နွေဦးတော်လှန်ရေး အောင်မြင်ဖို့ ငွေအင်အား အဓိကကူညီပံ့ပိုးပေးနေတဲ့ Click2donate အဖွဲ့ဟာ သူတို့ရဲ့ ယူကျုချန်နယ်မှာ ဗွီဒီယိုလာရောက်တင်ပေးဖို့ တော်လှန်ရေးအင်အားစုတွေကို ဇန်နဝါရီ ၁၉ ရက်နေ့မှာ အကြံပြု ဖိတ်ခေါ်လိုက်ပါတယ်။
တော်လှန်ရေးအဖွဲ့တွေအနေနဲ့ ယူကျုချန်နယ်တွေထောင်ပြီး အစကနေ ဗွီဒီယိုတွေ တင်နေမယ့်အစား Subscribe အများကြီးရှိပြီးသား Click2donate ချန်နယ်မှာ ဗွီဒီယိုတွေ လာတင်ဖို့နဲ့ ဗွီဒီယိုမှာတော့ ဖန်တီးထားတဲ့ အဖွဲ့နာမည်နဲ့ ဖန်တီးသူနာမည် ထည့်ပေးမှာဖြစ်ပြီး အဲဒီဗွီဒီယိုက ရသမျှ ဝင်ငွေအကုန်လုံးကို ပြန်တွက်ပြီး ပိုက်ဆံ ပြန်ပို့ပေးမှာဖြစ်တယ်လို့ သူတို့ရဲ့ လူမှုကွန်ရက်စာမျက်နှာကနေ ရေးသားဖော်ပြထားပါတယ်။
Click2Donate အဖွဲ့ရဲ့ Weclick Channel ဟာ Subscribers ပေါင်း 346 K အထိ ရရှိထားပြီး တခြား Raungni, WECLICK4MM ချန်နယ်တွေလည်း ရှိသေးတဲ့အပြင် App တွေအနေနဲ့ လက်ဆောင် (Lattsaung)၊ သပြေခက်၊ အောင်ပွဲ (Aungpwel) နဲ့ စီတူးဒီ (C2D) အက်ပလီကေးရှင်းတွေလည်း ထွက်ရှိထားပါသေးတယ်။
Click2donate ရဲ့ ၂၀၂၂ ခုနှစ် ရငွေစာရင်းတွေအရ စင်ကာပူဒေါ်လာ ၂ ဒသမ ၁၁၉ မီလီယံ၊ မြန်မာကျပ်ငွေနဲ့ သိန်းပေါင်း ၄၀,၀၀၀ ကျော်နဲ့ အမေရိကန်ဒေါ်လာ ၅၀,၀၀၀ ကျော် ရရှိခဲ့ပါတယ်။
ရရှိတဲ့ဝင်ငွေတွေကို တော်လှန်ရေးအဖွဲ့ပေါင်း ရာနဲ့ချီ ထောက်ပံ့ပေးထားပြီးဖြစ်ကာ စစ်ကောင်စီကတော့ အခုလိုမျိုး ငွေအင်အားအများအပြား ထောက်ပံ့ပေးနေတဲ့ အဖွဲ့တွေရဲ့ အက်ပလီကေးရှင်းတွေကို သုံးစွဲတာမပြုလုပ်ဖို့နဲ့ သုံးစွဲမယ်ဆိုရင် အရေးယူမယ်လို့လည်း ထုတ်ပြန်ထားပါတယ်။
ပြည်သူတွေနဲ့ ပြည်သူ့ကာကွယ်ရေးတပ်ဖွဲ့တွေကို မတရားဖိနှိပ်တိုက်ခိုက်ဖြိုခွင်းနေတဲ့ စစ်ကောင်စီတပ်တွေရဲ့ စစ်ဘက်လေယာဉ်တွေကို ပစ်ချနိုင်ရေးအတွက် Project Dragonfly အမည်နဲ့ အလှူငွေတွေ ကောက်ခံခဲ့ရာမှာ စုစုပေါင်း အမေရိကန်ဒေါ်လာ ၂ သန်းကျော် စံချိန်တင် ရရှိခဲ့တယ်လို့ ထုတ်ပြန်ပါတယ်။
