မကွေးတိုင်း၊ ပေါက်မြို့နယ်မှာ တော်လှန်ရေးတပ်ဖွဲ့တွေ စုပေါင်းပြီး စစ်ဘေးရှောင် မီးဘေးသင့်ပြည်သူတွေအတွက် “စာနာသနား စစ်ရှောင်များသို့” အစီအစဉ်နဲ့  ကံစမ်းမဲ့ ကမ်ပိန်း လုပ်နေတယ်လို့ Rocket Fighter လက်နက်ထုတ်လုပ်ရေးတပ်ဖွဲ့ကနေ သိရပါတယ်။

ပေါက်မြို့နယ်ထဲမှာ စစ်ကောင်စီတပ်တွေ မီးရှို့ဖျက်ဆီးခဲ့လို့ မီးလောင်ကျွမ်းခဲ့တဲ့ အိမ်ခြေအရေအတွက်က ၇၆၀၀ လောက်ရှိပြီး မီးဘေးသင့် စစ်ဘေးရှောင်ပြည်သူ အရေအတွက်က ၁၅၀၀ လောက်ရှိနေတယ်လို့ Rocket Fighter လက်နက်ထုတ်လုပ်ရေးနပ်ဖွဲ့ရဲ့ တာဝန်ခံ ဗိုလ်လပြည့်က ပြောပါတယ်။

အဲဒီစစ်ဘေးရှောင် မီးဘေးသင့် ပြည်သူတွေအတွက် ရန်ပုံငွေရရှိအောင် Rocket Fighterတပ်ဖွဲ့ ပခုက္ကူခရိုင် တပ်ရင်း(၄)တပ်ခွဲ(၁)CAF-SPUPDF၊ ပခုက္ကူခရိုင် အမှတ်(၁၈)တပ်ရင်း၊ ထိုင်းအခြေစိုက် သွေးမအေးတဲ့ ဒေါင်မလေးအဖွဲ့တို့က တဖွဲ့ကို ၅ သိန်းကျပ်စီ စုဆောင်းပြီး ရွှေထည်ပစ္စည်းတွေဝယ်ယူကာ ကံစမ်းမဲကမ်ပိန်း ပြုလုပ်ပေးကြတာလို့ ဆိုပါတယ်။

ဆုမဲတွေကတော့ ၅ သိန်းကျပ်တန် ရွေဆွဲကြိုး ၂ ကုံး၊ ဟန်းချိန်း ၁ခု၊ နားကပ် တရံဖြစ်ပြီး ကံစမ်းမဲ လက်မှတ်တစောင်ကို ၁၀၀၀၀ ကျပ်နှုန်းနဲ့ရောင်းချကာ အစောင်ရေ ၁၀၀၀ ရောင်းချပေးဖို့ လျာထားကာ  ဧပြီလ ၁၆ ရက်နေ့မှာ ဖွင့်လှစ်ပေးမယ်လို့ ဗိုလ်လပြည့်က ပြောပါတယ်။

အဲဒီကမ်ပိန်းကနေ ရရှိခဲ့တဲ့ ရန်ပုံငွေတွေအားလုံးကိုတော့ ပေါက်မြို့နယ်အတွင်းမှာရှိတဲ့ မီးဘေးသင့် စစ်ဘေးရှောင်ပြည်သူတွေကိုထောက်ပံ့ကူညီပေးသွားမယ်လို့ ဆိုပါတယ်။

ဒါကြောင့်မို့ ပြည်တွင်းပြည်ပမှာရှိတဲ့ မိဘပြည်သူတွေအနေနဲ့ ဒီကမ်ပိန်းမှာ ပါဝင်ကူညီပေးကြဖို့နဲ့ ရပ်ဝေးကနေ မဲပေါက်ခဲ့တဲ့ သူတွေကိုလည်း ပစ္စည်းတန်ဖိုးအတိုင် ငွေလွှဲပြောင်းပေးသွားမယ်လို့ ဆိုပါတယ်။

စစ်အာဏာသိမ်းပြီးနောက် ၂၀၂၃ ခုနှစ် ဖေဖော်ဝါရီ ၂၈ ရက်အထိ မကွေးတိုင်းအတွင်းက ကျေးရွာတွေကို စစ်တပ်က စစ်ကြောင်ထိုး မီးရှို့ဖျက်ဆီးခဲ့လို အိမ်ခြေပေါင်း ၉၀၁၉ လုံးမီးလောင်ဆုံးရှုံးခဲ့ကာ တနိုင်ငံလုံးအတိုင်းတာနဲ့ အိမ်ခြေပေါင်း ၆၀၄၅၉ အိမ်ကို မီးရှို့ဖျက်ဆီးခံရတယ်လို့  Data For Myanmar က မတ်လ ၁၉ ရက်နေ့မှာ ထုတ်ပြန်ထားပါတယ်။

မြန်မာ့နွေဦးတော်လှန်ရေးမှာ ရှေ့တန်းကနေ ပါဝင်နေကြတဲ့ ကရင်နီပြည်နယ် တော်လှန်ရေး အင်အားစုတွေနဲ့ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနအတွက် “Buddy ချီတက်၊ စစ်တပ်ပျက်” ရန်ပုံငွေကမ်ပိန်းကနေ ကျပ်သိန်း ၁၁၀၀ ကျော် စံချိန်တင် ရရှိခဲ့တယ်လို့ ထုတ်ပြန်ပါတယ်။

