စပါးတိုက်စစ်မှူး ဟာရီကိန်းဟာ အသက်ကြီးလွန်းသလို ဈေးလည်းကြီးလွန်းကြောင်း ဘိုင်ယန်ဂန္ထဝင် လိုသာမက်သီးယက်စ်က သုံးသပ်သွားပါတယ်။
လာမယ့်ရာသီမှာ ဘိုင်ယန်မြူးနစ်အသင်းက တိုက်စစ်မှူးတဦး မဖြစ်မနေ ခေါ်ယူသွားဖို့ရှိရာမှာ အသင်းဂန္ထဝင် မက်သီးယက်စ်က သုံးသပ်သွားခဲ့တာပါ။
အသက် ၃၀ ပြည့်တော့မယ့် ဟာရီကိန်းအတွက် ပေါင်သန်း ၁၀၀ ပေးရမယ်ဆိုတာ လုံးဝမတန်တဲ့ဈေးဖြစ်ပြီး နာပိုလီတိုက်စစ်မှူး အိုဆင်ဟမ်ကတော့ အဆင်ပြေနိုင်ကြောင်း မက်သီးယက်စ်က ပြောပါတယ်။
ဒါပေမဲ့ ဈေးနှုန်းအရ စွမ်းဆောင်နိုင်မယ့် တိုက်စစ်မှူးကတော့ ဝါဒါဘရီမင်တိုက်စစ်မှူး နီကလပ်ဖူးခရက်ချ်ဖြစ်ပြီး ပေါင်သန်း ၂၀ လောက်နဲ့ တရာသီမှာ ၂၅ ဂိုးလောက်တော့ သွင်းယူပေးနိုင်လိမ့်မယ်လို့ လိုသာမက်သီးယက်စ်က သုံးသပ်သွားပါတယ်။
မန်ယူအသင်းအနေနဲ့ တိုက်စစ်မှူး မာစီယယ်ကို အလိုက်ပေးပြီး စပါးတိုက်စစ်မှူးဟာရီကိန်းကို ခေါ်ယူဖို့ လုပ်ဆောင်သင့်ကြောင်း အီရန်ရိုက်က တိုက်တွန်းပါတယ်။
မန်ယူအသင်းဟာ တိုက်စစ်မှူးကောင်းမရှိတာကြောင့် အာဆင်နယ်နဲ့ပွဲမှာ အခက်အခဲရှိခဲ့ကြောင်း အာဆင်နယ်ဂန္ထဝင် အီရန်ရိုက်က ပြောပါတယ်။
ဒီလိုအခြေအနေတွေကြောင့် စပါးတိုက်စစ်မှူးဟာရီကိန်းကို ခေါ်ယူသင့်ပြီး အသင်းရှိ တိုက်စစ်မှူးမာစီယယ်နဲ့အတူ ပေါင်သန်း ၆၀ လောက်နဲ့ ကမ်းလှမ်းမယ်ဆိုရင် စပါးအသင်းဘက်က စဉ်းစားလာနိုင်ကြောင်း အီရန်ရိုက်ကဆိုပါတယ်။
“စာချုပ်တစ်နှစ်ပဲကျန်ရှိတော့တဲ့ ဟာရီကိန်းအတွက် ပေါင်သန်း ၆၀ လောက်ပေးပြီး မာစီယယ် ဒါမှာမဟုတ် တခြားတစ်ယောက်ယောက်ကို အလိုက်ပေးမယ်ဆိုရင် အလွန်ကောင်းမွန်တဲ့ ကမ်းလှမ်းမှုဖြစ်လာနိုင်တယ်။ မန်ယူနိုက်တက်အနေနဲ့ လိုအပ်နေတဲ့ တိုက်စစ်မှူးနေရာကို သေချာမကိုင်တွယ်ခဲ့ဘူးဆိုရင် ဦးနှောက်မရှိရာကျသွားလိမ့်မယ်။ အဲဒီအတွက် ဟာရီကိန်းက သူတို့ခေါ်ယူသင့်တဲ့သူပါပဲ” လို့ အီရန်ရိုက်ကပြောပါတယ်။
ဟာရီကိန်းအနေနဲ့လည်း ဖလားတစ်လုံးမှရယူနိုင်ခြင်းမရှိသေးတာကြောင့် မန်ယူအသင်းဆီကို ပြောင်းရွှေ့သင့်ကြောင်း အီရန်ရိုက် တိုက်တွန်းသွားခဲ့ပါတယ်။
