ရန်ကုန်မြို့မှာ ရပ်ကွက်အခြေပြု စက်ရုံ အလုပ်ရုံတွေကနေ သင်္ကြန်ပွဲတော် ကျင်းပဖို့အတွက် ငွေကြေးကောက်ခံနေပြီး ရပ်ကွက်အပိုင်တခုကို ကျပ် သိန်း ၂၀ သတ်မှတ်ထားတယ်လို့ ရန်ကုန်မြို့ခံတွေဆီက သိရပါတယ်။

အာဏာသိမ်းစစ်ကောင်စီဟာ သူတို့လက်ထက်မှာ ဒုတိယအကြိမ်မြောက်ကျင်းပမယ့် သင်္ကြန်ကို အရင်နှစ်ကထက် ပိုမိုစည်ကားအောင် ပြုလုပ်နေပြီး ကုန်ကျစရိတ်တွေအတွက် ရပ်ကွက်အခြေပြု စက်ရုံအလုပ်ရုံတွေကနေ အနည်းဆုံး ကျပ် ၂ သိန်းကနေ ကျပ် ၄ သိန်းအထိ ကောက်ခံနေတယ်လို့ သိရပါတယ်။

အင်းစိန်မြို့နယ်မှ စက်ရုံဝန်ထမ်းတဦးက“ဒီနေ့ ရပ်ကွက်ရုံးကို သွားပေးရတယ်။ ရပ်ကွက်တခုမှာ စက်ရုံ ၄ ခုရှိရင် သိန်း ၂၀ ပြည့်အောင် မျှခံရတယ်။ တချို့ရပ်ကွက်တွေကျတော့ စက်ရုံ ၁ ရုံ၊ ၂ ရုံလောက်ပဲရှိရင် အုပ်ချုပ်ရေးမှူးတွေက ခေါင်းစဉ်တခုတပ်ပြီး သိန်း ၂၀ ပြည့်အောင် ရပ်ကွက်ပြည်သူတွေဆီက ပြန်ကောက်ပြီး ဖြည့်ပေးနေကြရတယ်” လို့ ဒီဗွီဘီကို ပြောပါတယ်။

အဲ့ဒီလို စက်ရုံတွေက ကောက်ခံရရှိတဲ့ ငွေကြေးတွေကို ရပ်ကွက်အုပ်ချုပ်ရေးမှူးရုံးတွေကို သွားရောက်ပေးဆောင်ရတာဖြစ်ပြီး ရပ်ကွက်အုပ်ချုပ်ရေးမှူးရုံးတွေကနေ ဘယ်ကို သွားရောက်ပေးဆောင်ရမယ် ဆိုတာကိုတော့ မသိရဘူးလို့ သူက ဆက်လက်ပြောဆိုပါတယ်။

ရပ်ကွက်အခြေပြု စက်ရုံအလုပ်ရုံတွေကတော့ ဒီနေ့မှာ သတ်မှတ်ထားတဲ့ ငွေကြေးကို ပေးဆောင်နေရပေမဲ့ စက်မှုဇုန်တွေက စက်ရုံ အလုပ်ရုံတွေထံက ငွေကြေးကောက်ခံခြင်း ရှိ မရှိ ဆိုတာကိုတော့ သီးခြားအတည်မပြုနိုင်သေးပါဘူး။

ဒါ့အပြင် သင်္ကြန်မှာ ရပ်ကွက်နေပြည်သူတွေအနေနဲ့ တအိမ်တယောက် မဖြစ်မနေ သင်္ကြန်လည်ဖို့အတွက် လိုက်ပါရမှာဖြစ်ပြီး အဲ့ဒီညွှန်ကြားချက်ကတော့ လက်ရှိမှာ တရားဝင် မပြောဆိုသေးဘဲ သင်္ကြန်ကျင်းပမယ့် ရက်ပိုင်းအလိုမှ ပြန်လည်အတည်ပြုပေးမယ်လို့ ရပ်ကွက်အုပ်ချုပ်ရေးမှူးတွေက ပြောပါတယ်။

အာဏာသိမ်းစစ်ကောင်စီဟာ မနှစ်ကလိုပဲ ရန်ကုန်မှာ မြို့တော်ခန်းမရှေ့နဲ့ ပြည်သူ့ရင်ပြင်မှာ မဏ္ဍပ်တွေတည်ဆောက်ပြီး ပျော်ပွဲရွှင်ပွဲတွေ ထည့်သွင်းကာ စည်ကားနေတာတွေပြုလုပ်ဖို့ လုပ်ဆောင်နေတာဖြစ်ပြီး ပုဂ္ဂလိက မဏ္ဍပ်တွေ တည်ဆောက်ရင်လည်း အခွန်အခပေးဖို့ မလိုဘူးလို့ ကြေညာထားပါတယ်။

