စစ်အာဏာသိမ်းမှုနဲ့အတူ နိုင်ငံရေးမတည်ငြိမ်မှုတွေနဲ့ ရင်ဆိုင်နေရတဲ့ မြန်မာနိုင်ငံလူဦးရေရဲ့ သုံးပုံတပုံနီးပါး လူဦးရေ ၁၇ ဒသမ ၆ သန်းလောက်ဟာ လူသားချင်း စာနာထောက်ထားမှုဆိုင်ရာ အကူအညီတွေ လိုအပ်နေဆဲဖြစ်တယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ပါတယ်။
အခု ၂၀၂၃ ခုနှစ် ပထမ ၂ လတာအတွင်းမှာ ပြည်တွင်းနေရပ်စွန့်ခွာထွက်ပြေးရသူပေါင်း ၁၅၄,၀၀၀ လောက် ရှိခဲ့ပြီး တောတောင်တွေထဲမှာ နေထိုင်နေကြရကာ စစ်အာဏာသိမ်းပြီးချိန်ကတည်းက စတင်ရေတွက်ရင် ပြည်တွင်းနေရပ်စွန့်ခွာ ထွက်ပြေးတိမ်းရှောင်နေရသူပေါင်း ၁ ဒသမ ၃ သန်းထိ ရှိလာခဲ့ပြီလို့ ဆိုပါတယ်။
ပြီးခဲ့တဲ့ ဖေဖော်ဝါရီ ၂၇ ရက်အထိ နောက်ဆုံးရရှိထားတဲ့ အချက်အလက်တွေအရ အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့ မလုံခြုံမှုတွေကြောင့် နိုင်ငံတဝန်းမှာတော့ ပြည်တွင်းနေရပ်စွန့်ခွာထွက်ပြေးရသူပေါင်း ၁ ဒသမ ၆ သန်းကျော် ရှိလာပြီ ဖြစ်ပါတယ်။
ဒါ့အပြင် ပြည်နယ်နဲ့ တိုင်းဒေသကြီး အများအပြားရှိ မြို့နယ်ပေါင်း ၄၇ ခုတို့မှာ စစ်အုပ်ချုပ်ရေး ကြေညာထားပြီး နိုင်ငံတဝန်း လူသားချင်းစာနာထောက်ထားမှုဆိုင်ရာ လိုအပ်ချက်တွေ မြင့်တက်လာနေတယ်လို့ ဆိုပါတယ်။
အထူးသဖြင့် ကချင်ပြည်နယ်၊ မြန်မာနိုင်ငံအရှေ့တောင်ပိုင်းနဲ့ အနောက်မြောက်ပိုင်းတို့မှာ တိုက်ပွဲတွေ ပြင်းထန်စွာ ဆက်လက်ဖြစ်ပွားနေပြီး အသက်ဘေးအန္တရာယ်တွေ ခြိမ်းခြောက်မှုတွေနဲ့အတူ လူသားချင်း စာနာထောက်ထားမှုဆိုင်ရာ အကူအညီပေးရေးလုပ်ငန်းတွေကို နှောင့်နှေးစေတယ်လို့ UNOCHA Myanmar က ပြောပါတယ်။
ပြီးခဲ့တဲ့ ၂၀၂၂ ခုနှစ်အတွင်းမှာတော့ မြန်မာ့လူဦးရေ ၄ ဒသမ ၄ သန်းဆီ လူသားချင်းစာနာထောက်ထားမှုအကူအညီတွေ ပေးနိုင်ခဲ့ပေမယ့် အကန့်အသတ်တွေကြောင့် မျှော်လင့်ထားတဲ့အတိုင်း ထိရောက်တဲ့ အကူအညီတွေ လိုအပ်နေတဲ့ ကဏ္ဍတွေအသီးသီးကို ရောက်ရှိတဲ့အထိ မပေးနိုင်ခဲ့ဘဲ အခု ၂၀၂၃ ခုနှစ်အတွက်တော့ လူသားချင်းစာနာထောက်ထားမှုဆိုင်ရာ တုံ့ပြန်ရေးအစီအစဉ်အတွက် ရန်ပုံငွေ အမေရိကန်ဒေါ်လာ ၇၆၄ သန်း လိုအပ်ချက် ရှိနေတယ်လို့ ဆိုပါတယ်။
မြန်မာနိုင်ငံမှာတော့ အကြမ်းဖက်စစ်အုပ်စုက မတရားအာဏာသိမ်းယူထားခဲ့တဲ့ ကာလဟာ ၂ နှစ်ကျော်ထိ ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေး စတဲ့ ကဏ္ဍတွေအသီးသီးမှာ အဘက်ဘက်က ကျဆင်းလာနေခဲ့ပြီး လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ် နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာ ဖြစ်ပါတယ်။
