အကြီးမားဆုံး လေကြောင်းတိုက်ခိုက်မှု

အားလုံးသိတဲ့အတိုင်း ပြီးခဲ့သည့် ဧပြီ ၁၁ ရက်နေ့က စစ်ကိုင်းတိုင်း၊ ကန့်ဘလူခရိုင်၊ ပဇီကြီးကျေးရွာတွင် ပြုလုပ်သော ဖွင့်ပွဲတခုကို အကြမ်းဖက်စစ်တပ်မှ လေကြောင်းတိုက်ခိုက်မှု ပြုလုပ်ခဲ့သည်။ ထိုတိုက်ခိုက်မှုကြောင့် အရပ်သားပြည်သူ အများအပြား သေဆုံးခဲ့​ကြသည်။ အမျိုးသားညီညွတ်ရေးအစိုးရ၏ စာရင်းများအရ ဧပြီ ၁၃ ရက်နေ့အထိ သေဆုံးသူ အရေအတွက်မှာ ၁၆၈ ဦးအထိ ရောက်ရှိလာပြီဖြစ်ကြောင်း သိရသည်။ ထိုသေဆုံးသူ အရပ်သားပြည်သူများထဲတွင် အသက် ၁၈ နှစ်အောက် ကလေးသူငယ် ၃၆ ဦး၊ ကျား၊ မ ခွဲခြားမရသော ကလေးငယ် ၄ ဦးနှင့်အတူ ကိုယ်ဝန်ဆောင်မိခင်များလည်း သေကျေပျက်စီးကြရ၏။ စစ်ရေးပစ်မှတ်မဟုတ်ပါဘဲ အရပ်သားပြည်သူများအပေါ် တမင်ရည်ရွယ်ကာ တိုက်ခိုက်ခဲ့ခြင်းဖြစ်သည်။ လူသေစေဖို့ရည်ရွယ်သည့် ပေါက်ကွဲအားပြင်းထန်သည့် ဗုံးများကြဲချကာ တိုက်ခိုက်ခဲ့သည်။ ပြီးတော့ ရဟတ်ယာဥ်များနှင့်လည်း တရစပ်ပစ်ခတ်ကာ သေပြီးသားရုပ်အလောင်းများကို သက်သေအထောက်အထားဖျောက်ဖို့ အကြမ်းဖက်စစ်တပ်က ကြိုးပမ်းခဲ့သေးသည်။ ကန့်ဘလူ ပဇီကြီးကျေးရွာ လေကြောင်းတိုက်ခိုက်မှုကြောင့် သေဆုံးရသည့် ပြည်သူအရေအတွက်မှာ ပြီးခဲ့သည့်နှစ် အောက်တိုဘာလက အနန့်ပါ တိုက်ခိုက်မှုတွင် သေဆုံးခဲ့ရသူများထက်ပင် များပြားခဲ့ပါသည်။ အာဏာသိမ်းပြီးနောက် အကြမ်းဖက်စစ်ကောင်စီ၏ လေကြောင်းတိုက်ခိုက်မှုများအနက် ပြည်သူအကျအဆုံး အများဆုံးသော လေကြောင်းတိုက်ခိုက်မှုတခုအဖြစ်လည်း မှတ်တမ်းဝင်သွားခဲ့ပြီဖြစ်သည်။ တချို့သော တိုင်းရင်းသားတို့ ခေါ်ဝေါ်ကြသော “ဗမာစစ်တပ်” ဆိုသည်မှ ဗမာလူမျိုးများအပေါ် ကမ်းကုန်အောင် ရက်စက်ယုတ်မာသည့် ဖြစ်ရပ်များစွာထဲက တခုအပါအဝင် ဖြစ်ခဲ့ပေသည်။

