ကချင်ပြည်နယ်၊ ချီဖွေခရိုင်၊ ကချင်အထူးဒေသ ၁ ပန်ဝါမြို့၊ ဇွတ်လန်ကျေးရွာမှာ ဧပြီ ၂၅ ရက်ညက  မြေရှားသတ္တုလုပ်ကွက်တစ်ခုရဲ့အပေါ်ကျင်းလုပ်ငန်းခွင်မှာ ကျင်းပြိုကျလို့   လူငယ်  ၂ ဦး ပါသွားကာ တဦး သေဆုံးပြီး တဦးကိုတော့ ရှာဖွေနေဆဲ ဖြစ်ပါတယ်။

ဘက်ဟိုး အသုံးပြုပြီး တစ်နေကုန် တစ်ညလုံး ရှာဖွေရာမှာ အသက် ၂၄ နှစ်အရွယ်  မောင်ကျန်းယိန်းရဲ့ အလောင်းကိုပဲ ပြန်ရှာတွေ့ပြီး နမ္မတီးလမ်းခွက မောင်လမာနော်ကိုတော့ ရှာမတွေ့သေးဘူးလို့ သတ္တုလုပ်ကွက်လုပ်ငန်းခွင်ကနေ သိရပါတယ်။

မြေရှားသတ္တုလုပ်ငန်းလုပ်ကိုင်သူ တစ်ဦးက  "ကျင်းပြိုတာက ဖြစ်နေကျပါ။ နှစ်တိုင်း သတ္တုတွင်းပြိုပြီး  လူအသေအပျောက်ရှိတယ်။ မိုးတွင်းဆို ပိုဆိုးတာပေါ့။ အပေါ် ဘေးအကုန်ဖောက်ထားပြီး ရေလောင်းထားတော့ အရမ်းသတိထားရတယ်။  ကျင်းထောင်းတဲ့လူက ပြီးရင်ပြန်သွားတော့ ကြီးကြပ်တဲ့သူနဲ့အစောင့်လောက်ပဲ ကျန်တာ။ ခုက ကျင်းခေါင်း " လို့ ပြောပါတယ်။

ဒီလို လူအသေအပျောက် ဖြစ်ခဲ့ရင်လည်း တရုတ်ငွေ ယွမ် သုံးလေးသောင်းကို ကုမ္ပဏီဘက်က ပေးလေ့ရှိပြီး အသုဘပြီးဆုံးတဲ့ထိ တရုတ်ငွေ ၁၀၀၀ ကျော်ပတ်ဝန်းကျင်  ကူညီတတ်ကြောင်း သေဆုံးသူ မိဘအသိုင်းအဝိုင်းကနေ သိရပါတယ်။

မြေရှားသတ္တုတွင်းလုပ်ငန်းမှာ အပေါ်ကျင်းထောင်းအဖွဲ့၊ ဘေးကျင်းတစ်ဖွဲ့၊ ပိုက်သယ်တစ်ဖွဲ့၊ ရေကန်ကြည့်တစ်ဖွဲ့၊ မီးဖုတ်တစ်ဖွဲ့ စသဖြင့်အဖွဲ့လေးတွေသီးသန့်ရှိပြီး တာဝန်ယူထားတဲ့အပိုင်းကို ပုတ်ပြတ် လုပ်ကြတာများတယ်လို့လည်း အပေါ်ကျင်းသမားတစ်ဦးကပြောပါတယ်။

အပေါ်ကျင်းက ပိုပင်ပန်းပြီး ဘေးကျင်းသမားတွေက စက်ကိုင်တတ်ဖို့လိုသလို တရုတ်စကားတတ်ဖို့လို့လည်း ပြောပါတယ်။

တရုတ်ပြည်က တင်သွင်းလာတဲ့ ဘေးကျင်းဖောက်စက်တွေက လုပ်ငန်းဆိုက်ပြီးရင် အသုံးမဝင်တော့ဘဲ ပစ်ထားခဲ့ရတာမို့ လုပ်ငန်းဆိုက်တွေပြီးရင် မီးစက် ရေပိုက် မိုးကာတွေကတော့ ပုံကျန်ခဲ့တာဖြစ်ပါတယ်။

စစ်အာဏာသိမ်းပြီးနောက် မြန်မာနိုင်ငံအရပ်ရပ်က လူငယ်အများစုက တရုတ်ငွေ ၆၀၀၀ ပတ်ဝန်းကျင်လောက်ထိရတဲ့ မြေရှားသတ္တုတွင်းလုပ်ငန်းတွေရှိရာ ပန်ဝါဘက်ကို ပိုအာရုံစိုက်လာရောက် အလုပ်လုပ်ကိုင်နေကြတာပါ။

