အင်တာတိုက်စစ်မှူး လူကာကူကို ဂျူဗင်တပ်အသင်းပရိသတ်တွေက လူမျိုးရေးခွဲခြားမှု ပြုလုပ်ခဲ့တာကြောင့် ဂျူဗင်တပ်အိမ်ကွင်းက ပွဲကြည့်စင်တစ်ခုကို တစ်ပွဲပိတ်ပင်တဲ့ ပြစ်ဒဏ်ချမှတ်ခဲ့ပါတယ်။

အင်တာမီလန်အသင်းနဲ့ ဂျူဗင်တပ်အသင်းတို့ တစ်ဂိုးစီ သရေကျခဲ့တဲ့ ကိုပါအီတလီယာဖလား ဆီမီးဖိုင်နယ်ပထမအကျော့မှာ လူကာကူက နောက်ဆုံးမိနစ်မှာ ပင်နယ်တီဂိုးသွင်းခဲ့ပါတယ်။

ဂိုးသွင်းအပြီးမှာ ဂျူဗင်တပ်ပရိသတ်တွေရှေ့မှာ အောင်ပွဲခံခဲ့တာကြောင့် အဝါကတ်ပြသခံရပြီး နှစ်ဝါတစ်နီနဲ့ ထုတ်ပယ်ခံခဲ့ရပါတယ်။

အဲဒီပွဲစဉ်မှာ လူကာကူကို ဂျူဗင်တပ်ပရိသတ်တွေကလည်း လူမျိုးရေးခွဲခြားတဲ့ အသုံးအနှုန်းတွေနဲ့ အော်ဟစ်လှောင်ပြောခဲ့ကြတာပါ။

ဒါကြောင့် ဂျူဗင်တပ်အသင်းရဲ့ တောင်ဘက်ပွဲကြည့်စင်က အောက်ဆုံးအတန်းကို ပိတ်ပင်ဖို့ ပြစ်ဒဏ်ချမှတ်ခဲ့တာပါ။

အဲဒီပွဲကြည့်စင်ဟာ ပရိသတ် ၅၀၀၀ လောက်ဝင်ဆံ့ပြီး ဧပြီ ၂၃ ရက်မှာကစားမယ့် နာပိုလီနဲ့ပွဲမှာ စတင်ပြစ်ဒဏ်ခံရမှာ ဖြစ်ပါတယ်။

ချဲလ်ဆီးအသင်းဆီ မပြောင်းရွှေ့ဖို့ တိုက်စစ်မှူး လူကာကူကို သတိပေးခဲ့ဖူးကြောင်း ပြင်သစ် တိုက်စစ်မှူးဟောင်း အွန်နရီကပြောပါတယ်။ တိုက်စစ်မှူးလူကာကူဟာ ဘယ်လ်ဂျီယံလက်ထောက် နည်းပြအဖြစ်တာဝန်ယူခဲ့တဲ့ အွန်နရီနဲ့ လက်ရွေးစင်အသင်းမှာအတူအလုပ်လုပ်ခဲ့ဖူးပါတယ်။ သူဟာ ၂၀၂၁ ခုနှစ်က အင်တာမီလန်ကနေ ပေါင်၉၇ သန်းခန့်နဲ့ ချဲလ်ဆီးအသင်းဆီ တစ်ကျော့ပြန် ပြောင်းရွှေ့လာခဲ့တာပါ။ အဲဒီအချိန်တုန်းက ချဲလ်ဆီးနည်းပြ တူချယ်လက်ထပ်မှာ လူကာကူနဲ့ အနေနဲ့ အံဝင်ဖို့မလွယ်တာကြောင့် အသင်းမပြောင်းရွှေ့ဖို့ ပြောခဲ့ကြောင်း အွန်နရီကပြောပါတယ်။ အသက်၂၉ နှစ်ရှိ တိုက်စစ်မှူး လူကာကူဟာ လက်ရှိအချိန်မှာ အင်တာမီလန်မှာအငှားထွက်ကစားနေတာပါ။ ချဲလ်ဆီးမှာ ကစားစဉ်က စုစုပေါင်း ၄၄ပွဲမှာ ၁၅ ဂိုး သွင်းယူနိုင်ခဲ့ ပါတယ်။