အခုနှစ် ရန်ကုန်သင်္ကြန်ပွဲတော် စည်ကားစေရေးအတွက် စစ်ကောင်စီက ဖိအားပေးတာ၊ ငွေကြေးကောက်ခံတာတွေအပါအဝင် ရေကစားမဏ္ဏပ်တွေကို  ပြည်သူတွေနဲ့ ဝန်ထမ်းတွေ မဖြစ်မနေလာရောက်ရေကစားကြဖို့ မြို့နယ်အသီးသီးမှာ  နည်းလမ်းပေါင်းစုံသုံးပြီး  စည်းရုံး လုပ်ဆောင်နေပါတယ်။    

သာကေတမြို့နယ်မှာ စည်ပင်ဌာနက  အောက်ခြေဝန်ထမ်းတွေကို လူအလှည့်ကျနဲ့ မဖြစ်မနေ ရေကစားမဏ္ဏပ်မှာ လာရောက်ဖို့ ပြောနေတယ်လို့  စည်ပင်နဲ့ နီးစပ်တဲ့  အမျိုးသမီးတစ်ဦးက ​ပြောပါတယ်။

လှိုင်သာယာမြို့နယ်မှာတော့ သင်္ကြန်ကြေးဆိုပြီး ငွေကြေး အတင်းကောက်ခံနေပြီး ရပ်ကွက်အလိုက် နေအိမ်အခြေအနေပေါ်မူတည်ကာ တစ်အိမ်ထောင်လျှင် ကျပ်ငွေ ၁၀၀၀ မှ  ၃၀၀၀ နှုန်း တောင်းခံနေသလို ကျပ်ငွေ  ၁၀၀၀၀ လောက်အထိ သင်္ကြန်ကြေးထည့်ရတဲ့ အိမ်တွေရှိနေပါတယ်။ ဒါ့အပြင် လှိုင်သာယာမှာဖွင့်လှစ်ထားတဲ့ အဆောင်ပိုင်ရှင်တွေထံက လည်း သင်္ကြန်ကြေးကောက်ခံနေတယ်လို့ လှိုင်သာယာမြို့နေသူတစ်ဦးက  ပြောပါတယ်။

စစ်ကောင်စီက ၂၀၂၁ သင်္ကြန်တုန်းကထက် အခု ၂၀၂၂ သင်္ကြန်မှာ ပိုမိုစည်ကားရေး အားစိုက်ကြံစည် နည်းလမ်းပေါင်းစုံသုံးပြီး လုပ်ဆောင်နေတာဖြစ်ပြီး  ရေကစားမဏ္ဏပ်တွေ ၊ဖျော်ဖြေရေးမဏ္ဏပ်တွေလည်း ဆောက်လုပ်နေပါတယ်။

ကျောက်တံတားဒေသခံ တစ်ဦးက “ခုဆို ရွှေတိဂုံဘုရားရှေ့ ပြည်သူ့ရင်ပြင်မှာ ရေကစားမဏ္ဏပ်တွေဆောက်နေတာ မဏ္ဏပ် ၄ ခုလောက်ရှိနေပြီ၊ သင်္ကြန်အမီ အရေအတွက် များလာဖို့ပဲရှိတယ်။ ၈ ရက်နေ့က မြို့တော်ခန်းမရှေ့က မဏ္ဏပ်မှာ ဗုံးကွဲကတည်းက သင်္ကြန်လည်ဖို့ စိတ်ကူးမရှိတော့ဘူး” လို့ ပြောပါတယ်။

သင်္ကြန်လူစည်ကားရေး ရန်ကုန်တိုင်းတွင်းက မြို့နယ်တချို့မှာ ရပ်ကွက်အုပ်ချုပ်ရေးမှူးတွေက လိုက်လံစည်းရုံး လုပ်ဆောင်နေကြပါတယ်။

မြေအောက်တော်လှန်ရေးအဖွဲ့တွေကတော့  သင်္ကြန်မှာ မဏ္ဏပ်တွေဆီ မသွားကြဖို့ စစ်ကောင်စီတပ်တွေအနား မသွားရောက်ကြဖို့၊  အရက်သေစာ သောက်စားမူးယစ် အော်ဟစ် ကခုန်တာမပြုလုပ်ဖို့၊ တေးသီချင်းတွေ အသံကျယ်လောင်စွာမဖွင့်ကြဖို့နဲ့ မိမိနေအိမ်မှာသာ နေထိုင်ကြဖို့ လူထုကို သတိပေး ထုတ်ပြန်ထားပါတယ်။