ဒီကမ်ပိန်းကိုတော့ ပြီးခဲ့တဲ့ နိုဝင်ဘာ ၂၅ ရက်ကနေ ဒီဇင်ဘာ ၁၆ ရက်အထိ သီတင်း ၃ ပတ်ကြာ ပြုလုပ်ခဲ့တာ ဖြစ်ပါတယ်။

“တော်လှန်ရေးအတွက် ရံပုံငွေရှာဖွေတဲ့ ကမ်ပိန်းတွေ၊ ပရောဂျက်တွေ ဘာပွဲပဲလုပ်လုပ် ယုံကြည် စိတ်ချ၊ တက်ကြွစွာပါဝင်ပေးကြတဲ့အတွက် တော်လှန်ပြည်သူတွေရဲ့ အားဟာ ဒီတော်လှန်ရေး ကြီးရဲ့ အခရာ၊ ပင်မဒေါက်တိုင်ဆိုတာ အောင်ပွဲတွေဆက်နေတဲ့ ပရောဂျက်နဲ့ ကမ်ပိန်းတွေက သက် သေပါပဲ။ မူလက ဘက်ဒီလည်ပတ်ကို လေလံဆွဲရင် သိန်း (၃၀၀) လောက်ရနိုင်တာဖြစ်လို့ ကံစမ်းမဲကို (သိန်း ၅၀၀ ~ ၇၀၀) ကြားမျှော်မှန်းခဲ့ပါတယ်။ ဒါပေမယ့် တော်လှန်ပြည်သူတွေရဲ့ ထောက်ပံ့ပေးမှူတွေကြောင့် “Buddy to Win Campaign” လေးဟာလဲ မှန်းထားတဲ့ရာခိုင်နှုန်း ထက် (၁၅၇%) ကျော်ဖြင့် လျာထားချက်ထက် များစွာကျော်လွန်အောင်မြင်ခဲ့ပြန်ပါပြီ။ တာဝန် ကျေသော၊ အားကိုးရတဲ့ တော်လှန်ပြည်သူတွေနဲ့အတူ တော်လှန်ဝန်ကို ဆထက်ထမ်းပိုးပြီး စွမ်းနိုင်တာထက်ပိုကြိုးစားထမ်းဆောင်သွားပါ့မယ်လို့ ဆန္ဒကတိပြုပါရစေ။”

ခွေးကလေး Buddy ကိုတော့ ပြီးခဲ့တဲ့ လပိုင်းတွေတုန်းက ကရင်နီပြည်နယ်မှာ သေဆုံးသွားခဲ့တဲ့ အကြမ်းဖက်စစ်ကောင်စီတပ်က ဒုဗိုလ်မှူးကြီး ရာထူးအဆောင်အယောင် အပွင့်တွေကို လည်ပတ်မှာ ဆင်ပေးထားတဲ့ ဓာတ်ပုံတွေကတဆင့် အင်တာနက် လူမှုကွန်ရက် စာမျက်နှာတွေ ပေါ်မှာ ရေပန်းစားလာခဲ့တာပါ။

သူပတ်ထားခဲ့တဲ့ အဆောင်အယောင်တွေရဲ့ ပိုင်ရှင် ဒုဗိုလ်မှူးကြီးကတော့ ဖရူဆို-ဘောလခဲ လမ်းပိုင်း ယာဉ်တန်းတိုက်ခိုက်ခံရမှုမှာ သေဆုံးသွားခဲ့တာ ဖြစ်ပါတယ်။

ကံစမ်းမဲစနစ်နဲ့ ရောင်းချပေးခဲ့တဲ့ ဒီကမ်ပိန်းမှာတော့ ကံစမ်းမဲလက်မှတ်တစောင်ကို မြန်မာငွေကျပ် ၅ သောင်းနဲ့ ရောင်းချပေးခဲ့ရာမှာ လက်မှတ်စောင်ရေ ၁,၉၅၀ နဲ့ ငွေပမာဏအားဖြင့် သိန်း ၁,၁၀၀ ကျော် ရောင်းချပေးနိုင်ခဲ့တယ်လို့ ဆိုပါတယ်။ 

ရရှိငွေတွေကို ကမ်ပိန်းအစမှာ ကြေညာထားခဲ့တဲ့အတိုင်း ကရင်နီဒေသက ဘက်ဒီရဲ့ ဒုဗိုလ်မှူးကြီး လည်ပတ်ရရှိအောင်စွမ်းဆောင်ခဲ့ကြတဲ့တပ်ရင်းတွေကို ၇၀ ရာခိုင်နှုန်းနဲ့ NUG အစိုးရ ကာကွယ် ရေး ဝန်ကြီးဌာနကို ၃၀ ရာခိုင်နှုန်း ပို့ဆောင်ပေးသွားမယ်လို့ ပြောပါတယ်။

ဒါ့အပြင် နောက်တခုကတော့ တော်လှန်ရေးကာလ ပြီးမြောက်တဲ့အခါ NUG အစိုးရအနေနဲ့ “နွေဦးတော်လှန်ရေးပြတိုက်” ဖွင့်လှစ်သွားဖို့ရှိတာကြောင့် အဆိုပါပြတိုက်မှာ နွေဦးတော်လှန်ရေး အမှတ်တရအဖြစ် ဒါကို ပြသလှူဒါန်းချင်ရင်လည်း ကံထူးသူ အလှူရှင်နာမည်နဲ့ ပြသနိုင်ဖို့ စီစဉ်ဆောင်ရွက်ပေးသွားမယ်လို့ ဆိုပါတယ်။