ရှမ်းပြည်မြောက်ပိုင်း၊ မဘိမ်းမြို့နယ်၊ ခိုတာရွာနားမှာ စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေကို ကချင်လွတ်မြောက်ရေးတပ်မတော် (KIA) နဲ့ PDF ပူးပေါင်းအဖွဲ့တွေက ဧပြီ ၃ ရက် ညနေပိုင်းက  အသင့်စောင့်ဆိုင်း ပစ်ခတ်တိုက်ခိုက်ခဲ့ပြီး လက်နက်ကြီးတချို့နဲ့ ရိက္ခာတွေ သိမ်းဆည်းရမိခဲ့တယ်လို့ KIA တပ်ရင်း ၁၂ က ပြောပါတယ်။ 

မဘိမ်းမြို့မှာရှိတဲ့ ခိုတာရွာကို စစ်ကောင်စီတပ်တွေက အင်အား ၁၀၀ လောက်နဲ့ စစ်ကြောင်းထိုး ဖို့လာတဲ့အချိန် KIA အမှတ် (၁၂) တပ်ရင်း နဲ့ PDF ပူးပေါင်းအဖွဲ့တွေက အသင့်စောင့်ပြီး ပစ်ခတ်ခဲ့ကြတာဖြစ်ကာ တိုက်ပွဲဖြစ်ပွားတဲ့နေရာကို စစ်ကောင်စီ အခြေစိုက်စခန်းတွေဘက်ကနေ ဧပြီ ၄ ရက်နေ့အထိ လက်နက်ကြီးတွေနဲ့ ဆက်တိုက်ပစ်ခတ်ခဲ့တယ်လို့  KIA တပ်ရင်း ၁၂ တာဝန်ရှိသူက ပြောပါတယ်။

လက်နက်ကျသံတွေက အဆက်မပြတ် ကြားနေရပြီး ဒေသခံတွေက ဘာမှယူချိန်မရဘဲ ဘေးလွတ်ရာကိုထွက်ပြေးခဲ့ရကာ အင်အား ၈၀ လောက်ရှိတဲ့ စစ်ကောင်စီစစ်ကြောင်းက ၁၇ ယောက်လောက်ပဲ အကောင်းတိုင်း ကျေးရွာထဲကနေ ပြန်လည်ဆုတ်ခွာသွားတာ မြင်လိုက်ရတယ်လို့ ခိုတာရွာမှာ နေထိုင်တဲ့ ဒေသခံ အမျိုးသမီးတစ်ဦးက ပြောပါတယ်။

မဘိမ်းမြို့နယ်မှာ စစ်ကောင်စီတပ်တွေနဲ့ ဒေသကာကွယ်ရေးအဖွဲ့တွေအကြား မကြာခဏ တိုက်ပွဲဖြစ်ပွားလေ့ရှိပြီး အခု တိုက်ပွဲဖြစ်ပွားတဲ့နေရာက အိမ်ခြေ ၁၀၀ ကျော်ရှိတဲ့ ခိုတာရွာ ဖြစ်ကာ မဘိမ်းမြို့နဲ့ ၄ မိုင်သာကွာဝေးပြီး လက်ရှိမှာတော့ ဒေသခံတွေက ဘေးလွတ်ရာမှာ ထွက်ပြေးတိမ်းရှောင်နေကြတယ်လို့ သိရပါတယ်။ 

အခုတိုက်ခိုက်မှုနဲ့ပတ်သက်လို့ စစ်ကောင်စီဘက်က ထိခိုက်သေဆုံးတဲ့အခြေနေကိုတော့ သီးခြားအတည်မပြုနိုင်သလို စစ်ကောင်စီဘက်ကလည်း သတင်းထုတ်ပြန်လေ့မရှိပါဘူး။

ရှမ်းပြည်မြောက်ပိုင်း၊ ပလောင်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့နယ်ထဲမှာ စစ်ကောင်စီတပ်ဖွဲ့နဲ့ TNLA တအာင်းအမျိုးသားလွတ်မြောက်ရေးတပ်မတော်တို့ကြား ၅ ရက်ဆက်တိုက် တိုက်ပွဲဖြစ်နေတာကြောင့် အနီးနားဝန်းကျင် ရွာပေါင်း ၇ ရွာက ပြည်သူ ၁,၂၀၀ ကျော် ဘေးလွတ်ရာ ရှောင်တိမ်းနေရပြီး အရေးပေါ်အကူအညီတွေ လိုအပ်နေပါတယ်။

