ချင်းနဲ့ မီဇိုအဆိုတော်တွေ ပြန်လည်ဆန်းသစ်သီဆိုခဲ့တဲ့ “We are the world” သီချင်းဟာ နှစ်သက်အားပေးမှုတွေ တခဲနက်ရရှိခဲ့သလို တလအတွင်း ကြည့်ရှုသူ ၂ သန်းပြည့်သွားတဲ့အထိ အောင်မြင်ခဲ့ပါတယ်။

ကြည့်ရှုသူ ၂ သန်းပြည့် အထိမ်းအမှတ် အစီအစဉ်ကို ဒီနေ့ မတ်လ ၁၇ ရက်မှာ အွန်လိုင်းကနေ တိုက်ရိုက်လိုက်ဖ်လွှင့်ပြုလုပ်ခဲ့ပြီး ပါဝင်သီဆိုခဲ့တဲ့ အဆိုတော်တွေကလည်း အမှတ်တရ စကားတွေ ပြောကြားခဲ့ပါတယ်။

“ဒီသီချင်းလေးကြောင့်ပဲ နိုင်ငံအသီးသီးမှာ ကျနော်တို့မြန်မာပြည်ရဲ့ အခြေအနေကို မသိသေးကြတဲ့သူတွေလည်း အများကြီးသိသွားတယ်ပေါ့နော်။ ဒါက ဒီသီချင်းရဲ့ အကောင်းဆုံးသော ရလဒ်တခုဖြစ်တယ်လို့ ကျနော်မြင်ပါတယ်” လို့ ဒီသီချင်းမှာ ပါဝင်သီဆိုခဲ့သူတယောက်ဖြစ်တဲ့ ဒေးဗစ်လိုင်က ပြောပါတယ်။

အဆိုတော် ဒေးဗစ်လိုင်ဟာ စစ်အာဏာသိမ်းပြီးနောက် မြန်မာနိုင်ငံကနေ အိန္ဒိယနိုင်ငံဘက်ကို တိမ်းရှောင်ခဲ့ရတဲ့ ချင်းလူမျိုး အဆိုတော်တယောက်ဖြစ်ပြီး နွေဦးတော်လှန်ရေးအတွက် တေးသီချင်းတွေကိုလည်း သီဆိုဖန်တီးခဲ့သူ ဖြစ်ပါတယ်။

ဒီသီချင်းမှာ ပါဝင်သီဆိုခဲ့သူ နောက်ထပ်အဆိုရှင်တယောက်ဖြစ်တဲ့ Jenevy Sui ကလည်း “အထူးသဖြင့် ကျမတို့နိုင်ငံမှာ ဝမ်းနည်းပူဆွေးရတဲ့ ကာလက ၂ နှစ်ကျော်ပြီပေါ့နော်။ ကျမကိုယ်တိုင်လည်း ဒီသီချင်းမှာ ပါဝင်သီဆိုခြင်းအားဖြင့် အများကြီး အားဖြစ်မိတယ်။ ဒီသီချင်းကို နားထောင်သူတွေအားလုံးလည်း ခွန်အားရမယ်။ ကျမတို့ နိုင်မယ်ဆိုတဲ့ မျှော်လင့်ချက်လည်း ပိုရှိလာမယ်။ ကျမတို့အားလုံး အတူတကွ စည်းစည်းလုံးလုံးနဲ့ ရပ်တည်နေတယ် ဆိုတာလည်း သိစေချင်တာပေါ့နော်။ ဒီလိုအရာက မျှော်လင့်ထားတာထက် ပိုအောင်မြင်တဲ့အတွက် ဂုဏ်ယူသလို အားလုံးကိုလည်း ကျေးဇူးတင်ပါတယ်” လို့ ပြောပါတယ်။

We are the world ပြန်ဆိုတေးကို မြန်မာမှာ ဘာတွေဖြစ်ပျက်နေသလဲဆိုတာ ကမ္ဘာက သိစေလိုတဲ့ ရည်ရွယ်ချက်နဲ့ ဖန်တီးခဲ့တာဖြစ်ပြီး လာမယ့်ဖန်တီးမှုအသစ်တွေကိုလည်း ဆက်လက်အားပေးကြဖို့ သီချင်းစီစဉ်သူ အဖွဲ့ဝင်တယောက်ဖြစ်တဲ့ Dadeo Cer က တိုက်တွန်းပါတယ်။

