှလည်းမမျှော်လင့်တော့ဘူး။ လွှတ်ပေးတဲ့သူတွေထဲမှာ တကယ် လွတ်သင့် လွတ်ထိုက်တဲ့သူတွေကို မလွှတ်ပေးဘူး။ တခြားအမှုတွေကိုပဲ လွှတ်ပေးနေတယ်။ နိုင်ငံရေးနဲ့ အကျဉ်းကျခံနေရတဲ့သူတွေကိုတော့ တယောက်မှ မလွတ်ပေးဘူး။ ထောင်ထဲမှာ ၅၀၅(က)နဲ့ အကျဉ်းကျခံနေရတဲ့သူတွေလည်း ရှိသေးတယ်။”လို့ ပြောပါတယ်။
ပြီးခဲ့တဲ့ ဇန်နဝါရီ ၄ ရက်နေ့တုန်းကလည်း လွတ်လပ်ရေးနေ့အထိမ်းအမှတ်အဖြစ် စစ်ကောင်စီက နိုင်ငံတဝန်း အကျဉ်းထောင်အသီးသီးက အကျဉ်းသား၊ အကျဉ်းသူ ၇၀၁၂ ပြန်လွတ်ပေးတဲ့အထဲမှာ တနင်္သာရီတိုင်းက နိုင်ငံရေးအကျဉ်းသား၊ အကျဉ်းသူ ၂၅၃ ဦး ပါဝင်ခဲ့ပါတယ်။
တနင်္သာရီတိုင်း၊ မြိတ်အကျဉ်းထောင်ကနေ ဇန်နဝါရီ ၄ ရက် နေ့လယ်ပိုင်းက နိုင်ငံရေးအကျဉ်းသား ၂၀ နီးပါး၊ အကျဉ်းသူ ၁၁ ဦး အပါအဝင် စုစုပေါင်း ၈၂ ဦး ပြစ်ဒဏ်လွတ်ငြိမ်းခွင့်နဲ့ ပြန်လည် လွတ်မြောက်လာတယ်လို့ ထောင်အသိုင်းအဝိုင်းကနေ သိရပါတယ်။
လွတ်မြောက်လာတဲ့သူတွေထဲမှာ မြိတ်ဆေးရုံက လက်ထောက်ဆရာဝန် ကိုမင်းထက်ပိုင်ကိုတော့ စစ်ကောင်စီက နောက်အမှုထပ်ကပ်ပြီး ပြန်ဖမ်းထားတယ်လို့ အကျဉ်းထောင်နဲ့ နီးစပ်သူတဦးက ပြောပါတယ်။
ထားဝယ်အကျဉ်းထောင်မှ အကျဉ်းသား၊ အကျဉ်းသူ အယောက် ၉၀၊ မြိတ်အကျဉ်းထောင်မှ အကျဉ်းသား၊ အကျဉ်းသူ ၈၂ ဦး၊ ကော့သောင်းအကျဉ်းထောင်မှ အကျဉ်းသား၊ အကျဉ်းသူ ၃၃ ဦး၊ ဆင်ဖြူပြင်အကျဉ်းစခန်းမှ အကျဉ်းသား ၂၂ ဦး၊ ကျောက်ဖြူတောင်နဲ့ တခြားရဲဘက်စခန်းမှ အကျဉ်းသား ၂၆ ဦး လွတ်မြောက်လာတယ်လို့ စစ်ကောင်စီခန့် ဝန်ကြီးတဦး ပြောပါတယ်။
စစ်ကောင်စီက လွတ်လပ်ရေးနေ့ အထိမ်းအမှတ်အဖြစ် နိုင်ငံတဝန်း အကျဉ်းထောင်အသီးသီးက အကျဉ်းသား၊ အကျဉ်းသူ ၇,၀၁၂ ပြန်လွှတ်ပေးတဲ့အထဲမှာ တနင်္သာရီတိုင်းက နိုင်ငံရေးအကျဉ်းသား၊ အကျဉ်းသူ ၂၅၃ ဦး ပါဝင်တယ်လို့လည်း သိရပါတယ်။
လွတ်မြောက်လာတဲ့ နိုင်ငံရေးအကျဉ်းသား၊ အကျဉ်းသူတွေဟာ ၅၀၅(က)၊ ၁၄၃၊ ၁၄၅ ပုဒ်မတွေနဲ့ ထောင်ဒဏ်ကျခံရပြီး ပြစ်ဒဏ်ရဲ့ ခြောက်ပုံတပုံ လွတ်ငြိမ်းချမ်းသာခွင့်ရရှိပြီး လွတ်လာတယ်လို့ ဒီဗွီဘီကို ပြောပါတယ်။
ပြီးခဲ့တဲ့ နိုဝင်ဘာ ၁၇ ရက် အမျိုးသားနေ့တုန်းကလည်း စစ်ကောင်စီက နိုင်ငံရေးအကျဉ်းသားတွေ အပါအဝင် အကျဉ်းသား၊ အကျဉ်းသူ ၅,၇၇၂ ဦးကို ပြစ်ဒဏ်လွတ်ငြိမ်းချမ်းသာခွင့်ပေးခဲ့ပါတယ်။