တိုက်ပွဲဟာ နမ့်ဆန်မြို့နဲ့ မိုင် ၂၀ လောက်ဝေးတဲ့ ကုန်းသာကျေးရွာအုပ်စုဘက်မှာ ဖြစ်ပွားနေတာဖြစ်ပြီး အဲဒီတကြောက ကုန်းသာ၊ ဟူးမန်း၊ ပါလောက်၊ မန်လုံ၊ ပင်လုံ၊ တာ့လက်၊ ဆန်ငန်း စတဲ့ ရွာပေါင်း ၇ ရွာက ရွာသားတွေ ဒီဇင်ဘာ ၇ ရက် ညနေပိုင်းကနေ မနေ့ကအထိ ထွက်ပြေးတိမ်းရှောင်နေရကြောင်း၊ နမ့်ဆန်မြို့ ဇယန်းကြီးကျောင်းတိုက်မှာတော့ ၁,၂၆၅ ဦး ရောက်ရှိနေတယ်လို့ စစ်ဘေးရှောင်တွေကို ကူညီစောင့်ရှောက်နေတဲ့ သံဃာတော် တပါးက ဒီဗွီဘီကို မိန့်ပါတယ်။

“၇ ရက်နေ့ကတည်းကနေ တဖွဲဖွဲရောက်လာကြတယ်၊ အစက စာရင်းကောက်တာ ၁,၀၄၀၊ မနေ့ညက နောက်ထပ် ၂၂၅ ယောက် ရောက်လာတော့ အကုန် ၁,၂၆၅ ယောက်ပေါ့။ တချို့လည်း သူတို့အစီအစဉ်နဲ့လာတယ်၊ တချို့လည်း ကျောင်းတိုက်က ကားနဲ့ သွားကြိုလာတယ်၊ လူကတော့ အစုံပါပဲ၊ သက်ကြီးရွယ်အို အဘိုးအဘွားတွေရော၊ ကိုယ်ဝန်ဆောင်ရော၊ ကလေးတွေရော၊ ပြီးတော့ လေဖြတ်နေတဲ့လူနာတွေ၊ မသန်စွမ်းသူတွေလည်းပါတယ်၊ အများအားဖြင့် အဝတ်တထည် ကိုယ်တခု ပြေးလာတာ။ အဝတ်အစားလဲစရာ အပိုလည်းမရှိဘူး၊ စောင်တွေလည်းလိုတယ်၊ ဆေးဝါးတွေလည်း လိုတယ်၊ အရေးကြီးဆုံး စားရေးသောက်ရေးပေါ့။ လူက တအားများတော့ ဘုန်းကြီးကျောင်းလည်း မတတ်နိုင်၊ အလှူရှင်တွေ လှူသလောက်လည်း မလောက်သေးဘူး။”

အဆိုပါရွာသားတွေဟာ အများအားဖြင့် လက်ဖက်ခြံလုပ်ငန်းလုပ်ကိုင်ပြီး ခုချိန်ဆိုရင် လက်ဖက်ခူးချိန်၊ လက်ဖက်လှမ်းချိန်ဖြစ်ကြောင်း၊ ရက်ပေါင်းရှည်ကြာ စစ်ဘေးရှောင်ရရင်တော့ အလုပ်အကိုင်လည်း ပျက်ပြီး စားဝတ်နေရေး အခက်တွေ့နိုင်တယ်လို့ ဆိုပါတယ်။

ရပ်နီးရပ်ဝေး စေတနာရှင်တွေအနေနဲ့ နမ့်ဆန်စစ်ဘေးရှောင်တွေကို ဖုန်းနံပါတ် ၀၉၂၆၅၉၃၃၁၈၄၊ ၀၉၂၅၇၆၁၅၁၀၈၊ ၀၉၂၆၇၄၃၃၉၉၂၊ ၀၉၂၆၃၁၅၉၅၅၇၊ ၀၉၂၆၀၈၃၈၅၆၆ နဲ့ ၀၉၂၆၆၆၀၈၃၂၂ တွေကို ဆက်သွယ်ကူညီနိုင်တယ်လို့ ဆိုပါတယ်။

တိုက်ပွဲဖြစ်ပွားရတဲ့ အကြောင်းရင်းနဲ့ပတ်သက်ပြီး TNLA ပြောခွင့်ရ တာ့အိုက်ကျော်က “ဒီဇင်ဘာ ၇ ရက်နေ့က စစ်ကောင်စီလက်အောက်ခံတပ်ဖွဲ့ဟာ ရဟတ်ယာဥ် ၅ စီးနဲ့ ကုန်းသာ၊ ပန်လော့၊ ဟူးမန်းဘက်မှာ စစ်သားတွေ လာချထားလို့ ကုန်းသာရွာမှာ ရှိနှင့်နေတဲ့ TNLA တပ်သားတွေနဲ့ ပစ်ခတ်မှု စဖြစ်ခဲ့တာ” လို့ ဒီဗွီဘီကို ပြောပါတယ်။

စစ်ကောင်စီဘက်က ရဟတ်ယာဉ်ပေါ်ကနေ ဗုံးကြဲတာ၊ လက်နက်ကြီးနဲ့ ကူပစ်တာတွေကြောင့် ကုန်းသာရွာ ဘုန်းကြီးကျောင်းဇရပ်နဲ့ နေအိမ် ၅ လုံး လက်နက်ကျည်ထိပြီး မီးလောင်ပျက်စီးခဲ့ပါတယ်။

Photo Credit-ဇယန်းဟိုနမ့်ကျောင်း