“အကုန်လုံးက တကယ့်ကို လှိုက်လှိုက်လှဲလှဲနဲ့ ဒီသီချင်းရဲ့ အနှစ်သာရ အပြည့်အဝကို တလုံးချင်းစီ ခံစားပြီး နားထောင်ကြတယ် ဆိုတာကို မြင်ရတယ်ပေါ့နော်။ မြန်မာပြည်အတွက် သီချင်းအားဖြင့် ဒီလိုလုပ်ဆောင်တာက ဘယ်လောက်တောင်မှ ကောင်းလဲပေါ့နော်။ စည်းလုံးခြင်းအတွက်ရော၊ ဒီသီချင်းဖြင့်လည်း မြန်မာ့အရေး ပိုသိရှိလာစေတယ်။ ကြည့်တဲ့ ပရိသတ်က အများကြီး အထောက်အကူပြုလို့ဆိုတာလည်း ပြောချင်တယ်။ အရမ်းကျေးဇူးတင်ပါတယ်။ နောက်ထပ် Project တွေလည်း လုပ်ဖို့ရှိတယ်။ အဲ့ဒါကိုလည်း အားပေးကြပါဦး။”

ကမ္ဘာကျော်အဆိုတော်တွေဖြစ်တဲ့ မိုင်ကယ်ဂျက်ဆင်နဲ့ လိုင်ရွန်နယ်ရစ်ချီတို့ အာဖရိကအငတ်ဘေး ကယ်ဆယ်ရေးရန်ပုံငွေရရှိဖို့ ရေးစပ်သီဆိုခဲ့တဲ့ ဒီသီချင်းကို ချင်းနဲ့ မီဇိုအဆိုတော်တွေက ပြန်လည်ဆန်းသစ်သီဆိုပြီး မြန်မာ့အရေး မီးမောင်းထိုး ပြသခဲ့ကြတာလည်း ဖြစ်ပါတယ်။

ဒီသီချင်းကနေ ရရှိလာတဲ့ အကျိုးအမြတ် ငွေကြေးတွေကိုလည်း မြန်မာနိုင်ငံက ဒုက္ခရောက်နေသူတွေဆီကို ပံ့ပိုးသွားမယ်လို့ သိရပါတယ်။

“ငါအော်ကာနေမယ် ရပ်… စစ်ပွဲတို့ချုပ်ငြိမ်းလိုက်… တိုးတက်နေတဲ့ တိုင်းပြည်များကို ကျည်ဆံနဲ့တည်ဆောက်မရ… ငါအော်ကာနေမယ် ရပ်… စစ်ပွဲတို့ချုပ်ငြိမ်းလိုက်… တိုးတက်နေတဲ့ တိုင်းပြည်များကို ကျည် ဆံနဲ့ တည်ဆောက်မရ… ကျည်ဆံနဲ့ တည်ဆောက်မရ”

ဒါကို ကြားလိုက်တာနဲ့ ပရိသတ်တွေက နာမည်ကြီး တေးသံရှင်တယောက်ဖြစ်တဲ့ ဖြူဖြူကျော်သိန်း သီဆိုတဲ့ “စစ်” ဆိုတဲ့ သီချင်းထဲက တေးသွားစာသားတွေမှန်း သိကြပြီး ဖြစ်မှာပါ။ ခုတခါမှာတော့ ဒီသီချင်းကို မြေပြင်တိုက်ပွဲတွေ ပြင်းထန်နေတဲ့ ကရင်နီပြည်နယ်က တော်လှန်ရေးသမီးပျို မိန်းကလေးငယ်တယောက်ရဲ့ ဒရမ်ရိုက်ချက်တွေ တီးခတ်ပုံဖော်မှုတွေနဲ့ ရှုစားနားဆင်ကြရမှာပါ။

“စစ်” သီချင်းရဲ့ ဒရမ် Cover သီဆိုမှု ဒီရုပ်သံဗွီဒီယိုဖိုင်ကို တေးသံရှင် ဖြူဖြူကျော်သိန်းက ဖေ့စ်ဘွတ်ခ်အင်တာနက်လူမှုကွန်ရက်စာမျက်နှာပေါ်ကတဆင့် ပြန်လည်မျှဝေထားခဲ့ပြီး ခုလိုရေးသား ဖော်ပြထားခဲ့တာ တွေ့ရပါတယ်။

“တလောက online တက်ရင်း ဒီသီချင်းလေးကို မိန်းမငယ်လေးတစ်ယောက်က drum cover လေးတီးထားတာ သွားတွေ့တယ်။ အပီအပြင် mood အပြည့်နဲ့။ တီးထားတာလေးလည်း ကောင်းပါ့။ drum ချက်‌တွေ ရိုက်ချလိုက်တိုင်း ကျည်ဆန်တွေထွက်ကျလာသလို ရိုက်ထားတာ။ အော်… သူ့ကို ဒီ သီချင်းမတီးမဆိုဖို့ ဘယ်သူမှတားမယ့်သူ မရှိတော့ဘူးပဲ။ တားလည်း မတားနိုင်ကြ‌တော့ဘူးပေါ့။ ကံကောင်းလိုက်တာလို့… ဒါပေမယ့်...သူကလေ…မီးလောင်ပျက်စီး ပြာကျပြီး စစ်မြေပြင် ဖြစ်သွားတဲ့ မြန်မာပြည်ကြီးရဲ့ တစ်နေရာမှာ စစ်ဝတ်စစ်စားနဲ့  drum လေးချပြီး တီးနေရှာတာ... အော်…လွတ်လပ်ခြင်းဆိုတာ အတော်လည်း ဈေးကြီးတာပါလားလို့”