တုံ့ပြန်မှုများ

စစ်ရေးပြအခမ်းအနားလည်း မဟုတ်ပါ။ အကျွေးအမွေးများဖြင့် ဧည့်ခံကာ မြောက်မြားစွာသော ပြည်သူများ သွားလာ စားသောက်နေကြခြင်း ဖြစ်သည်။ ဤသည်ကို​ ဝေဟင်မှ အရှင်းသား တွေ့နိုင်ပါသည်။ သို့ပါလျက် အကြမ်းဖက်စစ်တပ်သည် အကြမ်းဖက်အုပ်စုပီပီ အရပ်သားလား၊ စစ်ရေးပစ်မှတ်လား မခွဲခြားတော့ဘဲ လူမဆန်စွာ သတ်ဖြတ်ခဲ့သည်။ နိုင်ငံတကာဥပဒေအရ ကြည့်လျှင်လည်း ဒါသည် စစ်ရာဇဝတ်မှု။ ဒါသည် အစုအပြုံလိုက် သတ်ဖြတ်မှု။ ဒါသည် လူသားမျိုးနွယ်အပေါ် ကျူးလွန်သည့် ရာဇဝတ်မှုပဲ ဖြစ်သည်။ သို့ပါသော်လည်း နိုင်ငံတကာသည် မြန်မာပြည်နည်းတူ တရားဥပဒေစိုးမိုးမှု ကင်းမဲ့​နေလေ‌ရာ ဘာမှ ထိထိရောက်ရောက် မလုပ်နိုင်ခဲ့။ ထုံးစံအတိုင်း ကုလမှာ တံခါးအဖွင့်အပိတ်လုပ်ဖို့ ကြံကြသည်။ သနားစဖွယ်ကောင်းသည်မှာ တံခါးအဖွင့်အပိတ်လုပ်ဖို့ကိုပင် သဘောတူညီမှု မရခဲ့ကြ။ တရုတ်နှင့် ရုရှားတို့က ကန့်ကွက်ကြသောကြောင့် ဖြစ်သည်။ ယင်းသို့ ကုလသမဂ္ဂဆိုသော ကမ္ဘာ့အဖွဲ့ကြီးကတဆင့် မလုပ်ဆောင်နိုင်သောအခါ နိုင်ငံတနိုင်ငံချင်းစီကတဆင့် လုပ်ဆောင်လာကြသည်။

ဘာလုပ်ကြပါသနည်း။ ကြေညာချက်ထုတ်ပြန်ကြခြင်း ​​ဖြစ်ပါသည်။ ဒီမိုကရေစီ ဘိုးအေနိုင်ငံကြီး အမေရိကန်ကလည်း ကြေညာချက်ထုတ်သည်။ မလေးရှားကလည်း ဆန့်ကျင်ကန့်ကွက်သည်။ ဆွစ်ဇာလန်နိုင်ငံကလည်း ပြင်းပြင်းထန်ထန် ရှုတ်ချသည်။ ပြင်သစ်နိုင်ငံကလည်း အားကျမခံ ရှုတ်ချသည်။ အားမကိုးရဘူးဆိုကြသော အာဆီယံ အဖွဲ့ကြီးကလည်း အပြေးအလွှား ရှုတ်ချပါသည်။ အပြစ်မဲ့ အရပ်သား ၁၀၀ ကျော် ၂၀၀ နီးပါးကို လေကြောင်းကနေ အကြမ်းဖက်တိုက်ခိုက်မှုအတွက် ကမ္ဘာကြီးက ဒီအတိုင်း ရပ်ကြည့်မနေပါ။ ထုတ်ပြန်ချက်အသီးသီး ထုတ်ပြန်ခြင်းဖြင့် အားပေးကြပါသည်။ မြန်မာပြည်သူတွေနှင့်အတူ ရပ်တည်ကြပါသည်။ နိုင်ငံတကာ တုံ့ပြန်မှုများ အဲ့သလို။

ပြည်တွင်းက အဖွဲ့အစည်းတွေကရော မည်သို့တုံ့ပြန်ကြသနည်း။ အညာဒေသက ဗမာတွေကို ဗမာစစ်တပ်ဆိုသည်က လေကြောင်းတိုက်ခိုက်ခဲ့မှုနှင့်ပတ်သက်၍ ပြည်တွင်းရှိ အခြားသော တော်လှန်ရေးလုပ်နေသူများက မည်သို့တုံ့ပြန်ကြပါသနည်း။ ပြီးခဲ့သည့်နှစ် အောက်တိုဘာလတုန်းက အနန့်ပါ ဗုံးကြဲတိုက်ခိုက်ခံရမှုတုန်းကလို တိုင်းရင်သားလက်နက်ကိုင် အဖွဲ့အစည်း အပါအဝင် အဖွဲ့အစည်းအသီးသီးမှ နေ့ချင်းမကူးဘဲ ကြေညာချက်များ ထုတ်ပြန်ကာ စာနာကြောင်း၊ အားပေးကြောင်း၊ ရှုတ်ချကြောင်း၊ ရပ်တည်ကြောင်း၊ ဆက်လက်တိုက်ပွဲဝင်မည်ဖြစ်ကြောင်း စသဖြင့် ထုတ်ပြန်ကြပါသလော။

