အင်ဒိုနီးရှားရဲတပ်ဖွဲ့ဟာ နတ်ဆရာအဖြစ် အသက်မွေးတဲ့ အမျိုးသားတဦးရဲ့ ခြံဝင်းထဲမှာ လူသေ အလောင်းတွေကို တွေ့ရှိခဲ့ပြီးနောက်မှာ အဲဒီလူကို လူ ၁၂ ဦးထက်မနည်းကို သတ်ဖြတ်ခဲ့တယ် ဆိုတဲ့ စွပ်စွဲချက်နဲ့ အခုလအစောပိုင်းမှာ ဖမ်းဆီးခဲ့ပြီး ကြိုတင်ပြင်ဆင်ထားတဲ့ လူသတ်မှုနဲ့ တရားစွဲခဲ့ပါတယ်။ 

အသက် ၄၅ နှစ်အရွယ် ဆလာမက် တိုဟာရီဟာ သူ့ဖောက်သည်တွေကို ငွေအမြောက်အမြား ပွားများအောင် အစီအရင်တွေသုံးပြီး လုပ်ပေးမယ်လို့ ကတိပေးခဲ့တာပါ။ 

တိုဟာရီက သူတို့ရဲ့ငွေတွေကို ရူပီယာ သန်း ၇၀ ကနေ ရူပီယာ ၅ ဘီလီယံအထိ ပွားပေးမယ်လို့ ကတိပြုထားကြောင်း ရဲတပ်ဖွဲ့က ပြောပါတယ်။ 

တိုဟာရီက ၂၀၂၀ ခုနှစ်မှာ သူ့ရဲ့ဖောက်သည်တွေကို သတ်ပစ်ခဲ့ကြောင်း စွပ်စွဲခံထားရပါတယ်။

နတ်ဆရာ တိုဟာရီ အဖမ်းမခံရခင်မှာ သေဆုံးသွားသူတွေထဲက တယောက်ဖြစ်တဲ့ အသက် ၅၄ နှစ်အရွယ် ပါယန်တိုဟာ တိုဟာရီဆီမှာ သူ့ပိုက်ဆံတွေကို ပြန်တောင်းဖို့ သွားရောက်ခဲ့ ပြီးနောက်မှာ သားဖြစ်သူက သူ့အဖေ ပျောက်ဆုံးနေကြောင်း သတင်းပေးပို့ခဲ့ပါတယ်။

ရဲတပ်ဖွဲ့ ထုတ်ပြန်ချက်အရ နတ်ဆရာ တိုဟာရီ ဟာ ငွေအတုပြုလုပ်မှု ရာဇ၀တ်မှုတွေနဲ့ အကြိမ်ကြိမ် အဖမ်းခံရဖူးသူဖြစ်ပြီး ၂၀၁၉ ခုနှစ်မှာလည်း ပီကာလွန်ဂန်မှာ ငွေအတုလုပ်တဲ့ အမှုနဲ့ပဲ ထောင်ချခံခဲ့ရကြောင်း သိရပါတယ်။ 

မက္ကဆီကိုနိုင်ငံ အလယ်ပိုင်းဒေသက တံတားတစင်းပေါ်နဲ့ သစ်ပင်တပင်ပေါ် မှာ တွဲလောင်းချိတ်ထားတဲ့ လူ ၆ ယောက်ရဲ့ အလောင်းတွေကို နိုဝင်ဘာ ၂၃ ရက်က တွေ့ရပါတယ်။

ရာဇဝတ်ဂိုဏ်းတွေရဲ့ အကြမ်းဖက်မှု ထူပြောတဲ့ ဒီဒေသထဲမှာ သီတင်းပတ် တပတ်မပြည့်ခင် ဒုတိယမြောက် ဖြစ်ရပ်ပါ။ လူကူးတံတားပေါ်ကနေ တွဲလောင်းကျနေတာ အလောင်း ၃ လောင်းဖြစ်ပြီး သစ်ပင်တပင်ပေါ်မှာတော့ အလောင်း ၃ လောင်း တွဲလောင်းကျနေတယ်လို့ ဇာကာ တေကတ်စ်ပြည်နယ် ပြည်သူ့လုံခြုံရေးဝန်ကြီးက ကြေညာချက် ထုတ်ပြန်ပါတယ်။

အနားက ရပ်ကွက်ထဲက မြေပေါ်မှာ နောက်ထပ် အလောင်း ၂ လောင်းကိုလည်း တွေ့ရပါတယ်။ နိုဝင်ဘာ ၁၈ ရက်ကလည်း ဇာကာတေကတ်စ်ပြည်နယ်အတွင်း တံတားပေါ်ကနေ အလောင်း ၉ လောင်း တွဲလောင်းချိတ်ထားပြီး စုစုပေါင်း အလောင်း ၁၀ လောင်း တွေ့ခဲ့ရတာပါ။

ဂိုဏ်းတွေနဲ့ပတ်သက်တဲ့ လူသတ်မှုတွေ ဖြစ်ပုံရတယ်လို့ မီဒီယာတွေက ကောက်ချက်ချပါတယ်။ 

ဒေသတွင်း မူးယစ်မှောင်ခို စျေးကွက်ကို ထိန်းချုပ်ဖို့ ရာဇဝတ်အုပ်စု ၂ စုကြား အငြင်းပွားတဲ့ ရလဒ်အဖြစ် လူသေတဲ့ အကြမ်းဖက်မှုတွေ လတ်တလောမှာ ပေါ်ပေါက်နေတာလို့ အမည်မဖော်တဲ့ ပြည်နယ်အစိုးရအရာရှိတယောက်က ပြောပါတယ်။

ဒီနှစ်ရဲ့ ပထမဆယ်လအတွင်း ဇာကာတေကတ်စ်ပြည်နယ်ထဲမှာ အကြမ်းဖက် သတ်ဖြတ်ခံရသူ ၉၄၈ ယောက်ထက်မနည်း ရှိတယ်လို့ တရားဝင် သတင်းအချက်အလက်တွေက ပြထားပါတယ်။

ဒါဟာ မနှစ်က အလားတူ ကာလကထက် လူ ၃၄၂ ယောက် ပိုအသတ်ခံခဲ့ရတာလို့လည်း ရိုက်တာ သတင်းဌာနက ဖော်ပြထားပါတယ်။