မကွေးတိုင်း၊ ရေနံချောင်းမြို့၊ ညောင်လှဆိပ်ကမ်းမှာ ရေဆင်းချိုးတဲ့ ကလေးလူငယ် ၉ ဦး မတ် ၆ ရက် ညနေပိုင်းက ရေနစ်ရာမှ ကယ်ဆယ်ရေးအဖွဲ့ဝင်တွေက ၅ ဦးကို ကယ်ဆယ်ခဲ့နိုင်ပြီး ပျောက်ဆုံး ၄ ဦးထဲက ၁ ဦးအလောင်းကို ပြန်လည်တွေ့ရှိခဲ့တယ်လို့ နယ်ခံပရဟိတအသင်းကနေ သိရပါတယ်။
ရွှေကြာဖြူပရဟိတအဖွဲ့ဝင်တဦးက “မနေ့တည်းက ရှာနေကြတာ၊ အခု ကလေးတယောက် သေဆုံးအလောင်း ပြန်တွေ့ပါတယ်၊ သုံးဦးကို ဆက်ရှာနေတယ်။ နစ်တဲ့နေရာ အောက်ဘက်မှာ ပြန်တွေ့တာပါ။ ညကလည်း ၁၂ ကျော်လောက်ထိ အသက်ရှင်လျက် ပြန်များတွေ့မလားဆိုပြီး ရှာခဲ့ကြတာ” လို့ ဒီဗွီဘီကို ပြောပါတယ်။
အဖွဲ့လိုက် ရေဆင်းချိုးရာက ရေနစ်ခဲ့တာဖြစ်ပြီး အနီးပတ်ဝန်းကျင်က ၅ ဦးကို ကယ်ဆယ်နိုင်ခဲ့ကာ ပျောက်ဆုံးနေတဲ့ ၄ ဦးကို နယ်ခံပရဟိတအသင်းတွေနဲ့ မကွေးမြို့က ကယ်ဆယ်ရေးအသင်းတွေ၊ မြို့ခံမီးသတ်တပ်ဖွဲ့ဝင်တွေ ဆက်လက်ရှာဖွေနေတယ်လို့ ဆိုပါတယ်။
ဘေးမဲ့ရပ်ကွက်မှ ရေနစ်ပျောက်ဆုံးနေသူ သက်ထားစံ (၁၅ နှစ်)၊ နိုင်နိုင်အောင် (၁၃ နှစ်)၊ ရှိန်ကြီး (၆ နှစ်)၊ ထိန်လင်းဖြိုး (၅ နှစ်) တို့ဖြစ်ပြီး မောင်ထိန်လင်းဖြိုး ရုပ်အလောင်းကိုတော့ ဒီနေ့ နေ့လယ်ပိုင်းက တွေ့ရှိခဲ့တယ်လို့ သိရပါတယ်။
မန္တလေးတိုင်း ကျောက်ဆည်မြို့နယ် ဆင်ခေါင်းတောင်အနီး အပန်းဖြေစခန်းတခုမှာ ရေနစ်ပျောက်ဆုံးခဲ့တဲ့ အမျိုးသားတဦးရဲ့ ရုပ်လောင်းကို စက်တင်ဘာ ၂၀ ရက်နေ့ မနက် ၁၁ နာရီက ရှာဖွေတွေ့ရှိခဲ့ပါတယ်။
ရေနစ်သေဆုံးသူ အမျိုးသားဟာ စက်တင်ဘာ ၁၈ ရက်နေ့ နေ့လယ်ပိုင်းက ရေနစ်ပျောက်ဆုံးခဲ့တာဖြစ်ပြီး ရုပ်အလောင်းကို သုံးရက်မြောက်နေ့မှာ မြို့ကြီးရေလွှဲဆည် (အဝေရာဆည်) မှာ ရှာဖွေတွေ့ရှိခဲ့တာလို့ သိရပါတယ်။
“သေဆုံးသူက လူလတ်ပိုင်းယောက်ျားလေး။ တနင်္ဂနွေနေ့က မွေးနေ့ပွဲသွားလုပ်တာ။ အဖွဲ့ထဲက ကောင်မလေးတစ်ယောက် ရေထဲအဆင်း ရေနစ်တာကို ဆင်းကယ်တာ။ သူက ရေမကူးတတ်ဘူး။ ကောင်မလေးက တနေရာကနေ ကယ်လိုက်နိုင်တယ်။ အသက်ရှင်တယ်” လို့ ရှာဖွေကယ်ဆယ်ရေးလုပ်ပေးတဲ့ မြန်မာနိုင်ငံလူမှုကယ်ဆယ်ရေးအဖွဲ့ (မန္တလေးတိုင်းရုံး) တာဝန်ရှိသူက ပြောပါတယ်။
တွေ့ရှိခဲ့တဲ့ ရုပ်အလောင်းကို လူနာတင်ကားနဲ့ သယ်ဆောင်ပြီး မန္တလေးမြို့ တောင်အင်းမြောက်အင်းသုသာန်မှာ သင်္ဂြိုဟ်ခဲ့တယ်လို့ သိရပါတယ်။
