ဧရာဝတီတိုင်း၊ ဟင်္သာတမြို့နယ်၊ ဥယျာဉ်တောင်ရပ်ကွက်၊ မနော်ဟရီလမ်းရှိ လူနေအိမ်တလုံးကနေ ဖေဖော်ဝါရီ ၁၄ ရက် ည ၉ နာရီခွဲလောက်က မီးစတင်လောင်ကျွမ်းခဲ့ပြီး ည ၁၂ နာရီခန့်မှာ မီးငြှိမ်းသတ်နိုင်ခဲ့တယ်လို့ ဟင်္သာတမြို့နယ် မီးသတ်နဲ့ လူမှုကူညီရေးအသင်းတွေဆီက သိရပါတယ်။
မီးလောင်မှုကြောင့် သန့်စင် အမှုန့်ကြိတ်စက်လုပ်ငန်း၊ နှစ်ထပ်အဆောက်အဦ ၂ လုံးနဲ့ ခန့်မှန်းတန်ဖိုး ကျပ်သိန်း ၂,၀၀၀ ကျော် ဆုံးရှုံးသွားတယ်လို့ သိရပါတယ်။
အဲ့ဒီရပ်ကွက်က အမျိုးသားတဦးက အရက်မူးနေချိန် မီးရှို့ခဲ့တာကြောင့် သူ့ရဲ့နေအိမ်ပါ မီးလောင်မှုထဲ ပါသွားခဲ့ပြီး ရှို့တဲ့အချိန်က အဆိုပါအမျိုးသားရဲ့ မိသားစုဝင်တွေ အိမ်မှာရှိမနေခဲ့ဘူးလို့ သိရပါတယ်။
အဆိုပါရပ်ကွက်နေသူတဦးက “ပထမလောင်တဲ့အိမ်က အဲ့ဒီ မီးရှို့တဲ့လူရဲ့ အိမ်၊ နှစ်ထပ်အိမ်၊ နောက်အိမ်ကလည်း နှစ်ထပ်၊ နောက်ဆုံးလောင်တာက သန့်စင် အမှုန့်ကြိတ်စက်လုပ်ငန်း အိမ်ပါ။ သူတို့အမျိုးတွေက လျှပ်စစ်ဆိုင်လည်း ဖွင့်ထားတယ်။ အဲ့နေ့ကမှ သူတို့ဆိုင်အတွက် CCTV ပစ္စည်းတွေ သိန်း ၄၀၀ ဖိုးလောက် ဒီမှာလာချထားတာ။ အဲ့ဒါတွေပါ မီးထဲပါသွားတယ်။ ရှို့မီးလို့ပြောတယ်။ စလောင်တဲ့အိမ်ကလူက အရက်သောက်တာများပြီး ကြောင်နေတယ်၊ အဲ့ကနေ နှစ်အိမ်ဆက်လောင်တာ” လို့ ပြောပါတယ်။
၂ နာရီခွဲကြာ မီးငြှိမ်းသတ်ခဲ့ရတဲ့ မနော်ဟရီလမ်း မီးလောင်မှုက မီးရှို့သူ အမျိုးသားကို ဟင်္သာတမြို့မရဲစခန်းမှာ ဖမ်းဆီးစစ်ဆေးနေတယ်လို့ သိရပြီး အဆိုပါ မီးလောင်မှုကြောင့် ထိခိုက်ဒဏ်ရာရရှိသူ မရှိဘူးလို့ သိရပါတယ်။
ရန်ကုန်တိုင်း၊ ဒဂုံမြို့သစ်မြောက်ပိုင်းမြို့နယ်၊ ၁၆ ရပ်ကွက်၊ တိုးကြောင်ကလေးဘူတာမှာ ဇန်နဝါရီ ၂ ရက် ဒီမနက်က ရိုဟင်ဂျာ အမျိုးသား ၇ ဦး၊ အမျိုးသမီး ၂ ဦးနဲ့ လိုက်ပို့တဲ့ အမျိုးသားပွဲစားနှစ်ဦးတို့ကို စစ်ကောင်စီတပ်က ဖမ်းဆီးခဲ့တယ်လို့ ရပ်ကွက်နေသူတွေဆီက သိရပါတယ်။
ဒီနေ့မနက် ၈ နာရီခွဲက ရန်ကုန်-မော်လမြိုင် ၈၉ အဆန် ရထားစီးဖို့ တိုးကြောင်ကလေးဘူတာမှာ စောင့်နေတဲ့ အမျိုးသား ၂ ဦးနဲ့ ရိုဟင်ဂျာ ၉ ဦးတို့ကို စစ်ကောင်စီက ဖမ်းဆီးခဲ့တယ်လို့ ဘူတာအနီးနေသူတဦးက ဒီဗွီဘီကို ပြောပါတယ်။
