close

လကမ္ဘာ

close

April 4, 2023

လကမ္ဘာကို လှည့်ပတ်ပျံသန်းမည့် ခရီးစဉ်တွင် ပထမဆုံး အမျိုးသမီးနှင့် လူမည်း အာကာသယာဉ်မှူးတို့ ပါဝင်

နာဆာဟာ အနှစ် ၅၀ ကျော်အတွင်း သူရဲ့ ပထမဆုံး လူသားမစ်ရှင်အတွက် လကမ္ဘာကို သွားရောက်ဖို့ ဧပြီ ၃ ရက်မှာ ထုတ်ဖော်ပြောကြားခဲ့ပြီး ပထမဆုံး အမျိုးသမီးတဦးနဲ့ လူမည်းအမျိုးသားတဦးတို့ ပါဝင်ခဲ့ပါတယ်။

နာဆာက အာကာသယာဉ်မှူးတယောက်ဖြစ်တဲ့ ခရစ်စတီးနားကို့ခ်ျဟာ အာကာသပျံသန်းမှု ခရီးစဉ်တခုမှာ အရှည်ကြာဆုံး ပျံသန်းမှုမှတ်တမ်းကို ရရှိထားသူဖြစ်ပြီး လာမယ့်နှစ် လကမ္ဘာကို အာတီမစ် တူး ပျံသန်းမှုမှာ မစ်ရှင်ပါရဂူအနေနဲ့ ဆောင်ရွက်မှာဖြစ်ပါတယ်။

နာဆာရဲ့ ရေတပ်လေယာဉ်မှူး ဗစ်တာဂလိုဗာ ကတော့ ၂၀၂၄ ခုနှစ် နိုဝင်ဘာလမှာ လကို လှည့်ပတ်ပျံသန်းမယ့် အိုရီယွန် အာကာသယာဉ်ကို မောင်းနှင်မှာဖြစ်ပြီး လကမ္ဘာမစ်ရှင်မှာ ပထမဆုံးပါဝင်မယ့် လူမည်းအမျိုးသားတဦး ဖြစ်ပါတယ်။

ကျန်အဖွဲ့သားတွေကတော့ အသက် ၄၇ နှစ်အရွယ် နာဆာ အာကာသယာဉ်မှူး ရိဒ် ဝစ်မန်းနဲ့ Canadian Space Agency က အသက် ၄၇ နှစ်အရွယ် တိုက်လေယာဉ်မှူးဟောင်း ဂျီရမီ ဟန်ဆန် တို့ဖြစ်ပြီး အမေရိကန်သုံးယောက်နဲ့ ကနေဒါနိုင်ငံသား တယောက်တို့ အနေနဲ့ ပထမဆုံး ဖြစ်လာပါတယ်။

အာတီမစ် တူး ပျံသန်းမှုဟာ ရာစုနှစ်ဝက်အတွင်း ပထမဆုံးအကြိမ် လူသားတွေ လပေါ်ကို ပြန်လည်ရောက်ရှိခြင်းရဲ့ ရှေ့ပြေးခရီးဖြစ်ပြီး အင်္ဂါဂြိုဟ်ကိုသွားရောက်ဖို့ အပြီးသတ် ခရီးစဉ်လည်း ဖြစ်ပါတယ်။

အပြာရောင် လေယာဉ်ဝတ်စုံကို ဝတ်ဆင်ထားတဲ့ အာကာသယာဉ်မှူးလေးဦးကို ဟော်စတွန်ရှိ Johnson Space Centre မှာ နာဆာအာကာသယာဉ်မှူး ဘီလ် နယ်ဆန်က မိတ်ဆက်ပေးခဲ့ပြီး “ကမ္ဘာ့အကြီးဆုံး အားအပြင်းဆုံး ဒုံးပျံဟာ သူတို့ကို ကောင်းကင်ဘုံ အထက်ကို ပို့ပေးလိမ့်မယ်” လို့ ပြောကြားခဲ့ပါတယ်။

ကနေဒါနိုင်ငံရဲ့ ဆန်းသစ်တီထွင်မှု သိပ္ပံနဲ့ စွမ်းအင်ဝန်ကြီး ဖရန်စစ်စကိုဖိလစ်ချမ်ပဂ်နီက အဆိုပါပွဲကို တက်ရောက်ခဲ့ပြီး အကာသယာဉ်အမှုထမ်းထဲမှာ ကနေဒါနိုင်ငံသား တစ်ယောက်ရှိနေတာထက် ပိုပြီး ဂုဏ်ယူစရာ မရှိပါဘူးလို့ ဆိုပါတယ်။

အာတီမစ် ပရိုဂရမ်ရဲ့ တစ်စိတ်တစ်ပိုင်းအနေနဲ့ နာဆာဟာ အပိုလို မစ်ရှင်အပြီး ဆယ်စုနှစ်ငါးခုကြာ ၂၀၂၅ခုနှစ်မှာ လပေါ်ကို အာကာသယာဉ်မှူးတွေစေလွှတ်ဖို့စီစဉ်ထားပါတယ်။

