ရန်ကုန်တိုင်း မြို့နယ် ၅ ခုမှာ မနက်ဖြန် ဧပြီ ၂၈ ရက်ကစတင်ကာ ၃ ရက်ဆက်တိုက် အချိန်ပိုင်း ဓာတ်အားပြတ်တောက်မှုတွေ ရှိမယ်လို့ ရန်ကုန်လျှပ်စစ်ဓာတ်အားပေးရေး ကော်ပိုရေးရှင်း (YESC) က ထုတ်ပြန်ပါတယ်။

ထုတ်ပြန်ချက်မှာတော့ 230kV မြောင်းတကာပင်မဓာတ်အားခွဲရုံ၊ (230/33/11) kV, Main Transformer (3) Banks ရဲ့ Bushing တွေ စစ်ဆေးထိန်းသိမ်းပြုပြင်ခြင်းလုပ်ငန်း ဆောင်ရွက်နိုင်ဖို့အတွက် အဆိုပါနေ့တွေမှာ မနက် ၈ နာရီကနေ ၁၀ နာရီအထိ မှော်ဘီ၊ တိုက်ကြီး၊ မြောင်းတကာ၊ ဥက္ကံနဲ့ အဖျောက်မြို့နယ်တွေရဲ့ နေရာတချို့မှာ ယာယီဓာတ်အား ပြတ်တောက်မှုရှိမှာ ဖြစ်ကြောင်းနဲ့ ပြတ်တောက်ချိန် ကြာမြင့်မှုမရှိစေရေး၊ ဓာတ်အားပြတ်ဧရိယာ လျော့နည်းစေရေးကို အလေးထား ဆောင်ရွက်သွားမှာ ဖြစ်တယ်လို့လည်း ဖော်ပြပါတယ်။

နိုင်ငံတွင်းမှာ လျှပ်စစ်ဓာတ်အားလောက်အောင် မပေးနိုင်တဲ့ စစ်ကောင်စီဟာ ဆိုလာစနစ်ကနေရတဲ့ လျှပ်စစ်ဓာတ်အားတွေကို ပြည်သူတွေဆီကနေ ပြန်ဝယ်ဖို့ ကြိုးစားနေပြီး ဆိုလာနဲ့ ဆက်စပ်ပစ္စည်းတွေကို ပြည်ပကနေ သွင်းတာအတွက်လည်း အကောက်ခွန်ကင်းလွတ်ခွင့် ပြုမယ်လို့ ကြေညာထားပါတယ်။

စစ်ကောင်စီရဲ့ စီမံကိန်းနဲ့ ဘဏ္ဍာရေးဝန်ကြီးက ပြီးခဲ့တဲ့ ဧပြီ ၂၀ ရက်စွဲနဲ့ ထုတ်ပြန်လိုက်တာ ဖြစ်ပြီး နိုင်ငံတော်အကျိုးအတွက် ပြည်တွင်းလျှပ်စစ်ဓာတ်အား လုံလောက်စေဖို့အတွက်လို့ ဆိုပါတယ်။

ကင်းလွတ်ခွင့်ပြုတဲ့ ပစ္စည်းတွေကတော့ နေရောင်ခြည်ကနေ စွမ်းအင်ထုတ်လုပ်ပေးနိုင်တဲ့ ဆိုလာချပ်တွေ၊ ပေါင်းစပ်ထိန်းချုပ်ကိရိယာတွေ၊ ဆိုလာအင်ဗာတာ၊ အိမ်သုံးတပ်ဆင်မှု ပုံစံတွေ၊ ရေပေါ်မှာတပ်ဆင်တဲ့ စနစ်နဲ့ ဆိုလာထိန်းချုပ်ကိရိယာနဲ့ တွဲလျက်တင်သွင်းလာတဲ့ ဘက်ထရီတွေ ဖြစ်ပါတယ်။