မည်သည့်အင်အားကြီး EAO အဖွဲ့ကမှ မထုတ်ပြန်ပါ။ B.P.L.A နှင့် ပအိုးဝ်အမျိုးသား ဖက်ဒရယ်ကောင်စီတို့မှလွဲ၍ ကျန် EAO အဖွဲ့များ၏ ထုတ်ပြန်ကြေညာချက်များကို မတွေ့ရသေးပေ။ ဤစာရေးချိန် ဧပြီ ၁၃ အထိ ကျန် တိုင်းရင်းသားလက်နက်ကိုင် အဖွဲ့များ၏ မည်သည့်ထုတ်ပြန်ချက်ကိုမှ မတွေ့ရ။ ဘာကြောင့်ပါလိမ့်။ ဗမာသည် တိုင်းရင်းသားလူမျိုးတမျိုး မဟုတ်ပါလား။ သွေးချင်းညီအစ်ကို မဟုတ်ပါလား။ ကြေညာချက်ထုတ်ပြန်တာ မထိရောက်လို့ဟု ယူဆလို့ပါလား.....။ ကာယကံရှင်များ အသိဆုံး ဖြစ်ပါလိမ့်မည်။

ဘာဆက်လုပ်ကြမလဲ

တချို့က လေကြောင်းအန္တရာယ်ကို ဒီထက်ပိုပြီး သတိပြုကြဖို့ သတိပေးကြသည်။ တချို့က လုံခြုံရေးကို ပိုပြီး ဂရုစိုက်ကြဖို့၊ မပေါ့ဆကြဖို့ အကြံပြုကြသည်။ တော်လှန်ကာလ ၂ နှစ်ကျော်လာပြီဖြစ်သည်။ ရန်သူဟာ ဘာကိုမှ အာရုံမဝေဝါးဘဲ သူလုပ်စရာရှိတာကိုသာ ဆက်လုပ်ကာ ရန်သူပီသကြောင်းကို ပြသနေပါသည်။ သူ့မှာ လူထုထောက်ခံမှု မရှိတော့ကြောင်း သိသည်။ သူ့မှာ နိုင်ငံရေးထွက်ပေါက် မရှိတော့ကြောင်း သိသည်။ ထို့အတွက်ကြောင့် သူ့မှာ တတိုင်းပြည်လုံး အခွံပဲကျန်ပလေ့စေ၊ သူတို့အာဏာရလျှင်ပြီးရော ဆိုသည့် ဆုံးဖြတ်ချက်နှင့် ကမ်းကုန်အောင် ရက်စက်ယုတ်မာနေခြင်းဖြစ်သည်။ ယင်းသို့ ရက်စက်ယုတ်မာနိုင်အောင်၊ ထင်ရာစိုင်းနိုင်အောင် တခြားသော အခြေအနေများကလည်း သူတို့ကို ကျားကန်ပေးထားလျက်ရှိသည်။ သူတို့ ဘာလုပ်လုပ် အရေးယူလို့မရအောင် အကာအကွယ်ပေးမည့် အာဏာရှင်နိုင်ငံ ရုရှားနှင့် တရုတ်ရှိ‌သည်။ တိုင်းပြည်ဘဏ္ဍာငွေကို အသုံးပြုကာ ဝယ်ယူထားသော အဆင့်မြင့် စစ်လက်နက်ပစ္စည်းတွေ ရှိသည်။ ပြီးတော့ အထက်အမိန့်အရဆိုလျှင် မစင်စားခိုင်းရင်တောင် စားဦးမည့် နောက်လိုက်နောက်ပါ ကျွန်သ‌ပေါက်တွေရှိသည်။ ဒီအင်အားစုတွေကို အသုံးချကာ တော်လှန်ရေးအင်အားစုတွေ၊ ပြည်သူတွေကို နှိပ်ကွပ်နေခြင်း ဖြစ်သည်။ ရန်သူဟာ ရန်သူပီသကြောင်း ပြသနေပြီ။

