ရန်ကုန်၊ လသာမြို့နယ်၊ အမှတ် ၆ ရပ်ကွက်၊ မဟာဗန္ဓုလလမ်းမနဲ့ ၂၁ လမ်းထောင့်ရှိ SP Bakery မုန့်ဆိုင်မှာ မေလ ၁၀ ရက် မနေ့ညနေပိုင်းက ဂက်စ်ပေါက်ကွဲမှုဖြစ်ပွားပြီး လူ ၅ ဦး ထိခိုက်ဒဏ်ရာရရှိခဲ့တယ်လို့ မြို့ခံတွေက ပြောပါတယ်။
အဆိုပါ SP (စံပြ)မုန့်ဆိုင်က ဆိုင်အတွင်းခန်းနဲ့ အဲယားကွန်းစနစ်တွေ ပြုပြင်နေတာကြောင့် ဆိုင်ပိတ်ထားတာလို့ သိရပြီး အဲ့ဒီညနေ ၅ နာရီခန့် အဲယားကွန်းဂက်စ် ဖြည့်တဲ့နေရာကနေ ပေါက်ကွဲခဲ့တာပါ။
ပေါက်ကွဲမှုကြောင့် အဲယားကွန်းဆားဗစ်နဲ့ ပန်းရန်အလုပ်သမား အသက်၂၀ ဝန်းကျင်ခန့်ရှိ အမျိုးသား ၅ ဦးမှာ လက်၊ ဦးခေါင်းနဲ့ မျက်နှာ ထိခိုက်ဒဏ်ရာတွေ ရရှိခဲ့တယ်လို့ သိရပါတယ်။
မြို့ခံကယ်ဆယ်ရေးအသင်း တာဝန်ရှိသူတဦးက"ဂက်စ်ဖြည့်ရင်း ပေါက်ကွဲတာ၊ ၂ ဦးက ခေါင်းထိထားတယ် တဦးက လက်ချောင်းတွေ အစတွေ မှန်ထားတာ၊ အားလုံး မစိုးရိမ်ရပါ၊ ရန်ကုန်ဆေးရုံကြီးကို ပို့ထားပါတယ် "လို့ ဆိုပါတယ်။
ဂက်စ်ပေါက်ကွဲမှုဖြစ်ပြီးချိန်မှာ လသာမြို့နယ်ရဲစခန်းက လာရောက်စစ်ဆေးမှုတွေ ပြုလုပ်ခဲ့တယ်လို့ သိရပြီး ဒီဖြစ်စဉ်နဲ့ပတ်သက်ပြီး SP Bakery မုန့်ဆိုင်ကို ဖုန်းဆက်သွယ်မေးမြန်းပေမဲ့ ပြန်လည်ဖြေကြားခြင်း မရှိပါဘူး။
ထိခိုက်ဒဏ်ရာရရှိသူတွေဟာ ရန်ကုန်မြို့က မှော်ဘီ၊ တာမွေ၊ တွံတေးနဲ့ သန်လျင်မြို့နယ်တို့က အလုပ်လာလုပ်သူတွေလို့ သိရပြီး ကယ်ဆယ်ရေးအသင်းတွေက ရန်ကုန်ပြည်သူ့ဆေးရုံကြီးကို ပို့ဆောင်ပေးထားပါတယ်။
ရန်ကုန်မြို့၊ လသာမြို့နယ်၊ ၁ ရပ်ကွက်၊ ကမ်းနားလမ်းနဲ့ လမ်းမတော်လမ်းထောင့်ရှိ ဧရာဝတီဘဏ်ခွဲ ၃၇ မှာ ဒီဇင်ဘာ ၁၉ ရက် ဒီနေ့မနက်ပိုင်းက လုယက်မှုဖြစ်ပြီး ကျပ် သိန်း ၁၀၀ နီးပါး ပါသွားတယ်လို့ ရပ်ကွက်နေသူတွေဆီက သိရပါတယ်။
ဒီနေ့မနက် ၁၀ နာရီဝန်းကျင်က ဧရာဝတီဘဏ်ခွဲ ၃၇ ကို အမည်မသိ အမျိုးသားတယောက် ရောက်လာပြီး ဓားမြောင်တချောင်းနဲ့ ခြိမ်းခြောက်ကာ ငွေကောင်တာမှ သိန်း ၁၀၀ နီးပါး ယူသွားတယ်လို့ ရပ်ကွက်နေသူတဦးက ဒီဗွီဘီကို ပြောပါတယ်။
“ဘယ်သူမှမသိဘူး၊ ၉ နာရီ ၄၀ မှာ ဖြစ်တာဆိုတော့ ရုံးစဖွင့်တဲ့အချိန် ကောင်မလေးတွေနဲ့ လုံခြုံရေးတယောက်ပဲရှိတာ၊ အဲ့ဒီအချိန် ဓားနဲ့ခြိမ်းခြောက်ပြီး ယူသွားတာဖြစ်မယ်။ အဲ့ဒီနားကသူတွေတောင် မသိဘူး၊ ဖြစ်ပြီးမှသိတာ၊ စစ်သားတွေရောက်လာမှ သိတာ။”
လုယက်သူအမျိုးသားဟာ ဘဏ်မန်နေဂျာ အပါအဝင် ဝန်ထမ်းတွေကို ဓားနဲ့ခြိမ်းခြောက်ကာ ငွေကောင်တာက ငွေတွေယူသွားတာဖြစ်တယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
“ငွေကတော့ သိန်း ၁၀၀ နီးပါး ပါသွားတယ်။ စစ်တပ်က နောက်မှရောက်လာတာ၊ မမိဘူး။”
လုယက်မှုဖြစ်ပြီးနောက် စစ်ကောင်စီတပ်နဲ့ ရဲတွေက မဟာဗန္ဓုလလမ်းကနေ ကမ်းနားထိ ပိတ်ဆို့စစ်ဆေးခဲ့တယ်လို့ ရပ်ကွက်နေသူတွေဆီက သိရပါတယ်။
ပြီးခဲ့တဲ့လတွေကလည်း ရန်ကုန်က မြို့နယ်တချို့မှာ လုယက်မှုတွေဖြစ်ပြီး သေဆုံးသူနဲ့ ထိခိုက်ဒဏ်ရာရသူတွေ ရှိခဲ့ပါတယ်။
