နေပြည်တော်၊ ဇေယျာသီရိမြို့နယ်၊ ပေါင်းလောင်းမြစ်အတွင်း မေလ ၆ ရက် ညနေ ၃ နာရီက သူငယ်ချင်းတွေနဲ့ ရေဆင်းကူးတဲ့ လူငယ်နှစ်ယောက် ရေနစ်သေဆုံးခဲ့တယ်လို့ ဒေသခံတွေဆီက သိရပါတယ်။
လှေခွင်းတောင်ကမ်းခြေအပန်းဖြေစခန်းအနီး ပေါင်းလောင်းမြစ်မှာ မနေ့ညနေသုံးနာရီက လူငယ် ၅ ယောက်ရေဆင်းကူးရာမှာ ယောကျ်ားလေးတစ်ယောက်နဲ့ မိန်းကလေး တစ်ယောက် ရေနစ်သေဆုံးခဲ့တာဖြစ်တယ်လို့ ဒေသခံတစ်ဦးက ပြောပါတယ်။
"ငါးယောက်စလုံးက အသက် ၁၆ ကနေ ၂၀ လောက်ပဲရှိမယ်။ ပျဥ်းမနားနဲ့ ပုပ္ပသီရီက လူငယ်တွေ ရေဆင်းကူးရင်း နှစ်ယောက်နစ်သွားတာ ရေငုပ်ကျွမ်းကျင်သူတွေလိုက်ရှာတာ ညနေ လေးနာရီခွဲမှာ အလောင်းကို ပြန်တွေ့တယ်။”
သေဆုံးသူနှစ်ယောက်မှာ ပျဥ်းမနားမြို့နယ် ရွာကောက်ရပ်ကွက်နေ အသက် ၁၆ နှစ်အရွယ်ရှိ မောင်ကောင်းခန့်နဲ့ ပုပ္ပသီရိမြို့နယ် အောင်သာယာရပ်ကွက်နေ အသက် ၂၀ အရွယ်ရှိ မမျိုးထက်မြတ်တို့ဖြစ်တယ်လို့ အုပ်ချုပ်ရေးနဲ့နီးစပ်သူတစ်ဦးက ဒီဗွီဘီ ကိုပြောပါတယ်။
"ကျည်တောင်ရွာက ရေငုပ်သမားတွေရှာပေးလို့ပြန်တွေ့တာ ခုတင် ၁၀၀၀ ကို ပို့လိုက်တယ်၊ ရေဆင်းနယ်မြေရဲစခန်းက သေမှုသေခင်းနဲ့ဖွင့်တယ်"လို့ ရှင်းပြပါတယ်။
ပြီးခဲ့တဲ့ မတ်လ ၁၈ ရက်ကလည်း ပေါင်းလောင်းမြစ်အတွင်းမှာ ရေဆင်းကူးတဲ့ ဇမ္မူသီရိမြို့နယ် ဘောဂသီဒ္ဓိရပ်ကွက်မှာနေထိုင်တဲ့ အသက် ၂၈ နှစ်အရွယ်ရှိ ကိုမိုးဝေယံ ဆိုသူ ရေနစ်သေဆုံးခဲ့ပါတယ်။
ကရင်ပြည်နယ်၊ ကြာအင်းဆိပ်ကြီးမြို့နယ်မှာ စစ်ကောင်စီတပ်က ညမထွက်ရအမိန့် ထုတ်ပြန်ပြီးနောက် လူငယ်အမျိုးသားတွေကို အဓိကထားပြီး လိုက်လံဖမ်းဆီးထောင်ချ နေတယ်လို့ ဒေသခံတွေက ပြောပါတယ်။
ရဲတပ်ဖွဲ့၊ စစ်ကောင်စီတပ် အပါအဝင် ဌာနဆိုင်ရာ အဖွဲ့အစည်းတွေနဲ့ ကရင်နယ်ခြားစောင့်တပ် (BGF) တပ်တွေ မြို့ထဲလှည့်ပတ်ကာ လူငယ်အမျိုးသားတွေကို အဓိကထား စစ်ဆေးဖမ်းဆီးတာတွေ ပြုလုပ်နေတယ်လို့ သိရပါတယ်။
ဖမ်းဆီးခံရသူ ၂၀ ဝန်းကျင်ရှိလာပြီး ၁ ဦးသေဆုံးကာ ငွေကြေးနဲ့ ပြန်ရွေးရတာတွေလည်း ရှိတယ်လို့ မြို့ခံအမျိုးသမီးတဦးက ပြောပါတယ်။