တော်လှန်ရေးအင်အားစုတွေဘက်ကရော ဘာဆက်လုပ်ကြမည်နည်း။ ရန်သူစစ်မိစ္ဆာတပ်၏ အကြမ်းဖက်လုပ်ရပ်ကို ဖော်ပြနေရုံနှင့် လမ်းဆုံး၍မရ။ ဗမာပြည်နယ်မဖွဲ့လို့၊ ကြားကာလဖွဲ့စည်းပုံ မရေးဆွဲလို့၊ ဖက်ဒရယ်ပဋိဉာဉ်ဟာ မပြည့်စုံ မလုံလောက်လို့၊ ဗမာနိုင်ငံရေးခေါင်းဆောင်တွေဟာ မယုံကြည်ထိုက်လို့၊ ငါတို့က ပြည်သူ့အစိုးရဖြစ်လို့၊ မင်းတို့ဟာ LDF တွေသာဖြစ်လို့၊ ဘယ်သူဘယ်ဝါနဲ့ ရင်းနှီးသည့်အတွက် ဘယ်သူ့ကိုတော့ဖြင့် ဘယ်လိုရှော်ပေးလိုက်ကြောင်း စသဖြင့် မပြီးမစီးနိုင် ကိစ္စများဖြင့် အာရုံဝေဝါး၊ အချိန်တွေယူကာ တော်လှန်ရေးကို ဖင့်နွှဲ့စေမည်လား။ တောင်ပေါ်၊ မြေပြန့်က ရှိသမျှ ပြည်သူတရပ်လုံး အားသွန်ခွန်စိုက် တက်တက်ကြွကြွနှင့် ရင်းနှီးပေးဆပ်မှုများစွာ ပေးဆပ်နေရသော ယနေ့အချိန်အခါတွင် တော်လှန်ရေးဦးဆောင်အဖွဲ့များ အနေဖြင့် သူတလူ၊ ငါတမင်း မညီမညွတ် လုပ်‌နေကြဦးမည်လား။ စစ်အာဏာရှင်တို့ ရှိနေသမျှ ကာလပတ်လုံး ဒီမိုကရေစီလည်း မရနိုင်၊ ဖက်ဒရယ်လည်း မဖြစ်နိုင်။ သို့ဖြစ်ရာ အနာဂတ်တွင် ဘာကိုပဲ ရည်မျှော်သည်ဖြစ်စေ စစ်အာဏာရှင်စနစ် လုံးဝမရှိတော့မှဖြစ်သည်။ စစ်အာဏာရှင်စနစ်ကို ဖြိုချဖျက်ဆီးဖို့က ပထမဦးစားပေးဖြစ်သည်ကို တော်လှန်ရေး ဦးဆောင်အဖွဲ့များအားလုံးက ကောင်းစွာ သဘောပေါက် နားလည်ထားမှဖြစ်မည်။

ဒီတကြိမ်သည် တတိုင်းပြည်လုံးရှိ ပြည်သူတွေကို ခေတ်အဆက်ဆက် ဖိနှိပ်လာခဲ့သော စစ်အာဏာရှင်စနစ်ကို အဆုံးတိုင်ချေမှုန်းနိုင်သည့် အချိန်အခါကောင်းတခု ဖြစ်သည်။ ဒီတကြိမ် မနိုင်ပါက နောင်အခါ အနိုင်ရရန် မုချမလွယ်ကူတော့။ ပြည်သူတွေဘဝ ပိုပြီး ညစ်သထက် ညစ်၊ ဆင်းရဲသထက် ဆင်းရဲ လူ‌မွေးလူတောင် မပြောင်ဖို့သာ ရှိတော့သည်။

အခွင့်ကောင်းသည် ဘယ်သောအခါမှ နှစ်ခါမလာပေ။

နွေဦးဇင်

(သူ့အတွေး သူ့အမြင် – Op-Ed)

(ဤဆောင်းပါးသည် စာရေးသူ၏ အတွေးအမြင်သာဖြစ်ပြီး ဒီဗွီဘီ၏ အာဘော်မဟုတ်ပါ။)

တိုင်းပြည်အာဏာကို လက်နက်အားကိုးနဲ့ အကြမ်းဖက်လုယူခဲ့ပြီး ပြည်သူ့သွေး အထပ်ထပ် လူးနေတဲ့ စစ်မိစ္ဆာကောင်စီက နိုင်ငံရေးပါတီမှတ်ပုံတင်ဥပဒေကို ဇန်နဝါရီ ၂၆ ရက်က ထုတ်ပြန်ခဲ့ပြီး နိုင်ငံတဝန်းစည်းရုံးမယ့်ပါတီဟာ ပါတီဝင်တသိန်းနဲ့ ပါတီရန်ပုံငွေ ကျပ်သိန်း ၁,၀၀၀ ရှိရမယ်လို့ တရားမဲ့ပြဋ္ဌာန်းခဲ့ပါတယ်။

