အမေရိကန်သမ္မတ ဂျိုးဘိုင်ဒင်ဟာ သေနတ်ဝယ်ယူသူတွေအတွက် နောက်ခံစစ်ဆေးမှုကို အားကောင်းခိုင်မာစေမယ့် အုပ်ချုပ်ရေးအမိန့်တရပ်ကို မတ် ၁၄ ရက်က ထုတ်ပြန်ခဲ့ပြီး အိမ်ဖြူတော်ကလည်း ဒီအမိန့်ဟာ ကွန်ဂရက်လွှတ်တော်မပါဘဲ သမ္မတက ပြဋ္ဌာန်းနိုင်တဲ့ အပြည့်စုံဆုံး မူဝါဒအဖြစ် အားပေးထောက်ခံခဲ့ပါတယ်။

ဒီအမိန့်ဟာ ပြည်နယ် ၁၉ ခုနဲ့ ကိုလံဘီယာခရိုင်တို့မှာ အတည်ပြုထားတဲ့ အလံနီဥပဒေလို့ သိကြတဲ့ သေနတ်အကြမ်းဖက်မှုကာကွယ်ရေး ဥပဒေတွေကို ဖက်ဒရယ်ထောက်ခံမှု အားကောင်းစေဖို့လည်း ရည်ရွယ်ထားပါတယ်။

အလံနီဥပဒေဟာ သူတို့ကိုယ်တိုင် သို့မဟုတ် တခြားသူတွေကို အန္တရာယ်ရှိတယ်လို့ တရားဝင် မှတ်ယူထားတဲ့လူတွေကို သေနတ်ရောင်းချမှုကို ရပ်တန့်ဖို့ ရည်ရွယ်ထားတာပါ။

သမ္မတ ဘိုင်ဒင်ဟာ အရွယ်မရောက်သေးသူတွေ အပါအဝင် သေနတ်ထုတ်လုပ်သူတွေက လက်နက်တွေကို ဘယ်လိုရောင်းချနေတယ် ဆိုတာတွေကို လေ့လာဆန်းစစ်ပြီး ဖက်ဒရယ်ကုန်သွယ်မှုကော်မရှင်ကို တောင်းဆိုတဲ့ အုပ်ချုပ်ရေးအမိန့်ကို မြှင့်တင်ဆောင်ရွက်ဖို့အတွက် တရုတ်နှစ်သစ်ကူး အခမ်းအနားအတွင်း လူ ၁၁ ဦး သေဆုံးခဲ့တဲ့ မွန်တေရီပန်းခြံကို သွားရောက်ခဲ့ပါတယ်။

အဲဒီပွဲကို တက်ရောက်လာတဲ့ အသက် ၂၆ နှစ်အရွယ် ဘရန်ဒွန်ဆေးဟာ မွန်တေရီပန်းခြံ သေနတ်သမားကို လက်နက်မဲ့သွားအောင် လုပ်ဆောင်နိုင်ခဲ့သူဖြစ်ပြီး သူ့ကို ကယ်လီဖိုးနီးယားပြည်နယ် အယ်လ်ဟမ်ဘရာမြို့မှာ ရဲစွမ်းသတ္တိဆုတံဆိပ် ချီးမြှင့်ခဲ့ပါတယ်။

အမေရိကန်မှာ တနှစ်ကို သေနတ်ကြောင့် သေဆုံးမှု ၄၀,၀၀၀ ကျော် ရှိနေတာနဲ့အတူ ဘိုင်ဒင်ဟာ ၂၀၂၄ ခုနှစ် သမ္မတရွေးကောက်ပွဲမှာ ပိုပြီးတက်ကြွတဲ့ သေနတ်ထိန်းချုပ်မှုကို လက်ခံရရှိလိမ့်မယ်လို့ မဲဆန္ဒရှင်တွေကို လောင်းကြေးထပ်ထားပါတယ်။