မြန်မာနိုင်ငံမှာ စစ်တပ်အာဏာသိမ်းပြီးနောက် တနှစ်ထက်တနှစ် လျှပ်စစ်ဓာတ်အား ပေးနိုင်တဲ့ ပမာဏ လျော့လာနေပြီး ရန်ကုန်မှာတော့ ဆိုလာစနစ်ကနေရတဲ့ လျှပ်စစ်ဓာတ်အားတွေကို ပြန်ဝယ်ဖို့ ကမ်းလှမ်းနေပါတယ်။

လက်ရှိမှာ နိုင်ငံတဝန်း လျှပ်စစ်မီးပြတ်တောက်မှုတွေက ဆိုးဆိုးရွားရွား ဖြစ်ပေါ်နေပြီး တရက်ကို ၂၄ နာရီနီးပါး ပြတ်တောက်နေတဲ့ နေရာဒေသတွေရှိသလို သတ်မှတ်ချိန်ထက်ပိုပြီး လျှပ်စစ်မီး ပြတ်တောက်နေတဲ့ နေရာဒေသတွေလည်း ရှိနေပါတယ်။

လျှပ်စစ်မီး ဆိုးဆိုးရွားရွား ပြတ်တောက်မှုက လူထုအကြားမှာ အဆင်မပြေမှုတွေ ကြုံတွေ့နေရပြီး စီးပွားရေးလုပ်ငန်းတွေလည်း အခက်ကြုံနေရပါတယ်။

မြန်မာနိုင်ငံမှာ တရက်တည်း ကိုဗစ်-၁၉ အတည်ပြုလူနာသစ် အယောက် ၇၀ နီးပါး တွေ့ရှိရတဲ့အထဲမှာ ရန်ကုန်တိုင်းက ၄၅ ယောက်နဲ့ အများဆုံးပါဝင်နေတယ်လို့ စစ်ကောင်စီ လက်အောက်ခံ ကျန်းမာရေးဝန်ကြီးဌာနက ဒီကနေ့ ထုတ်ပြန်ပါတယ်။

ဧပြီ ၂၆ ရက် ညပိုင်းက ထုတ်ပြန်ချက်မှာတော့ ဓာတ်ခွဲနမူနာ စုစုပေါင်း ၈,၃၆၀ ခုကို စစ်ဆေးခဲ့ချိန်မှာ ပိုးတွေ့လူနာသစ် ၆၈ ယောက် တွေ့ရှိရတာကြောင့် ရောဂါပိုးတွေ့ရှိမှု ရာခိုင်နှုန်း ၀ ဒသမ ၈၁ ရာခိုင်နှုန်း ရှိနေတာ ဖြစ်ပါတယ်။

တိုင်းဒေသကြီးနဲ့ ပြည်နယ်တွေအလိုက် ကူးစက်ခံရသူတွေထဲမှာတော့ ကူးစက်မှုအများဆုံး ရန်ကုန်တိုင်းရဲ့နောက်မှာ ကရင်ပြည်နယ်က ၁၁ ယောက်နဲ့ ရှိနေပြီး ဧရာဝတီ၊ မန္တလေး၊ နေပြည်တော်၊ တနင်္သာရီ၊ ပဲခူးတိုင်းနဲ့ မွန်ပြည်နယ်တွေမှာလည်း ကိုဗစ်-၁၉ လူနာသစ်တွေ အသီးသီး တွေ့ရှိရတယ်လို့ ဆိုပါတယ်။

နိုင်ငံတဝန်းမှာတော့ ကိုဗစ်-၁၉ ရောဂါ ကူးစက်ခံရသူ အရေအတွက်ဟာ ၆၃၄,၅၃၉ ယောက် ရှိလာခဲ့ပြီဖြစ်ကာ ရောဂါပြန်လည်ပျောက်ကင်း သက်သာလာသူပေါင်း ၆၁၄,၇၂၂ ယောက် ရှိခဲ့ပြီလို့ ဆိုပါတယ်။

ဒါပေမဲ့ ဒီစစ်ဆေးထုတ်ပြန်ချက်တွေဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲစမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှု၊ သေဆုံးမှုတွေနဲ့ ပတ်သက်ပြီးတော့ တိကျတဲ့ ပမာဏအတိုင်းအဆကို မသိနိုင်သေးပါဘူး။