တရုတ်ယွမ်ငွေနဲ့ပဲ စျေးဖြတ်တဲ့ ပန်ဝါမြို့မှာ အဆင်ပြေသူရှိသလို စားရမဲ့ သောက်မဲ့အခြေအနေတွေမှာ တန်ကြေးထက် ထက်ဝက်တောင်မရှိတဲ့ လုပ်အားခတွေနဲ့ဖြစ်ဖြစ် အလုပ်အကိုင်ရဖို့ ဦးစားပေးလုပ်ကိုင်နေကြရတာလည်းရှိပါတယ်။

တနင်္သာရီတိုင်း၊ ထားဝယ်မြို့နယ်၊ ပုလုကုန်းရွာ၊ အထပ်သားစက်ရုံဝင်းမှာ ဧပြီ ၂၅ ရက် မနက်ပိုင်းက  ရေတွင်းဟောင်းတခုကို ပြန်တူးရာက မြေသားပြိုကျပြီး အမျိုးသားတဦး သေဆုံးခဲ့တယ်လို့ ကူညီကယ်ဆယ်ရေး သွားရောက်လုပ်ဆောင်ခဲ့တဲ့ ထားဝယ်မြို့နယ် မီးသတ်ဦးစီးဌာနကနေ သိရပါတယ်။

သေဆုံးသူ အမျိုးသားဟာ အသက် ၃၃ နှစ်အရွယ်ရှိ ဦးအောင်မျိုးသူဖြစ်ပြီး သူ့ရဲ့ ရုပ်အလောင်းကိုတော့ ဇမ္ဗူသီရိ လူမှုကူညီကယ်ဆယ်ရေးအသင်းရဲ့ကားနဲ့ ထားဝယ်ဆေးရုံကို ပို့ဆောင်ပေးခဲ့ပါတယ်။

မီးသတ်တပ်ဖွဲ့ဝင်တဦးက “၉ နာရီခွဲလောက် သတင်းရပြီး ကယ်ဆယ်ရေးသွားကြတယ်။ မြေသားပြိုကျနေတော့ ရိုးရိုးပြန်ဆယ်လို့မရဘူး၊ မြေတူးစက်နဲ့ တွင်းကိုချဲ့တူးပြီးမှ ကယ်ရတယ်။ ပေ ၂၀ ကျော်ကျော်လောက်တူးပြီး နေ့လယ် ၂ နာရီထိုးခါနီးလောက်မှ အလောင်းပြန်ရတယ်” လို့ ပြောပါတယ်။

ထားဝယ်ခရိုင်အတွင်းရှိ ကျေးရွာတွေမှာ နွေရာသီရောက်တိုင်း ရေတွင်းတွေ ခန်းခြောက်လေ့ရှိတဲ့အတွက် ပြန်လည်တူးဖော်ရလေ့ရှိပြီး အခုနှစ်မှာ အပူရှိန် မြှင့်တက်မှုကြောင့် ရေတွင်းရေကန် ခန်းခြောက်မှုတွေ ပိုဖြစ်နေတယ်လို့ ရေရှားတဲ့ အခက်အခဲ ကြုံနေရတဲ့ ဒေသခံတွေက ဆိုပါတယ်။

ဧပြီ ၂၅ ရက် ညနေပိုင်းမှာတော့ ထားဝယ်မြို့ အပါအဝင် ထားဝယ်ခရိုင်အတွင်းရှိ ကျေးရွာအတော်များများမှာ မိုးစတင်ရွာသွန်းနေပြီလို့ သိရပါတယ်။

ထိုင်း-မြန်မာနယ်စပ်၊ တာ့ခ်ခရိုင်၊ ဖုပ်ဖရမြို့နယ်ထဲမှာ ဧပြီ ၂၅ ရက် မနေ့ညနေပိုင်းက မြန်မာလုပ်သား ၂ ဦး မိုးကြိုးပစ်ခံရပြီး သေဆုံးသွားတယ်လို့ ထိုင်းသတင်းတွေမှာ ဖော်ပြပါတယ်။ 

မနေ့ ညနေ ၃ နာရီခွဲလောက်က ဖုပ်ဖရမြို့နယ် ဆီရိရတ်ဆဒွန်းကျေးရွာအုပ်စု ဘန့်ဟွေ့ဖိုင်ကျေးရွာမှာ မိုးကြိုးပစ်ခံရပြီး သေဆုံးသူရှိကြောင်း အကြောင်းကြားချက်ရတဲ့အတွက် သွားရောက်စစ်ဆေးခဲ့တယ်လို့ ဆီရီရတ်ဆဒွန်းနယ်မြေရဲစခန်း တာဝန်ရှိသူက သတင်းထောက်တွေကို ပြောပါတယ်။