ပြီးခဲ့တဲ့ ၂၀၂၀ ရွေးကောက်ပွဲမှာ တနေရာမှာမှ အမတ်နေရာ အရွေးမခံခဲ့ရတဲ့ ပြည်သူ့ပါတီ (PP) နဲ့ အမျိုးသားညီညွတ်သော ဒီမိုကရက်တစ်ပါတီ (NUDP) ပါတီ ပူးပေါင်းထားတဲ့ ပါတီအပါအဝင် ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ၊ ဖက်ဒရယ်ဒီမိုကရက်တစ်ပါတီ၊ မြန်မာပြည်သူ့ဒီမိုကရက်တစ်ပါတီ (MPD)၊ ပြည်ထောင်စုဒီမိုကရေစီပါတီ (Union Democracy Party)၊ ပအိုဝ်းအမျိုးသားအဖွဲ့ချုပ် (PNO)၊ ဒီမိုကရက်တစ်အင်အားစုလေဘာပါတီ၊ ဒီမိုကရေစီပါတီသစ် (ကချင်) (NDP KACHIN)၊ ပြည်သူ့အကျိုးပြုကျောင်းသားများပါတီနှင့် အမျိုးသားဒီမိုကရေစီပါတီသစ် (NEW NATIONAL DEMOCRACY PARTY)၊ သက်သက်ခိုင်ရဲ့ ပြည်သူ့ရှေ့ဆောင်ပါတီ (PPP)၊ ဦးသိန်းညွန့်ရဲ့ အမျိုးသားဒီမိုကရေစီပါတီသစ် (NEW NATIONAL DEMOCRACY PARTY)၊ ဒေါက်တာအေးမောင် ဦးဆောင်တဲ့ ရခိုင့်ဦးဆောင်ပါတီ (AFP) စတဲ့ နိုင်ငံရေးပါတီ ၁၃ ခုဟာ တရားမဝင် အာဏာလု စစ်ဓားပြတွေက ကျင်းပပေးမယ့် တရားမဝင် ရွေးကောက်ပွဲမှာ ပါဝင်နိုင်အောင် ပါတီမှတ်ပုံပြန်တင်ဖို့ ဆုံးဖြတ်ခဲ့ကြပါတယ်။

ပြည်သူ့‌သွေးအလိမ်းလိမ်း‌ ပေကျံနေတဲ့ စစ်မိစ္ဆာတွေလုပ်မယ့် တရားမဝင် ရွေးကောက်ပွဲဝင်ဖို့ မှတ်ပုံတင်သူဆိုတာ ခွေးခြင်္သေ့ယိုတဲ့မစင် ရွှေရမယ်ထင် ကျင်လိုတဲ့နိုင်ငံရေးလဒအုပ်များ ပမာပါပဲ။ လဒဆိုတာ အပုပ်အစပ်ကိုကြိုက်တတ် မသန့်ပြန့်တဲ့ အပုပ်ကောင်ကို စားတတ်တာ အားလုံးသိပြီး ဖြစ်ပါတယ်။

အခုလည်း ပြည်သူ့မဲနဲ့ ဘယ်တုန်းကမှ အမတ်နေရာ မရနိုင်သူတွေက အခုလို ပြည်သူ့ပါတီက ပြည်သူက ရွေးကောက်ထားတဲ့ ပြည်သူ့ကိုယ်စားလှယ် အမတ်တွေကို ဖမ်းဆီးသတ်ဖြတ် ထောင်ချထားပြီး တရားမဝင်ကျင်းပမယ့် ရွေးကောက်ပွဲကို အချိုအချောင်နှိုက်တာဟာ အခွင့်အရေးသမား နိုင်ငံရေးလဒများလို့ပဲ ဆိုရမှာဖြစ်ပါတယ်။ ခေတ်ပျက်မှာ လူရာဝင်ချင်၊ နေရာယူချင်တတ်တာ အရှက်သိက္ခာမရှိလို့ဘဲ မဟုတ်ပါလား။

