မကွေးတိုင်း၊ အောင်လံမြို့နယ်မှာ စစ်ကောင်စီတပ်ကဖမ်းဆီးထားတဲ့ ရိုဟင်ဂျာ ၁၃ ယောက် ထွက်ပြေးခဲ့ရာ အမြန်လမ်းမှာ မေ ၃ ရက် မနက် ၁၀ နာရီက ပြန်လည်ဖမ်းမိခဲ့တယ်လို့ ရဲတပ်ဖွဲ့နဲ့ နီးစပ်သူတွေဆီက သိရပါတယ်။

အောင်လံမြို့နယ်မှာ မေ ၂ ရက်၊ ည ၁၀ နာရီက ထောက်ကြံ့တိုင်းကျေးရွာ ရွာပေါက်နဲ့ ကျောက်ကြားရှိ လမ်းမပေါ်မှာ ရပ်ထားတဲ့ ကားတစီးပေါ်ကနေ ရိုဟင်ဂျာ ၁၃ ယောက်ကို စစ်ကောင်စီက ဖမ်းမိခဲ့တာလို့ မြို့ခံတဦးက ဒီဗွီဘီကို ပြောပါတယ်။

“ဘွတ်ကြီးတံတား စစ်ဆေးရေးဂိတ်က ဖမ်းတာ၊ အဲ့ညမှာပဲ ၁၃ ယောက် ထွက်ပြေးတာ၊ ၄ ယောက်မိတယ်၊ မနက်ကျတော့ အမြန်လမ်းမှာ ၉ ယောက်ထပ်မိတယ်။”

ထွက်ပြေးသွားတဲ့ ယာဥ်မောင်းနဲ့ ရိုဟင်ဂျာ အမျိုးသား ၇ ယောက်နဲ့ အမျိုးသမီး ၂ ယောက်ကို မေ ၃ ရက် မနက် ၁၀ နာရီလောက် ရန်ကုန်-မန္တလေး လမ်းဟောင်း မိုင်တိုင်အမှတ် ၂၀၅ မှာ ပြန်လည်ဖမ်းမိခဲ့တယ်လို့ အမြန်လမ်းရဲတပ်ဖွဲ့မှ ရဲအရာရှိတဦးက ပြောပါတယ်။

“ယာဥ်မောင်းကိုတော့ မမိဘူး၊ ကျန်တာ ၁၃ ယောက်လုံးမိတယ်။ သူတို့တွေကို စစ်တွေကနေ ခေါ်လာတယ်လို့ ပြောတယ်။ အခုဖမ်းမိတဲ့သူတွေအကုန် အောင်လံရဲစခန်းကို လွှဲလိုက်ပြီ။”

လတ်တလောမှာ ဖမ်းဆီးထားတဲ့ ရိုဟင်ဂျာ အမျိုးသား ၁၀ ယောက်နဲ့ အမျိုးသမီး ၃ ယောက်ကို အောင်လံမြို့မရဲစခန်းမှာ စစ်ဆေးမှုတွေ ပြုလုပ်နေတယ်လို့ ရဲတပ်ဖွဲ့ကနေ သိရပါတယ်။

မကွေးတိုင်း၊ အောင်လံမြို့ရှိ အများပြည်သူတွေ အပန်းဖြေသွားရောက်လေ့ရှိတဲ့ ဧက ၆၀ ဝင်းထဲမှာ ပြသထားတဲ့ တိရစ္ဆာန်တွေ အစာရေစာ ပြတ်လပ်နေတာတွေ့ရတယ်လို့ အဲဒီနေရာကို သွားရောက်ခဲ့သူတွေထံက  သိရပါတယ်။

အဲဒီနေရာမှာ အောင်လံမြို့ မဟာသမယကျောင်းဆရာတော်က ဦးဆောင်ပြီး ဘုန်းကြီး ကျောင်းနဲ့ ဓမ္မရိပ်သာဖွင့်ထားတဲ့နေရာဖြစ်သလို အများပြည်သူလည်ပတ်လို့ရအောင် ပန်းခြံတွေ၊ အရုပ်တွေ၊ ထိုင်ခုံရောတွေ အပြင် လာလှူထားကြတဲ့ တိရစ္ဆာန်တွေကိုလည်း ပြသထားတာဖြစ်ပါတယ်။

မြွေတွေဆို ခြံ‌ထဲမှာ အစာရေစာပြတ်လပ်ကာ ခြောက်ကပ်ပြားနေပြီး ဒေါင်းခြံထဲမှာလည်း ထမင်းခဲတွေကလွဲလို့ ဘာမှမရှိဘဲ ရေကန်မှာလည်း ခြောက်ကပ်ပြီး ရေ မထည့်တာအတော်ကြာနေလောက်ပြီလို့  မတ်လ ၂၉ ရက် ညနေက သွားရောက်လည်ပတ်ခဲ့တဲ့ ဒေသခံ ပြောပါတယ်။

“ကျနော်တို့ ရောက်သွားတော့ သူတို့တွေရဲ့ကန်ကို ရေဖြည့်တဲ့နေရာမှာ ရေမရှိတာပါပဲ။ ခြံတစ်ခုစီရဲ့နောက်မှာ ပိုက်နဲ့ကျောက်ကန်လေးတွေရှိပေမဲ့၊ ဘယ်ပိုက်မှရေမလာဘူးဖြစ်နေတာ။ ခပ်သုံးရတဲ့ရေကန်တွေတောင် ကုန်သွားလို့ ဘယ်က ရေယူရမှန်းမသိဖြစ်ခဲ့တယ်။ အစားအသောက်ကတော့ ဆရာတော်ကလည်း ကျွေးနေတယ်ပြောတယ်၊ မြွေတွေကိုကျတော့ ကြက်ဥတွေချည်း ကျွေးနေတာလို့ပြောပါတယ်။ အသားလည်းမစားဘူးလို့ ပြောပုံအရဆို မြွေတွေမှာစားချင်စိတ်မရှိတာမျိုးဖြစ်နိုင်ပါတယ်။”

အဲ့ထဲမှာ ဘုန်းကြီးက ဓမ္မာရုံတွေ၊ တရားစခန်းတွေ၊ တဦးချင်းထိုင်တဲ့ တရားဆောင်တွေအပြင် လာလှူတဲ့ တိရစ္ဆာန်တွေကိုလည်း အခန်းလေးတွေနဲ့ ထားရှိတာ ၃ နှစ်လောက်တော့ရှိနေပြီဖြစ်ပါတယ်။

ရွာထောင်မြို့ ပရဟိတအသင်းတာဝန်ရှိသူတစ်ဦးက “ဆရာတော်က မြို့ထဲမှာလည်း စာသင်တိုက်ရှိတော့ ဟိုဖက် သွားလိုက် ဒီဘက်သွားလိုက်နဲ့ တချို့နေရာလေးတွေမှာတော့ လိုအပ်ချက်ရှိတာ ဖြစ်နိုင်တယ်”လို့  ပြောပါတယ်။

အဆိုပါနေရာဟာ အောင်လံမြို့၊ ရွာထောင်ဘက်ကနေ ၂ မိုင်လောက်အကွာမှာရှိတာဖြစ်ပြီး မြေ ဧက ၆၀ ကို ဒေသခံ ယာသမားမိသားတစုက လှူဒါန်းထားခဲ့တဲ့ နေရာဖြစ်ပါတယ်။