အခင်းဖြစ်တဲ့နေရာဟာ တောင်ပေါ်တောလမ်းဖြစ်ပြီး လဲကျနေတဲ့ အနက်ရောင်ဟွန်ဒါဝေ့ဖ် ဆိုင်ကယ်တစီးဘေးမှာ ခြံအလုပ်သမားဝတ်စုံနဲ့ ပက်လက်အနေအထား လဲကျသေဆုံးနေတဲ့ အမျိုးသား တယောက်ကို တွေ့ရတယ်လို့ ဆိုပါတယ်။ 

အဆိုပါ နေရာနဲ့ နောက်ထပ် ၃- ၄ မီတာအကွာအဝေးမှာတော့  နောက်ထပ်အမျိုးသမီး တယောက်ရဲ့ အလောင်းကို တွေ့ရှိရကြောင်း၊ သေဆုံးသူ နှစ်ယောက်လုံးရဲ့ ခန္ဓာကိုယ်မှာ မိုးကြိုးပစ်ခံထားရတဲ့ ဒဏ်ရာတွေ့ရှိတယ်လို့ ဆိုပါတယ်။ 

မျက်မြင်ရွာသားတွေ ပြောပြချက်အရ သေဆုံးသူတွေမှာ မြန်မာအလုပ်သမား မောင်နှမတော်စပ်ပြီး ဒီမတိုင်ခင်က တောထဲမှာ ဟင်းသွားရှာမယ်ဆိုပြီး ဆိုင်ကယ်နဲ့ တောင်ပေါ်တက်လာကြောင်း၊ တောင်ပေါ်တနေရာမှာ ရာသီဥတုရုတ်တရက်ပြောင်းလဲပြီး မိုးသားတွေမည်းလာကာ မိုးခြိမ်းသံတွေပါကြားရလို့ ရှေ့ဆက်မသွားတော့ဘဲ နောက်ကိုလှည့်ပြန်စဉ် မိုးကြိုးပစ်ခံရပြီး ဆိုင်ကယ်လဲကျသွားကာ နှစ်ဦးလုံးမှာလည်း လျှပ်စစ်စီးဝင်ဓာတ်လိုက်ခံရပြီး သေသွားတာလို့ ဆိုပါတယ်။

အဆိုပါနေရာဟာ ကျဉ်းမြောင်းတဲ့ တောင်ပေါ်လမ်းဖြစ်တဲ့အပြင် ရာသီဥတုလည်း ဆိုးရွားနေ တာကြောင့် ဘယ်သူကမှ ဝင်ကယ်လို့မရဘူးလို့ ရွာသားတွေက ပြောပါတယ်။

သေဆုံးသူ ၂ ဦးနဲ့ပတ်သက်လို့ AEC အာဆီယံသတင်းမှာတော့ အမျိုးသားမှာ အသက် ၂၁ နှစ်အရွယ် ကိုအားချင်နဲ့ အမျိုးသမီးမှာ အသက် ၂၀ နှစ်အရွယ် မမွှေးတို့ဖြစ်တယ်လို့ ဆိုပါတယ်။ 

ချနယ်လ် ၇ ထိုင်းတီဗွီသတင်းမှာတော့ အသက် ၃၅ နှစ်ရွယ် နဲ့ ၃၀ နှစ်ရွယ် မြန်မာအမျိုးသား ၂ ဦး လို့ ဖော်ပြပါတယ်။

သေဆုံးသူတွေကို ဓလေ့ထုံးစံအတိုင်းသင်္ဂြိုဟ်ဖို့ တာဝန်ရှိသူတွေက သက်ဆိုင်ရာဆွေမျိုးတွေကို အလောင်းလာယူဖို့ အကြောင်းကြားထားပြီး လတ်တလော ရာသီဥတုဖောက်ပြန်မှုရှိတာကြောင့် ပြည်သူတွေအနေနဲ့ သတိထားနေထိုင်ကြဖို့ သက်ဆိုင်ရာက သတိပေးထားပါတယ်။

တချိန်တည်းမှာပဲ မယ်လမတ်မြို့နယ်ထဲမှာ မိုးသက်လေပြင်းတိုက်ခတ်ခဲ့တာကြောင့် ဟွေ့နုတ်လဲ၊ မဲ့စလောဝ်း၊ ဆာမ်မိန်၊ မဲ့တိန် အစရှိတဲ့ ကျေးရွာအုပ်စုထဲမှာ နေအိမ် ၂၆ လုံးပျက်စီးခဲ့ပြီး သစ်ပင်ကြီးတွေ၊ ဓာတ်မီးတိုင်တွေ လဲပြိုခဲ့တယ်လို့ AEC အာဆီယံသတင်းမှာ ဖော်ပြပါတယ်။