ဗဟန်းမြို့နယ် ရွှေဂုံတိုင်မှာရှိတဲ့ ပြည်သူ့ပါတီဗဟိုဌာနချုပ်မှာ ဖေဖော်ဝါရီ ၂၈ ရက် နေ့လယ်ပိုင်းက ပြုလုပ်တဲ့ သတင်းစာရှင်းလင်းပွဲမှာ လက်ရှိဖြစ်ပေါ်နေတဲ့ နိုင်ငံရေးပြဿနာတွေကို ဖြေရှင်းနိုင်မယ်လို့ တာဝန်ခံမယ့် အဖွဲ့အစည်း၊ လူပုဂ္ဂိုလ်တွေရှိပါက ပါတီဖျက်သိမ်းမယ်လို့ ပြည်သူ့ပါတီဥက္ကဋ္ဌ ကိုကိုကြီးက အရှက်မရှိ လူပုံအလယ် ပြောခဲ့ပါသေးတယ်။

နိုင်ငံရေးနည်းလမ်းနဲ့ ဖြေရှင်းဖို့ လူထုခေါင်းဆောင် ဒေါ်အောင်ဆန်းစုကြည်နဲ့ ပြည်သူလူထုဟာ အခွင့်ထူးခံ အကြမ်းဖက် စစ်မိစ္ဆာတွေကို လုံလောက်တဲ့အချိန်နဲ့ သူတို့အမှားတွေကို ပြင်ဆင်ဖို့ အခွင့်အရေးတွေ ပေးခဲ့ပြီးဖြစ်ပါတယ်။ ဒါပေမဲ့ ခွေးမြီးကောက် ကျည်တောက်စွပ် ဆိုသလို အမြီးမဖြောင့်သွားဘဲ ပြည်သူ့ဦးခေါင်းထက် တက်ထိုင်၊ အခွင့်ထူးခံပြီး သမ္မတတက်လုပ်ချင်တဲ့ အာဏာရူးနဲ့ လက်ပါးစေတသိုက်ဟာ ခွေးဇာတ်ဆက်ခင်းပြီး တိုင်းပြည်အရေး၊ နိုင်ငံရေးပြဿနာတွေကို လက်နက်ကိုင် ဗိုလ်ကျတဲ့လမ်းစဉ်နဲ့ အကြမ်းဖက်ဖြေရှင်းခဲ့ကြတာ အားလုံးသိပြီးသားပါ။

ခွေးရူးများပမာ အာဏာဗိုင်းရပ်စ် ဦးနှောက်ကိုစားခံရတဲ့ ခွေးခြင်္သေ့ရူးနဲ့ စစ်ခွေးတွေကို ပါတီနိုင်ငံရေးနည်းနဲ့ ဖြေရှင်းမယ်လို့ မရှက်မကြောက် ကိုကိုကြီး ပြောဆိုတာဟာ နိုင်ငံရေးဆိုတာ ဘာလဲ၊ နိုင်ငံရေးရဲ့ အဓိပ္ပာယ်အစစ်အမှန်ကို လုံးလုံးနားမလည်တာ ဖြစ်ချင်ဖြစ်၊ သိလျက်နဲ့ အရေးပါချင် အာဏာမင်လို့သာ ဒီစကားကို ပြောတာဖြစ်ပါတယ်။

ဒီနေရာမှာ ကြားဖြတ်လို့ နိုင်ငံရေးအဟောသိကံ မဖြစ်စေဘို့ ဆောင်းပါးမှာ စာ‌ရေးသူက နိုင်ငံရေးဆိုတာ လူအားလုံးရဲ့ အရေးကိစ္စဖြစ်တယ်။ နိုင်ငံရေး၊ တိုင်းပြည်အရေးဟာ လူတိုင်းရဲ့ ဘဝကိစ္စဖြစ်လို့ လူတိုင်းနဲ့ သက်ဆိုင်တယ်။ ဒါပေမဲ့ အာဏာရှင်ရဲ့ စစ်ဖိနပ်အောက်က နိုင်ငံရေး ဆိုတာကတော့ လက်နက်အင်အားရှိသူတွေက ခြယ်လှယ်ဗိုလ်ကျတဲ့ အမိန့်ရအာဏာနိုင်ငံရေး ဖြစ်တာမို့ အခွင့်ထူးခံလူတစု ဟန်ရေးပြတဲ့ ပြဇာတ်တပုဒ်လို ဇာတ်တိုက်ထားတဲ့ ခေါင်းညိတ်၊ အလေးပြု လက်ခုပ်တီးတဲ့ အခမ်းအနားတက် အာဏာရှင်စနစ်ရှင်သန်ရေး စစ်ကျွန်နိုင်ငံရေးသာ ဖြစ်တယ်လို့ ရေသားခဲ့ဖူးပါတယ်။

