မော်တော်ယာဥ်ဖောင်းကြွနံပါတ်ပြားတွေကို မတ် ၃ ၁ ရက် နောက်ဆုံးထား ပြောင်းလဲတပ်ဆင်စေခဲ့ရာ ယာဥ်တချို့ကျန်နေသေးတာကြောင့်ဆိုပြီး ဧပြီလကို ပညာပေးကာလ သတ်မှတ်ကာ ယာဥ်အားလုံး အပြီးတပ်ဆင်ရမယ်လို့ စစ်ကောင်စီလက်အောက်ခံ ကုန်းလမ်းပို့ဆောင်ရေးညွန်ကြားမှု ဦးစီးဌာနက ထုတ်ပြန်ပါတယ်။

ပညာပေးကာလဖြစ်တဲ့ ဧပြီလကျော်လို့မှ နံပါတ်ပြားအသစ် ပြောင်းလဲမတပ်ဆင်ရသေးဘူးဆိုရင် လိုအပ်တဲ့ စစ်ဆေးအရေးယူမှုတွေ ပြုလုပ်သွားမယ်လို့ ဖော်ပြထားပါတယ်။

မူလက ဌာနဆိုင်ရာယာဥ်တွေ၊ မြို့တွင်းခရီးသည်တင်ယာဥ်တွေ၊ တက္ကစီနဲ့ ကုန်တင်ယာဥ်တွေအနေနဲ့ မတ် ၃၁ ရက် နောက်ဆုံးထားပြီး ယာဥ်နံပါတ်ပြားအသစ် လဲလှယ်တပ်ဆင်ဖို့ ညွှန်ကြားခဲ့ပြီး ပုဂ္ဂလိကယာဥ်တွေကိုတော့ နောက်ဆုံးထား တပ်ဆင်ရမယ့်ကာလ သတ်မှတ်ဖော်ပြထားခြင်း မရှိခဲ့ပါဘူး။

ပုဂ္ဂလိက ယာဥ်တွေအနေနဲ့ ယာဥ်မှတ်ပုံတင်သက်တမ်း တိုးချိန်ဖြစ်စေ၊ သက်တမ်းမကုန်ခင်ဖြစ်စေ အမြန်ဆုံးလဲလှယ်ဖို့သာ ဖော်ပြထားခဲ့ပြီး အခုထုတ်ပြန်ချက်အရ အဲဒီယာဥ်တွေပါ ဧပြီလအတွင်း နံပါတ်ပြားအသစ် လဲလှယ်ရတော့မယ်လို့ ကညန လိုင်စင်ဝန်ဆောင်မှု လုပ်ငန်းလုပ်နေသူတချို့က ပြောပါတယ်။

ကညန လိုင်စင်ဝန်ဆောင်မူလုပ်နေသူတဦးက "မူလကြေညာချက်အရ ကားသက်တမ်းတိုးချိန်ကြမှ နံပါတ်ပြား ပြောင်းလဲရတယ်ဆိုတော့ တချို့ကားပိုင်ရှင်တွေက မလုပ်ကြသေးတာ၊ အခုကြေညာချက်အသစ်အရဆို အကုန်အပြီးပြောင်းကြရတော့မယ်။ သင်္ကြန်ပိတ်ရက်တွေလည်းရှိတော့ နံပါတ်ပြားလည်းသူတွေ ပိုများလာနိုင်တယ်" လို့ ပြောပါတယ်။

အခုပြောင်းလဲမယ့် ယာဥ်ဖောင်းကြွနံပါတ်ပြားမှာ ယာဥ်မှတ်ပုံတင်ထားတဲ့ မြို့နယ်သင်္ကေတနံပါတ်၊ ယာဥ်အမျိုးအစားတို့ကို အသစ်ထည့်သွင်းဖော်ပြထားတာဖြစ်ပါတယ်။

အဲဒီနံပါတ်ပြားအသစ်ကို စစ်အာဏာသိမ်းပြီးနောက်မှာ ပြောင်းလဲတပ်ဆင်ဖို့ သတ်မှတ်ခဲ့တာဖြစ်ပြီး အစောပိုင်းကာလတွေမှာ ပြုလုပ်သူနည်းခဲ့ပေမယ့် အခုလိုနောက်ဆုံးထား ပြောင်းလဲတပ်ဆင်ရမယ့် အချိန်ကာလသတ်မှတ်လိုက်ပြီးနောက်မှာ လဲလှယ်သူ များပြားလာခဲ့တာဖြစ်ပါတယ်။

နံပါတ်ပြားအသစ်လဲရင် နံပါတ်ပြားခ ကျပ် ၉,၀၀၀ နဲ့ ဖောင်ကြေး ကျပ် ၁,၀၀၀ ကျသင့်မှာဖြစ်ပြီး ဝန်ဆောင်မူလုပ်ငန်းတွေကိုအပ်ပြီး လုပ်မယ်ဆိုရင်တော့ ဒီထက်ပိုကုန်ကျတယ်လို့ ယာဥ်ပိုင်ရှင်တွေက ဆိုပါတယ်။

