တနင်္သာရီတိုင်း၊ ရေဖြူမြို့နယ်၊ ကံပေါက်ဒေသမှာ ခဲမဖြူ အဖြိုက်နက် သတ္တုရှာဖွေရေး လုပ်ကိုင်နေတဲ့ Delco ကုမ္ပဏီ လုပ်ကွက်မှာ ဖေဖော်ဝါရီ ၆ ရက် မနက် ၁၀ နာရီခွဲလောက်က သတ္တုမြေစာပုံ ပြိုကျတာကြောင့် အမျိုးသမီး ၁ ဦး သေဆုံးပြီး ၁ ဦး ဒဏ်ရာရခဲ့ပါတယ်။

မြေစာပုံပြိုကျတာကြောင့် ကံပေါက်ရွာ မိုင်းဝင်းရပ်ကွက်မှာ နေထိုင်တဲ့ အသက် ၃၈ နှစ်အရွယ် မချောချော သေဆုံးသွားခဲ့ပြီး မြသီတာရပ်ကွက်မှာ နေထိုင်တဲ့ ဒေါ်ဝေ ကတော့ ကံပေါက်တိုက်နယ်ဆေးရုံမှာ ဆေးကုသနေရပါတယ်။

သူတို့ ၂ ဦးဟာ လက်လုပ်လက်စား ခဲယဉ်း (သတ္တုကျင်) သူတွေ ဖြစ်ကြပြီး နယ်ခံမဟုတ်ကြဘူးလို့ သိရပါတယ်။

ကံပေါက်သတ္တုတွင်း သတ္တုလုပ်ကွက်ကို အခုလက်ရှိ ဖွံ့ဖြိုးတိုးတက်ထုတ်လုပ်မှု ဖော်ဆောင်ရေးကုမ္ပဏီ Delco က လုပ်ဆောင်နေပါတယ်။

ကံပေါက်ဒေသမှာ လက်လုပ်လက်စား ခဲသတ္တုရှာဖွေသူတွေကလည်း တပိုင်တနိုင် ခဲသတ္တု ရှာဖွေလုပ်ကိုင် စားသောက်ကြပါတယ်။

အခုလို မြေစာပုံပြိုပြီး လူသေတဲ့ဖြစ်စဉ် အရင်ကလည်း တကြိမ်ဖြစ်ခဲ့ဖူးတာကြောင့် ကုမ္ပဏီဘက်က လုပ်ကွက်အတွင်း ခဲသတ္တုရှာဖွေတာကို ခွင့်မပြုထားပေမဲ့ ကန့်သတ်ထားခြင်း မရှိတာကြောင့် လက်လုပ်လက်စားသမားတွေဟာ သတ္တုလုပ်ကွက်အတွင်း ဝင်ရောက်ကာ သတ္တုရှာဖွေကြတယ်လို့ သိရပါတယ်။

စစ်အာဏာသိမ်းပြီးနောက် ကံပေါက်‌ဒေသမှာ သတ္တုလုပ်ကွက်တွေ တိုးချဲ့ လုပ်ဆောင်လာတာကြောင့် ၂၀၂၂ ခုနှစ် ဇူလိုင်လကလည်း တောင်နံရံမြေသားပြိုကျမှု ဖြစ်ခဲ့ပါတယ်။

ကချင်ပြည်နယ်၊ ဖားကန့်မြို့နယ်မှာ မေ ၆ ရက် မနက်ပိုင်းက ကျောက်ယမ်းခွဲရာကနေ မြေစာပုံပြိုကျလို့  ကျောက်ရှာသူ ၂ ယောက်သေဆုံးပြီး ၄ ယောက် ဒဏ်ရာရရှိခဲ့တယ်လို့ ဒေသခံတွေ ထံကသိရပါတယ်။ 

ဆိပ်မူကျေးရွာအုပ်စု၊ နမ့်မော်ကျေးရွာရှိ ကျောက်စိမ်းလုပ်ကွက်ဟောင်းတခုမှာ ကျောက်ယမ်းခွဲရာမှာကနေ ရေမဆေးကျောက်ရှာဖွေနေသူတွေအပေါ် မြေစာပုံပြိုကျခဲ့တာ ဖြစ်ပါတယ်။

ဖားကန့်ဒေသခံတဦးက "မနက် ၇ နာရီလောက် ဖြစ်တာ။ ကျောက်ယမ်းခွဲရာကနေ မြေစာပုံက ကျောက်ရှာနေတဲ့ လူတွေပေါ် ပြိုကြပြီးသေဆုံးတာ။ နှစ်ယောက်သေတယ်။ လေးဦး ဒဏ်ရာရတယ်” လို့ ပြောပါတယ်။

မြေစာပုံပြိုကျလို့ ထိခိုက် ဒဏ်ရာရသူ ၄ ယောက်ထဲက တယောက်ဟာ ဒဏ်ရာပြင်းထန်ပြီး အသက်အန္တရာယ်စိုးရိမ်ရတယ်လို့လည်း ဒေသခံက ပြောပါတယ်။

မေ ၅ ရက်မနက်ပိုင်းကလည်း ကောင်ဆန်ကျေးရွာမှာရှိတဲ့ ကျောက်စိမ်းလုပ်ကွက်ဟောင်းမှာ မြေစာပုံပြိုကျခဲ့လို့ ရေမဆေးရှာဖွေသူ ၇ ယောက် ထိခိုက်ဒဏ်ရာရခဲ့ပါသေးတယ်။

ဖားကန့်မြို့နယ်မှာ မြေစာပုံပြိုကျတာတွေ မကြာခဏဖြစ်ပွားလေ့ရှိကာ မမုံကျေးရွာမှာရှိတဲ့  လုပ်ကွက်ဟောင်းတခုမှာ ဖေဖေါ်ဝါရီ ၁၈ ရက်က မြေစာပုံပြိုကျခဲ့လို့ ရေမဆေးကျောက်ရှာဖွေသူ ၂ ယောက်သေဆုံးခဲ့ကာ ၃ ယောက် ဒဏ်ရာရခဲ့သလို ဖေဖေါ်ဝါရီ  ၂၈ ရက်ကလည်း  မမုံကျေးရွာက လုပ်ကွက်တခုမှာ မြေစာပုံပြိုကျခဲ့လို့ ရေမဆေးသမား  ၅၀ ထက်မနည်း သေဆုံးခဲ့ပါတယ်။