အမေရိကန်နိုင်ငံတဝန်း စာသင်ကျောင်းတွေက ကျောင်းသားတွေဟာ ဧပြီ ၅ ရက်က စာသင်ခန်းနဲ့ ကျောင်းဝင်းပြင်ပကို ထွက်ပြီး သေနတ်ကိုင်ဆောင် အကြမ်းဖက်မှုတွေအပေါ် ဆန့်ကျင်ဆန္ဒပြခဲ့ကြပါတယ်။

ဒီလို လမ်းလျှောက်ထွက် ဆန္ဒပြမှုကို “ကျောင်းသားအရေး တောင်းဆိုလှုပ်ရှားမှု” အဖွဲ့က စီစဉ်ခဲ့တာပါ။

အမေရိကန်နိုင်ငံသား အယောက် ၁၁၀ ကျော်ဟာ သေနတ်နဲ့ ပစ်သတ်ခံခဲ့ရသလို နောက်ထပ် အယောက် ၂၀၀ ကျော်ဟာလည်း ဒီလိုပစ်ခတ်မှုတွေကြောင့် ထိခိုက်ဒဏ်ရာ ရရှိခဲ့တယ်လို့ ထုတ်ပြန်ချက်ထဲမှာ ဖော်ပြထားပါတယ်။

လမ်းလျှောက်ဆန္ဒပြမှုတွေကတဆင့် ကျောင်းသားတွေဟာ စာသင်ကျောင်းတွေ ဘေးကင်းလုံခြုံစေရေးအတွက် အဓိပ္ပာယ်ပြည့်ဝတဲ့ နည်းဗျူဟာတွေကို တောင်းဆိုနေပါတယ်။

မတ်လ ၂၇ ရက်တုန်းကလည်း နက်ရှ်ဗီးလ်မြို့က ကော့ဗ်ဗနန့်ကျောင်းမှာ နောက်ဆုံးဖြစ်ပွားခဲ့တဲ့ သေနတ်နဲ့ အကြမ်းဖက်မှုအတွင်း ကျောင်းသား ၃ ဦးနဲ့ ဝန်ထမ်း ၃ ဦး သေဆုံးခဲ့ရပါတယ်။

ဒီလိုတိုက်ခိုက်ခဲ့တဲ့ အသက် ၂၈ နှစ်အရွယ် ကျောင်းသားဟောင်းကို ရဲတပ်ဖွဲ့က တုံ့ပြန် ပစ်သတ်ခဲ့ပြီး တိုက်ခိုက်ရတဲ့ အကြောင်းရင်းကိုတော့ ရှင်းရှင်းလင်းလင်း မသိရသေးပါဘူး။

ဒီနှစ်ထဲမှာ အမေရိကန်နိုင်ငံထဲက ကျောင်းတွေအတွင်း သေနတ်နဲ့ပစ်ခတ်မှု အရေအတွက်ဟာ အကြိမ် ၉၀ အထိ ရောက်လာပြီလို့ သုတေသနပြုစုသူ ဒေးဗစ် ရိဒ်မန်း တည်ထောင်ထားတဲ့ ကျောင်းအတွင်းပစ်ခတ်မှု အချက်အလက်ဆိုင်ရာ K-12 ဝက်ဘ်ဆိုက်အရ သိရပါတယ်။

ကျောင်းအတွင်း သေနတ်နဲ့ပစ်ခတ်မှုတွေဟာ ၁၉၇၀ ခုနှစ်ကစတဲ့ စာရင်းအင်းမှတ်တမ်းတွေ အရ ပြီးခဲ့တဲ့နှစ်အတွင်း ဖြစ်ရပ်ပေါင်း ၃၀၃ ခုနဲ့အတူ အများဆုံးဖြစ်လာပါတယ်။

အမေရိကန်နိုင်ငံမှာ ကျောင်းလခ ကြွေးကျန်ငွေ ဒေါ်လာ ဘီလျံချီကို ပယ်ဖျက်ပေးလိုက်တဲ့ အမေရိကန်သမ္မတ ဂျိုးဘိုင်ဒင်ရဲ့ ဩဂုတ် ၂၄ ရက် ကြေညာချက်ကို နိုင်ငံတလွှားက ကျောင်းသားတွေက ကြိုဆိုလိုက်ပါတယ်။