တိုင်းပြည်ရဲ့ လွတ်လပ်ရေးဗိသုကာ ဗိုလ်ချုပ်အောင်ဆန်း မိန့်ကြားခဲ့တဲ့ အောက်ပါ နိုင်ငံရေးအဓိပ္ပာယ် ဖွင့်ဆိုချက်တွေကလည်း ရှင်းရှင်းလေးသာဖြစ်ပါတယ်။ “နိုင်ငံရေးဆိုသည်မှာ ကျွန်ုပ်တို့ နေ့စဉ်နှင့်အမျှ လူ့လောကတွင် တွေ့ကြုံနေကြရသောကိစ္စပင် ဖြစ်ပေသည်။ တနည်းအားဖြင့်ဆိုသော် နိုင်ငံရေးဆိုသည်မှာ လူ့ကိစ္စဟု ဆိုရပေမည်။ ကျွန်ုပ်တို့ စားမှု၊ သောက်မှု၊ နေမှု၊ ထိုင်မှု၊ သွားမှု၊ လာမှု အစုစုသည် နိုင်ငံရေးပင်ဖြစ်၏”

“နိုင်ငံရေးကို ဘာသာတရားဖြစ်သကဲ့သို့ ပြောဆိုကြသောသူများမှာ ယုတ်မာညစ်ထေးသော နိုင်ငံရေးသမားများပင်လျှင် ဖြစ်ပေ၏။ ထိုသူတို့၏ ရည်ရွယ်ချက်မှာ ဤကဲ့သို့ ကြီးကြီးကျယ်ကျယ် လီဆယ်၍ ပြောခြင်းအားဖြင့် ပြည်သူတို့၏စိတ်ကို ရှုပ်ထွေးစေ၍ အကြောင်းအကျိုး အကောင်းအဆိုးကို ဝေဖန်ခြင်းငှာ မစွမ်းနိုင်အောင် လုပ်ခြင်းမျှသာဖြစ်ပေ၏။ အမှန်မှာ ထိုသူတို့ ပြုလုပ်မှုသည် နိုင်ငံရေးမဟုတ်၊ မိမိတို့အကောက်ဉာဏ်ကိုသုံး၍ မိမိတို့ကြီးပွားရေး တနပ်စားနိုင်ငံရေးပင် ဖြစ်ပေ၏။”

“အလွန်မွန်မြတ်တဲ့ နိုင်ငံရေးထဲမှာ တခါတရံ လူယုတ်မာတွေ ပါကောင်းပါလာမယ်။ အဲဒါကြောင့် နိုင်ငံရေးလုပ်တာ မကောင်းဘူးလို့ ဆိုရတော့မှာလား။ ဒီ‌နေရာမယ် ဥပမာတခု ပြောပြချင်တယ်။ ဒီအဆောက်အဦကြီးဟာ (အိုးရီးရင့်ကလပ်ကို ညွှန်းတာ) လူအများစုဝေးဖို့ ဆောက်ထားတယ်။ အစောင့်အကြပ် ကင်းမဲ့ချိန်မှာ တခါတရံ ခွေးလေခွေးလွင့်တွေ တက်အိပ်နေကြတယ်။ အဲဒီလို ခွေးလေခွေးလွင့်တွေ တက်အိပ်တာကိုကြည့်ပြီး အဲဒီအဆောက်အဦဟာ ခွေးအိပ်ဖို့ ဆောက်ထားတာပါလို့ ဆိုရင် မှန်ပါ့မလား။ မမှန်ဘူး။”

“ဒါကြောင့် နိုင်ငံရေးကလည်း ဒီလိုပဲ။ အင်မတန် မွန်မြတ်ပါတယ်။ ဒီအဆောက်အဦကြီးအပေါ် ခွေးတက်အိပ်သလို လူယုတ်မာတွေလည်း အလစ်မှာ နိုင်ငံရေးလောကထဲ ဝင်လာတတ်ပါတယ်။ အဲဒီလိုဝင်လာတဲ့အခါ ကျနော်တို့ နိုင်ငံရေးသမားစစ်စစ်တွေက ဒီလူယုတ်မာတွေကို မျက်ခြည်မပြတ် ဟန့်တားဝိုင်းပယ်နိုင်တာနဲ့အမျှ နိုင်ငံရေးလောကကြီးဟာ သန့်ရှင်းစင်ကြယ် မွန်မြတ်လာပါလိမ့်မယ်” လို့ ဆိုခဲ့သလို ဗိုလ်ချုပ်က စားဖားနိုင်ငံရေးသမားတွေ ညီညွတ်တာကိုလည်း လုံးဝလက်မခံခဲ့ပါဘူး။