Click2donate နဲ့ ပန်ဆယ်လိုတို့ ဦးဆောင်ကောက်ခံနေတဲ့ ဒီပရောဂျက်မှာတော့ စတင်တဲ့ ပထမ ၂ ရက်အတွင်းမှာတင် သိန်းထောင်ချီရရှိခဲ့တာဖြစ်ပြီး လူမဆန်စွာ လေကြောင်းကနေ တိုက်ခိုက်တာတွေ ပြုလုပ်နေတဲ့ တိုက်လေယာဥ်၊ ရဟတ်ယာဉ်တွေကို ပစ်ချနိုင်ဖို့ ၁၀ ရက်အတွင်း ကနဦးအမေရိကန်ဒေါ်လာ ၆ သိန်းခွဲစုဖို့ နိုင်ငံအသီးသီးမှာ နေထိုင်သူတွေဆီက အလှူခံခဲ့တာ ဖြစ်ပါတယ်။
“ကျနော်တို့ရဲ့ Dragonfly project ရဲ့ စုစုပေါင်းရငွေကတော့ USD 2.2Million ဖြစ်ပါတယ်ခင်ဗျာ။ အနည်းငယ်တိတိကျကျပြောရရင် USD 2,259,126 ဒေါ်လာဖြစ်ပါတယ်ခင်ဗျာ။ 2.2million ကို ဒေါ်လာခြောက်သောင်း(သိန်းတစ်ထောင့်နှစ်ရာ)လောက်တောင် ပိုပါသေးတယ်ခင်ဗျာ။ အစွန်းထွက်တွေနဲ့ လုံးဝအတိအကျကတော့ ငွေလွှဲတဲ့ကိစ္စတွေပြီးမှပဲ ထပ်မံထုတ်ပြန်ပါ့မယ်ခင်ဗျာ။” လို့ Click2donate က ပြောပါတယ်။
လေယာဥ်ပစ် လက်နက်ဝယ်ယူဖို့ မျှော်မှန်းထားတဲ့ အစီအစဉ်မှာတော့ အမေရိကန်၊ ကနေဒါ၊ ယူအေအီး၊ ဩစတေးလျ၊ ဂျပန်၊ စင်ကာပူ၊ မလေးရှားနဲ့ ထိုင်းစတဲ့ နိုင်ငံတွေမှာ နေထိုင်ကြသူတွေဆီက အလှူငွေ တွေ ကောက်ခံခဲ့တာဖြစ်ပြီး ရက်ပိုင်းအတွင်းမှာတင် ကနဦးမျှော်မှန်းထားတဲ့ ပမာဏထက် ကျော်လွန်ရရှိခဲ့တာ ဖြစ်ပါတယ်။
နိုင်ငံအလိုက် ကောက်ခံရရှိမှုပမာဏတွေထဲမှာတော့ စင်ကာပူနိုင်ငံက ၅၂ ဒသမ ၄ ရာခိုင်နှုန်းနဲ့ အများဆုံးဖြစ်နေပြီး သူ့နောက်မှာတော့ အမေရိကန်၊ ကိုရီးယား၊ ထိုင်း၊ ဂျပန်န်စတဲ့ နိုင်ငံတွေက အစဉ်လိုက် ရှိနေတာ ဖြစ်ပါတယ်။
ပန်ဆယ်လိုကတော့ “ဒါဟာ တစ်ဦးတစ်ယောက်တည်း၊ နှစ်ဦးနှစ်ယောက်တည်းရဲ့ အင်အားမဟုတ်ပါဘူး။ နိုင်ငံအသီးသီးက ငွေကြေးကိုယ်တွယ်စီမံပေးကြသူများ၊ ငွေကူစုပေးကြ လှုံ့ဆော်ပေးကြသူများနဲ့ စိတ်အားထက်သန်မှုအပြည့် ထည့်ဝင်ခဲ့ကြတဲ့ ပြည်သူတစ်ဦးချင်းတစ်ယောက်ချင်းစီတိုင်းရဲ့ အင်အားတွေပါပဲ။ ငုံ့မခံဘူး၊ တုံ့ပြန်ကြမယ်။ ငါတို့က လေထဲမှာ၊ ငါတို့ကို ဘယ်သူမှ ထိလို့မရဆိုတဲ့ စိတ်လွတ် လပ်မှုမျိုးကို နည်းနည်းမှ ထပ်မပေးနိုင်တော့ဘူး ဆိုတာပဲ။ ကင်မယ်။ ကင်ကိုကင်မယ်။”