ဂျပန်နိုင်ငံက မြန်မာနိုင်ငံကို လူသားချင်းစာနာထောက်ထားမှုဆိုင်ရာ အကူအညီအဖြစ် အမေရိကန်ဒေါ်လာ ၆၀ ဒသမ ၃ သန်း ထပ်မံပေးအပ်သွားမယ်လို့ ဂျပန်နိုင်ငံခြားရေးဝန်ကြီးဌာနက ထုတ်ပြန်ပါတယ်။
ပြီးခဲ့တဲ့နှစ်တွေကတည်းက ဆိုးရွားလာတဲ့ အခြေအနေတွေကြောင့် လူသားချင်းစာနာမှုဆိုင်ရာ အကူအညီတွေ လိုအပ်မှု လျှင်မြန်စွာ တိုးလာမှုကို တုံ့ပြန်တဲ့အနေနဲ့ ခုလိုပေးအပ်သွားဖို့ လုပ်ဆောင်တာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
ဒီအကူအညီကို ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR)၊ ကုလသမဂ္ဂ ကလေးများရန်ပုံငွေအဖွဲ့ (UNICEF)၊ ကုလသမဂ္ဂ ကမ္ဘာ့စားနပ်ရိက္ခာအစီအစဉ် (WFP) နဲ့ သဘာဝဘေးစီမံခန့်ခွဲမှုဆိုင်ရာ လူသားချင်းစာနာထောက်ထားမှုဆိုင်ရာ အကူအညီပေးရေး အာဆီယံညှိနှိုင်းရေးစင်တာ (AHA Centre) တို့ အပါအဝင် နိုင်ငံတကာအဖွဲ့အစည်းတွေက တဆင့် ထိခိုက်ခံစားရသူတွေဆီ ထောက်ပံ့ကူညီသွားမယ်လို့ ဆိုပါတယ်။
“ဂျပန်နိုင်ငံက အစားအသောက်၊ ဆေးဝါးပစ္စည်းနဲ့ အမိုးအကာတွေအပြင် ရေနဲ့ မိလ္လာဆိုင်ရာ အခြေခံအဆောက်အအုံတွေ၊ အာဟာရမြှင့်တင်ရေး၊ ဆေးဘက်ဆိုင်ရာ ဝန်ဆောင်မှုတွေ၊ ပညာသင်ကြားခွင့်နဲ့ တရားမဝင် မူးယစ်ဆေးဝါးတိုက်ဖျက်ရေး အစီအမံတွေကိုလည်း ပံ့ပိုးပေးမှာ ဖြစ်ပါတယ်” လို့ ဂျပန်နိုင်ငံခြားရေးဝန်ကြီးဌာနက ပြောပါတယ်။
ပြီးခဲ့တဲ့ ၂၀၂၁ ခုနှစ် ဖေဖော်ဝါရီ ၁ ရက် စစ်တပ်က အာဏာသိမ်းပြီးချိန်ကတည်းက မြန်မာနိုင်ငံ နေရာအနှံ့အပြားမှာ အကြမ်းဖက်မှုတွေ ကြုံနေရဆဲဖြစ်ပြီး ရလဒ်အနေနဲ့ကတော့ မြန်မာနိုင်ငံက လူသားချင်းစာနာထောက်ထားမှုဆိုင်ရာ အခြေအနေတွေက ပိုဆိုးဝါးလာနေတယ်လို့ ဂျပန်က ဆိုပါတယ်။
ပြည်တွင်း ရွှေ့ပြောင်းနေထိုင်သူတွေ အပါအဝင် မြန်မာနိုင်ငံသား ၁၇ ဒသမ ၆ သန်းဟာ လူသားချင်း စာနာထောက်ထားမှုဆိုင်ရာ အကူအညီတွေ လိုအပ်နေတယ်လို့ ထုတ်ပြန်ချက်မှာ ဖော်ပြထားပြီး လက်ရှိအချိန်အထိ ဂျပန်နိုင်ငံအနေနဲ့ နိုင်ငံတကာအဖွဲ့အစည်းတွေ၊ အစိုးရမဟုတ်တဲ့ အဖွဲ့အစည်း NGO တွေကတဆင့် မြန်မာနိုင်ငံကို လူသားချင်းစာနာထောက်ထားမှု အကူအညီ အမေရိကန်ဒေါ်လာ ၄၇ သန်းကျော် ပေးအပ်ခဲ့ပြီး ဖြစ်တယ်လို့ ဆိုပါတယ်။
ဒီလိုအကူအညီတွေ ပေးအပ်နိုင်ဖို့ မြန်မာနိုင်ငံဘက်က လုံခြုံစိတ်ချရပြီး အဟန့်အတားကင်းတဲ့ လူသားချင်းစာနာထောက်ထားမှုဆိုင်ရာ အကူအညီတွေ ဝင်ရောက်ခွင့်ပြုဖို့ တိုက်တွန်းထားပြီး ဂျပန်နိုင်ငံအနေနဲ့ တက်ကြွစွာ ပံ့ပိုးပေးသွားမယ်လို့လည်း နိုင်ငံခြားရေးဝန်ကြီးဌာနက ပြောပါတယ်။