စစ်ဓားပြအုပ်စုက သူတို့ တရားမဝင် အာဏာလုယူထားတာကို တရားဝင်အောင် ကောက်ကျစ်ယုတ်မာစွာ စီမံထားတဲ့ ပြည်သူအလိုမတူတဲ့ အခုလာမယ့် စစ်ကျွန်ရွေးကောက်ပွဲဝင်ဖို့ ပါတီတွေ မှတ်ပုံတင်တယ်ဆိုတာ ဗိုလ်ချုပ်အောင်ဆန်း မိန့်ကြားခဲ့သလို ပြည်သူလူထုအပေါ် သစ္စာဖောက်ကြတဲ့ စားဖားနိုင်ငံရေးလဒတွေ စုံညီကခုန်ဖို့ နိုင်ငံရေးလောကဇာတ်ခုံပေါ် ဝင်ရောက်နိုင်အောင် ပြင်ဆင်လာကြတာ ဖြစ်ပါတယ်။

ဒါကြောင့် ဗိုလ်ချုပ်အောင်ဆန်း မှာကြားခဲ့သလို တိုင်းရင်းသား လုပ်သားပြည်သူတွေ အားလုံးနဲ့တကွ ကျနော်တို့ နိုင်ငံရေးသမားစစ်စစ်တွေက ဒီလူယုတ်မာတွေကို မျက်ခြည်မပြတ် ဟန့်တား ဝိုင်းပယ်ကြရမှာ ဖြစ်ပါတယ်။

ဒီဆောင်းပါးကို နိဂုံးချုပ်ရရင် ညှိနှိုင်းဆွေးနွေး အဖြေရှာဖို့ အကြိမ်ကြိမ်ငြင်းဆန်ခဲ့ပြီး ပြည်သူ့သွေး အလိမ်းလိမ်းလူးပေလို့ နိုင်ငံတော်ကို အခါခါလုပ်ကြံခဲ့ကြတာမို့ နိုင်ငံရေးစားပွဲဝိုင်းနဲ့ မထိုက်တန်တော့တဲ့ စစ်ဓားပြတပ်နဲ့ လက်ပါးစေ ပြည်သူသတ်သမားတွေဆိုတာ မတော်လောဘနဲ့ အာဏာရူးဗိုင်းရပ်စ်ပိုး ဦးနှောက်ထဲ ရောက်သွားတဲ့ ခွေးရူးများသဖွယ် အန္တရာယ်အလွန်ကြီးပါတယ်။ အဲ့ဒီ ပြည်သူ့ကျိန်စာစူးနေတဲ့ စစ်ခွေးရူးတွေကျင်းပမယ့် ရွေးကောက်ပွဲဝင်ပြီး နိုင်ငံရေးနည်းနဲ့ အဖြေရှာကြမယ့် အမည်ခံ ပြည်သူ့ပါတီ (PP) ကိုကိုကြီးနဲ့တကွ နိုင်ငံရေးပါတီ ၁၃ ဖွဲ့လည်း ခွေးရူးအကိုက်ခံရပြီး ခွေးရူးပြန်ရောဂါ မရပါစေနဲ့လို့ ဆန္ဒပြုလိုက်ရပါကြောင်း။

မင်းကောင်းချစ်

(သူ့အတွေး သူ့အမြင် – Op-Ed) (ဤဆောင်းပါးသည် စာရေးသူ၏ အတွေးအမြင်သာဖြစ်ပြီး ဒီဗွီဘီ၏ အာဘော်မဟုတ်ပါ။)

ကိုးကား - ဇန်နဝါရီလ ၂၀ ရက် ၁၉၄၆ ခုနှစ် အလယ်ပစ္စယံညီလာခံ ဗိုလ်ချုပ်အောင်ဆန်းမိန့်ခွန်း - Credit to တို့ဗမာအစည်းအရုံး