“စစ်တပ်ရော ရဲရော ဖမ်းတာ၊ ဘူတာကလူတွေလည်းပါတယ်။ ဘယ်ကိုဖမ်းခေါ်သွားလဲတော့ မသိဘူး။”
တိုးကြောင်ကလေးဘူတာအနီးမှာ ဖမ်းဆီးခံရတဲ့ ပွဲစား ကိုသန်းဝင်း၊ ကိုကျော်သူရ တို့နှစ်ဦးနဲ့ ရိုဟင်ဂျာ အမျိုးသား ၇ ဦးနဲ့ အမျိုးသမီး ၂ ဦးကို ဒဂုံမြို့သစ်မြောက်ပိုင်း မြို့မရဲစခန်းမှာ အမှုဖွင့်အရေးယူဖို့ စစ်ဆေးနေတယ်လို့ မြို့ခံတွေဆီက သိရပါတယ်။
ပြီးခဲ့တဲ့နှစ်တွေက ရန်ကုန်၊ ဧရာဝတီ၊ ပဲခူး၊ မကွေးနဲ့ ရခိုင်ပြည်နယ်က မြို့နယ်တချို့မှာ ဖမ်းဆီးခံရတဲ့ ရိုဟင်ဂျာဦးရေ ၁,၀၀၀ နီးပါးရှိတယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
“သေချာတွက်ရင် အဲ့ဒီထက်တောင်မကဘူး။ စာရင်းမထွက်သေးဘူး။ ဌာနတိုင်းမှာ နှစ်ကုန်စာရင်း မတွက်ရသေးဘူး။ အာ့ကြောင့် ပြောဖို့ခက်တယ်။ ၁,၀၀၀ နီးပါး အနည်းဆုံးပဲ။”
ရန်ကုန်၊ ဧရာဝတီတိုင်း၊ ပဲခူးတိုင်းနဲ့ ရခိုင်ပြည်နယ်က မြို့နယ်တချို့မှာ ဖမ်းဆီးခံရပြီး ထောင်ဒဏ်အပြစ်ပေးခံရသူတွေရှိသလို ရိုက်နှက်သတ်ဖြတ်ခံရပြီး စွန့်ပစ်ခံရတဲ့ ရိုဟင်ဂျာတွေလည်း ရှိပါတယ်။
ဧရာဝတီတိုင်း၊ ဟင်္သာတမြို့နယ်မှာလည်း ဇန်နဝါရီ ၂ ရက် မနက် ၁၀ နာရီခွဲလောက်က ရိုဟင်ဂျာလူမျိုး ၃၉ ယောက် ဖမ်းဆီးခံခဲ့ရတယ်လို့ ရဲတပ်ဖွဲ့အသိုင်းအဝိုင်းက သိရပါတယ်။
လယ်တီကွင်းမြို့ဝင်စစ်ဆေးရေးဂိတ်မှာ ရပ်မပေးတဲ့ ကျောက်တင်ကားကို လိုက်လံဖမ်းဆီးရာ မြဝတီရပ်ကွက်အရောက်မှာ ရပ်တန့်ထားတဲ့ ကားပေါ်ကနေ ရိုဟင်ဂျာလူမျိုး အမျိုးသား ၃၆ ဦးနဲ့ အမျိုးသမီး ၃ ဦးကို ဖမ်းမိခဲ့တာလို့ ရဲတပ်ဖွဲ့နဲ့နီးစပ်သူတွေက ပြောပါတယ်။
ရဲတပ်ဖွဲ့နဲ့နီးစပ်သူတဦးက “အများစုကတော့ အမျိုးသားများတယ်။ အမျိုးသမီး ၃ ဦးထဲမှာ အသက်မပြည့်သေးတာ ၁ ဦးပါတယ်။ ခုတော့ ဟင်္သာတရဲစန်းကို ရွှေ့ဖို့လုပ်နေပြီ” လို့ ပြောပါတယ်။
ရခိုင်ပြည်နယ်ကနေ ကုန်းလမ်းကတဆင့် ဝင်ရောက်လာခဲ့တဲ့ ရိုဟင်ဂျာလူမျိုးတွေကို ဖမ်းဆီးမိပေမဲ့ လိုက်ပို့ပေးတဲ့ ကားမောင်းသူကိုတော့ ဖမ်းမမိခဲ့ဘူးလို့ ဆိုပါတယ်။
ဖမ်းဆီးခံရတဲ့ ရိုဟင်ဂျာလူမျိုး ၃၉ ဦးကို ဟင်္သာတမြို့မရဲစခန်းကို ရွှေ့ပြောင်းပြီး လဝက ဥပဒေနဲ့ အမှုဖွင့်ဖို့ စီစဉ်နေတယ်လို့ ရဲတပ်ဖွဲ့အသိုင်းဝိုင်းက သိရပါတယ်။