“ဖမ်းခံရတာ အယောက် ၂၀ လောက်ရှိတယ်။ အလုပ်နောက်ကျမှ ပြန်လာတဲ့သူတွေပေါ့။ မိန်းကလေးမပါဘူး၊ ယောကျ်ားလေး လူငယ်တွေချည်းပဲ။ ပိုက်ဆံရှိတဲ့သူတွေကတော့ လာရွေးတယ်၊ တယောက် ၁၀ သိန်းနဲ့ ၃ ယောက်လောက်ရှိတယ်။ မရှိတဲ့သူတွေကတော့ ဖမ်းခံထိထားတာပေါ့။ ဖမ်းပြီးရင် အချုပ်ထဲမှာ ၃ ရက်ထားတယ်။ ပြီးတော့ လေယာဥ်နဲ့ ခေါ်သွားလိုက်တယ်။ ဘယ်ကိုခေါ်သွားလိုက်မှန်းမသိဘူး။ ၁ ယောက်ကတော့ အထဲမှာ ထုရိုက်ခံရပြီး သေသွားတာ။”
ကြာအင်းဆိပ်ကြီးမြို့ထဲက ဖမ်းခံရသူတွေကို ဘားအံ တောင်ကလေးထောင်ကို ပို့ဆောင်ကာ ဖမ်းဆီးခံရသူတွေထဲမှာလည်း စစ်ကောင်စီတပ်လက်အောက်ခံ ထွေအုပ်စာရေးတဦး ပါဝင်နေပြီး အဲ့ဒီသူကိုတော့ ကြာအင်းဆိပ်ကြီးရဲစခန်းက အချုပ်ခန်းမှာသာ ဖမ်းဆီးထားတယ်လို့ မြို့တွင်းနေထိုင်သူ အမျိုးသားတဦးက ပြောပါတယ်။
“ညနေ ၆ နာရီထိုးရင်တော့ ရောက်တဲ့နေရာမှာ နားလိုက်ကြတယ်။ လွန်ခဲ့တဲ့အပတ်က ဖမ်းထားတဲ့ စကစ ထွေအုပ်စာရေးတယောက် ဆိပ်ကြီးရဲစခန်းအချုပ်မှာ ရှိနေသေးတယ်။ ဖမ်းခံရတဲ့သူတွေကို ဘားအံထောင်ကို ပို့လိုက်တယ်။ ဘားအံ တောင်ကလေးထောင်မှာ စစ်အုပ်ချုပ်ရေး မာရှယ်လော ၁၄၄ စစ်ခုံရုံးနဲ့ တိုက်ရိုက်။ ထောင်ကျတာကတော့ ၁၈ လလို့ ကြားတယ်” လို့ သူကပြောပါတယ်။
ကြာအင်းဆိပ်ကြီးမှာ ပြီးခဲ့တဲ့ ဖေဖော်ဝါရီ ၂ ရက်နေ့က ညနေ ၆ နာရီကနေ မနက် ၆ နာရီအထိ ညမထွက်ရအမိန့် စစ်ကောင်စီက ထုတ်ပြန်ခဲ့တာပါ။
ညဘက်တွေမှာ စစ်ကောင်စီတပ်က မီးအမှောင်ချပြီး ပစ်ခတ်ဖမ်းဆီးတာတွေ ပြုလုပ်နေတာကြောင့် ဈေးရောင်းဈေးဝယ်သူတွေနဲ့ အလုပ်သွားလာတဲ့သူတွေမှာ ပိုမိုခက်ခဲလာတယ်လို့ ဆိုပါတယ်။
ဒါ့အပြင် ဘားအံမြို့၊ မြဝတီမြို့နဲ့ ကော့ကရိတ်မြို့နဲ့တို့မှာလည်း ညမထွက်ရအမိန့် ထုတ်ပြန်ထားပြီး ညမထွက်ရအမိန့်ကို ကျော်လွန်ပြီး အပြင်ထွက်သူတွေကိုလည်း စစ်ဆေးဖမ်းဆီး ထောင်ချတာတွေ ပြုလုပ်နေတယ်လို့ ဒေသခံတွေထံက သိရပါတယ်။
