လှိုင်မြို့နယ်ရှိ မြို့နယ်လျှပ်စစ်ရုံး ဒီကနေ့ ညနေပိုင်းက ဗုံးခွဲတိုက်ခိုက်ခံရပြီး စစ်ကောင်စီတပ်သားအချို့ ဒဏ်ရာရရှိခဲ့ပါတယ်။
ဒီကနေ့ ညနေ သုံးနာရီကျော်က အင်းစိန်လမ်းမကြီးနဲ့ ကန်လမ်းထောင့်ရှိ မြို့နယ်လျှပ်စစ်ရုံးအဝင်မှာ တပ်စွဲထားတဲ့ စစ်ကောင်စီတပ်ရှိရာ ဘန်ကာမှာ ဗုံးပေါက်ကွဲခဲ့တာဖြစ်ပြီး ထိခိုက်ဒဏ်ရာရရှိသူအချို့ရှိတယ်လို့ မြို့ခံတဦးက ပြောပါတယ်။
"ဗုံးပေါက်တာ အသံအတော်လေးကျယ်တာ။ ဗုံးပေါက်ပြီးတော့ သေနတ်သံတွေကြားရသေးတယ်။ ရုံးနားနေတဲ့သူတွေပြောတာတော့ စစ်တပ်က ရမ်းသမ်းလျှောက်ပစ်တယ်ပြောတယ်။ စစ်သားအချို့လည်း ထိတယ်ပြောတယ်။"
ဗုံးပေါက်ကွဲပြီးနောက် အင်းစိန်လမ်းမကြီးပေါ်ရှိ မြိုနယ်လျှပ်စစ်ရုံးအနီးတဝိုက်မှာ စစ်ကောင်စီတပ်သားတွေက စစ်ဆေးခဲ့တယ်လို့ မြို့ခံတွေက ပြောပါတယ်။
အဆိုပါဗုံးခွဲတိုက်ခိုက်မှုကို Emerald Girls Army (EGA)၊ နိင်ငံရေးအကျဉ်းသားများအားလုံး ကိုယ်စားပြုတိုက်ခိုက်ရေးအဖွဲ့ Freeland Attack Force (FLA) နဲ့ Revolution of 21 Century အဖွဲတို့က ပူးပေါင်းပြီးတိုက်ခိုက်ခဲ့တာလို့ ထုတ်ပြန်ချက်အရ သိရပါတယ်။
ရန်ကုန်တိုင်းရှိ မြို့နယ်အချို့တွင် ဒီဇင်ဘာ ၁ ရက်မှ ဒီဇင်ဘာ ၁၀ ရက်နေ့အတွင်း ပစ်ခတ်မှုနဲ့ ဗုံးပေါက်ကွဲ ၁၃ ကြိမ်ဖြစ်ခဲ့ပြီး ၉ ဦး ဒဏ်ရာရရှိခဲ့ပါတယ်။
မွန်ပြည်နယ်၊ ဘီးလင်းမြို့နယ် တောင်စွန်းစံပြကျေးရွာက စစ်ကောင်စီလက်အောက်ခံ EPC ရုံးဟာ မတ် ၂၂ ရက် နေ့လယ် ၂ နာရီလောက် ဗုံးခွဲတိုက်ခိုက်ခံခဲ့ရတယ်လို့ ဒေသခံတွေက ဒီဗွီဘီကို ပြောပါတယ်။
အဲဒီတောင်စွန်း EPC ရုံးကို အာဠာဝကနဲ့ သွေးသောက်များ (ဘီးလင်း) အဖွဲ့က ဗုံးပစ်သွင်းပြီး သွားရောက်တိုက်ခိုက်ခဲ့တာ ဖြစ်ပါတယ်။
EPC ရုံး ဗုံးပစ်တိုက်ခိုက်ခံရတာကြောင့် အဆောက်အဦတချို့ ထိခိုက်ပျက်စီးခဲ့သလို ရုံးအနီးရပ်ထားတဲ့ ဆိုင်ကယ် ၃ စီး ပျက်စီးခဲ့ပြီး လူထိခိုက်ဒဏ်ရာရတာတော့ မရှိဘူးလို့ ဘီးလင်း ဒေသခံတဦးက ပြောပါတယ်။
တောင်စွန်း EPC ရုံးကို ဗုံးခွဲတိုက်ခိုက်ရတာဟာ စစ်ကောင်စီလက်အောက်ခံ ဝန်ထမ်းတွေက ပြည်သူတွေအပေါ် လျှပ်စစ်မီတာခ အတင်းအကျပ် ကောက်ခံနေတဲ့အတွက်ကြောင့် နောက်ဆုံးအကြိမ် သတိပေးတဲ့အနေနဲ့ ဖောက်ခွဲရတာလို့ အာဠာဝကနဲ့ သွေးသောက်များ (ဘီးလင်း) အဖွဲ့က ထုတ်ပြန်ထားပါတယ်။
ဒါကြောင့် ဘီးလင်းမြို့နယ်က စစ်ကောင်စီလက်အောက်ခံ EPC ဝန်ထမ်းတွေအနေနဲ့ လျှပ်စစ်မီတာခ ကောက်ခံနေမှုကို ချက်ချင်းရပ်တန့်ဖို့နဲ့ ရပ်တန့်တာမရှိရင် ပစ်ခတ် အရေးယူသွားမယ်လို့ သတိပေးထားပါတယ်။
တောင်စွန်း EPC ရုံး ဗုံးပေါက်ကွဲပြီးနောက် စစ်ကောင်စီတပ်ဖွဲ့တွေက လာရောက် စစ်ဆေးတာတွေ လုပ်ဆောင်ခဲ့သလို လမ်းတချို့ကိုလည်း ပိတ်ဆို့ပြီး ရှာဖွေစစ်ဆေးတာတွေ လုပ်ခဲ့တယ်လို့ ဒေသခံတွေက ပြောပါတယ်။