တနှစ်ကို ကျောင်းလခ အမေရိကန်ဒေါ်လာ ၁၂၅,၀၀၀ ထက် နည်းတဲ့ငွေကို ချေးယူသူတွေနဲ့ ဒေါ်လာ ၂ သိန်းခွဲထက်နည်းတဲ့ငွေကို ချေးယူထားတဲ့ လက်ထပ်ထားတဲ့ စုံတွဲတွေအတွက် ကျောင်းလခအကြွေး အမေရိကန်ဒေါ်လာ ၁၀,၀၀၀ ကို အစိုးရက ပယ်ဖျက်ပေးမှာပါ။

ဝင်ငွေနိမ့် ကောလိပ်ကျောင်းသားတွေအတွက် အတိုးနှုန်းနည်းတဲ့ ပြည်ထောင်စုချေးငွေဖြစ်တဲ့ ပဲလ် ဂရန့်စ် ထောက်ပံ့ကြေးကို ရယူထားတဲ့ ကျောင်းသားတွေအတွက်ကတော့ အကြွေး အမေရိကန်ဒေါ်လာ ၂၀,၀၀၀ ကို ပယ်ဖျက်ပေးမှာ ဖြစ်ပါတယ်။

ဧပြီလက နယူးယောက် ပြည်ထောင်စုအရန်ဘဏ်ရဲ့ တွက်ချက်မှုအရ ကျောင်းလခချေးငွေ ယူထားသူတိုင်းအတွက် အကြွေး အမေရိကန်ဒေါ်လာ ၁၀,၀၀၀ ကို ပယ်ဖျက်ပေးရင် အမေရိကန်အစိုးရဟာ ဒေါ်လာ ၃၂၁ ဘီလျံ ကုန်ကျမှာပါ။

ဒါဟာ အမေရိကန်ကျောင်းသား စုစုပေါင်းရဲ့ ၃၁ ရာခိုင်နှုန်းဖြစ်တဲ့ ငွေချေးသူ ၁၁ ဒသမ ၈ သန်းအတွက် အကြွေးတွေကို ဖယ်ရှင်းပေးရာ ရောက်မယ်လို့လည်း ဘဏ်က ခန့်မှန်းထားပါတယ်။

အိမ်ဖြူတော်ကတော့ ကျောင်းလခချေးထားတဲ့ ကျောင်းသား အယောက် သန်း ၂၀ လောက် ရှိမယ်လို့ ပြောပါတယ်။

ငွေချေးသူတွေရဲ့ ၉၀ ရာခိုင်နှုန်းနီးပါးဟာ တနှစ်ကို ဒေါ်လာ ၇၅,၀၀၀ အောက်သာ ရလိမ့်မယ်လို့ အိမ်ဖြူတော်က ပြောပါတယ်။

ပြည်ထောင်စုအရန်ဘဏ်ရဲ့ နောက်ဆုံးကိန်းဂဏန်းတွေအရ အမေရိကန်ငွေချေးသူတွေရဲ့ ကျောင်းသားအကြွေးငွေဟာ ဒေါ်လာ ၁ ဒသမ ၇၅ ထရီလီယံလောက်ထိ ရှိနေတာပါ။

အဲဒီထဲက အများစုဖြစ်တဲ့ ဒေါ်လာ ၁ ဒသမ ၆၂ ထရီလီယံလောက်ကို ပြည်ထောင်စုအစိုးရက ထိန်းသိမ်းထားပါတယ်။

အစိုးရရဲ့လုပ်ရပ်ဟာ နိုဝင်ဘာ အောက်လွှတ်တော် ရွေးကောက်ပွဲတွေအတွင်း ဒီမိုကရက် ပါတီဝင်တွေကို ထောက်ခံမှုတိုးအောင် လုပ်တာဖြစ်ပေမဲ့ ငွေကြေးဖောင်းပွမှုကို မီးလောင်ရာ လေပင့်သလို ဖြစ်စေနိုင်တယ်ဆိုတဲ့ ထင်မြင်ချက်တွေလည်း ထွက်ပေါ်နေပါတယ်။

ဒီလုပ်ရပ်ကို ရီပတ်ဘလစ်ကန် ပါတီဝင်တွေက ဆန့်ကျင်ခဲ့ကြပြီး ဒါဟာ မတရားဘူးလို့ ငြင်းပါတယ်။

ဒီလုပ်ရပ်ဟာ ဝင်ငွေပိုမြင့်တဲ့လူတွေကို အချိုးမညီမမျှဘဲ ကူညီပေးရာရောက်တယ်လို့လည်း ရီပတ်ဘလစ်ကန်တွေက ပြောခဲ့ပါတယ်။