စစ်အာဏာရှင် အလိုမရှိကြောင်း မြန်မာပြည်သူတွေက နည်းလမ်းမျိုးစုံနဲ့ ဆန့် ကျင်ဆန္ဒပြနေကြရာမှာ ခုတခါမှာတော့ နွေဦးတော်လှန်ရေးကာလအတွင်း ကျဆုံးခဲ့ကြ တဲ့ သူရဲကောင်းတွေအတွက် အစိမ်းရောင်ကမ်ပိန်း(Green Day Strike)မှာ ပါဝင်ကြဖို့ နှိုး ဆော်ထားပါတယ်။

ဒီကမ်ပိန်းကိုတော့ "မြန်မာပြည်လည်း ကံကြမ္မာဆိုးကနေ လွတ်မြောက်ပြီး အား မာန်သစ်နဲ့ ပြန်လည်နိုးထလာရမည်" ဆိုတဲ့ရည်ရွယ်ချက်နဲ့ ပြုလုပ်တာဖြစ်ပြီး သစ်ပင်၊ သစ်ရွက်၊ အိမ်တွင်း အလှစိုက်သစ်ပင်‌တွေနဲ့အတူ ပါဝင်နိုင်မှာ ဖြစ်ပါတယ်။ ဒါ့အပြင် ကမ် ပိန်းမှာ လူမျိုးဘာသာမရွေး ပါဝင်နိုင်ပြီး အစိမ်းရောင်ရှိတဲ့ သစ်ရွက်တင်မက အားလုံး အနေနဲ့ လွယ်လင့်တကူ ကြွေထားတဲ့ ရွက်နီ၊ ရွက်ဝါတွေနဲ့လည်း ပါ၀င်လို့ရမှာ ဖြစ်ပါ တယ်။

လာမယ့် ဧပြီ ၁၁ ရက်မှာ တပြိုင်တည်း ပြုလုပ်မယ့် ဒီကမ်ပိန်းမှာတော့ ရေစင် အောင်ဆေး၊ ခြောက်အောင် ပြန်သုတ်ထားတဲ့ သစ်ရွက်ရဲ့ ကြိုက်တဲ့ မျက်နှာစာပေါ်မှာ စာတိုလေးတွေ ရေးပြီး ပါဝင်နိုင်မှာပါ။ သစ်ရွက်ကို ယူလို့မရတဲ့နေရာတွေအတွက် ကိုယ့် အိမ်တွင်းက အလှစိုက် သစ်ပင်တွေကို ဖန်တီးမှု ပြုလုပ်ပြီး ပါ၀င်နိုင်ပြီး သစ်ရွက် မရှိ ရင်တောင် ငယ်ငယ်ကခေါ်ကြတဲ့ စက္ကူသစ်ပင်(စက္ကူပန်း)တွေနဲ့ ဖန်တီးမှုပြုလုပ်ပြီး ပါ ၀င်လို့ရပါတယ်။ ဒါမှမဟုတ် သစ်ရွက်နဲ့ သစ်ပင် ပင်စည်ကနေ Hand-made(လူလုပ်)နဲ့ ပြုလုပ်ထားတဲ့ လူ့အသုံးအဆောင် ပစ္စည်းတွေနဲ့လည်း ကမ်ပိန်းမှာ ပါ၀င်လို့ရပြီး သစ် ရွက် မခူးချင်သူတွေကတော့ သစ်ပင်စိုက်တဲ့ အလေ့အကျင့်ဟောင်းနဲ့ ပါ၀င်လို့ရမှာ ဖြစ်ပါ တယ်။

 ဓာတ်ပုံရိုက်ပြီး အင်တာနက်လူမှုကွန်ရက်စာမျက်နှာတွေပေါ်မှာ ပြန်လည်မျှဝေ ရင်တော့ #GreenDayStrike #Apr11Coup နဲ့ #WhatsHappeningInMyanmar စတဲ့ Hashtags တွေ ကို အသုံးပြုပြီး တင်ကြရမှာ ဖြစ်ပါတယ်။

စစ်အာဏာသိမ်းမှုကို ပြည်သူတရပ်လုံးက လက်မခံပဲ ဝိုင်းဝန်းဆန့်ကျင်ခဲ့ကြတဲ့ စစ်အာဏာရှင်ဆန့်ကျင် နွေဦးတော်လှန်ရေး ကာလဟာ ၂ လကျော်လာခဲ့ပြီဖြစ်ကာ လတ်တလောအချိန်အထိ ကျဆုံးသူပေါင်း ၆၀၀ ကျော် ရှိနေခဲ့ပြီ ဖြစ်ပါတယ်။