ရီပတ်ဘလစ်ကန်တွေကလည်း ၂၀၂၄ မှာ ဒီမိုကရက်တစ် ဘိုင်ဒင်ကို စိန်ခေါ်နိုင်မယ့် သူတို့ပါတီရဲ့ ကိုယ်စားလှယ်လောင်း အမည်စာရင်းကို ကြိုးပမ်းနေတာဖြစ်ပြီး အမျိုးသားရိုင်ဖယ်အသင်း NRA လိုမျိုး သြဇာကြီးတဲ့ အဖွဲ့တွေကနေ ကျောထောက်နောက်ခံပြုထားတဲ့ ပိုပြီးကျယ်ပြန့်တဲ့ သေနတ်အခွင့်အရေးကို ထောက်ခံဖို့ ဖြစ်ပါတယ်။

ရှမ်းပြည်နယ်အရှေ့ပိုင်း၊ မိုင်းဆတ်မြို့နယ်၊ မိုင်းတွမ်းတောင်ပေါ်ကျေးရွာအုပ်စု၊ ပုံတပ်ကျေးရွာရှိ နွားမွေးမြူရေးခြံနဲ့ ပါဟိုးကျေးရွာရှိ နွားခြံပိုင်ရှင် နေအိမ်မှာ ဖေဖော်ဝါရီ ၂၀ ရက်က ကျပ်ငွေ ၂ ဒသမ ၆ ဘီလီယံ တန်ဖိုးရှိ မူးယစ်ဆေးပြား ၆၅ သိန်းနဲ့ သေနတ်၊ ကျည်ဆန်တွေ ဖမ်းဆီးရမိခဲ့တယ်လို့ မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ဆီက သိရပါတယ်။

အဲ့ဒီနေ့ ညနေ ၆ နာရီခွဲလောက်က ပုံတပ်ကျေးရွာမှာ နွားခြံအလုပ်သမား မအားချာနဲ့ မနာထီးတို့ နှစ်ယောက်ကို ၁၂ ဗို့ ပြောင်းချောသေနတ်တလက်၊ မူးယစ်ဆေးပြားအကြေ ၁၀၀ ဂရမ်နဲ့အတူ ဖမ်းမိခဲ့တာပါ။

ည ၇ နာရီမှာ ထုတ်ပြန်ချက်အရ မိုင်းတွမ်းတောင်ပေါ်ကျေးရွာအုပ်စု၊ ပါဟိုးကျေးရွာနေ နွားခြံပိုင်ရှင်ဖြစ်သူ ဦးအားချာရဲ့ နေအိမ်မှာ မူးယစ်ဆေးပြား ၆၅ သိန်း၊ ပွိုင့် ၂၂ သေနတ် ၄ လက်၊ အမ် ‌၁၆ သေနတ် ၁ လက်၊ ၁၂ ဗို့ ပြောင်းချောသေနတ် ၁ လက်၊ ကျည်အိမ် ၁၆ ခု၊ ကျည်မျိုးစုံ ၂၇ တောင့်တို့ကို ထပ်မံသိမ်းဆည်းရမိခဲ့တယ်လို့ သိရပါတယ်။

မူးယစ်ဆေးပြားနဲ့ လက်နက်တွေ တွေ့ရှိတာကြောင့် နွားခြံအလုပ်သမား မအားချာ၊ မနာထီး အပါအဝင် အိမ်ရှင်ဖြစ်သူတို့ကို မူးယစ်ဆေးဝါးနဲ့ စိတ်ကိုပြောင်းစေတတ်သော ဆေးဝါးများ ဥပဒေပုဒ်မနဲ့ မိုင်းဆတ်နယ်မြေရဲစခန်းမှာ အမှုဖွင့်ထားပါတယ်။

ဖေဖော်ဝါရီ ၁၃ ရက်ကလည်း ရှမ်းပြည်နယ်အရှေ့ပိုင်း၊ တာချီလိတ်မြို့နယ်မှာ ကျပ် ၁၅ ဒသမ ၉၂ ဘီဘီယံတန်ဖိုးရှိ မူးယစ်ဆေးပြား ၂၇ ဒသမ ၄ သန်း၊ အိုက်စ်ဆေးပြား ၅၈၀ ကီလို၊ ကဖင်း ၄ တန်တို့ကို ကား ၄ စီးနဲ့အတူ ဖမ်းဆီးရမိခဲ့ပါတယ်။