12 hours Ago

December 15, 2022

လကမ္ဘာသွားခဲ့သည့် မောင်းသူမဲ့ Orion အာကာသယာဉ် ကမ္ဘာမြေပေါ် ပြန်ရောက်

‌လကမ္ဘာကို ၂၅ ရက်ကြာ လေ့လာနိုင်ခဲ့တဲ့ မောင်းသူမဲ့ Orion အာကာသယာဉ်ဟာ လပတ်လမ်းကြောင်းပေါ်မှာ မိုင်ပေါင်း ၁ ဒသမ ၄ သန်းကျော် ခရီးနှင်ခဲ့ကာ ဒီဇင်ဘာ ၁၁ ရက်က ‌ပစိဖိတ်သမုဒ္ဒရာထဲကို လေထီးနဲ့ အောင်အောင်မြင်မြင် ဆင်းသက်နိုင်ခဲ့တယ်လို့  နာဆာက သတင်းထုတ်ပြန်ပါတယ်။

နောက်လာမယ့် အာတီမစ် မစ်ရှင်တွေက Space Launch System (SLS) ဒုံးပျံတွေအတွက် ဒုံးပျံအင်ဂျင်အသစ် RS- 25 ကို ဒီဇင်ဘာ ၁၄ ရက်နေ့ စမ်းသပ်မယ်လို့ နာဆာက ဆိုပါတယ်။

နိုဝင်ဘာ ၁၆ ရက်နေ့က နာဆာရဲ့ ကနေဒီ အာကာသစင်တာကနေ Space Launch System (SLS) ဒုံးပျံတပ်ထားတဲ့ အာတီမစ် ၁ မစ်ရှင်ကို လွှတ်တင်ခဲ့တာဖြစ်ပြီး အာတီမစ် ၂ မစ်ရှင်မှာ လိုက်ပါမယ့် အာကာသယာဉ်မှူးတွေအတွက် အာကာသထဲက ကြမ်းတမ်းတဲ့ အခြေအနေတွေကို သိရဖို့ Orion ယာဉ်၊ အာတီမစ် ၁ မစ်ရှင်ကို စမ်းသပ်လွှတ်တင်ခဲ့တာလို့ သိရပါတယ်။

Orion ယာဉ်က ကမ္ဘာပေါ် တနာရီ မိုင် ၂၅,၀၀၀ အရှိန်နဲ့ ပြန်ဆင်းလာချိန်မှာ လေထုပွတ်တိုက်မှု အရှိန်ကြောင့် နေမျက်နှာပြင်ရှိ အပူချိန် ၅,၀၀၀ ဒီဂရီဖာရင်ဟိုက်ရဲ့ တဝက်လောက် ပူနေခဲ့တာဖြစ်ပြီး လေထီးဖွင့်လိုက်မှ တနာရီမိုင် ၂၀ ခန့်အထိ နှေးကွေးသွားကာ ပစိဖိတ်သမုဒ္ဒရာထဲ ဘေးကင်းစွာ ဆင်းသက်နိုင်ခဲ့တာပါ။

အာတီမစ် ၁ မစ်ရှင်ရဲ့ မန်နေဂျာ မိုက်ဆာရာဖင်က “Orion ဟာ လကနေ ကမ္ဘာပေါ်ကို ဘေးကင်းကင်းနဲ့ ပြန်ရောက်ပါပြီ။ ကျနော်တို့ မျှော်လင့်ချက်တွေကို ကျော်လွန်ပြီး နက်ရှိုင်းတဲ့ အာကာသထဲမှာ Orion က ကောင်းကောင်းလည်ပတ်နိုင်ခဲ့တယ်။ လကနေ ကမ္ဘာကိုပြန်တဲ့ လမ်းမှာလည်း လေထုနဲ့ ပြင်းထန်တဲ့အခြေအနေတွေကို ခံနိုင်ရည်ရှိကြောင်း ပြသခဲ့ပြီးပါပြီ” လို့ ပြောပါတယ်။

၈ မိနစ်ခွဲ (စက္ကန့် ၅၀၀) ကြာမြင့်မယ့် RS-25 အင်ဂျင်အသစ် စမ်းသပ်မှုကို နာဆာရဲ့ စတန်နစ် အာကာသစင်တာမှာပြုလုပ်ခဲ့တာလို့ သိရပြီး ‌အင်ဂျင်ပေါက်ကွဲတွန်းကန်မှုကို အချိန်ကြာကြာ မြင်တွေ့ရမှာဖြစ်ကာ SLS ပါဝါကို ၁၁၁ ရာခိုင်နှုန်းအထိ မြှင့်တင်စေနိုင်တယ်လို့ ဆိုပါတယ်။

ဒီဇင်ဘာ ၁၁ ရက်က ကမ္ဘာမြေပေါ် ပြန်ရောက်ခဲ့တဲ့ Orion ကို ဒီဇင်ဘာ ၁၃ ရက်နေ့မှာ ပစိဖိတ်ကမ်းခြေကနေ ကန်နဒီစင်တာအထိ နာဆာက သယ်ယူသွားမယ်လို့ သိရပြီး အာတီမစ် ၁ မစ်ရှင်ရဲ့ လပေါ် အချိန်ကြာကြာ လေ့လာနိုင်ခဲ့မှုကနေ အာကာသယာဉ်မှူးတွေ အင်္ဂါဂြိုဟ်အထိ သွားနိုင်ဖို့ ဆောင်ရွက်သွားမယ်လို့ သိရပါတယ်။

Ref/Photo -NASA

4 months Ago
Up