စစ်ကောင်စီဩဇာခံ ကျန်းမာရေးဝန်ကြီးဌာနကတော့ ကိုဗစ်-၁၉ နေ့စဉ်ကူးစက်မှုနှုန်း ၁ ရာခိုင်နှုန်းအောက်ထိ ဝန်းကျင်နဲ့သာ ထုတ်ပြန်နေတာကို တွေ့ရပြီး သေဆုံးမှု လုံးဝမရှိတဲ့ နေ့တွေလည်း ရှိလာနေတယ်လို့ ဆိုပါတယ်။

မြန်မာနိုင်ငံမှာတော့ စစ်အာဏာသိမ်း ၂ နှစ်ကျော်ကာလအတွင်း တိုင်းပြည်မှာ နိုင်ငံရေး မတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေး စောင့်ရှောက်မှုတွေမှာ အဘက်ဘက်က ကျဆင်းနေပါတယ်။

ခုရက်ပိုင်းမှာတော့ မြန်မာနိုင်ငံမှာ ကိုဗစ်-၁၉ ကူးစက်မှုအသစ် ခပ်စိပ်စိပ် တွေ့လာနေရ ပြီးတော့ ကိုဗစ်ကူးစက်နှုန်း များလာတာကြောင့် ကိုဗစ်လူနာတွေအတွက် နိုင်ငံတဝန်းက ဆေးရုံတွေ အသင့်ပြင်ထားကြဖို့ စစ်ကောင်စီလက်အောက်ခံ ကျန်းမာရေးဝန်ကြီးဌာနက ဧပြီ ၂၄ ရက်မှာ ညွှန်ကြားထားပါတယ်။

ညွှန်ကြားစာမှာတော့ ထိုင်း၊ ဘင်္ဂလားဒေ့ရှ်နဲ့ အိန္ဒိယတို့မှာ ကူးစက်မြန် ကိုဗစ်-၁၉ မျိုးကွဲ 1.16 (Arcturus) ကြောင့် ၂၀၂၃ ဇန်နဝါရီကစပြီး ကူးစက်နှုန်း မြင့်တက်လာပြီး မြန်မာ နိုင်ငံအတွင်း ဧပြီလကစတင်ကာ ကိုဗစ်ကူးစက်သူ များပြားလာတဲ့အတွက် ဆေးရုံတွေ အ သင့်ပြင်ထားဖို့ ပါရှိပါတယ်။

NUG အစိုးရ ကျန်းမာရေးဝန်ကြီးဌာနက ကောက်ယူခဲ့တဲ့ စစ်တမ်းမှာတော့ ပြီးခဲ့တဲ့ ကိုဗစ်-၁၉ တတိယလှိုင်းကာလမှာ သေဆုံးသူတွေရဲ့ ၇၃ ရာခိုင်နှုန်းက လိုအပ်တဲ့ ဆေးရုံတွေမှာ တက်ရောက်ကုသခွင့်မရဘဲ နေအိမ်တွေမှာ သေဆုံးခဲ့ကြတယ်လို့ ဖော်ပြပါတယ်။

စစ်တမ်းမှာ တွေ့ရှိရတဲ့ အထောက်အထားတွေအရ ဆေးရုံမှာ စောင့်ရှောက်ကုသဖို့ လိုအပ်တဲ့ လူနာတွေ ဆေးရုံမတက်ရောက်နိုင်တာ၊ အွန်လိုင်းကသာ ကုသမှုခံယူနေကြရတာ၊ စစ်ကောင်စီက အမှန်တကယ် သေဆုံးနှုန်းကို မဖော်ပြနိုင်တာ စတဲ့အချက်တွေ ဟာ ထင်ရှားနေတာမို့ စစ်ကောင်စီဟာ ကိုဗစ်-၁၉ ကာကွယ်၊ ထိန်းချုပ်၊ ကုသမှုလုပ် ငန်းတွေမှာ မှားယွင်းညံ့ဖျင်းစွာ စီမံနေတယ်လို့ သုံးသပ်ထားပါတယ်။