လတ်တလောမှာတော့ မြန်မာနိုင်ငံမှာ အကြမ်းဖက်စစ်အုပ်စုက ပြည်သူ့ဆန္ဒကို မျက်ကွယ်ပြုကာ မတရားအာဏာသိမ်းယူထားခဲ့တဲ့ ကာလဟာ ၂ နှစ်တာ ကြာမြင့်နေခဲ့ပြီဖြစ်ပြီး တိုင်းဒေသကြီးနဲ့ ပြည်နယ်တွေအနှံ့ စစ်အာဏာရှင်ဆန့်ကျင်တော်လှန်ရေး မြေပြင်တိုက်ပွဲတွေ၊ သပိတ်စစ်ကြောင်းတွေ၊ လူထုတော်လှန်ရေးလှုပ်ရှားမှုတွေနဲ့ မတည်ငြိမ်တဲ့ အခြေအနေတွေနဲ့ ရင်ဆိုင်နေကြရတာ ဖြစ်ပါတယ်။

“ယမ်းငွေ့ကြားထဲ အတုံးအရုံး လဲပြိုကျ… သွေးချောင်းစီးခဲ့ စစ်ရဲ့ ဆိုးမွေကြား… ပျောက်ဆုံးသွားခဲ့တဲ့ အိမ်ရာများ… ပျက်စီးသွားခဲ့တဲ့ ကလေးငယ်များ… အနာဂတ်ပျောက်ခဲ့တာ တို့ပြည်သူများပဲ… အမုန်းတရား အချင်းချင်း တုံ့နှင်းတဲ့ စစ်မက်များ… ငြိမ်းချမ်းခြင်းက စာချုပ်အထက် လက်မှတ်များသာ… စတေးခဲ့ရတာ ပြည်သူများ… စာချုပ်အနောက်ဖက်မှာ အသက်တွေပါ… ကျည်ဆံကြားက ဘဝဟာ အဓိပ္ပါယ်မဲ့ခြင်းသာ”

တော်လှန်ရေး မိန်းမငယ် Maw ReeRe ရဲ့ ကာဗာအနေနဲ့ ပြန်လည်ပုံဖော်ဖန်တီးမှုမှာတော့ တော်လှန်ရေးစစ်ဝတ်စုံနဲ့ မီးလောင်ပြင်ထဲက အပျက်အစီးတွေကြားမှာ အသက်ဝင်တဲ့ ဒရမ်ရိုက်ချက်တွေနဲ့အတူ လတ်တလော အခြေအနေတွေကို ထင်ဟပ်နေခဲ့တာကို တွေ့ရမှာပါ။

စစ်အာဏာသိမ်း ၂ နှစ်တာ ကာလတွေအတွင်း အကြမ်းဖက်စစ်ကောင်စီက နည်းလမ်းပေါင်းစုံနဲ့ ရက်စက်စွာ ညှန်းပန်းနှိပ်စက် သတ်ဖြတ်မှုကြောင့် သေဆုံးခဲ့တဲ့ ပြည်သူစုစုပေါင်း ၂,၈၉၄ ယောက်ရှိခဲ့ပြီး အရပ်သားတွေကို ပစ်မှတ်ထား တိုက်ခိုက်မှုတွေကြောင့် နေရပ်စွန့်ခွာ ထွက်ပြေးနေကြရတဲ့ စစ်ဘေးရှောင်ဦးရေ ၁ သန်းခွဲကျော် ရှိလာပြီလို့ အမျိုးသားညီညွတ်ရေးအစိုးရ (NUG) က ပြောပါတယ်။

ကရင်နီပြည်နယ်ဟာလည်း မြန်မာ့နွေဦးတော်လှန်ရေးမှာ ရှေ့တန်းကနေ စစ်အာဏာရှင်ကို ဆန့်ကျင်တော်လှန်ခဲ့တဲ့ ပြည်နယ်တခုဖြစ်နေပြီး အကြမ်းဖက်စစ်အုပ်စုက လေကြောင်းကရော မြေပြင်ကပါ ထိုးစစ်ဆင် ဖိနှိပ်မှုတွေ ခံနေရတဲ့ ပြည်နယ်တခု ဖြစ်ကာ အကြမ်းဖက် သတ်ဖြတ်ခံရမှုတွေ၊ ရွာလုံးကျွတ် မီးရှို့ဖျက်ဆီးခံရမှုတွေနဲ့ပါ ရင်ဆိုင်နေရတာ ဖြစ်ပါတယ်။