စစ်ကောင်စီ ကျန်းမာရေးဝန်ကြီးဌာနကတော့ မြန်မာနိုင်ငံမှာ လက်ရှိအချိန်ထိ ကိုဗစ်-၁၉ ရောဂါ ကူးစက်ခံရပြီး သေဆုံးသူ စုစုပေါင်း ၆၈၀,၀၀၀ ကျော် ရှိလာခဲ့ပြီလို့ ထုတ်ပြန် ထားပါတယ်။

ရန်ကုန်တိုင်းအတွင်းရှိ မြို့နယ်ရေကစားမဏ္ဍပ်တွေမှာ လုံခြုံရေးအနေနဲ့ စွမ်းအားရှင်တွေကို စစ်ကောင်စီတပ်က

နေ့စားခပေးပြီး ခေါ်ထားတယ်လို့ စစ်တပ်နဲ့နီးစပ်သူတွေဆီက သိရပါတယ်။

လှိုင်သာယာ (အရှေ့ပိုင်း) မြို့နယ်မှာ  ဧပြီ ၁၁ က ဖွင့်လှစ်ခဲ့တဲ့ "လှိုင်ပိတောက်မေ" သင်္ကြန်မဏ္ဍပ် ဖွင့်ပွဲအခမ်းအနားမှာ စွမ်းအားရှင်အချို့ကို စစ်တပ်က နေ့စားခပေး ခေါ်ယူတာ သိခဲ့ရတယ်လို့ မြို့ခံတဦးက ဒီဗွီဘီကို ပြောပါတယ်။

"အဲ့နေ့ဖွင့်ပွဲတက်လာတဲ့အထဲမှာ ၂၀၀၇ ရွှေဝါရောင်တော်လှန်ရေးတုန်းက တောင်ဥက္ကလာငွေကြာရံမှာ ဘုန်းကြီးနဲ့နိုင်ငံရေးသမားတွေကို ရိုက်တဲ့သူတွေပါတယ်၊ စစ်တပ်က နေ့စားခပေးပြီး ခေါ်သုံးတာ။" 

၂၀၀၇ ရွှေဝါရောင်တော်လှန်ရေးမှာ  မြောက်ပိုင်းခရိုင်ဥက္ကဋ္ဌ ဗိုလ်မှူးနေလင်း နေ့စားခနဲ့ ခေါ်ယူအသုံးပြုခဲ့သော လှိုင်သာယာမြို့အတွင်းရှိ ရပ်ကွက်နဲ့ကျေးရွာအချို့က စွမ်းအားရှင်တွေ ဖြစ်တယ်လို့ အုပ်ချုပ်ရေးမှူးဟောင်းတဦးက ဒီဗွီဘီကို ပြောပါတယ်။

"အဲ့ဒီတုန်းက ဘုန်းကြီးတွေရိုက်ခဲ့တဲ့ ၁၅ ရပ်ကွက်က ဆင်ကြီး ဝင်းတင်တို့အုပ်စုတော့ မပါဘူး၊ အခြားသူတွေတော့ပါတယ်။ ပုံထဲမှာပါတဲ့သူတွေကြည့်ပြီး မြို့ခံတွေက ဆုံးဖြတ်ပေးလိမ့်မယ်။" 

အလားတူပင် ဒဂုံအရှေ့၊ တာမွေ၊ ရန်ကင်း၊ မြောက်ဒဂုံ စတဲ့မြို့နယ် မဏ္ဍပ်တွေမှာလည်း နယ်ခံ လူမိုက်အချို့နဲ့ စွမ်းအားရှင်တွေကို ခေါ်ထားတယ်လို့ မြို့ခံတွေဆီက သိရပါတယ်။

ဒါ့အပြင်  မြို့နယ်ရေကစားမဏ္ဍပ်တွေမှာ  စစ်တပ်၊ ရဲ၊ စသုံးလုံး၊ ထောက်လှမ်းရေး အစရှိတဲ့ အဖွဲ့အစည်းတွေကို ထားရှိကာ လုံခြုံရေးကို ပိုမိုတင်းကျပ်ထားတယ်လို့ သိရပါတယ်။